Myityina Hkristan Hpung Kongsi (MCC) Shaning Shajup Zuphpawng Galaw

ျမစ္ၾကီးနားခရစ္ယာန္အသင္းေတာ္မ်ားေကာင္စီ ႏွစ္ပတ္လည္အစည္းအေ၀း က်င္းပ

Myitkyina Hkristan Hpung Kongsi a shaning shajup Zuphpawng hte 2019-2021 ning na matu Komiti nnan lata san ai hpawng hpe dai ni Septeber 16 ya shani Myitkkyina San Columban Cathedral Nawku Jawng Wang, Mungbawng Htap Masum gawk nu hta galaw lai wa ai.

 Zuphpawng hta, Hkristan Nawku Hpung shagu na Ningbaw ni hte MCC Komiti malawm ni, MCC Sub-komiti malawm ni hte saw shaga da ai hpung kanu kawa ni sa du lawm ma ai.KBC Amu madu hte MCC a ninghpum salang rai nga ai Rev.Dr.Hkalam Samson hte Wa Saradaw Kaba Paul Zinghtung Grawng yan mung zuphpawng hta sa du lawm ma ai.

MCC gaw masum ning hta aten ladaw term langai hku masat nna, ningbaw ningla ni galai ai lam galaw ai hte maren, ndai zuphpawng hta du na 2019-2021 shaning na amu gun ningnan ni hpe lata san da lu sai lam chye lu ai.

Zuphpawng hte maren, MCC ningbaw hpe Jinghpaw Wunpawng Hkalup Hpung kaw na Rev.Maji Bawk La, Ningbaw malai (1) hpe Kahtawlik Nawku Hpung kaw na Myitkyina Jau Aseng Ginwang up Wajau, Ningbaw malai (2) hpe Lhaovo Hkalup Hpung kaw na Rev.Hanggawng Zau Zawng, Amu Madu, Rev.Noah Brang Mai (Anglican) hte Amu madu malai hpe Sara John Shadan Hkang Tu Shan (RC) ni hpe myit hkrum lata shatsam shagrin da lu sai lam chye lu ai.

Matut nna MCC Amyu shayi hpung hpe Sarama Shanrawng Seng Maw (KBC), Shadang Patrick Mung Hkai Seng (RC) hpe Ramma lithkam hku nna shatsam da sai hte Sarama Hkawng Naw (RC) kun hting, Sara U Soe Win Naing ( Anglican), Saranum Daw Ngwa Ma Sa (Lisu Hkalup Hpung) yan hku nna jahpan jep magam lit hte KBC kaw na hpungtau Gawlu Seng Tawng  alu tam hpa-awn magam lit hpe gun hpai mat wa na re lam chye lu ai.

Bai nna dai ni na hpawng hta, lai wa sai shaning ni hta MCC hku nna galaw mat wa sai lam, alu shang/ jai jahpan ni hpe sumtang tang madun ai lam, matut nna shawng de galaw mat na masing masa lam ni hpe bawngban jahkrup ai lam ni mung galaw la lu sai lam chye lu ai

MCC ningbaw lata ai lam hpe Hkristan Nawku Hpung kata kaw nna Ningbaw hpe kahti galai galaw mat ai lam rai nna, lai wa sai 6 ning hta MCC ningbaw hpe Kahtawlik Nawku Hpung kawn woi awn mat wa sai lam, 2019 kaw nna KBC kawn ningbaw hku bai matut woi  mat wa na re ai hte hpang de mung dai hku gayin let Nawku Hpung langai hpang langai ningbaw tai let magam bungli galaw mat na re lam MCC ningbaw hpe aten ladaw term lahkawng lang galaw lai wa sai Wajau Peter Dr Hka Awng Tu Tsun lai wa ai.

“ Myitkyina Hkristan Kongsi gaw masum ning hta ndai zawn re zuphpawng kalang lang galaw ai, dai ni gaw Magam gun ningnan lata ai lam hpe madung galaw ai, hpu nau hkristan ni hte rau sha, ningbaw shara hpe kahti galai galaw ai, ndai lang gaw KBC hku nna ningbaw, lai wa sai ten Kahtawlik Hpung hku nna ningbaw shara kaw na woi lai wa ai, e dai hku shara kayin nna langai hpang langai woi mat wa na re, dai hta ninghpum Salang hku nna gaw, Nawk hpung kaw na ningbaw, masha kaba ni hpe bang da ai, ga shadawn RC kaw na nga yang, Wa Saradaw Francis Daw Tang, KBC kaw na Amu Madu Hpauyawng Tu Mai, Anglican kaw na Bishop John Zau li zawn re ai ni hpe bang da ai re” nga nna Wajau Hka Awng Tu tsun lai wa ai.