Karai Kasang a Mungga - Pran Wan Ladaw Laban 28 , 2019

Chyum Laika ni – 2 Hkawhkam 5:14-17,  2Tim 2:8-13, Lk 17:11-19

Tsaw ai nu wa hpu nau ni, anhte laban shani shagu nawku jawng sa nna Missa hkungga, shing nrai laban nawku ni sa lawm ga ai. Hpa rai anhte laban shani nawku jawng sa ai rai ga ta, ngu nna lama san yang anhte hta langai hte langai nbung ai mahtai ni law law nga mai ai. Laban shani nawku jawng sa ra ai nga nna nawku matsun da ai lam nga ai majaw sa ai, shing nrai, Karai Kasang kaw nna lamma lama hpyi la mayu ai lam ni nga ai majaw sa ai, ru ai yak ai lam ni law law hkrum hkra nga ai majaw, Karai Kasang kaw nna shalan shabran ai lam ni lu la na myit mda nna sa ai, shing nrai nawku mahkawn hkawn ai lam hpe sharawng ai majaw sa ai, manau manang ni hte hkrum lu ai majaw sa ai, ngu ai mahtai ni rai na rai nga ga ai.

Raitimung, hpa majaw nawku jawng sa ai ngu ai ga san a kaja wa byin ging ai anhte a mahtai gaw, anhte hpe lam magup hku nna madun ya nga ai Madu Karai Kasang a kaba la tsawra ai lam hpe chyeju dum shakawn shagrau na matu rai nga ai, shi madu a tsawra myit hpe lam amyu myu hku nna anhte hpe madun ya ai ngu ai lam ni hta,  anhte hpe makam masham jaw ya ai, anhte a mara ni hpe ya sha ya sha raw dat hkyam sa jaw ya ai, sum sing mung dan de du wa lu na lam hta hkawm sa nga lu hkra aten shagu lakawn ya nga ai, ngu ai lam ni rai nga ai. Ndai lam ni a majaw, shi madu hpe chyeju dum shakawn shagrau ra ga ai majaw, nawku jawng sa, Missa hkungga shing nrai laban nawku ni sa lawm ai rai nga ga ai.

Ndai bat na ja chyum mungga ni hku nna nawku hpung anhte hpe shadum ya mayu ai lam ni mung, hkristian ni a prat ngu ai gaw aten shagu, langai hpra hku nna mung uhpung uhpawng hku nna mung chyeju dum chye ai prat rai ra ai, ndai zawn Karai Kasang hpe aten shagu chyeju dum ai myit hte sak hkrung nga ai hku nna, grau nna ngang kang ai hkrisatin prat lu la hkra shani shagu gaw gap nga ga ai mung rai nga ai.

Kabu gara ai shiga hta, mang gang kap ai amsha marai 10 hpe madu yesu tsi shamai ya ai lam hpe na la saga ai. Ndai masha ni gaw kaja wa nan mang gang kap ai masha ni rai ma ai. Dai shaloi na mang gang kap ai masha ni a prat gaw kaja wa nan jam jau dik matsan mayan hkrum dik ai ni rai ma ai. Shanhte hpe masha ni kadai nkam shaga ma ai, zai bru jang nam mali ni de gawt kau hkrum ai hte dai shara ni hta matsan mayan garen gari rai prat hpe nga jahtum ra ai ni rai ma ai.

Mang gang kap ai masha ni hkan sa ra ai tara ni lajang da ai hpe mung Ga shaka dingsa chyum laika hta mu lu mai nga ga ai. Ga shadawn, Jaw jau laika 13: 45-46 hta “mang gang kap ai wa gaw je ai hpun palawng bu hpun let, kara hpyan ayai kau nna, lahta nten magap kau nhtawm, nsan nseng ai, nsan nseng ai, nga nna jahtau na rai wu ai, ana dai nmai ding sa gaw, shi awu asin arai nga ai, shi gaw nsan nseng rai nga ai, shi hkrai nga nga na rai nna, shi a nga shara gaw dap shing gan e rai na rai nga ai” nga ai tara ni jahtrat da nga ai.  

Ndai zawn rai masha hpawng de nmai sa ai, masha ni hte nmai kayau ai ngu ai tara ni nga nga ai majaw, kabu gara ai shiga hta mu lu ai mang gang kap ai masha ni, tsan tsan kaw nna sha, “Madu Yesu e, anhte hpe matsan dum la e law” nga nna jahtau nga ma ai rai nga ai. Madu Yesu mung shanhte hpe mu ai hte rau, lang lata sha, nanhte a hkum hpe hkyin jawng ni kaw wa madun dan mu, ngu nna htan ya lai wa ai. Madu Yesu shanhte hpe matsun dat ai lam hpe hpa bai nhtang san ai lam ni n-galaw ai sha, Madu Yesu a ga hpe kam sham myit kaba hte hkap la nna shanhte a hkum hpe hkyin jawng ni kaw sa madun na matu rawt mat wa ma ai hte, shanhte a hkum na mang gang ana ni mai tsai mat wa ai hpe shanhte mu mada ma ai.

Ndai kabu gara ai shiga hta, anhte hpe myit yu na lam kaba byin shangun ai lam gaw, shi a hkum hkum na mang gang ana ni mai tsai wa ai hpe mu dat ai shaloi dai masha wa galaw dat ai magam lam rai nga ai. 

Dai gaw Lk 17: 15-16 hta “shanhte hta na marai langai mi gaw, tinang hkum san pra mat ai mu chye jang, bai nhtang wa nna nsen kaba hte Karai Kasang hpe shagrau shaa ai hte, Yesu a lagaw nhpang e ding yawm dagup nna, shi a chyeju hpe shakawn ya wu ai, dai wa gaw samari masha rai nga ai” nga ai chyum mung daw nan rai nga ai. Shamai shatsai hkrum ai ni yawng shi madu hpang de bai wa na hpe Madu Yesu teng sha myit mada lai wa na rai nga ai. Dai zawn rai myit mada ai ngu ai hta shanhte a chyeju dum ai lam ni hpe lu la mayu ai majaw sha chyawm gaw nrai na rai nga ai. Shanhte a mang gang ana hpe tsi shamai dat ya ai ngu ai gaw, dai masha ni shi madu hpe kam sham wa lu na matu galaw ai magam lam a shawng na lahkam sha naw rai nga malu ai majaw rai nga ai.

Dai re ai majaw bai nhtang wa ai wa hpe Madu Yesu tsun ai gaw “rawt wa nu na a kam sham ai gaw nang hpe hkye la nit dai” ngu ai ga rai nga ai. Hkye hkrang la ai hkrum lu na lam hta hkawm nga sai ngu ai lam hpe shangang shakang dat ya ai lachyum rai nga ai. Madu Yesu hpe kam hpa ai a marang e, shi a mang gang ana shamai ya ai hkrum lai wa ai. Karai Kasang hpe chyeju dum ai lam a marang e shi a shut hpyit mara ni hpe rau dat hkyam sa jaw ja ai lam hpe lu la lai wa ai hte, dai lam ni gaw Madu Yesu hpe kam sham ai ngu ai de shi du wa lu hkra shi hpe garum ya sai rai nga ai.

Tsawra ai nu wa hpu nau ni, anhte galaw ai Karai Kasang hpe chyeju dum ai lam ni gaw, hkristan prat hpe grau nna ngang kang ai hte anhte sak hkrum hkawm sa nga lu hkra anhte hpe garum ya ai lam ni tai lu nga ai. Anhte a prat hta kap nga ai shut hpyit mara ngu ai hkrit hpa matsan shabat re ai Wenyi ana hpe madu yesu kaw nna ya sha ya sha tsi shamai ya ai lam ni galaw ya nga ai. Karai Kasang anhte hpe jaw ya nga ai law la ai chyeju ni a matu shi madu hpe chyeju dum chye ai myit masa ni anhte hta n-rawng ding sa gaw, anhte byin ging ai hkristan prat hpe anhte galoi mung lu na ga ai nrai nga ga ai. Karai kasang kaw nna anhte lu la ai chyeju kum hpa ni ngu ai hta, nam bat langai, mung kan hte seng ai sut gan kum hpa ni ngu nna tsun lu ai, asak, hkam ja lam, dum nta, malu masha, dum nta masha, manaw manang, bai, hpan da ai arung arai ni ma hkra, jan shata shagan, lamu marang, nam na ashu ashan, ntsa malen pyen ai u ni, shamying ndang ai law la ai chyeju ni a matu anhte karai kasang hpe chyeju dum na ra ga ai. Raitimung, ndai zawn law la ai kum hpa ni hpe anhte manu nshadan ai lam ni galaw kau chye ga ai.

Lahkawng ngu na gaw, Wenyi hte seng nna jaw ya ai makam masham ngu ai chyeju kum hpa kaba, bai anhte a mara ni hpe raw ya ai shi a kaba la ai matsan dum lama ai myit a matu mung shi madu hpe chyeju dum ra nga ga ai. Masum ngu na hta gaw, anhte a ru yak lam ni hte nni nkri lam ni a matu mung chyeju dum mai nga ga ai. Hpa majaw nga yang anhte a ru yak kin dut hkrum ai aten ni ngu ai gaw karai kasang hpe kade tsawra ga ai ngu ai anhte a tsawra myit hpe shaw madun lu ai aten ni rai na rai nga ai. Dai zawn rai ru yak kin dut hkrum ai aten ni hta karai kasang hpe chyu sha kam hpa let matut hkawm sa lu nga hkra shakut ai a marang e, hkye hkrang la ai chyeju kum hpa anhte lu la na rai ga ai majaw, dai kin dun lam ni gaw anhte hkyen hkrang la ai de du wa lu na matu garum ya ai lam ni tai lu ai zawn anhte a makau grup yin ni hpe mung hkye la hkrum lu na matu garum ya ai lam tai lu nga ai. Ndai zawn re ai ahkaw ahkang ni hpe lu la mai ai lam ni rai nga ai majaw, anhte hkrum lu mai ai ru yak kin dut lam ni a matu mung karai kasang hpe chyeju dum mai nga ga ai.

Dai re ai majaw, laban shani shagu anhte jawm hpawng nna, laban nawku daw jau ai lam ni hte missa hkungga jawm nawng ya ai lam ni hpe chyeju dum ai myit ni hte shang lawm lu nga hkra matut shakut nga ga.

Akyu hpyi saga: Wa karai kasang e, tsawra ai lam hpe madung da nna anhte asak hkrung nga lu na amtu garum ya rit, dai tsawra ai lam ni a marang e, masha shagu hpe mai kaja ai lam ni hte anhte galaw daw nga lu na u ga mung garum ya nga rit anhte a madu hkrsitu a marang e hpyi nem nga ga ai.

By: Wajau Bernard Dashi Tang Ji