“Karai Kasang a Mungga Laban” masat galaw na matu Wa Sarabyin ndau shagrin dat nga ai shiga ( 02 OCT 2019 )

Shaning shagu Pranwan Ladaw laban (3) ngu na hpe “Karai Kasang a Mungga Laban” ngu nna masat galaw na matu Wa Sarabyin Francis kaw nna September 30 ya shani ndau shagrin lam galaw dat nga ai.

“Karai Kasang a Mungga Laban” nhtoi masat galaw na matu Wa Sarabyin ndau shana lam galaw dat ai September shata 30 ya shani gaw Chyum laika hpe Latin ga hte ka gale lam galaw da ya ai, Chyum laika ning hkring San Pra ai Jerome a poi nhtoi shani mung rai nga ai. “Chyum laika hpe nchye nchyang ai lam gaw, Madu Yesu hpe nchye ai lam rai nga ai” nga nna grai dan hkung ai masa hte tsun da lai wa ai wa mung ndai San pra ai Jerome rai nga ai.

“Karai Kasang a Mungga Laban” masat shagrin lam galaw dat ai "Aperuit illis" ngu nna Latin ga hte shamying ai Wa Sarabyin a ndau laika hta, “Nawku hpung a asak aprat hta Karai kasang a mungga ahkyak ai lam lahkawng ngu na Vatican zup hpawng kaba kaw nna sharin matsun da ai lam nga nga ai, ya na zawn “Karai Kasang a Mungga Laban” masat galaw na matu ndau shagrin lam galaw dat ai gaw, mungkan shara magup hta shanu nga ai hpung masha ni law law kaw nna ra sharawng tsun lajin lam galaw da ai hpe hkap la shagrin dat ya ai lam re, shaning shagu Pranwan Ladaw ngu na Laban hpe  “Karai Kasang a Mungga Laban” ngu nna masat galaw na, dai shani hta Karai Kasang a Mungga hpe hkaja ai lam, hti sumru akyu hpyi ai lam ni hpe laksan galaw ra na re” nga nna ndau matsun dat nga ai.

Wa Sarabyin a ndau shabra laika hta, “Karai Kasang a Mungga Laban” masat galaw ai lam gaw ahkyak ai lam, Chyum Laika ngu ai gaw, laksan masha nkau mi a matu chyu sha nrai yawng a matu rai nga ai lam, mungga htawn ai lam gaw grai ahkyak ai lam rai nga ai majaw, hkaw tsun lam galaw nga ai magam gun ni hku nna chyum laika ga baw hte nseng ai galu galang anoi abya nga nna hkaw tsun lam galaw ai masa nbyin hkra sadi ra ai lam, Chyum laika hkaja, hti sumru lam galaw ai hta Chyoi Pra ai wenyi ahkyak ai lam, Chyum laika a sharin matsun lam ni hpe hkap la nna tsawra matsan dum lama ai magam bungli ni hpe ta tut hkrang shapraw galaw sa na ahkyak ai lam ni hpe mung Wa Sarabyin a laika hta matsun dat nga ai lam Vatican shiga dap kaw nna shana dat nga ai. 

Source: Vatican News