(4) Lang Ngu Na Myitkyina Saradaw Ginwang Ramma Ni A Hkrum Zup Hpawng Galaw Na Nhtoi Masat Shagrin

Mali lang ngu na Myitkyina Saradaw Ginwang Ramma ni a hkrum zup hpawng (Youth Congress)  hpe 2020 March shata 30 ya kaw nna April 5 ya laman, 7 ya tup galaw sa mat na lam tara shang n-dau shana dat ma ai.

Dai ni, 2019 October 26 ya shani Mungbawng Htap Masum gawk nu kaw galaw ai Ginjaw Ramma ni a lahkawng lang ngu na, dawdan Komiti hpawng hta ya na zawn masat shagrin dat ai rai nga ai.

Ramma hpawng hpe Alam Mare hta galaw na matu myit mada yaw shada da ai raitim shara grai naw jahtuk ra ai majaw hte Ginwang Up Wa Saradaw a madi shadaw shagrin ya ai lam nnga shi majaw, Zuphpawng galaw na shara hpe tup hkrak masat ndau ai lam gaw n galaw lu shi ai lam Ramma Ningbaw John Paul Nhkum Htoi Awng tsun ai hte maren chye lu ai.

"Alam kaw galaw na ngu ti gaw masat da ai, raitim shara grai naw jahtuk ra ai majaw n shana shi ai" nga nna tsun lai wa ai.

Ndai zawn Saradaw Ginwang ting na Ramma ni a sharin hpawng hte hkrumzup hpawng hpe mali ning hta kalang galaw ai rai nna, lai wa sai masum lang ngu na Ramma hpawng hpe Jinghpaw Mung kata Kahtawlik Ramma shamu shamawt ai labau shang (50) ning hpring Ja Jubiliee hte hpawn Myitkyina, Eden San Luka Chyum Jawng Wang hta 2016 April 27 ya kaw nna May 2 ya shani du hkra galaw lai wa sai rai nga ai.

Thomas