WANWU CHYA BAT MASUM YA SHANI: "NANG GA YUN BAI TAI NA RIN DAI HPE MYIT DUM U!"

photo from website

Wanwu Chya Nhtoi (Ash Webnesday) C, 2022

Yoela  2:12-18      2Kor 5:20-6:2       Mt 6:1-6, 16-18

 Hkristu hta tsawra ai nu wa hpu nau ni e, hpawt ni gaw Wanwu Chya Nhtoi, Ash Webnesday rai nna Lusha Gam Ladaw shang ai nhtoi mung rai nga ai.

Ndai lusha gam ladaw gaw anhte a wenyi lam a matu ahkyak dik ai ladaw langai rai nga ai. Dai hpe chye ai nawku hpung gaw ndai ladaw hpe akyu pru ai hku sung lang jai lang ra ai.

Lusha Gam Ladaw a lachyum hpe chye na hkawn hkrang na matu nawku hpung gaw “wanwu” hpe kumla hku nna shaman let anhte a kahtan kaw chya hkam la na matu matsun da ai.

“Wanwu” hte wudang masat kumla masat hpe hkam la ai a lachyum gaw hpa rai ta? Ndai kumla gaw anhte a matu laklai ai kumla langai mung rai nga ai. Kadai gara myu bawsang hta mung ndai htung lai n nga lai wa yu ai raitim, shawng na Hkristan Nawku Hpung woi ni lusha gam ladaw hpang ai kumla hku nna ndai masat kumla hpe jaw lai wa ma ai.

“Wanwu” chya ai shaloi “Nang gayun bai tai na rin dai hpe myit dum mu,” ngu wanwu chya ya let tsun ai gaw  anhte ni gayun kaw hpe shachyaw nna Karai Kasang a wenyi hte nsa kawut bang nna hpan da hkrum ai ni rai ga ai hpe myit dum shangun ai. Mara hpe koi yen nna Kabu Gara Shiga hpe kam sham na matu mung rai nga ai.

“Wanwu” gaw anhte a hkum hkrang hte wenyi lam hta gawng kya ai lam nga ai hpe bai myit dum shangun ai.

Wanwu gaw anhte gade daram n-gun kya ga ai hpe mung, anhte a mungkan sak prat kadun la ai hpe mung bai myit dum shangun ai.

Prat law law hta hti ndang ai masha law law tara upadi amyu myu gaw de jahkrat nna ja la ai daru magam ahkang aya hte up hkang lai wa ma ai. Dai hte maren, tinang a hpaji byen-ya hpe jai lang nna anhte ni mau na zawn re ai hpaji hte up hkang lam woi ningshawng tai lai wa ma ai. Sut masa lam hta kung kyang ai sut du ni up hkang lai wa ai.

Dai mung up ni, hpaji ninghkring ni, sut du ni yawng mung lani mi na nhtoi hta mayam langai zawn, shangun ma langai zawn, si ra ma ai. Laika hpaji chye ai ni, n chye ai ni, lusu matsan mayan ni, hpyen du hpyen la ni, gumgai dingla, ma chyangai ni, shan hpraw shan chyang yawng mung si ra ma ai.

Lup wa kaw, lup ra kaw, lup da ai ni a lup hpe htu shaw hpaw yu ai shaloi mu lu ai gaw langai hte langai n shai hkat ma ai, maren sha rai nga ai hpe mu lu na ga ai. Shaning grai na ai hpang bai yu yang gayun sha ngam taw ai hpe mu lu na ga ai.

Arawng aya, hpaji byen-ya hte sut gan ni gaw tinang a asak hpe kachyi mi pyi galu shangun ai n rai.

Asak latsa ning lahta de sak galu ai ni hpe asak aprat a lam shi a ningmu hpe san yang, asak aprat gaw grai nan kadun la ai, ngu htai na ma ai. Kadai raitim kade a ntsa raitim mungkan htum hkra up hkang da n lu ai, hting hkang da n lu ai.

“Wanwu” gaw anhte a wenyi lam yan hta kade daram n-gun kya ga ai hpe myit dum shangun ai. Anhte yawng gaw shut hpyit mara lu ai ni hkrai rai ga ai.

Mare kaw nta wan hkru ai mabyin hpe kalang lang gaw hkrum yu na ma ai. Anhte ni ladat hpaji shaw, arang bang, atsam dat nna galaw da ai nta hte sut gan yawng ma hkra hkru lawm mat chye ai. Manu dan ji woi ji wa ni a sut gan ni, ahkyak ai laika maisau pa ni, ja gumhpraw ni yawng lawm mat chye ai.

Dai zawn wan tsin-yam hkrum sha ai ni hpe jinghku jingyu, htingbu htingbyen ni hte hku hkau manang ni e shingbyi shara hte buhpun palawng, malu masha ni karum ya na ma ai. Manu dan sut gan ni yawng gaw wanwu hkrai tai ma ai.

Ya ten du hkra galaw da ai mai kaja ai akyu ara apu asi ni, anhte a masin salum hta nga ai myit ngwi myit pyaw lam, Hkristan kun dinghku kata na myit hkrum myit ra ai hte simsa lam ni gaw Karai Kasang jaw ya ai wenyi asak chyeju rai nga ai.

Wan hte shut hpyit mara gaw n bung pre ai, shai hkat ai lam nga ai. Wan gaw anhte a mare, dum nta, buga, u wa yam nga, dusat dumyen ni hpe jahten kau chye ai. Shut hpyit mara gaw shinggyim masha hkum nan hpe jahten kau ya chye ai. Anhte yawng gaw mara lu ai rai nna, mara hpe bai matut galaw shut ga chye ga ai.

Anhte a kahtan kaw chya da ai “wanwu” gaw shinggyim masha gaw mara lu ai wa rai nga ai hpe masat shadum ya ai. Lusha gam ladaw gaw anhte mara lu ai ni hpe myit malai lu na matu saw shaga nga ai. Mara a mayam prat kaw nna shalawt dat ya ai. Mara dam hpe shaprai kau ya ai.

Anhte a kahtan kaw, Nawku Hpung mara chya shakap ya ai wanwu gaw prat ningnan langai hpe bai hpang lu na matu myit mada lam jaw ya ai kumla rai nna, dai lam hta hkawm sa na matu saw shaga ai kumla mung rai nga ai.

Anhte wunpawng myu sha ni gaw, grau nna bum ga na masha ni gaw, yi sum hkau na galaw sha ga ai. Yi hkyen ta hta yi hkyen nna jan lam jahkraw ngut jang wan nat kau ga ai. Atsawm n hkru ai hpun lakung lakyin ni hte ru ni hpe sawm kau nat kau nna nsi nai mam ni hpe hkai shaprut ga ai.

Wan nat nna ga kaw kap taw ai wanwu ni gaw marang hka hte ga kata de jung shang mat ai. Nsi nai mam hpun ni gaw dai ga hte wanwu kayau mat nna byin wa ai gasau hpe chyup la ai. Wenyi lam hta mung dai hte maren rai na gaw ahkyak ai.

Anhte a gawng kya ai gaw Karai Kasang hta kam hpa kam sham na matu rai nga ai. Mara a majaw hkrat sum wa shagu teng man myit malai hte Karai Kasang hpang de nhtang wa ra ai. Anhte a myit malai hte Karai Kasang a matsan dum lama ai tsaw ra myit hkrum pawng mat ai shaloi mara hpe kashin kau ya hkrum let apu asi pu si lu ai chyeju tai nga na rai ga ai.

Lusha Gam Ladaw Na Mahkyen Lamang Ni

Nawku Hpung gaw mahkrum madup law law hte kung hpan nga sai kanu hte bung ai. Shi a kashu kasha ni Lusha Gam Ladaw hpe lachyum pru/nga ai hku akyu jashawn na matu Hkristan ni yawng hpe, prat bang shagu hta, ndai mahkyen masum hte lakawn lanawn ya let n-gun jaw ai.

  1. Akyu hpyi na aten hpe shawoi na hta grau jaw na
  2. Teng man myit malai hte mara tawng ban na (tara npu e kabu pyaw let galaw lu ai lam nkau ni hpe pyi nyet kau ra ai)
  3. Nihtep ai ni (hpu nau) hpe shawoi na hta grau ai tsaw ra myit hte karum shingtau ya na

Ndai lam masum hte gaw mara ngu ai ana zingli kaw nna mai tsai wa lu shangun ai manu dan tsi ni hte bung nga ai. Nawku hpung gaw ndai Lusha Gam Ladaw hta anhte hpe law htam ai hku gat hkai shangun mayu ai nli tum kaja hte mung bung nga ai.

Anhte gaw akyu hpyi shaja ra ai. Ga hte sha n re ai; Karai Kasang hte hku hkau nihtep ai hte shaga ra ai.

Anhte gaw n kaja ai lam ni hta na koi yen ra ai. Sadan hpe “kaw si hpang gara shangun u; shi hpe nang kaw na htang wa ai shaloi kaman dat dat u,” ngu San Pra ai masha langai tsun da ai hte maren Sadan anhte hpe krau sha n lu hkra galaw ra ga ai.

Nihtep ai hpu nau ni hpe karum shingtau mu ngu ai gaw mawhpyi hpe gumhpraw alap achyap jaw ai hpe tsun ai n rai nga ai. Ra kadawn ai ni hpe karum ya ai shaloi ap nawng myit kaba hte daw jau na hpe tsun ai rai nga ai; Tinang a asak hpe pyi n lahpawt hkra ap nawng daw jau ai hpe tsun ai rai nga ai.

Akyu hpyi saga

Wa Karai Kasang e, gayun kaw na tai wa ai hpe myit dum let shagrit shanem ai myit hte tinang shut hpyi mara kaw nna teng man myit malai hte Nang Madu kaw bai htang wa lu ai lam hta hkawm sa shangun ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban gaw Lusha Gam Ladaw shang ai shani, Wanwu chya bat masum ya shani rai nga ai.

Hti ang ai Ja Chyum Mungga ni gaw

Chyum Mungga Daw (1) Yoela  2:12-18

Chyum Mungga Daw (2) 2Kor 5:20-6:2

Kabu Gara Shiga    Mt 6:1-6, 16-18

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.

                   

 

Add new comment

2 + 0 =