Yesu A Salum Ningsang Poi Laban , A, 2023

 

 

Mt 11:25-30 hta Ngai gaw myit sumnung ai hte myit gyip nga nngai. .ngu nna tsun da nga ai. .

 

Hkristu hta tsawra hkungga ai nu wa hpu nau ni ndai Laban gaw Pranwan ladaw hta shilangai ngu na laban rai nna Yesu a Salum Ningsang Poi nhtoi hku nna masat da ai shani mung rai nga ai. Daini na Ja Chyum Mungga hta Madu Yesu a salum gaw asak ngu ai hte sak hkrung lam a npawt rai nga ai majaw madu hpang de sa ai masha hpung masha shagu gaw tinang a lit magam hpe gun hpai na matu ra kadawn nga ai n-gun atsam marai ni hpe lu la ai sha nre, sak hkrung lam a npawt nhpang langai rai nga ai shagrit shanyem lam hte si mani ai lam yan ni hpe mung sharin la lu nga ai re. Masha langai sak hkrung nga lu ai gaw tsawra myit hta npawt rai nga ai hpe mu chye lu ai.

 

Dai tsawra myit a majaw sha masha gaw magam bungli ni hpe galaw shachye shaja nga ai rai nga ai. .yak ai hkak ai jamjau jamhkau lam amyu myu hpe hkam lu nga ai. .shakut shaja nga ai. ..asak hpe pi ap nawng kau gwi ai rai nga ai. ..masha shagu shakut shaja rai nna nga ai lam a madung hte yaw shada lam a ban dung hpe sawk sagawn dat yu yang tsawra hkrum na matu hte tsawra hkat nga lu na matu sha rai nga ai. ..hpa majaw ta masha gaw tsawra myit a marang e tsawra myit a matu hpan da hkrum nga ai a majaw rai nga ai. ..dai majaw daini e Yesu a salum ningsang a poi nhtoi hta Karai Kasang a shingygyim masha ni atsa e da ai shi a kaba dik ai tsawra myit a kumla poi nhtoi ngu yang mung nshut nga ai.

 

Kahtawlik Nawku hpung gaw hpa majaw ndai poi hpe galaw na matu masat da ya a ta nga yang shi a yaw shada lam gaw anhte marai hkum ngau shagu a tsa e tawn da ai Karai Kasang a tsawra myit kaba hpe myit dum lu na matu mung rai nga ai. . Daini na poi nhtoi hta e wa jau hte rau ndai lam masum hpe myit sawn sumru yu nga ga. . -- Madu Yesu gaw hkri ba nna lit li gun ai ni hpe n-gun ban ya ai lam --Madu Yesu gaw myit sumnung ai hte myit gyip ai lam hpe sharin achyin ya let shi hkum nan hkan nang hkan sa galaw dan ai lam --Madu Yesu gaw shagrit shanem ai lam hpe sharin achyin ya nna shi hkum nan hkan nang lai wa ai lam ndai lam masum hpe rau sha jawm myit saru yu nga ga. ..

 

 Daini e nawku hpung hku nna mung madu yesu hte grai nihtep rai nga ai anhte hpe rau sha jawm myit sumru yu na matu mung saw shaga nga ai. . Hkri ba nna lit li gun ai ni e ngai hpang de wa marit ngai nanhte hpe ban sa jaw na made nga nna madu tsun da ai ga ndai a lachyum gaw Yesu Hkristu gaw lit li gun nna hkri ba nga ai masha shagu a ntsa de shaman chyeju hpe shaman jaw ya nga ai. ..hkyehkrang la ai hpe hpa zawn n nawn ai masha ni a ntsa e mung makam masham ngu ai nhtoi hpe garai nlu ai ni a ntsa e mung shi makawp maga ya nna garum chyeju ni hpe jaw ya nga ai. ..lam dam nga ai ni hpe lam kaja hta bai hkawm sa shangun let si mani ai hte shi a hpang e hkan nang na matu shadut ya ai. .dai sha n-ga ai mara kaba a majaw Karai Kasang a myi man npu e si taw nga ai ni hpe mung mara raw sakramentu chyeju kumla a marang e bai jahkrung sharawt la ya ai hte htawm hpang mara hta bai n hkrat sum na matu chyoi pra hkum chyeju kumla hku na madu yesu gaw wenyi n-gun bai ban ya nga ai. .grau nna gaw madu yesu gaw ndai mungkan hta dan dawng ai hte nga lai wa ai ten matsan yak hkak jam jau lam amyu myu hkrum nga ai ni a ntsa e matsan dum lama nga ai hte maren Chyoi Pra Hkum da ai gawk kaji hta e Yesu a salum ningsang gaw matsan dum lama ai lam hpring zup ai hte ala nga ai. .dai majaw anhte gaw shalan shabran ya ai lam hpe laga masha hta e ntam ai sha tsawra myit hte hpring tup rai nga ai Madu Yesu a salum ningsang hpang de sa du nna tam ai a marang e ra kadawn ai lam ni hpe teng sha lu la na rai nga ai. . Madu yesu gaw myit sumnung ai hte myit gyip ai lam hpe sharin achyin ya let hkan nang hkan sa ra na lam tsun da nga ai. .

 

Ngai gaw myit sumnung ai hte myit gyip myit masin ngai ai wa rai nna ngai hta e sharin achyin la nga mu ngu nna 11:29 tsun Madu tsun da nga ai. .madu yesu hkum nan ndai lam lahkawng hpe grai nan sharawng nga ai re ai majaw shi hkum nan azin ayang hkan shatup lai wa sai mung rai nga ai. .. Myit sumnung ai lam hte seng nna Yesu Madu gaw anhte hpe law law lang hkaw tsun sharin achyin ya nga ai ngu ai lam hta maja majan ai lam ni hpe hkum ninghkap. .bai nna mung na a shabyi maga mi maga de kahpret ai wa hpe maga mi de bai gayin ya u ngu nna tsun hkang da nga ai hte n kaja ai lam hpe n kaja ai hku tinang myit hpe shadang nna bai matai htang ai lam n re ai sha hkam sharang na matu mung hkaw tsun da nga ai. ..anhte hpe galaw saw ai ni hpe hkam sharang ra ai sha n-ga.. n kaja ai hpe kaja ai lam hku bai htang ra ai lam hpe mung sharin achyin ya ai. .. Dai sha n ga Madu Yesu gaw myit sumnung nga ai lam hpe shi a kasa kaba ni hpe katsi kaja madun dan ai hte shanhte a zai mazut nga ai myit ni.. arawn alai ni... tsun shaga lam ni mahkra hpe mung hkam sharang nna shanhte a n chye n kaw nga ai lam ni hpe mung si mani ai lam mahkrun hku nna shading sharai ya lai wa ai. ..mara lu ai wa hpe pawt sin

 

sindawng ai lam nnga ai hte nyet kau ai lam n nga ai sha myit malai lu shangun ai hte mara hpe dat ya ai wa rai nga ai. .. Madu Yesu gaw shagrit shanem ai lam hpe sharin achyin ya nna katsi kaja hku nna madun ai rai nga ai. ..Mahte 18:4 hta e Ndai wa gaw ma kaji zawn, tinang a myit shanem ai wa kadai raitimung sumsing lamu a mungdan hta grau kaba ai wa tai na ra ai. .tsun da nga ai.. matut na sha Mahte 23:12 hta mung Kadai raitimung tinang hkum hpe shagrau ai wa gaw grit mat wa na ra ai. Tinang hkum hpe shagrit ai wa chyawm gaw grau wa lu na ra ai. ..nga nna tsun da nga ai. ..

 

Dai hte maren nanhte mung tsun matsun yawng hpe hkan shatup ngut jang she anhte gaw akyu nrawng ai mayam ni rai nga ga ai. .galaw ra ai hpunda hte sha anhte shatup shaga ai ngu mu ngu wu ai. .Lk 17:10..hta mu lu nga ai. .. Madu Yesu gaw shagrit shanem ai lam hpe matsaw ningtsa de na bethlehem na u shat wa kang hta yu hkrat wa let shangai chying hkai wa ai ten ndan dawng ai hte matsan mayan rai nga taw ai sagu rem ai ni htan lai na kadai mung madu hpe nchye ma ai. ..nazaret ngu na mare kaji hta shaning sumshi ning laman e matsan mayan rai nna nga lai wa ai re majaw shi a tara mungga hpe nnan hkaw tsun wa ai ten hta nazaret na kaja ai lam langai ngai hpa byin pru wa yu a ta nga nna asawng ai let san lai wa ai. .udang hta jen noi si hkam ai shaloi mung damya lahkawng a lapran e mara lu ai wa zawn gaya kahpa di nna si ai ten du hkra shi hkum hpe shagrit shanem lai wa ai. .. Anhte yawng mung madu yesu hkristu a tengman ai jet ai sape kaja ni byin tai mayu ai nga yang madu yesu a si mani nna shagrit shanem ai myit masin hpe kasi la nga ga. ..htingbu wa hpe bai matai htang.. pawt sindawng ai manawn masham ai. Myit tsaw myit rawng ai.. shakawng shakra rai mayu ai ndai zawn nkaja ai myit masa ni hpe la kau nga ga. .yawng hpe karai kasang shaman ya nga u ga. .

 

Akyu hpyi saga oh hpan madu karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.

 

 Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw pran wan ladaw hta jahku ngu na lanban rai nga ai

 

Hti Ang Ai Ja Chyum Mungga Ni Gaw-

 

Chyum Mungga Daw ( I ) Trj 7:6-11...

Chyum Mungga Daw ( II ) 1Yh - 4:7-16

Kabu Gara Shiga - Mt 11: 25-30

 

Ndai jachyum mungga ni hpe hti nna hpawt ni na nawku daw jau lamang ni hpe woi nga ga law.

Add new comment

12 + 2 =