Pranwan Ladaw Laban 30, Shaning A, 2023

Pranwan Ladaw Laban 30, Shaning A, 2023

Yesu gaw Ngai e tsawra ai wa rai yang gaw nye ga matsun hkan shatup na ra ai..nye wa mung dai wa hpe tsawra na wu ai rai nna an lahkawng gaw dai wa kaw sa nna shi hte rau hpawng de nga na ga ai..yawhan 14:23

Hkristu hta tsawra hkungga ai nu wa hpu nau nawku hpung masha ni ndai laban gaw pran wan ladaw hta 29ngu na laban rai nga ai.

 

1. Karai Kasang a Matsan Dum Lama ai Myit hte tara rap ra ai lam

           Na la lu na chyum mungga daw (1) ga shaka dingsa hta gaw matsan mayan ai ni a ntsa nga nga ai Karai Kasang a matsan dum lama ai myit hte tara rap ra ai lam hpe madun dan taw nga ai. “Matsan mayan re ai ngu ai ni hta e” dai ten na matsan mayan re ai ni gaw “gaida jan ni hte jahkrai nmai ma ni rai nga ai.” Gai da jan ni gaw shanhte hpe shing lum lam jaw nna garum shingtau na matu Madu  ra kadawn taw ai ni rai nna jahkrai nmai ma ni gaw shanhte hpe lam woi nna makawp maka let bau maka na kanu kawa ni ra nga ai. Ndai Chyum mungga daw (1) hku nna mu mada lu shangun nga ai gaw shanhte hpe karai kasang gaw yu lanu lahku ya taw nga ai lam rai nga ai. Shanhte hpe sharu shatsang di ai masha ni hpe Karai Kaseng gaw nhtu hte sat kau na hte shanhte a hpyi jahtau ai nsen hpe teng teng na ya let madat mara ya nga ai hpe asan sha tsun da nga ai. Ndai lam ni hpe myit sawn sumru yu yang Karai Kasang shanhte hpe kade daram manu shadan nna tsawra nga ai hpe anhte chye na hkan sha lu ga ai.

          Daini anhte a makau gupyin , anhte a dum nta, anhte a makyin jinhku ni hta mung lam amyu myu a majaw matsan mayan re ai ni, hkra machyi loi ai masha ni law law nga nga ai. Shanhte hpe mastan dum nna shanhte hta tara rap ra ai lam lu la na matu gaw anhte a lit, anhte a bungli nan rai nga ga ai. Shanhte hpe anhte kaji htum ai ni re ai nga nna nmai kabai da kau ai. dai zawn masha ni gaw Madu Yesu hte ni htep ai ni rai nga ai hte shanhte a hpyi jahtau ai nsen hpe Madu Yesu galoi ma madat mara nga ai. “Kaji htum ai wa hpe galaw daw jaw ai gaw ngai hpe galaw jaw ai re” nga nna Madu Yesu chyum mungga hta tsun da nga ai. Dai majaw kaji htum ai ni, matsan mayan re ai ni hpe galaw daw jaw ai lam gaw Madu Yesu hpe nan galaw daw jaw nga ai hte Madu Yesu a myit ra sharawng ai lam hpe galaw nga ai mung rai nga ga ai. 

2. Kasi kamang la mai ai lam ni

          Hkristan ngu ai gaw Madu Yesu Hkristu a hpang hkang ai masha ni hpe shaga ai amying shingteng langai rai nga ai. Hkristu a hpang hkang ai ngu ai gaw Hkristu shi hkum nan sharin ya ai lam ni hte mungkan ga hta shi asak hkrung nga pra wa ai ten hpe myit dum let  shi Madu hkawm sa lai wa sai lam hku tatut hkang nang hkawm sa ai lam rai nga ai.

Hkristu a hpang hkang ai Hkristan ni hta Jet ai Hkristan hte N jet ai Hkristan ngu nna hpung (2) garan nna anhte mu lu nga ai. Jet ai Hkristan ngu ai gaw tinang a asak aprat hta pyaw ai aten hta rai tim, npyaw ai aten hta rai tim, lu su ai aten hta rai tim, jam jau yak hkak hkrum ai aten ni hta rai tim Hkristu jaw da ai Tara ni hpe tatut hkan nang hkan sa nna shi ra sharawng ai hku asak hkrung hkawm sa nga ai ni hpe tsun ai rai nga ai. N jet ai Hkristan ngu ai gaw Hkristu a hpang hkan ai shaloi awng dang  pyaw hpa lam ni hpe sha ra sharawng nna hkrat sum ai aten, ru yak jam jau ai aten ni hta myit daw myit hten ai hte tinang a makam masham hpe mara mu, mara tam ai ni rai nga ai.

Moi na Ji woi ni a makam masham lam hpe bai yu yu yang Hkristu a hpang hkan nang ai majaw du daw, sai hkaw nna zingri zingrat lam amyu myu hte jam jau yak hkat ai lam ni hpe hkam sha lai wa ai hpe anhte na yu, mu yu, laika ni hta hti yu saga ai ni rai nga ga ai. Dai zawn tinang a asak hpe pyi asum hkam hkra Hkristu a hpang hkan nang ai ni hpe jet ai hkristan ni re nga nga nna tsun ai.. Chyum Mungga daw II hpe hti myitsun sumri yang anhte hpe ga san langai mi san taw nga ai rai nga ai. Dai ga san gaw “Nang jet ai Hkristan rai ni”. ngu ai rai nga ai.

          Daini anhte a Hksritan makam masham mung gara madang kaw du taw sai kun anhte sung sung sawn ding lik yu ra nga ai. Tinang a makam masham gaw gara hku re kun. Tinang hkap la kam sham da ai Hkristan makam masham hte tinang galaw hkawm sa nga ai ni gaw bung nga ai kun anhte bai nhtai myit yu ra nga ga ai. Anhte a makam masham gaw tatut magam bungli n lawm ai nga yang makam masha ajet n tai lu ai zawn makam masham n nga ai sha magam bungli hkrai nga yang mung nmai nga ga ai. Makam masham hte tatut magam bungli gaw anhte a prat hta galoi mung arau ginrun let jai lang ra ai lam rai nga ai. Dai re yang she anhte gaw tinang hte ni htep ni nawn ai ni, tinang hte hku hkau ai ni hte, manaw manang makyin jinghku ni a matu makam masham kasi la mai ai ni, lam woi ning shawng ai ni tai wa nna Karai Kasang a man e mung myi man pa ai ni tai wa na rai nga ai.

3. Karai Kasang a Jep ai Tara a lam

          Ga san san ai ngu ai hta hpan (4) nga ga ai.

(1) Ga san a mahtai hpe chye mayu ai majaw san ai

(2) Tinang chye da ai mahtai gaw jaw ai kun, shut ai kun ngu ai hpe shagrin la mayu ai majaw san ai

(3) Ga san a mahtai hpe tinang chye ai ngu arawng la mayu nna san ai

(4) Masha hpe chyam dinglik mayu nna mara tam na matu san ai..ndai lam ni rai nga ai..

          Daini anhte na la lu sai Kabu Gara shiga hta mung Tara Sara langai mi Madu Yesu hpe Ga san san ai lam anhte na la lu saga ai. Tara Sara san ai ga san gaw tsun lai wa sai ga san hpan mali kaw na no. (4) hpan rai nga ai. Ga San hpe san ai Tara Sara gaw Yesu a tsun wa mahtai hta mara rim lu na matu, Yesu hpe chyam na matu gyam ai lam sha rai nga ai. Yesu htai ya na tengman ai mungga hpe madat mayu na gaw nrai nga ai.

          Madu Yesu hpe Tara Sara san ai ga san gaw “Jep ai Tara hta na grau kaba ai gaw gara mahtang rai nga a ta? Ga san hta lawm ai jep ai tara ngu ai hpe anhte matut myit sun sumru yu ga nga yang. “Jep ai tara ngu hpa wa rai nga a ta?” Karai Kasang a Jep ai Tara ngu ai gaw tsaw htum grau htum ai tara rai nga ai hte  tatut hkan nang galaw ai ni a akyang lai len ni galaw sa ai lam ni hte hkam la ai lam ni hpe lam woi na matu rai nga ai. Jep ai Tara a yaw shada lam gaw Karai Kasang gaw anhte ni hpe lam woi matsun madun sharin shaga ya na matu mahkrun langai hku nna masat tawn da ya ai mung rai nga ai. Jep ai Tara ni gaw nang ngai anhte yawng hkan sa ra ai arawn alai hte tara lam ni mung rai nga ga ai.

          Shawng n-nan hku nna Karai Kasang gaw Israel amyu sha ni hpe Tara kanu lam shi hpe jaw da ai hpe “Pru mat wa ai laika 20:2-17” hta mu lu nga ai. Tara kanu shi kaw nna tara 613 du hkra law mat ai lam hpe “Ningpawt Ninghpang laika hte Tara Jahprang laika” ndai lahkawng hta  anhte mu lu ga ai. Tara kanu lam shi hpe tang du hkra tatut hkan shadik na pyi yak hkak nga yang, tara 613 du hkra hpe hkan shadik na gaw grau nna yak na rai nga ai..

4. Hkan shadik ra ai Tara lahkawng gaw hpa ta

(i) Karai Kasang hpe tsawra ai

           Anhte ni anhte a shyinggyim myi hte nmu lu ai Karai Kasang hpe tang madun nlu ai tsawra myit ngu ai hte gara hku tsawra lu na rai a ta. Karai Kasang gaw shi hpe anhte a myit kraw lawang mahkra, myit masin mahkra hte myit mang mahkra hte shi hpe tsawra na matu ra sharawng nga ai. Dai hpe yu yang Karai Kasang gaw shi a hkrang sumla hte bung hkra shi galaw hpan da ai anhte shyinggyim masha ni hpe ndaw nhten ai tsawra myit rawng ai salum hte jet ai tsawra myit hte tsawra na hpe hpyi shawng taw ai rai nga ai. Karai Kasang hpe tsawra ai anhte a tsawra myit hpe dingtawk nmai madun tim gawai nna mai madun ai lam ni law law nga ga ai.

- Shi a mungga hpe shani shagu hti let myit sawn sumru ai

- Shi hpe nawku shakawn ai

- Hkam la lu sai chyeju ni yawng a matu chyeju shakawn ai

- Tinang a ra rawng gawng kya ai hte shut lai wa sai mara ni a matu myit malai let hpyi nem tawng ban ai

- Shi kaw matut manoi akyu hpyi ai

- Shi hpe kam sham ai myit, shi kaw manoi manat ai myit grau nna law htam wa na matu hpyi nem ai

- Karai jaw da ai chyeju hte myit dik hkra chye nga nna shi hpe shagrau sha-a ai…lam ni rai nga ga ai

(ii) Htingbu wa hpe tsawra ai

          Anhte shyinggyim asak htum mat ai hpang htani htana asak lu la na matu hpan Madu Karai Kasang hpe tsawra kam sham na ahkyak ai zawn, anhte mungkan ga na asak aprat hta mung Karai Kasang a ra sharawng ai hku hkawm sa ai the Karai Kasang hta myiman lu ai ni tai hkra asak hkrung hkawm sa lu na matu anhte a htingbu wa hpe mung tinang a hkum hpe tsawra ai zawn tsawra ra ai. Anhte nmu lu ai Karai Kasang hpe tsawra nga ai hpe dingtawk nmai madun tim mu lu ai htingbu wa hpe tsawra ai myit hpe gaw dingtawk mai madun nga ga ai. Dai mahkrun ni gaw …

- Madat ya ai

- Akyu hpyi garum ya ai

- Aten jaw nna mung jahta ai..madat mara ya ai

- N-gun jaw ai

- Ra kadawn nga ai hta hkan nna garum shingtau ai

- Lanu lahku ai … lam ni rai nga ai.

          Ndai jep ai Tara lahkawng gaw kaba dik hte anhte ni yawng a matu galoi mung hkan nang hkan sa ra ai Tara rai nga ai. Anhte hte ni htep nna galoi mung mu taw nga ai htingbu wa hpe nlu tsawra nna Madu Yesu hpe sha tsawra ai gaw jet ai tsawra myit n rai nga ai. Dai zawn sha htingbu wa hpe sha tsawra nna Madu Yesu hpe n tsawra ai gaw Madu Yesu yaw shada da ai, Madu Yesu ra sharawng ai tsawra myit n rai  nga ai. Ndai tsawra myit lahkawng gaw anhte a salum hta galoi ma ginrun let nga taw ra ai tsawra myit rai nga  ai. Ndai jep ai Tara lahkawng gaw Jet ai Hkringstan tai na matu ahkyak dik rai nga ai myit dum ga kam sham myit hte magam bungli hpe tatut galaw gun hpai nga ga..

Akyu hpyi saga oh hpan madu  karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.

 

Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw pranwan ladaw hta. ....hkun jahku........ ngu na lanban rai nga ai hti ang ai ja chyum mungga ni gaw chyum mungga daw langai ....pru mat wa ai laika  22:20-26 chyum mungga daw lahkawng htesaloni hpung masha ni hpang de san paulu shagun dat ai laika  langai 1:5-10 kabu gara shiga Mahte 22:34-40

Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law

 

Add new comment

9 + 4 =