PRANWAN LADAW LABAN ( XIII ) A, 2023

PRANWAN LADAW LABAN ( XIII ) A, 2023

 ( Karai Kasang a Mungga )

Mahte 10:38,40 hta tinang a udang hpai let, nye a hpang n hkan nang ai wa gaw ngai hte n ging dan nga ai. .nanhte hpe hkap hkalum la ai wa gaw, ngai hpe mung hkap hkalum la ai rai nga ai nga nna tsun da nga ai. .

Hkristu hta tsawra hkungga ai nu wa hpu nau ni ndai laban gaw pranwan ladaw hta (XIII ) ngu na laban rai nga ai. ..Daini na jachyum mungga hta Madu Yesu gaw shi a Kasa ni hpe tsun shadum da ai hta " tinang a Wudang Kandang hpe hpai let, nye a matu asak sum ra na. .nye a matu asak sum mat ai wa kadai mung asak bai lu na ra ai. " ndai ga hte Madu Yesu gaw shi kasa ni hpe tinang nang a kandang hpai na matu hkang da nga ai.

Dai hkang da ai ngu ai a lachyum gaw, atsawm sha lachyum shapraw ga nga yang langai hta Madu Yesu nni nhkri hkrum lai wa ai lam hpe, myit dum shangun ai. . lahkawng hta e anhte a shani shagu hkrum ang ai nji nmu lam, ruyak lam ni hpe hkam jan ai hte hkawm sa ra ai ngu ai lam rai nga ai. Ndai lam lahkawng hpe rau sha jawm myit sumru yu nga ga. Madu Yesu gaw anhte shinggyim masha ni hpe hkyehkrang la na matu sumsing lamu de na yu sa wa nna anhte a nni nhkri yubak lam ni hpe sa hkam la ai.

Madu gaw shi hkum nan ruyak jam jau lam ni hpe nkoi yen lu na gaw nrai nga ai. Raitim.anhte shinggyim masha ni hpe kaja wa grai tsawra ai a majaw sharawng awng ai myit kaba hte hkap hkam la ai lam rai nga ai. Dai zawn anhte mung ruyak jam jau lam ni hte hkrum wa ai ten myit n daw nhten ai hte sha hkam sharang let sak hkrung na matu madu gaw shadum sharin ya nga ai. Madu yesu shi du sa wa ai ten kaw na wudang ntsa hta jen noi si hkam ai ten du hkra yak hkak jam jau lam amyu myu hte nni nkri lam ni hpe nhkrum ai ten ngu ai gaw n nga na daram rai nga ai. Lu na sha na lam ni hta matsan mayan rai nga lai wa ai . .madu shi hkum nan hpyen wa a zingri zingrat hkrum katut lai wa ai ..shatan hkrum ai. mara shagun hkrum ai. .jawng katut ai tsun jahpoi jahpyak ai hkrum ai. .mayen mahtaw hkrum ai. .kade mi hkrum lai wa ai raitim si mani ai hte hkam sharang ya lai wa ai madu yesu rai nga ai .kaja ai lam ni hpe jaw ya nga tim ..n kaja ai hku bai nhtang hkrum ai. .chyeju ni hpe jaw ya nga tim anhte shinggyim masha ni chyeju bai n ginhtang ai hpe shi hkrum ai. .kade mi shinggyim masha ni hku nna madu yesu hpe galaw lai wa ai rai tim hkam sharang let myit galu ai hte chyeju ni hpe matut nna galoi jaw ya nga ai.

Karai kasang rai nga ai. . Anhte a mungkan ntsa hta sak hkrung nga ai lam gaw lagawn si na zawn rai nga tim madu a garum chyeju hte hkam sharang nna nga ai rai yang apu asi law law hpe teng hkam la lu na lam hpe mung tsun nga ai. Madu shi hkum nan madun dan lai wa sai kasi ningli hte san pra ai masha ni a kasi ningli ni hpe la nna yak hkak jam jau lam amyu myu hpe hkam sharang nna sak hkrung nga ai rai yang lani mi nhtoi hta teng sha madu hte rau sumsing lamu a sut gan hpe madu lu na gaw teng sha rai na hpe mu mada shangun nga ai Dai majaw madu gaw daini e nang ngai hpe mung saw shaga nga ai"Nye a shangun ma byin mayu yang tinang hkum tinang nyet kau u. .htani htana asak hkrung lam hpe hkam la mayu ai nga yang ndai mungkan hta sak hkrung nga ai ten hta na hkum nang shagrit shanyem U. Ngai hte ningngai nga mayu ai rai yang ngai hte rau wudang hpai garum u." .ngu nna madu yesu saw shaga ai ai hpe myit dum nga ga. Lahkawng hta gaw kaning re ai shara de mi sa sa kaning re ai lam ni hpe mi myit myit. .anhte myit ra ai hte maren mahkra hpe hpan lajang da ya nga tim n ra ai. ..n ra sharawng ai lam langai ngai hte hkrum katut na re majaw dai gaw wundang lam hkrum katut na hpe tsun ai rai nga ai.

Hkum hkrang hta ana ahkya byin ai mi rai rai. .myit masin hta hkam sha ai hte myitru tsang pu lam ni hpe rai tim hkrum sha ra na re. Raitim tinang masat da ai shara hta galaw ra ai magam bungli hpe galaw gun hpai ai ten hta tau nau chye da ai mi rai rai nchye da ai mi rai rai matsan yak hkak jam jau lam ni hte gaw hkrum sha ra na sha re. Karai kasang jaw ya kandang gaw langai hte langai n bung na re raitim tinang hpe jaw da sai kandang hpe gaw apu angun nnga ai myit galu ai hte hpai lu na matu shakut ai hte karai kasang a makawp maga ya ai chyeju ni hpe hpyi ai rai yang yak hkak jam jau lam kade mi nga nga yeng seng tawt lai lu na re. ..

Kaja wa ta tut prat ngu ai hta madu a hpang nang na nga nna myit daw dan wa ai ten kun dinghku hte jinghku jingyu ni a lapran e myit n hkum n ra ai hte mang hkang lam amyu myu hkrum na gaw teng sha re. .madu hkum nan mung shi hpang hkan ai masha ni hpe shi a hpang hkan yang gaw law law sak jaw ra re hpemung tsun da nga ai. .hpa majaw nga yang tinang a myit sharawng awng ai htan karai kasang a sharawng awng ai lam hpe galaw gun hpai ra ai majaw rai nga ai. .tinang a myit sharawng awng ai lam hpe tawn kau da na ngu ai gaw nloi nga ai. .ndai tawn kau ai lam hpe galaw ai mung majan langai shang taw ai hte bung nga ai. Dai majaw madu gaw shi a hpang hkan nang nga ai masha ni hku nna shanhte a prat hta hpa lam ni ngu ai hte kadai wa gaw grau ahkyak nga ai

ngu ai hpe san dinglik yu na matu daini e anhte hpe mung saw shaga nga ai. .Hkristu a hpang hkan nang nga ai jet ai hpung mashani gaw laga lam ni htan Karai kasang a lam hpe shawng myit dum shara jaw na gaw teng sha re. .ga shadawn kalang marang kun dinghku a lam.. tinang a lam hte tinang myit ra ai hpe madung da nna galaw sa wa sa i nga yang madu a hpang hkan nang ai lam hta dingbai dingna byin wa chye nga ai. .dai majaw kaja wa nga yang anhte a prat hta e ahkyak dik lam langai sha rai nga ai. .dai langai ngu ai hpe lu na matu laga lam ni hpe tawn kau da ai gaw gingdan nga ai nga nna madu gaw teng man tara hpe tsun lai wa ai. .bai dai langai ngu ai lam gaw anhte a htani htana hkyehkrang la hkrum na lam rai nga ai. .dai hkyehkrang la ai lam hpe hkrum na matu karai kasang a sharawng ai myit hte maren hkan nang hkan sa rai let shakut shaja nga ga law.

Akyu hpyi saga oh hpan madu karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai. Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw pranwan ladaw hta jahku ngu na lanban rai nga ai

Hti Ang Ai Ja Chyum Mungga Ni Gaw –

Chyum Mungga Daw ( I ) 2 Hk 4:8-11..14-16

Chyum Mungga Daw ( II)..Rom 6:3-4.8-11

Kabu Gara Shiga : Mahte 10:37-42

Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law.