Yesu A Salum Ningsang Poi - Karai Kasang A Mungga

Yesu A Salum Ningsang Poi, A, 2020

Pranwan Ladaw (12)

Hkristu hta tsaw ra ai Nu, Wa, Hpu, Nau ni e, Lai wa sai laban hta “Trinity” poi a lam sumru saga ai. Karai langai, atai masum a tsawra matsan dum lama ai hkam la lu na lam sumru la shaga ai re. Ndai laban gaw pranwan ladaw hta (12) ngu na laban rai nga ai. Raitim, June 19, bat 5 ya shaning ang ai “Yesu a Salum Ningsang Poi” nhtoi hpe ndai laban shani de sit da ai re. Dai majaw Yesu a salum ningsang a lam sumru nga ga.

Lamu shagan (lamu majan) ni hkaja hpaji ninghkring ni gaw shagan langai hpe sawk sagawn hkaja na matu shaning law law na ai re. Lamu na shagan ni gayin taw ai lam hpe matsing masat da nna, mungkan hte ni dik htum shara kaw du wa na aten hpe lat nga ra ai. Dai ten hta shanhte a pat nhpai (jan nhpai) (man pyawng) hte dai shagan hpe madi yu nna, dai shagan kaw na mau hpa lam ni hpe hkaja la ma ai da.

Shagan ni hpa baw hte hkrang shachyaw da ai; gara lam de sit hkawm nga ai; laga shagan ni hpe gara hku ga-up da ngu ai zawn re ai lam ni hpe mung hka ja ma ai.

Kanu Nawku Hpung gaw Yesu Madu hte ni htep dik ai hku nga ai anhte ni mung dai zawn hka ja na matu saw shaga nga ai re. Ngai hte ni dik htum ai Yesu a Salum Ningsang hta shadan dan ai Karai Kasang a tsawra matsan dum lama ai hpe sumru la na matu saw shaga nga ai re. Madu Karai a salum ningsang gaw shinggyim hkum hkrang sa dagraw la ai re majaw shinggyim salum mung rai nga ai.

Shinggyim salum rai nga ai Yesu a Salum Ningsang gaw anhte shinggyim masha ni hkam sha ai zawn sha hkam sha na ai re; kun dinghku hta ngwi pyaw simsa lam; jinhku jinyu, manau manang ni hte mahku mahkau lam hte kabu pyaw lam; hku hkau ai manang si mat na yawn ai lam; chyeju galaw ya tim chyeju dum lam nnga ai hta sha n ga mara shagun ai lam zawn re ai anhte ni hkam sha ai lam yawng hkam sha ai.

Dai zawn shinggyim masha ni a hkam sha lam ni hta lai jan ai hkam sha lam Madu Yesu a salum ningsang hta naw nga nga ai. Dai gaw, Kawa Karai Kasang hpe tsaw ra ai shadawn ndang ai tsaw ra myit; Anhte hpe mara a mayam prat kaw na hkye hkrang la na sharawng awng dik ai myit; Madu Karai a tsawra myit hpe shamat kau nna mat mat taw ai masha ni a matu salum machyi hkra yawn hkyen ai myit; shi hpe kam ai ni a hkye hkrang la hkrum ai ni a matu kabu pyaw ngawn ai myit ni rai nga ai.

Yesu a salum ningsang gaw Karai Kawang a tsawra matsan dum lama ai hpe shadan shadawng ya lu ai pat nhpai (jan nhpai) (manpyawng) kaw rawng ai pat (chyemung) hte bung nga ai. Dai majaw salum ningsang poi hpe “Yesu Madu a tsawra myit madun poi” ngu mung tsun mai nga ai. Yesu a salum ningsang gaw Karai Kasang a dam lada ai tsawra myit hpe madun da ai madun gawk zawn rai nga ai.

Dai tsawra myit gaw lai wa sai ten na labau hta ngam da ai tsawra myit nre. Mani, daini, hpawtni, galoi mung gring nga ai tsawra myit rawng ai salum ningsang rai nga ai. Anhte dum chye ra ai gaw Yesu Madu si ai kaw na bai hkrung rawt ai shaloi mi na hkum hkrang hpe nan bai hkam la, dagraw la ai re. Dai hkum hkrang gaw nu Maria a hkritung kaw shangai wa ai; Wudang ntsa si hkam ai hpang shayu la nna Nu Maria a lahpyan hta mara da ai hkum hkrang nan rai nga ai. Dai hpang, lup ding lup wa de sa nna lup kau sai hkum hkrang rai nga ai. Raitim, dai bai hkrung rawt ai hkum hkrang gaw si mat na hkum hkrang nrai sai. Hpung shingkang hte hpring ai hkum hkrang rai nga ai.

Si hkam nna bai hkung rawt ai hpang, shi hkum hta na ningma ni hpe kasa ni kaw galang lata nan madun dan ai. “Nye a lata ni hte lagaw lahpan a ningma ni hpe yu u....minla ngu ai gaw, ngai hpe nanhte mu ai zawn ashan hte nrut nra rawng ai n rai” ngu tsun da nga ai, (Lk 24:39-41, Yawhan 20:27). Yesu Madu a hkum hkrang gaw mi na hkum hkrang nan rai nga ai. Yesu Madu gaw Kawa Karai Kasang hpang de Karai a tai, Masha atai hte bai lung wa ai re. Sumsing mungdang de shang wa ai shaloi shinggyim hkum hkrang hpe nkau da ai. Madu Yesu a shinggyim salum gaw Kawa Karai Kasang hte anhte hpe tsawra ai majaw salum gum htawn taw ding yang rai nga ai.

Kanu Nawku hpung gaw Yesu a Salum Ningsang poi hpe Wenyi shadut ya ai a marang e galaw ai re. Karai Kasang a tsawra myit hpe hpaw hti lu ai kaja dik ai hte sawk sagawn tam la loi dik ai laika buk gaw Yesu a Salum Ningsang nan rai nga ai. Shing nrai, Mungkan ga nnan lat ai kaw na ya du hkra karai kasang a tsawra myit hpe mahkang da ai google search zawn rai nga ai. Karai Kasang a shadawn ndang ai tsawra myit hpe sawn sumru nna chyeju shakawn na matu hte, chyeju dum masat dingsat tawn ai hku shi hpe hkrit hkungga tsawra lu na matu gaw ndai salum ningsang poi a yaw shada ai nan rai nga ai.

Israel myusha ni Karai Kasang a matsan dum lama ai hpe chye na wa na matu Mawshe garum ya lai wa ai. Ga shaka dingsa prat hta Karai Kasang galaw wa ai lam hte Ga shaka ningnan prat hta Madu Yesu mungkan ga de du sa ai hpang galaw ai lam sai hkat ai nga nna tsun chye ma ai. Ga shaka dingsa prat hta Karai Kasang gaw shinggyim masha ni a shawng hta sindawng gahtep ai wa; hkrit tsang hpa re ai wa; myit dik lam nga na matu yak ai wa; kaji dik ai shut hpyit mara galaw ai wa hpe mara shagun lawan ai wa re ngu tsun da ma ai. Dai lam ni gaw njaw ai da. Karai Kasang hpe dai zawn hkrang shapraw ai ni gaw shanhte hkum nan a (myit masa) myit hpawang kaji ai (tang ai, nsung ai) majaw; mara dat ya ai myit nrawng ai majaw; matai htang mayu myit ni rawng taw ai majaw rai nga ai.

Daini na chyum mungga daw langai hta Karai Kasang gaw galoi mung n galai sai ai tsawra matsan dum lama ai myit hte Adam yan Eve hpe hpan da ai. Shinggyim masha ni mara galaw tim matut tsawra ding yang rai nga ai. Galai shai ai lam nnga ai. Moi prat, ya prat hte hpang na prat maren sha rai nga ai.

Yaweh Karai Kasang Abraham hpe shaga la ai shaloi, Israel myusha ni hpe hkye la na matu lata la ai rai nna, Israel myusha ni hpe shanhte nga ai mungdan makau grupyin na masha yawng Karai Kasang hpang de bai htang wa na matu nhtoi jaw ya ai.

Yaweh Karai Kasang gaw shanhte hpe Egutu (Egyip) mung kaw mayam prat hta na hkye la ai. Shanhte hpe nam maling, zai bru jang hta hkrun lam hkawm nna Canan de woi shang wa ai, (Ningpawt Ninghpang 12:7). Yaweh Karai Kasang jaw da ai tara kanu ni hpe hkan shatut shangun ai. Dai gaw Karai Kasang shanhte hte ga shaka tawn da ai lam hpe bai myit dum shangun ai. Karai Kasang gaw shanhte a Karai Kasang re ai ngu ai hpe yin la na lam rai nga ai, (Jaw Jau 26:12). Kadun ai hku tsun ga nga yang Mawshe gaw Israel myusha ni Yaweh Karai Kasang a masin salum hpe tam mu la na matu saw shaga ai rai nga ai. Karai Kasang shanhte hpe kade daram tsawra matsan dum nna, shanhte a matu hkan shatup wa ai hpe bai myit dum sumru na matu rai nga ai. Chye na wa ai shaloi Karai Kasang hpe nhtang tsaw ra na matu rai nga ai.

Yesu Madu shinggyim masha yawng shi a salum ningsang hpe sawk sagawn hka ja hkam la na matu saw shaga nga ai. Israel myusha ni shanhte a ntsa Karai Kasang a mai kaja ai lam hte matsan dum lama ai lam hpe galoi mung sung sung hka ja la ai lam nnga wa ma ai. Karai Kasang a masing salum hpe Shanhte a myit magyit magaw lam ni hte sha shingdaw la ma ai. Karai Kasang a tsawra matsan dum lama ai chye ju hpe bai htang na matu Myihtoi ni shadum la ya nga ai lapran baw ja nga lai wa ma ai. Shanhte a matu Sara kaga langai mi ra taw ai. Dai gaw Messiah ngu ai Yesu Madu nan rai nga ai. Karai Kasang a matsan dum lama ai hpe tsun shapraw madun dan lu ai wa rai nga ai. Karai Kasang a salum hpe mungkan ga de woi sa ai wa rai nna, shinggyim masha ni hkum nan sam maram la lu shangun ai wa rai nga ai.

Yesu Madu a saw saga ai lam a marang e hkum tsup shangun ai. Mt 11:28 hta, “ Hkriba la nna, lit li gun ai ni e, ngai kaw wa marit, ngai nanhte hpe ban sa shangun na made ai.” Ndai saw shaga ai lam gaw shinggyim masha yawng hte seng nga ai. Bu hkawm laika 12:3 hta, Mawshe hpe mungkan ntsa hta nga ai masha yawng hta si mani dik ai wa ngu tsun da nga ai. Mt 11:29 hta, Mawshe nnan rai nga ai Yesu Madu gaw shi a myit sumnung shingdi ai hte shagrit shanem ai lam hpe madun dan na matu masha shagu hpe saw saga nga ai. Madu gaw shi a hpaji byingnya hte hpung dagu; hpan da lam a mau hpa lam ni hpe sa du hka ja la nna, chyeju shakawn na matu saw saga na re ngu myit la na re. Raitim, shi hkum nan dai hku ntsun ai.

Yesu Madu gaw Kawa Karai Kasang hta ap da ai shi a shagrit shanem ai lam, shinggyim masha ni hpe hkye la na matu Kawa Karai Kasang a myit ra ai lam hpe hkan shatup na matu hte, yawng a shangun ma tai, yawng hpe daw jau na matu jing jing rai nga ai lam ni hpe katsi la na matu anhte hpe saw saga ai. Yesu Madu gaw shi a tsawra matsan dum ai hpe hkam sha nna, kaga masha ni hpe mung shi a tsawra matsan dum ai lam hpe madun dan na matu saw saga nga ai.

San Yawhan gaw Yesu Madu tsun ai Karai Kasang a tsawra matsan dum lama ai hpe mu tam la na mahkrun lam nnan langai mi hte anhte hpe garum ya ai. San Yawhan zawn Yesu Madu hte ni htep ai hku nga ai kasa kaga nnga ai. Shi gaw “Yesu Madu tsawra ai wa” ngu shi a kabu gara laika hta chyahkring hkring tsun da nga ai. Yesu Madu a tsawra matsan dum lama lam hte seng nna sung grau ai hku chye na da ai wa re ngu tsun lu nga ai. Yawhan 13:1 hta, “Shi gaw ndai mungkan ga e nga ai shi a masha ni hpe galoi mung a tsaw ra nga mu ai rai nna, jahtum nhtoi du hkra shanhte hpe tsaw ra mu ai” ngu ka da nga ai. Yesu Madu hpe ap kau na lam hte seng nna san ai shaloi Yesu a lahpyan kaw nga ai wa ngu mung ka da nga ai, (Yawhan 13:25).  Hpang jahtum Yesu madu hpe wudang ntsa jan noi da ai shaloi Roma hpyen la langai mi shi a garep hpe nri hte galun waw ya nna sai hte hka lwi hkrat wa ai ngu mung ka da nga ai, (Yawhan 19:34).

Chyum mungga daw lahkawng hta mung Karai Kasang gaw mahkra dang chye ai wa; shi gaw htani htana asak; shi gaw hpung dagu rawng ai wa; hpaji byannya hte nhtoi rai nga ai. Raitim shi gaw Karai Kasang a tsaw ra matsan dum lama ai wa re. Mai kaja ai lam mahkra gaw Karai kasang kaw na rai nga ai hte maren, tsawra matsan dum lama ai lam mung Karai kasang kaw na re. Karai kasang kaw na sa ai tsawra myit nrai jang dai hpe tsawra myit ngu tsun na n gindan ai nga nna 1Yawhan 4:7-8 hta Yawhan hkum nan ka da nga ai. Karai Kasang gaw shinggyim masha ni hpe tsaw ra lam madun ai hta lam amyu myu hku madun chye nga ai. Raitim, ginchyum dat yu yang “Anhte htani htana asak lu la na matu shi a kasha shingtai hpe mungkan ga de shangun dat ai lam” rai nga ai, (1Yawhan 4:9). Dai tsaw ra myit gaw chyoi pra san seng dik ai re ngu San Yawhan tsun da ai, (1Yawhan 4:10).

Dai daram nan kaba la ai tsawra myit hpe anhte shinggyim masha ni gara hku bai htang ra na ta?  San Yawhan dai lam hte seng nna anhte shada da tsawra let bai htang na matu tsun da nga ai. 1Yawhan 4:11 hta, “Tsaw ra ai ni e, Karai Kasang gaw anhte hpe ndai hte wa tsaw ra mi ai rai yang gaw, anhte mung shada da mai tsaw ra nga ga ai” ngu mahtai jaw da nga ai. Dai gaw Yesu madu hkum nan anhte hpe tsun da ai ga rai nga ai. Yawhan 13:34 hta, Yesu gaw “Ngai nanhte hpe tsaw ra ai zawn, nanhte mung shada tsaw ra myit rawng nga myit yang gaw, nanhte nye a sape ni rai nga myit dai gaw masha yawng mayawng chye lu na mara ai, ngu mu ai.

1Yawhan 4:12,16 hta Yawhan matut tsun ai “Anhte shada tsaw ra nga ga yang gaw, Karai Kasang gaw anhte hte langai sha tai nna nga nga ai rai nna, shi a tsaw ra ai myit gaw anhte hta kup tsup wa lu na ra ai. Dai rai nna, tsaw ra ai myit hta asak hkrung ai wa kadai rai ti mung, Karai Kasang hte langai sha tai nna nga nga ai.”

Dai majaw anhte, ni htep ai ni yawng hpe Yesu a Salum Ningsang hte tsaw ra daw jau ganawn matsun nga ga.

 

Chyum Laika ni

Buhkawm Laika  7:6-11

1Yawhan  4:7-16

Mahte  11:25-30

 

 

 

 

 

 

Add new comment

4 + 1 =