Pranwan Ladaw Laban 32, Shaning A, 2023

Christu hta tsawra hkungga ai nu wa hpu-nau nawku hpung masha ni e ndai laban gaw Pranwan ladaw hta laban 32 ngu laban rai nga ai. Hti ang ai ja chyum mungga ni hta na daw langai Hpaji Byeng-ya laika 6: 12-16 hta hpaji ningli a a-lu ai lam hte hpaji ningli hpe tam ai ni gara hku mu tam la lu lam hte seng nna na la lu na rai nga ai.

Chyum mungga daw lahkawng San Paulu Htesaloni hpang de shagun dat ai laika langai 4: 13-18 hta  madu Yesu hta kam sham nna si mat ai ni hpe myit mada lam, bai hkrung rawt wa na lam hte Madu bai du sa wan a lam tsun da ai hpe na la lu na rai nga ai.

Bai nna gabu gara shiga Mahte laika 25:1-13 hta anhte ni yawng gaw sumsing mung dan de shang lu na matu tinang nang a wengyi hpe lajang shachyip ra ai lam hpe La nnan hpe tinang a wan pyengding ni hpe lang nna hkap bawp la na pru sa wa ai mahkawn shi  hte bung nga ai lam gashadawn tsun da ai hpe na la lu na rai nga ai. Dai majaw ndai ga shadawn the Madu yesu gaw masha shagu hpe hpang jahtum na ten hta jeng yang na matu bai du sa wa ai shaloi kam sham ai hte kang ka rai mai kaja ai hku sak hkrung nga lai wa sai mahsa ni hpe htani htana asak jaw ya na lam re hpe shadum sharin ya nga ai. 

          Shawng nnan Hpaji Byeng-ya laika hta hpaji ningli ngu ai gaw tsawm htap ai shingni hte aten ladaw n nga ai sha galoi mung grin nga ai hpan re hpe tsun da nga ai. Hpaji ningli hpe jet ai tsawra myit gaw chye na hkawnhkrang ai lam a shawng e hkam ra ai lahkam re hpe tsun da ga ai. Dai hpaji ningli ngu ai hpe gaw makoi magap da nmai nga ai ra sharawng ai ni yawng gaw mu tam la lu mai nga ai. Htauli htaula myit hte hpring zup ai lam gaw hpaji ningli rai nga ai. Anhte a prat lam hpe shading sharai ya ai n-gun mung rai nga ai.

           San Paulu Htesaloni ni hpang shagun dat ai laika hta shawng nnan Hkristan ni gaw si mat ai ni hpe n-malap shangun mayu ai lam sha n-ga tinang a tsawra ai masha langai ngai si mat ai ten shalan shabran ya ra ai lam hpe shadum da nga ai. Christan ni a myit mada kam sham ai a bandung gaw hpang jahtum na nhtoi hta bai hkrung rawt wa na lam hte dai zawn kam sham ai ni yawng hpe shi hpang de woi wa nna htani htana shi hte rau ning ngai nga na lam rai nga ai. Dai majaw anhte Christan ni gaw ndai dinghta e myit ru myit tsang jam jau hkrum wa ai ten hta shada da tsawra ai myit hte bai shalan shabran pawn ba hkat ra ai lam tsun da ga ai.

Dai majaw Christan ni gaw myit mada lam hpe shamat kau ai ni n re ai sha gade myit ru myit tsang yawn hkyen lam ni hkrum ai rai tim myit mada lam lu ai ni rai nga ga ai.

           na la lu ai Mahte a gabu gara shiga hta sungsing mungdan hpe ga shadawn hte tsun da ai hpe na la lu na re. Dai gaw galoi mung shajin da ra ai lam hte seng nna tsun da ai mung rai nga ai. Tsawra ai nu wa hpu nau  ni e anhte gaw hpa lam ni hpe shajin lajang tawn da nga sai  kun. Anhte a matu jaw teng nna byin taw nga ai lam gaw lam langai ngai hpe grai ahkyak da na  shawng tau nau shajin da di galaw ai. bai Anhte nta garai n gap shi yang nta hkrang ni sut arang ni yawng hpe shawng sawn shajin di she gap hpang ai rai nga ai.

 

Dai hte maren shat mai mu mu shadu sha ai shaloi mung shat mai kaw bang na malawm hkum sum hpa ni hpe jahkum da nna atsawm rai shadu ai hkrang ni hte shadu   ai rai yang mu na teng sha re. Poi pyin ra ntsa de garai nka shi yang shawng shaman shakyang da ai. Garai n hkungran shi yang tinang hte rau nga na la num hpe shawng lata la shajin di rai ra ai.

Karai Kasang shi hkum nan shinggyin masha hpe garai nhpan shi yang  shi hte hkrang sumla bung hkra hpan da sai ni hpe up hkang na matu shawng yaw shada ai hte lajang ai lam hpe Ningpawt Ninghpang laika 1:26 kaw mu lu nga ai. Anhte mung hpang jahtum e garai nsi shi yang ndai prat hta anhte a wenyi makam lam yan ni hpe shawng lajang sha chyip di rai nna htani htana sumsing lamu e ningngai nga lu na matu shakut shaja nga ga ai. Dai majaw lama ma tsawm ai, lachyum rawng ai, a kyu rawng ai ni yawng gaw lajang shachyip ai lam a akyu chyeju hte shabyin da ai ngu tsun yang mung nshut nga ai.

 

          kabu gara shiga hpe myit sawn sumru yu yang  madu Yesu gaw lajang shachyip ai lam a ahkyak ai lam hpe madi madun ya nga ai hpe mu lu na re. Dai hta n ga ndai chyum laika na ga shadawn hta gaw sumsing mungdan de gara hku du lu na lam a mahtai zaw ngu na secret hte anhte a wengyi lajang shachyip ai lam a myit manoi ai lam hpe tsun shadum nga ai.

          Ndai ga shadawn hpe bai sang lang yu ga nga yang mahkawn 10 gaw kam sham ai hpung masha hpe tsun mayu ai hte wan sau hte pyending gaw anhte a makam masham hte lajang shachyip ai lam ni rai nga ga ai. Myit su ai num marai manga gaw wan sau hpe shajan gun sa ai ni rai nga ai ..myit nsu ai num marai manga gaw wan sau shajan nlawm ai hpe tsun da nga ai. Wan sau shajan ngu ai gaw anhte a lajang shachyip ai lam rai nna  wan sau nlaw ai ngu gaw du wa na aten a matu lajang shachyip ai lam masing kata re hpe tsun ai ga mung rai nga ai.

           “ Yu mu la nnan wa du ra ai!” ngu ja htau ai nsen gaw hpang jahtum  nhtoi a matu galoi mung maja let, shajin la taw na matu ahkyak ai lam hpe tsun shadum da nga ai...dai majaw atsawm sha shajin da ai lam n nga ai...myit nsu ai mahkawn manga  gaw wan sau lu na matu hpyi ai shaloi wan sau lu ai ni mung anhte na matu nlaw sai laga de tam mu ngu tsun dat ai. Dai gaw anhte a makam masham gaw tinang nang ngai langai hte sha seng ai lam re hpe madun ya nga ai. Dai shaloi myit nsu ai ni wan sau hkan tam na matu hkawm sa nga yang chyinghka pat mat ai sau lu nna dai chying hka lam shawng kaw du ai shaloi shanhte gaw madu e madu chying hka naw hpaw la rit law ngu nna jahtau tsun yang , madu gaw ngai nanhte hpe nchye nngai ngu nna tsun dat ai. Ndai ga si “ Ngai nan hte hpe nchye  nngai” ngu hpe gaw ahpa atang sha nmai sawn la nga ai.

          Dai ga si gaw anhte a wenyi makam ngu na sau ma mat ai shaloi shing nrai madu Karai Kasang hte matut mahkai kanawn mazum ai lam n nga ai shaloi e na lu na ga si mung rai nga ai. gashadawn langai hpe tsun ga nga yang lama na anhte masha jasam hpe mu ai shaloi shi a lam hpa na nchye ai kun? mahtai gaw anhte shi hte hku hkau kanawn mazum ai lam n nga ai majaw rai nga ai. Gadai mung tinang nchye ai masha langai hpe gaw anhte a nta de kalang ta gaw nsaw shaga bang na re. Dai hte maren sha Karai Kasang mung shi hte chye hkat ai masha shi hte matut mahkai ai wa nre ai hpe gaw “ Ngai nanhte hpe nchye ga ai” ngu nna tsun dat na sha rai nga ai. Ngai nchye ai ngu ai ga si gaw hpa hpe tsun mayu ai rai kun?  anhte a machye machyang gaw subjective nature ngu ai tinang a myit kata kaw sha byin ai mabyin hte Epistemic limitations hte hpring nga ai re. Epistemic limitation ngu ai gaw yawng mayawng hpe jaw hkra nchye lu ai ,chyoi chye ai lam ngu ai a madin ni hpe tsun ai rai nga ai. Dai majaw anhte lama ma hpe chye mayu yang matu mahkai ai lam shing nrai hku hkau kanawn mazum lam shing nrai gahti galai galaw pawn ba hkat ai lam ni ra nga ga ai.

          Dai hte maren anhte a wengyi hkrun lam hta e Karai Kasang hte matut mahkai ai lam ni hpe galaw nga yang she Karai Kasang gaw anhte hpe grau mu chye na re. Dai hta n ga grau grau nna Karai Kasang hte matut mahkai pawm hpawm magang  grau grau nna tinang a wenyi hkrum lam hpe lajang shachyip lu magang rai nga ai..

Karai Kasang a yaw shada ai lam ni shi a tara lam ni hte shada mara dat ya hkat ai lam ni hpe galaw ai a marang e Karai Kasang gaw anhte hpe chye wa na rai nga ai. Shing nrai jang laga hpa baw lam mahkrun ni hte mai chye lu a ta?

          chyum mungga daw lahkawng hte maren Madu Yesu gaw hpang jahtum na nhtoi hta gara hku byin wa na lam ni hpe tau nau nna tsun da chyalu rai nga ai. Karai Kasang gaw galoi mung ntsun da nna galaw ai wa nrai nga ai. Gashaka dingsa hpe yu dat ai shaloi Karai Kasang gaw galoi mung masing nga ai hte shi a masing ni hpe Myihtoi ni  hku nna hting let na lu chye lu ai. Laga lam ni mung law law naw nga ai bai Noah sang hpaw mabyin lam mung dan leng dik htum mabyin lam langai rai nga ai. Noah gaw hka gaba wa na nhtoi a matu lajang shachyip ai zawn , Karai Kasang hta kam sham ai anhte ni mung wenyi hkrun lam a matu  lajang shachyip ra nga ga ai. Myit su ai mahkawn ni zawn anhte a wenyi sau ngu na hpe galoi mung jan hkra gun da ra nga ai. Shani shagu anhte hku nna lajang  nna mai galaw ai amu ni gaw missa hkungga garai nhpang shi yang myit masin hpe lajang da nna shang lawm ai zawn shing nrai prat hkrun lam hpe garai nhkawm sa shi jang gara hku hkawm sa na asak hkrung na ngu ai lam ni hpe shajin hkyen lajang da ai lam ni hpe mai galaw da nga ai. Yawng gaw Karai Kasang a yaw shada lam hpe atsawm sha hte hkan nang hkawm sa lu na matu madu Karai Kasang yawng hpe shaman ya u ga. Amen...

  Akyu hpyi saga oh hpan madu  karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.

 

Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw pranwan ladaw hta. ....hkun jahku........ ngu na lanban rai nga ai hti ang ai ja chyum mungga ni gaw chyum mungga daw langai ....hpaji byeng ya laika 6: 12-16 chyum mungga daw lahkawng htesaloni hpung masha ni hpang de san paulu shagun dat ai laika  langai 4: 13-18  kabu gara shiga Mahte 25:1-13

Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law

 

Add new comment

4 + 9 =