Pranwan Ladaw Laban ( 22 ) A, 2023

22nd Ordinary Sunday (Year A)

Hkristu hta tsawra hkungga ai nu wa hpu nau nawku hpung masha  ni ndai laban gaw pra wan ladaw hta hkunlahkawng ngu na laban rai nga ai..

STORY:

 shawng nnan e mabyin lam langai mi hpe shawng tsun dan mayu ai dai gaw Kalang mi  hta Nawku hpung lam hta grai ap nawng shakut ai numsha ma langai nga ai. dai num sha gaw machyi ai masha ni, asak kaba sai gumgai dingla ni, hte  hkum hkrang hta ningra ai ni hpe sa kawan ai hte shanhte hpe shi dang di dang dep ai daram garum ya nga ai num sha rai nga ai. Lani mi hta shi hta mung lahput machyi wa ai majaw tsirung kaw sa madun ai shaloi Tsi du ni gaw shi hpe lahput ga tsi ra ai ngu nna tsun dat ai majaw, lahput ga tsi lajang la ai. Rai timung, shi a lahput machyi ai gaw nmat nna lam pi naw atsawm sha nlu hkawm wa ai.

Dai majaw shi hkum hpe shi myit daw wa ai hte shi a mani sumsai ai myi man mung nnga wa ai myi man nsam hte myit hta e mung nchyi nmu ai lam ni paw pru wa ai da. raitim Lani mi hta shi a myit hpe bai shangang la nna, shi hkam sha nga ai lam ni hpe Jau hpe sa tsun dan na matu Nawku Jawng de rawt sa wa ai. Shi hkam sha ai nga lam ni mahkra hpe jau gaw madat la ngut ai hte  shi hpe jau gaw “Nawku tawn de sa nna Madu Yesu kaw naw wa tsun dan u” ngu nna ngun jaw dat ai. Jau ngun jaw ai hte maren shi mung Nawku tawn de sa nna Madu Yesu hpe wa tsun dan ai da. Hpang shani Jau gaw shi hpe Nawku jawng kaw bai mu ai, dai shaloi rai yang shi a myi man hta yawn ai hte machyi ai myi man nsam hpe n-mu  ai sha shi a myi man kaw myit ngwi simsa taw nga ai hpe mu ai. da Shi gaw Jau hpe mu jang “Wajau, Madu Yesu ngai hpe hpa tsun ai hpe chye ai i?” ngu nna san u ai. Jau mung “Ngai n-chye ai” ngu nna bai htan u ai. Shi gaw Jau hpe bai tsun dan ai “ngai Wudang ntsa e noi nga ai Madu Yesu hpe yu nna ngai a lahput machyi ai lam ni hpe tsun dan taw nga ai shaloi, Madu Yesu gaw ngai hpe “Ngai shani shanang  machyi hkrum nga ai lam gaw nang hta grau sawng nga ai” ngu nna ngai hpe tsun dan dat ai shaloi myit n gun bai lu wa ai”. ngu nna jau hpe bai tsun dan ai da.

INTRODUCTION

na la lu na  Chyum mungga ni gaw “nni nhkri lam ni ngu ai gaw anhte ndai mungkan ga kaw hkawm sa nga ai, anhte ni a asak aprat a daw chyen ni rai nga hte dai nni nhkri lam ni gaw Karai Kasang a hpung shingkang kaw du wa lu na matu lam mung rai nga ai” hpe anhte ni hpe tsun shadum taw nga ai rai nga ai.

 

 Chyum mungga daw langai hta Myi htoi Jeremiah gaw myi htoi htoi ai majaw shi hkam sha ai ruyak jam jau lam ni hte Karai Kasang a mying ningsang a majaw shi hkam sha ai machyi makaw lam ni hpe Karai Kasang hpe aput angun ai lam rai nga ai. Masha ni shi hpe asawng asang galaw ai, yu kaji ai lam ni gaw Karai Kasang a amu bungli galaw ai majaw rai nga ai ngu nna shi hkam sha wa ai. Dai majaw Karai Kasang shi hpe sha ngun da ai amu hpe n kam gun hpai wa tim shi a ntsa kaw nga ai wenyi gaw Karai Kasang galaw sha ngun mayu  ai bungli hpe gun hpai sha ngun nga ai ngu nna shi tsun lai wa sai rai nga ai.

Kabu gara shi ga hta Madu Yesu gaw shi a sape ni hpe shi hkrum sha na nni nhkri lam ni hpe tsun dan ai shaloi Kasa Petru gaw shi a ga hpe nchye na nga ai. Dai majaw Madu Yesu gaw Petru hpe tsun daru sharin nna, Wudang a lam hpe atsawm sha sharin ya nu ai. Madu Yesu gaw sape ni hpe “tinang a Wudang hpe hpai let shi kaw hkan nang na matu saw sha nga ai” lam na la lu na rai nga ai.

daw lahkawng ngu na Roma ni kaw san paulu  shangun dat ai laika hta San Paulu gaw Roma Hpung masha ni hpe “Christian kumla rai nga ai Wudang hpe n-sha mat na matu hte, kaga maigan ni a htung lai ni hku n-nga sa na matu” saw sha ga shadum da ai lam rai nga ai.

          Kabu gara shiga hta Madu Yesu gaw shi a sape ni hpe shi bai du sa wa ai lam hpe atsan sha tsun dan nga ai rai nga ai. Mungkan masha ni, a la taw nga ai Messiah ngu ai Madu gaw nni nhkri hkam nna masha ni e shi hpe sat kau na ra ai. Masum ya shani e, si ai ni kaw na hkrung rawt wa na ra ai nga nna shi tsun dan dat ai shaloi, Petru gaw Madu Yesu a ga hpe n lu hkap la ai lam hpe mu lu nga ai. Dai majaw Madu Yesu hpe shi hku nna dai lam ni hpe n tsun na matu hpyi shawn ai mung rai nga ai.

Petru ra sharawng ai gaw Madu Yesu gaw awng dang lam jaw ai Madu, shanhte ni hpe Roma ni up hkang ai lam hta na shaw la nna Isreala mungdan hpe bai gaw gap ya ai Madu hpe ra sharawng nga ai rai nga ai. daini Anhte ni yawng mung Petru a myit ra sharawng ai hte maren sha Madu Yesu dai hku galaw ya na hpe ra sharawng nga ai ni rai nga ai. Jamjau jamhkau lam ni, ruyak ai lam ni, myit ru myit tsang lam ni rai nga ai, Wudang kandang lam ni hpe n ra sharawng nga ai. Raitimung Madu Yesu a hpang hkang nang ai Christan ni gaw dai Wudang ngu na lam yan ni hpe Madu Yesu zawn gun hpai ra ai. Christian ngu ai a lachyum hpe dai ni na Chyum mungga ni hku nna lachyum shaleng ya nga ai.  

CHRISTIAN NGU AI LACHYUM: loi galu ai hku na bai tsun ga nga yang

Madu Yesu gaw “Ngai hpang de sa wa mayu ai wa kadai raitimung, tinang a hkum hpe nyet kau lu na rai nna, shi a Wudang hpai let, ngai kaw hkan nang ru ga” ngu nna shi a sape ni saw sha ga da ai lam rai nga ai. Madu Yesu a dai zawn saw sha ga ai ga gaw, shi a hpang hkan nang nga ai anhte ni yawng hpe  gara hku shi a hpang e hkan nang ra ai ngu ai lam hpe atsan sha tsun dan taw nga ai mung rai nga ai.

 Dai ni na chyum mungga hpe lam (3) hku nna bai myit sumru yu mai nga ai.

(1)“Shi hpang hkan nang ai ni gaw tinang a hkum hpe nyet kau ra ai”. dai lam hpe Galoi mung anhte chye na da ra ai “hkum hpe nyet ai” gaw “tinang a myit hpe nyet kau ai, tinang a arai ni hpe rap di da kau ai, tinang kaw nna lama ma hpe ga bai kau ai” ngu nna chye na da ai rai nga ai.  Madu Yesu a hpang hkang nang ai ni a matu gaw hkying ten sha gu tinang a myit ra ai hpe “No nkam ai” ngu tsun nna Karai Kasang a myit ra ai hpe “Yes mai sa” ngu ra ai. Madu Yesu zawn Karai Kasang a myit ra ai hpe shawng tawn da nna sak hkrung hkawm sa nga ai rai nga ai. Tinang ai hkum hpe nyet kau ra ai ngu ai gaw Karai Kasang hpe tinang a  prat hta  madung tawn ra ai, shi gaw anhte prat hkrun lam a npawt madung rai nga ai nga nna hkap la da ra ai.

(2) “Shi a hpang hkan nang ai ni gaw tinang a Wudang hpe hpai ra ai”. Dai gaw ap nawng nga ai a majaw lit li ai hpe anhte ni hkap la ra ai lam hpe tsun mayu ai rai nga ai. Christian asak aprat ngu ai gaw ap nawng daw jaw ai prat hkrun lam rai nga ai. Madu Yesu hpe daw jau na matu tinang a tingkyeng myit ra sharawng ai lam ni  hpe kau tawn da ra ai. Madu Yesu a hpang hkang nang ai ni kadai mung Karai Kasang a myit ra ai hpe galoi mung sadi maja nna, tinang a manaw manang htingbu htingbyen  ni a ra kadawn ai lam ni hpe chye na galaw ya  ai. Madu Yesu hpang hkang nang ai ni kadai mung Madu Yesu a majaw nni nhkri lsm ni, jam jau ai lam ni hpe hkap la ra na gaw teng sha rai nga ai. Dai rai yang she, anhte ni gaw Madu Yesu hpang hkang nang ai jet ai sape ni tai wa na re.

(3) “Madu Yesu hpang hkang nang ra ai”. ngu ai gaw Karai Kasang hpe hkap la kam sham sai anhte ni gaw Madu Yesu a hkawm lai wa sai lam hku hkan nang ra ai rai nga ai. Shi gaw anhte ni a matu jet ai kasi kamang mung rai nga ai. Shi hta grau nna jet ai teng man ai masha n nga sai. Shi a hpang hkang nang ai ni gaw kaja wa Karai Kasang kaw na gingdan ai manu jahpu lu na rai nga ai. Tinang a wudang hpai let Madu Yesu a hpang n hkang nang ai rai yang chyawm gaw Sumsing Mungdan de n du lu na rai nga ai.

Anhte ni Madu Yesu a hpang hkang nang na ni rai yang gaw Madu Yesu a Wudang ngu ai lam hpe n mai malap ai. Wudang ngu ai nni nkri yak hkak lam gaw anhte ni a matu hkrat sum ai lam n rai nga ai, anhte ni a matu awng dang ai lam hpe jaw ya ai, hpung shingkang jaw ai, shagrau ai lam lu la shangun ai bai htani htana asak hpe mung jaw ya na hte htani htana asak hkrung ai lam ngu ai de mung lam madun ya na  rai nga ai. Madu Yesu hte Wudang hpe e n mai garan ai zawn Madu Yesu a hpang hkang nang ai ni mung Wudang lam ngu ai hpe n mai garan nga ai. dai majaw Madu Yesu hte rau anhte ni Wudang hpai yang gaw mungkan ga a awng dang ai hta grau nna e htani htana asak lu la na rai nga ai ngu nna Madu Yesu a mungga gaw anhte hpe sha dum ya taw nga ai.

CONCLUSION:

Madu Yesu gaw anhte Christian ni a nga sat nga sa ai lam hte Wudang ngu ai gaw matut mahkai taw nga ai nga nna dai ni na mungga hku nna sharin shaga ya nga ai rai nga ai. Kaga n kam sham ai ni a matu Wudang gaw kaja wa zingri ai lam, jamjau jamhkau lam, hte si ai lam hpe madun ai zawn rai nga tim  Madu Yesu hpe kam sham ai ni a matu Wudang gaw hkye hkrang la ai lam, asak ningnan hpe jaw ai lam, hte awng dang ai lam tai wa sai rai nga ai.

Madu Yesu gaw shi a sape ni hpe “tinang a Wudang hpai let, ngai kaw hkan nang u” ngu nna tsun ai zawn anhte ni yawng hpe mung tinang a Wudang ni hpe hpai nna shi kaw hkang nang matu daini na mungga hku nna hpyi shawn taw nga ai rai nga ai. “Wudang n nga yang gaw Christian aprat mung n nga ai”. Wudang ngu ai hkrun lam lawm yang she Christian aprat gaw jet wa ai hpe mung sha dum ya nga ai. Christian a sari sadang (virtues) ni rai nga ai, n-gaw nwai ai myit, matsan dum chye ai myit, kangka ai myit, teng man ding hpring ai myit, mara raw dat ya hkat chye ai myit, tsawra matsan dum myit ni gaw Madu Yesu hpe kam sham nna tinang a Wudang hpe hpai ai kaw nna, byin pru wa ai sari sadang lam ni rai nga ai. Madu Yesu hpang hkang nang ai Kasa ni mung jamjau jamhkau lam ni, zingri zingrat lam ni hpe hkrum sha lai wa sai rai nga ai. dai sha n ga kaja wa nan mung Madu Yesu a tara lam ni hpe hkaw tsun lai wa sai ni mung rai nga ai. Shanhte mung shanhte a wudang hpe hpai let htani htana asak hpe lu la sai ni mung rai nga ai.

Dai zawn sha, masha law law mung makam masham a matu asak si hkam ai ni mung nga lai wa sai rai nga ai. Jamjau jamhku gade mi hkrum ting tinang a makam masham hpe n gabai ai sha, si ai du hkra tinang a Wudang hpe hpai ai ni mung law law nga nga ai. Dai majaw anhte ni mung tinang a wudang hpe hpai let Madu Yesu kaw hkang nang yang gaw Karai Kasang a shagrau ya ai htani htana asak hpe lu la na rai nga ai. Wudang hpe anhte ni a prat kaw na yeng seng  kau ya na matu n hpyi ai sha, shani shagu anhte ni gun hpai taw nga ai Wudang lam ni hpe hkam jan tawt lai lu na shaman chyeju ni hpe mahtang dai ni Madu Yesu kaw hpyi la nga ga.  yawng hpe karai kasang shaman ya u ga..  

Akyu hpyi saga oh hpan madu  karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.

 

Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw pranwan ladaw hta. ....hkunlahkawng.......... ngu na lanban rai nga ai hti ang ai ja chyum mungga ni gaw chyum mungga daw langai ....yerema a laika 20:7-9.daw lahkawng Roma hpung masha ni hpang de san paulu shagun dat ai laika  12:1-2 kabu gara shiga Mahte 16:21-27

Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law

 

Add new comment

10 + 4 =