Yesu Hkristu Sumsing Lamu De Lung Wa Ai Poi, B Shaning, 2024

Paska Ladaw Hta Laban 7

(Yesu Hkristu Sumsing Lamu De Lung Wa Ai Poi)

Hkristu hta tsawra hkungga ai nu wa hpu nau ni ndai laban gaw shaning B a Paska Ladaw a Laban Sanit rai nga ai bai nna e Yesu Sumsing Lamu de lung wa poi nhtoi laban hku nna mung masat da ai  rai nga ai..

Madu Yesu Hkristu lamu de lung wa ai poi gaw moi shawng nnan na hkristan ni a poi kaba ni hta na langai mi mung rai nga ai. Ga shaka ningnan hta mu lu ai hte maren, Madu Yesu hkristu gaw, si ai kaw na bai hkrung rawt ai hpang nhtoi 40 ya laman hta aten law law wa shi a Sape ni hte hkrum let shi a sharin shaga ai lam ni hpe matut galaw sa na matu shanhte hpe matsun da ai rai nga ai.  Kahtawlik nawku hpung a sharin shaga ai lam hta, Madu Yesu hkristu a lamu de lung wa ai lam gaw, Madu Yesu hkristu gaw Kawa Karai Kasang a hkra maga e shara la na matu ngu ai lam hte rau matut mahkai nga ai. Kaja wa nan mung Kawa Karai Kasang a hkra maga e hkaw dung nga ai.

Bai nna, ga shaka ningnan hku nna, Madu Yesu hkristu lamu de lung wa la ai lam gaw dinghta ga na shi a shinggyim prat htum mat sai ngu ai lam mung rai nga ai. Madu Yesu hkristu sumsing lamu de lung wa ai poi hpe e Paska poi (shalai wa ai poi) a hpang nhtoi 40 ya ngu na nhtoi, Laban mali shani e galaw ai rai nga ai.

Madu Yesu Hkristu sumsing lamu de lung wa la wa lam hpe Luka a kabu gara shiga hte kasa ni a laika hta dan dan leng leng grau nna mu lu nga ai. Luke a kabu gara shiga 24:51 hta, “shingrai shanhte hpe shaman ya nga yang, shi shanhte kaw na hka mat wa nna sumsing lamu de woi shalun la ai hkrum wu ai.” Bai nna kasa laika hta ka da ai hpe gaw chyum mungga Daw 1 hta mu hti lu nga ai. Hpa majaw Madu Yesu Hkristu lamu de lung wa ai lam gaw anhte a matu ahkyak nga ai kun? Hpa majaw nga yang, ndai lam gaw anhte a matu madu yesu hkristu gaw kaja wa si du hpe dang kau ai lam re hpe madun nga ai lam langai mung rai nga ai. Bai nna shi madu gaw kaja wa Karai Kasang ajet re ai lam ngu ai hpe madun dan ai hte shi a nta majing de wa mat ai lam mung rai nga ai. Madu Yesu hkristu lamu de lung mat wa ai gaw shi a hpung shingkang atsam hte lung mat ai lam rai nga ai. Nu maria hpe lamu de woi shalun la hkrum ai lam hte gaw n bung nga ai. Nu Maria hpe gaw karai kasang ai hpung dagu atsam hte shalun la hkrum ai rai nga ai. Madu Yesu hkristu sumsing lamu de lung wa ai lam gaw dinghta gaw anhte a shara majing nre, anhte a nga shara majing gaw sumsing lamu mungdan re ai lam hpe madun dan ai lam mung rai nga ai.

Hpa majaw Madu Yesu hkristu gaw lamu de lung mat ai kun? Dai gaw anhte shinggyim masha ni a gawng malai, Kawa Karai Kasang kaw sit shang tsun shaga, htinglu htinglai kyu hpyi ya na matu mung rai nga ai. Bai nna  Anhte a matu nga shara lajang da ya na matu mung rai nga ai. Madu Yesu hkristu sumsing lamu de lung wa ai lam gaw anhte hpe kaning re ai lam ni sharin ya nga kun? Dai gaw anhte a wenyi hpe awng dang kau lu na matu shani shana nrau nhtau rai let nga ra ai hte karai kasang anhte hpe shaga la sai hte maren, kaning re ai sasana magam lam hta raitim anhte gaw jahpring shatsup ra nga ga ai. Dai majaw anhte hkum ngau shagu mung Madu Yesu hkristu sumsing lamu de lung mat ai shaloi jaw da ai ..ga ndat da ai lam ni hpe hkan sa shatup na lit nga ga ai.

Madu Yesu hkristu sumsing lamu de lung mat ai a marang e anhte hta hpa tsang shara n nga sai. Anhte si na lam mung n hkrit ra sai. Hpa majaw nga yang shi hkum nan anhte a matu sumsisng chying hka hpe hpaw da ya nga ai. Anhte hku nna myit npyaw na lam n nga ai. Shi Madu hku nna dinghta ga hta naw nga ai ahkying aten hta anhte shinggyim masha ni yawng a matu lqm magup hpe galaw lajang da shangut da ya sai rai nga ai. Dai hta n-ga shi hku nna anhte hpe matut nna tsun da ai hta ngai nanhte hpe galoi mung nkabai da ai, Mungkan htum ten du hkra ngai nanhte hte rau dinggrin a nga nga na nngai nga nna anhte hpe ga ndat tawn da ya sai mung rai nga ai. Dai lam hpe myit sawn yu yang  anhte shinggyim masha ni hpe kade daram tsawra ai ngu ai hpe mu lu nga ai.

Marku a kabu gara shiga hta mung anhte hpe tsun da nga ai. Nanhte Mungkan ting chyam hkra hkaw dan mu; kamsham nna kashin kamun hkam ai wa  gaw hkye la ai hkrum na mara ai, nkam nsham ai wa chyawm gaw daw dan ai hkrum na ra ai nga nna, (Mk 16:15) hta tsun da nga ai. Madu Yesu hkristu hpe kamsham nna, hka hte kashin kamun hkam la nna hkristan tai nga sai ni anhte yawng gaw madu yesu hkristu matsun tawn da ai lam ni hpe hkan shatup na lit nga ga ai. Madu yesu hkristu sumsing lamu de lung mat wa ai gaw anhte hpe tawn kau da ai lam n rai nga ai. Anhte  hte htani htana dinggrin anga nga lu na matu rai nga ai. Madu Yesu hkristu hku nna anthe hpe matsun da ai hte maren, anhte langai hpra mung madu Yesu hkristu a matsun ga hte maren shi a sasana magam hpe matut gun hpai galaw sa ra nga ga ai.

Madu Yesu hkrsitu a mungga hkaw tsun gat hkai ai lam hta kasa paulu a myit jasat anhte hta nga ra ai lam hpe... kasa Paulu korinhtu ni kaw shagun dat ai laika langai 1 cor 9:16 hta, “ndai kabu gara shiga hpe hkaw dan nga yang, nye a matu gumrawng shara n nga ai, kaning rai nme law ngai nhkaw dan yang gaw, dingnye lu nngai,” nga nna tsun da nga ai. Kasa paulu ya na zawn kabu gara shiga hkaw tsun ai hta shi hku nna kumhpaw kumhpa hpe myit mada let galaw ai lam gaw n rai nga ai. Shi a kamsham myit a majaw, Madu Yesu hkristu hpe tsawra nga ai lam a kumla langai mi sha rai nga ai. Shi a kabu gara shiga hkaw tsun ai a marang e lu la ai kumhtaw gaw shi hku na bai hkaw tsun lu ai lam ngu ai sha rai nga ai.

Hpa majaw anhte Madu Yesu hkristu a kabu gara shiga hpe hkaw tsun ra nga ga ai kun? Madu Yesu hkrsitu mung anhte ni hpe hpa majaw hkang da nga ai kun? Ndai ga san ni hpe anhte myit yu mai nga ai. Anhte shinggyim masha ni yawng gaw Madu Yesu hkristu hpe chye chyang let, shi madu a marang e yawng gaw hkye hkrang la ai chyeju hkam la lu na matu rai nga ai. Dai majaw anhte hkristan hpung masha ni kadai mung, dai madu yesu hkristu a lam hpe hkaw tsun dan na lit nga ga ai. Anhte n hkaw n tsun dan ai rai yang, madu yesu hkristu hpe anhte nchye nchyang ai hte asak htum mat ai, shing nrai mara hta si mat ai ni rai yang anhte a hkye hkrang la lu na n mai byin nga ai. Hpa majaw nga yang, madu yesu hkristu hta lai nna hkye hkrang la ai lam kaga n nga sai. Kasa laika 4:12, “anhte hkye hkrang la ai kaw du lu na matu, shi  hta shaje hkye hkrang la ai lam nnga sai,” nga nna tsun da ai hpe anhte mu lu nga ai. Roma ni kaw san paulu shagun dat ai laika hta mung . Kabu gara shiga gaw hkye hkrang la shangun lu ai karai kasang a atsam rai nga ai,” nga nna tsun da nga ai..(Rom 1:16).

Ya madu Yesu hkristu sumsing lamu de lung mat ai poi nhtoi hta anhte hpe sharin ya ai lam (3) nga ai. Dai ni gaw, 1. Madu yesu hkristu gaw kaja wa karai majing rai nga ai lam sharin ya nga ai. (2). Ndai dinghta ga gaw sumsing lamu mungdan ram n ahkyak nga ai ngu ai lam hpe mung sharin ya nga ai. (3). Madu yesu hkristu matut nna Mungkan ga ntsa e naw sak hkrung nga ai rai yang, sasana magam bungli gaw shi hta e hpring tup naw nga taw na sha rai nga ai. Ya shi dinghta ga na wa mat ai re majaw, shi a sasana lit magam gaw daini e anhte a lit nan rai sai rai nga ai. Dai majaw madu yesu hkristu anhte hpe kam nna ap da sai magam lit ni hpe gun hpai nga yang anhte yawng gaw yak hkak jam jau ai lam ni hpe hkrum katut na re, bai pyaw ai ten hta raitim madu yesu hkristu hpe kam shamyet shanat nga let, shi madu yesu hkristu a kabu gara shiga hpe hkaw tsun gat hkai chye ai hkristan hpung masha ni tai nga lu hkra shakut sa wa ga.

Akyu hpyi saga oh hpan madu  Karai Kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.

Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw shaning B a paska ladaw sanit  rai nga ai hte Madu Yesu lamu de lung wa ai poi nhtoi mung rai nga ai. hti ang ai ja chyum mungga ni gaw chyum mungga daw langai Langai ngu na..Kasa laika 1 :1- 11, 20-26 chyum mungga daw lahkawng Ehpesu hpung masha ni hpang san pawlu shagun dat ai  laika  4: 1 -13 kabu gara shiga Mk 16: 15-20 Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law