Pranwan Ladaw Laban ( 17 ) A, 2023

Mtt 13:44 hta shi lu malu hte hpe dut kau nna ga dachyawk dai hpe mari la wu ai.

Hkristu hta tsawra hkungga ai shiga madat nu wa hpu nau nawku hpung masha ni ndai laban gaw Pranwan Lagaw ( 17 ) ngu na laban rai nga ai.

Chyum Mungga daw langai  1 hkawhkam 3:5.7-12 hta anhte na la lu ai lam gaw na lam "Shawlumon hkawhkam gaw karai kasang a myu masha ni hpe up hkang na matu hpaji byengya hpyi ai lam" rai nga ai. Hpaji byengya ngu ai lam gaw, Kaja ai magam bungli hte Nkaja ai magam lit ni hpe garan ging hka nna kaja ai lam de hkawm sa chye ai  lam hpe tsun ai rai nga ai.

 daw lahkawng ngu na Roma ni kaw San Pawlu shagun dat ai laika 8:28-30 hta "Karai Kasang gaw shi a kasha rai nga ai yesu hkristu a gawng shingyan hte bung na matu, anhte hpe lata san da nga ai. dai zawn San da ai ni hpe shaga la nna dinghpring shangun ai lam" hpe na la lu na rai nga ai.

Kabu gara shiga, Mahte a laika 13: 44-52 hta gaw " Sumsing lamu a mungdan gaw, ga dachyawk hta e makoi da nna, masha mu hkrup lu ai hte, bai makoi da ai sut gan hte bung nga ai. Bai sumsing lamu a mungdan gaw, grai reng dik ai kachyi hpe tam nga ai hpaga la wa hte bung nga ai. Matut nna Madu Yesu sharin ai lam gaw, sumsing lamu a mungdan gaw, nawng hta e kabai bang nna, nga amyu myu hpe magawn la ai sumgawn hte bung nga ai" ndai lam ni hpe e na la lu na rai nga ai.

 na la lu na Ja Chyum mungga ni hpe  bai myit sumru dat ai shaloi  mu chye shangun ai lam gaw karai kasang a mungdan lam ngu ai hpe  rai nga ai. Madu yesu gaw karai kasang a mungdan lam hpe ga shadawn law law hte sharin ya nga ai. 

Chyum mungga daw langai hpe yu dat ai shaloi  Karai kasang gaw Solumon hkawhkam hpe Ngai nang hpe hpa jaw na ra a ta ngu nna san ai lam rai nga ai. Dai ni anhte a prat hkrun lam hta mung, anhte hpe Karai kasang gaw ga san san nga ai. Karai kasang a mungdan lam hpe ra sharawng nga ai kun shing nrai mungkan a pyaw hpa lam hpe rai nga ai kun? bai Karai Kasang sharawng awng ai hte maren  hkawm sa nga ai Kun, shing nrai anhte a ra sharawng ai lam hta e karai Kasang hpe mying bang da nga ai kun? Myit sumru la mai nga ai. mungga hta, na la lu ai hte maren Solumon hkawhkam gaw karai kasang ra sharawng ai hte maren, shi a myu sha ni hpe kaja ai lam de woi awn lu na matu hpaji ningli hpe hpyi ai rai nga ai. Kaja ai hte nkaja ai lam hpe garan ginhka chye ai hpaji ningli ngu ai hpe lu la nna e kaja ai lam de hkawm sa ai lam gaw karai kasang a mungdan lam hpe ndai mungkan ga hta e gaw gap ai lam rai nga ai. 

Chyum mungga daw lahkawng San Pawlu shadum sharin ya ai lam hta Karai Kasang gaw shi a kasha a gawng shingyan hte bung na matu, anhte hpe san da nga ai. dai zawn San da sai ni hpe shaga la nna dinghpring ai lam de hkawm sa nga na matu shadum ya ai lam rai nga ai.  Daini na aten ladaw hta dinghpring ai lam de hkawm sa lu na matu nang ngai grai shakut ra nga ga ai. hpa majaw Amu kaji ni hta dinghpring ai hku hkawm sa wa ai rai yang, karai kasang a shaman chyeju gaw dai wa a ntsa e hpring zup nga na rai nga ai.

San Pra ai Francis De Sales tsun da ai lam hta " Anhte ni yawng gaw ganing re ai prat madang kaw mi du taw nga ai rai tim, hkap la da ra ai lam gaw anhte galaw nga ai magam bungli hta hkan nna san seng Chyoi Pra ai Hkristan arawn alai hte hkawm sa ra nga ai" nga nna n-gun jaw da nga ai. San Pawlu tsun sharin ya nga ai mung, Karai Kasang gaw anhte hpe shaga la nna dinghpring ai lam hku nna hkawm sa nga na matu  anhte yawng gaw shakut ra nga ai nga nna tsun shadum ya ai..rai nga ai Karai Kasang a npawt nhpang lam hpe Kadai mung nchye lu ai zawn Karai Kasang a tsawra matsan dum myit gaw anhte a ntsa e galoi aten kaw nna nga ai lam hpe kadai mung nchye lu nga ai. bai Karai kasang gaw shi a sumsing mungdan chying hka hpaw let anhte hpe galoi mung hkap tau la nga ai.

daini na Madu a kabu gara shi ga hpe myit sumru la mai ai lam gaw, sumsing mungdan gaw grai manu dan ai lam re hpe chye na shangun nga ai. Hpa majaw nga yang, Madu Yesu a ga shadawn ni hpe yu nna hkap la lu mai nga ai. bai kabu gara shiga hpe yu dat ai shaloi Israella Myusha ni gaw Manu dan ai Ja sutgan ni hpe ga kata hta lup da chye nga ai hpe mu lu ga ai. Mungdan nsimsa ai aten ladaw hta e lagut, damya hpyen ni hpe hkrit ra ai majaw mung rai nga ai. dai majaw shanhte lup makoi da ai hpe Mung masa bai pyaw wa ai a ten ladaw hta bai htu shaw la chye ma ai mung rai nga ai.

  Story

Lani mi hta la shabrang manga gaw bungli tam hkawm nga yang, hkau na galaw nga ai dingla wa gaw shanhte marai manga hpe bungli jaw na lam tsun wu ai. dai hku nna Shawn nnan e hpun langai mi hpe kran nna ju hpun galaw na matu hta sha ngun ai rai nga ai. Shaloi shanhte ni langai hpang langai mabyin manghkan a myu myu tsun let a put a ngun nga nna hpun hpe nkam kran nga ma ai. Langai mi gaw, nhtu ndai ai, laga langai mi bai rai yang hpun gaw grai magaw ai, Langai mi gaw, Hpun grai ja ai, Langai mi gaw jan grai Ja ai. Ja htum na la wa gaw bai baw machyi ai nga nna tsun nga ma ai. Rai tim Jahtum na la shabrang wa gaw shi a ndai la ai nhtu hpe Garang nna, dingla wa shangun ai hpun hpe kahtam daw ya ai. Kade nna yang salat pru wa nna shi a baw makret machyi ai mung mai mat nna dai hpun hpe daw kau lu ai. Jahtum e gaw dai hpun hpe daw kau ya ai la shabrang sha bungli lu mat ai.

Ndai mabyin mawng mwi hpe yu yu ai shaloi, daini na la sai jachyum mungga hpe mung myit dum la shangun nga ai. Karai Kasang a sumsing mungdan gaw grai manu kaba la nga ai. Majoi hte sha, grai loi ai hku nna lu la mai ai lam gaw nrai nga ai hpe bai myit la lu shangun nga ai..bai nna karai kasang gaw kaja ai hte n kaja ai masha ni hpe rau ndai mungkan ga hta rau sha sak hkrung nga shangun da ai lam hpe mung mu lu nga ai. hpa majaw ta karai kasang gaw masha ni hpe myit galu hkam sharang nna tsawra nga ai hte maren anhte ni mung dai hte maren galaw na matu ra sharawng nga ai..

n kaja ai masha ni gaw kaja ai masha ni a lapran e masat da ai aten htum ai du hkra sak hkrung hkawm sa nga na matu madu gaw shi a nyan marai hte chye na hkawn hkrang ahkaw ahkang jaw da ya ai..tsun mayu ai hta shakut ai lam n nga yang hpa awng dang ai lam mung n lu ai zawn agung alu ngu ai n nga yang mung anhte a dakring da lang myit marai ni rawt jat wa ai lam n nga na re..bai .agung alau hkrum wa ai ten madu a jet ai hpyen ma langai hku nna n hkrit n kang ai hte gwi gwi yeng seng ai nga yang hpring zup ai lam de du wa lu ai zawn karai kasang a shakawn shagrau ai kumhpa hpe munghkam lu la na re..

dai majaw san Gregory tsun da ai n kaja masha ni hte rau kanawn mazum nga ai gaw teng man ai masha ni a matu san seng chyoi pra ai lam de du shangun nga ai...sumsing mungdan lam a matu hkawm sa taw ai ten hta loi ai lam chyu sha gaw nrai na re.. bai kaja ai masha ni hte sha hkrum katut ra  na ngu ai lam mung nrai nga ai. amyu myu zingri ai gunglau ai ni hte mung hkrum katut na re ..raitim ndai zawn lam ni mahkra hpe

 Madu yesu shi hkum nan mung anhte a shawng e hkrum sha let Udang ntsa e si hkam nna anhte a matu sumsing sut gan hpe bai jaw ya lai wa ai rai nga ai. Ndai lam ni hpe myit dum let anhte hkawmsa nga ai prat hkrun lam hta mung mayak manghkang ni law law nga na gaw teng sha rai nga ai, ndai mayak manghkang lam ni hte hkrum katut wa yang  myit htum mat ai lam nre ai sha galu kaba ai lam de du lu na matu lakang htan ya nga ai hpe myit dum let shakut ra nga ga ai.

Sumsing sut gan hpe lu la na matu karai kasang gaw anhte yawng a ntsa e atsam ningja jaw bang da ya sai mung rai nga ai.  2 Corinthian 12:9, Nye a chyeju ni gaw na ntsa e, Ramla nga ai. Karai Kasang gaw anhte dang ai kandang hpe sha hpai shangun nga ai hpe galoi mung myit n-gun la mai nga ai. Manu dan ai Ja Lung seng hpe Lu na matu gaw, atsam marai dat nna htu tam ai rai yang she, manu dan ai ja lung seng hpe mu tam lu ai rai nga ai. Dai hte maren anhte Christian ni yawng a (ultimate goal) Ja htum ngu na pandung gaw karai kasang a ngwi pyaw ja mungdan hte sumsin sutgan hpe lu la na lam sha rai nga ai. Dai majaw daini na madu tsun ai mungga hpe madat la lu sai zawn .tsun lai mat sai mawng mwi hta lawm ai hpang jahtum na la shabrang ma zawn, ndai ai nhtu hpe karang let, anhte hkrum wa na agung alau lam ni hpe dan di kau let karai kasang a mungdan lam hpe gaw gap sa wa lu u ga Karai Kasang  kaw Akyu hpyi let sit sa wa ga ngu n-gun jaw dat lu nngai.

yawng hpe karai kasang shaman ya u ga

Akyu hpyi saga oh hpan madu  karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n-gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.

Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw Pranwan Ladaw Laban ( 17 ) ngu na laban rai nga ai. hti ang ai ja chyum mungga ni gaw chyum mungga daw langai ... 1 hkawhkam 3:5.7-12 chyum mungga daw lahkawng..Roma hpung masha ni kaw San Pawlu shagun dat ai laika 8:28-30 kabu gara shiga Mahte laika 13: 44-52

Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law