Wa Sarabyin Francis Mozambique Mungdan Hta Du Nga

Africa dan Mungdan ni rai nga ai Mozambique, Madagascar hte Mauritius Mungdan masum de du gawan na hkawm sa nga ai Wa sarabyin Fracis, bat masum ya, Sept praw 4 ya shana maga daw hta, Mozambique mungdana de du shang wa sai rai nga ai.

Vatican shiga dap kaw nna ndau shapraw ai shiga hta, ahkying hkum 10 jan pyen ngut ai hpang Wa Sarabyin a nbungli, Mozambique Mungdan ahkying shana maga hkying 6 tup hta Mozambique Mungdan Maputo nbungli daru de du yu wa ai, Mozambique mungdan gumsan magam Filipe Jacinto Nyusi hkum nan nbungli daru hta Wa Sarabyin hpe hkap tau hkalum la lai wa ai, Wa Sarabyin hpe sa tau la ai hta gumsan magam the rau gum san magam a ning rum ning tau jan mung lawm nga ai zawn, Saradaw ni yawng a gawng malai dat kasa Saradaw langai mung lawm nga ai,” nga nna tsun shana da nga ai.

Nbungli daru kaw nna maw daw hte hkawm pru wa ai lam nmaw ding yang Mozambique mung chying sha ni kabu gara mani sum sai myi man ni hte Wa Sarabyin Francis hpe hkap tau la ai lam galaw ma ai, Wa Sarabyin hpe sha nrai, shi du gawan sa wa ai hkrum lam a yaw shada ai lam madung rai nga ai, simsa lam, myit mada lam, bai htingram hkat lam ngu ai lam ni hpe mung mung chying sha ni kaw nna kabu gara hkap tau la ma ai re, nga ai.

Ndai hkrun lam gaw Wa sarabyin Francis a 31 lang ngu na mai gan mungdan hkrun lam rai nga ai, hkrun lam nbungli ntsa rai nga ai aten Wa Sarabyin kaw nna nbungli ntsa lawm nang wa ai shiga dap na shiga la ai masha ni hte hkrum shaga ai lam galaw lai wa ai. Wa Sarabyin a nbungli Italy, Greece, Egypt, Sudan, Dingda Sudan, Uganda, Tanzania, Malawi hte Zambia mungdan ntsa lai di nna hkawm sa nga ai aten ni hta mung nbungli ntsa kaw nna mungdan ning baw ni hpang de ga shaga jak hte shakram ga tsun akyu hpyi shaman ya ai lam ni mung galaw lai wa ai re, nga ai.

September praw 6 ya shani Mozambique Mungdan kaw nna Madagascar Mungdan de Wa Sarabyin matut hkawm sa na, dai kaw nna Mauritius Mungdan de matut hkawm sa nna bat lahkawng ya September 10 ya shani Roma de bai gin htang wa na rai nga ai.

Source : Vatican News