Sasana Laban Nhtoi Karai Kasang A Mungga : Ngai Gaw Kaja Ai Sagu Rem Wa Rai Nngai

Hkristu hta tsaw ra ai nu wa hpu nau ni e, ndai laban gaw (4) ngu na Paska ladaw laban rai nga ai.

 

Kaja Ai Sagu Rem Wa Hte Sagu Hpung

Ndai mungkan hta anhte asak hkrung nga ai a yaw shada ai gaw Hkristu hpe grau tsawra lu na matu, sumsing mungdan hta shi hpe hkak chye lu na matu hte myit masin mahkra hte shi hpe tsawra lu na matu rai nga ai.

 

Anhte a matu bai hkrung rawt ai Hkristu ngu ai wa gaw kadai rai ta? Bai hkrung rawt ai dai Hkristu a matu ngai gaw kadai rai ta? Ndai ga san lahkawng hpe tinang hkum tinang bai san let mahtai tam yu ga.

 

Ga san hte mahtai gaw amyu myu rai na re. Hpa majaw nga yang Yesu Madu gaw anhte a matu amyu myu mai byin ai. Kaja wa Yesu Madu gaw mahkra dang chye, mahkra shabyin lu ai wa rai nga ai.

 

Ndai laban na Kabu Gara Shiga hta Yesu Madu jaw ai lachyum nga dik mahtai rai nga ai. “Ngai Gaw Sagu Rem Wa Kaja Rai Nngai; Nanhte gaw Nye A Sagu Hpung Ni Rai Ma Ai.” Yesu a mahtai gaw grai nan chye na loi ai re majaw ma kaji ni hpyi chye na lu nga ai. Raitim, sumsing mungdan hta anhte ni lachyum sung dik ai re hpe atsawm sha chye na wa na ga ai.

 

Yesu Madu A Prat Na Palestine Kaw Nga Ai Sagu Hpung Ni Hte Sagu Rem Ni

Yesu Madu gaw mauhpa lam  jaw ai sharin shaga lam ni hpe galaw chye ai wa rai nga ai. Shi a sharin shaga lam ni hpe shinggyim masha ni shani shagu sak hkrung nga pra ai prat masa lam kaw na ga shadawn ni hpe la nna sharin shaga ai hpe mu lu ga ai.

Ga shadawn- anhte jai lang ai hpun kawa hte anhte shani shagu lu sha ai malu masha ni a lam, yi sun hkauna galaw ai lam, jau gawng gawng ai lam, poi shingra n’htoi ni a lam zawn re ai ni hpe lakap nna tsun lu ai.

 

Yesu Madu gaw Palestine mungdan kaw shangai wa ai. Dai majaw Yesu Madu gaw dai shara hta dai aten ni hta jai lang ai muk lusha a lam, hkali hte nga hkan ai ni a lam, tsabyi hpun a lam, sagu rem ni hte sagu hpung ni a lam hpe tsun let sharin shaga ai. Anhte ginra hta n nga n mu yu ai ga shadawn ni law law rawng nga ai.

 

Sagu ni gaw si mani ai dusat ni rai ma ai. Shanhte hkum hpe hpyen ni kaw nna makawp maga la n lu ai. Sagu ni gaw shanhte a madu a matu sagu mun hte chyu ntsing shapraw ya ai hte sagu kasha ni hpe mung shaning shagu shaprat ya ma ai.

 

Palestine mungdan hta sut su, lu su ai ni sagu law law madu lu ma ai. Yu maya shawa masha ni gaw sagu 50 hte 100 lapran kaw sha madu lu ma ai. Shanhte gaw sagu ni hte rau udat shara ni hta shata hku hkan nga lawm ra ma ai. Sagu ni hpe dat da let tsan ai kaw nna rem sing chye ma ai.

 

Shana daw maga du wa yang sagu rem ai ni gaw shanhte a sagu ni hpe pe mali, manga tsaw hkra nlung ni hte kum da ai sagu lawng ni hta mahkawng bang da ma ai. Shana ten hta lagut hte kaga dusat ni a hpyen kaw nna makawp maga na matu langai hpang langai sin maja ma ai.

 

Sagu lawng hta shang chying hka langai sha nga ai. Jahpawt n’htoi htoi jang sagu rem masha ni tinang a sagu ni hpe shai hkak ai nsen ni hte shaga ai shaloi, sagu ni mung tinang a madu a nsen hpe chye na ma ai hte woi sa ai udat shara de hkan nang ma ai.

 

Dumsu ni hpe udat shara de woi sa yang hpang kaw nna shingna hte gau jang ya ra ai. Sagu rem ni gaw sagu ni hpe laklai nsen hte sha woi sa ma ai.

Moi shawng de nam maling ni hta dusat law law nga lai wa ai. Raitim, ya aten gaw grai shau mat wa sai. Yesu Madu a prat hta Palestine kaw chyahkawn hte sharaw ni law ai majaw sagu ni hte sagu rem ni hpe dingbai dingna jaw ma ai.

 

Law malawng gaw tinang madu ai sagu ni hpe tinang rem sin ma ai. Raitim, sut su, lu su ai ni gaw shanhte a sagu ni hpe rem na matu masha shap nna rem shangun ma ai. Tinang n madu ai sagu rem ni gaw sagu madu ni zawn sadi maja nna rem ai lam n nga ma ai. Sagu ni hpe tsawra ai lam mung n nga ma ai.

 

Ndai bat na Yawhan a kabu shiga hta Yesu Madu tsun dan ai sagu rem ni hte sagu hpung a lam hte seng nna dai ten na masha ni grau chye na na ma ai.

 

Hkristu Gaw Sagu Rem Kaja Rai Nga Ai.

Yesu Madu “ngai gaw sagu rem wa kaja rai nngai” ngu tsun ai lachyum gaw, shi gaw kaja ai sagu rem ni hta na marai langai rai nngai ngu tsun mayu ai n rai nga ai. Raitim, dai kaja ai sagu rem ni yawng hta na kaja dik htum ai sagu rem kaja wa rai ai hpe tsun mayu ai rai nga ai. Yesu Madu gaw mungkan hta shi a sagu ni rai nga ai anhte marai hkum shagu hpe grai tsawra dik ai kaja dik htum sagu rem wa rai nga ai.

 

Sagu rem kaja gaw shi a sagu ni hpe chye ai.

Sagu ni gaw langai hte langai grai bung ma ai majaw langai hpra hpe garan ginhka chye lu na matu grai n loi la ai rai nga ai. Sagu rem wa gaw sagu langai hpra a lam chye ya lu ai; asak kade rai sai, chyu ntsi kade lu mai ai, ana zingli nga n nga yawng hpe chye maram ya lu ai. Langai hpra hpe shaga ai mying jaw da ai.

 

Anhte chye ai Yesu Madu gaw shi a sagu ni hpe chye ai sagu rem wa kaja rai nga ai. Madu gaw anhte a kanu kawa ni hta grau nna, anhte marai hkum shagu hpe mying hte hkrak chye ai. Anhte hkum anhte chye ga ai hta grau nna Karai Kasang anhte a lam grau chye ai. Anhte marai hkum shagu a prat hta ra kadawn nga ai hpe kata lam du hkra chye nna hparan lajang shachyip ya ai. Anhte wenyi lam hta machyi nga ai hpe chye nna tsi tsi ya lu ai kaja dik wenyi hte seng ai tsi mawan mung shi hta nga ai. Yesu Madu anhte hpe chye ai hta sha n ga ai, hkumhkrang myit masin wenyi lam yan ni hta ra kadawn ai lam mahkra hpe lajang ya ai.

 

Sagu rem kaja gaw shi a sagu ni hpe ningshawng tai woi awn ya ai. Madu gaw shi a sagu hpung ni hpe Hkanan zawn re ai udat shara de woi ningshawng ya ai. Hpyen ni a lata kaw nna simlum ai shara de woi ningshawng ya ai. Shana aten hta rai tim, simlum ai shara hta simlum ai hku tawn da ai.

 

Kadai mung Yesu Madu zawn kaja ai sagu rem wa n tai lu ai.

Yesu Madu gaw kanu nawku hpung hta kashin kamun chyeju kumla hku nna woi awn ya ai. Hkristu a sagu hpung masha ni gaw nawku hpung kata hta malu masha law htam ai hku hkam la lu nna simlum lam mung nga ai.

 

Wenyi lam hta anhte a matu Karai Kasang yaw sin nna hkyen lajang da ai lam ni hpe hkan shatup na matu n-gun jaw bang ya ai.

 

Mara a majaw shi hte tsan gang mat ai anhte hpe myit malai lu nna shi hpang de gayin wa na matu Madu anhte hpe lam woi ya ai.

 

Anhte a mungkan asak htum ai shaloi sumsing nta de simlum ai hku woi lung wa ai. Yesu Madu a woi awn ai lam hpe hkap la hkan sa ai ni galoi raitim lam n shut ai, lam n dam ai.

 

Sagu rem wa kaja gaw sagu ni hpe dau jau ai.

Madu Karai gaw anhte a hkum hkrang matu ra kadawn ai malu masha ni hpe daw jau let anhte hpe woi ning shawng ya ai. Machyi ai ten raitim, myit ru ten hta rairim, anhte hpe yu lakawn ya ai. Kadai sagu rem wa rai tim Yesu Madu zawn anhte hpe n-gun tai ai malu masha hte daw jau n lu ai. Madu Karai gaw akyu hpyi let, mungga htawn ya let, Chyoi Pra hkum sakramentu hta shi a hkum sai shan hte, anhte hpe daw jaw ya ai. Kadai sagu rem wa rai tim, shanhte a sagu ni hpe tinang a hkum sai shan hte daw jaw ai lam n nga ai.

 

Sagu rem wa kajaw gaw shi a sagu ni hpe makawp maga ya ai.

Lagut ni a lata kaw nna makawp maga ai; shani shana aten shagu sin maja nga ai. Raitim, chyahkyawn, sharaw ni hte lagut ni a lagu rim sha ya ai kaw nna makawp maga na matu aten shagu sadi let sin maja nga tim, sagu ni hpe shayaw kau ra ma ai.

 

Sagu, bainam ni hte dusat ni gaw anhte a matu manu dan la nga ai. Raitim, anthe shinggyim asak gaw grau nna manu dan nga ai. Tinang a asak jasum na malai sagu bainam hte dusat langai ngai jasum ai gaw grau kaja ai n rai ni?

 

Raitim Yesu, mungkan ga hta nga ai ten, dai hku n tsun da ai. “Ngai gaw sagu rem wa kaja rai nngai: sagu rem wa kaja gaw, sagu ni a matu tinang a sak nawng ya kau lu ai,” (Yh10:11). Madu Yesu tsun ai sagu gaw anhte shinggyim masha ni rai nga ai. Madu tsun ai sagu ngu ai gaw ga shadawn tsun ai rai nga ai. Madu Yesu gaw anhte shinggyim masha ni a matu shi asak hpe ap nawng kau ya ai.

 

Yesu Madu shi a sak hpe ap nawng ai lam n galaw ai sha, shi hkum shi lawt lam tam la mai nga ai. Raitim Yesu Madu dai hku n galaw ai. “Nye asak hpe gade e kashum la ya lu ai n rai: nye a myit hte ngai nawng ya kau nngai,” (Yh 10:18).

 

Yuda masha ni mara n lu ai Yesu hpe jeyang sat kau ma ai. Yesu Madu mung shyinggyim masha ni hpe hkye la na matu si hkam lai wa ai. Yesu Madu si ai hpang anhte hpe matut woi awn ya ai. Daini du hkra raitim du na aten ni hta rai tim, shinggyim masha ni hpe Yesu Madu lam woi ya nga na, daw jau nga na, makawp maga ya nga na rai nga ai.

 

Anhte yawng gaw Yesu Madu a sagu hpung ni rai ga ai. Kaja ai sagu rem wa gaw shi a sagu ni hpe atsawm hkrak chye ai. Anhte shi a sagu hpung ni mung chyum laika hti sumru, akyu hpyi let shi hpe chye chyap lu hkra shakut ra ga ai. Anhte a makam masham hpe grau chye na hkra shakut nga ga ai kun? Chyum laika hti sumru ai hta Yesu hte shi a lam hpe chye lu na matu sha rai kun? Shi hpe madu lu na hte hku hkau ganawn mazum nga lu na matu rai nga ai.

 

Sagu rem kaja gaw sagu ni a hpang hkan nang ai. Anhte ni Madu a tara ni hpe hkan shatup ai a marang e, shi a hpang hkan nang nga ga ai kun? Shing n rai, dai hpe jahten kau let sadan a hpang hkan nang nga ga ai kun? Ndai laban hta Yesu Madu tsun ai dam mat ai sagu ni tai nga ga ai kun? Mungkan ga hta Yesu Madu ahkang aya ap jaw da ai ningbaw ningla ni a hpang hkan ai ni tai nga ga ai kun?

 

Kaja ai sagu ni gaw sagu rem wa daw jau ai malu masha ni hpe kabu sharawng ai hte hkap la hkam la ai. Yesu Madu anhte a matu daw sha poi hpe shawang tsawra myit kaba hte hkyen lajang da ya ai.

 

Akyu hpyi saga

Wa Karai Kasang e, sagu rem wa kaja Madu Yesu a lam woi ai hta htep lahti hkang nang let nawku hpung masha ni hpe woi awn nga ai hpa-awn ni hte mungdan hpe woi awn nga ai ningbaw ningla ni hpe mung sagu rem kaja ni tai nga mu ga lam woi ya rit. Nang Madu a sagu hpung masha ni hte mungkan masha yawng gaw sagu rem wa kaja Yesu Madu a lam woi ai hta htep lahti hkan nang lu na chyeju atsam jaw ya rit. Anhte a Madu Hkristu a marang e hpyi nem nga ga ai.  Amen.

 

Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban gaw Paska Ladaw hta (4) ngu na laban rai nga ai.

 

Hti ang ai Ja Chyum Mungga ni gaw

Chyum Mungga Daw (1) Kasa 4:8-12

Chyum Mungga Daw (2) 1Yh 3:1-2

Kabu Gara Shiga Yh 10:11-18

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.