Pranwan Ladaw IV, A, 2023 - A Lu Ai Lam Hte Seng Ai Mungga

Pranwan ladaw (4)

A Lu Ai Lam Hte Seng Ai Mungga

Hkristu hta tsawra ai nu wa hpunau nauna ni e, ndai laban gaw Pran Wan Ladaw hta (4) ngu na laban rai nga ai.

Lai sai laban hta gaw Mawshe a tara ni hpe n hkan shatup ai Galilee masha ni hpe Madu Yesu hkaw tsun ai lam na lu ga ai.

Ndai laban hta gaw Karai Kasang a ja mungdan shang lu na matu matsan hkam ra ai. Karai Kasang a ja mung dan de shang matu Madu Yesu saw shaga ai hpe matsan mayan re ai ni chyu sha hkap la ma ai. Lu su ai ni gaw dai hpe n hkap la ma ai.

Zephaniah gaw matsan dik masha ni a matu shimlam jaw na hpe ndau shana ai.

Myihtoi kaji (14) nga ai hta na Zephaniah gaw jahku (9) ngu na Myihtoi kaji wa rai nga ai. Shi gaw Yerumiah n paw pru shi ai shaning kaji aten hta Yerusalem mare kaw hkaw tsun lai wa ai.

Shi a prat hta Israel myusha ni a wenyi lam masa gaw myit n pyaw hpa kaba rai nga ai. (1) Hpara sumla ni hpe nawku ai lam chyam bra wa ai; (2) Daru magam ahkang aya lu ai ni gaw myit masin kaja ai ni hpe yu shut, na shut, myit shut lam ni byin hkra kyang lailen ni hpe jahten ya ma ai; (3) lu su sahti ni gaw matsan ai ni hpe lam amyu myu hte dip lu dip sha ma ai; (4) grau sawng ai gaw, ningbaw ningla ni Yaweh Karai Kasang hpe dan dan leng leng asawng asang di ma ai.

Myihtoi Zephaniah gaw Yaweh Karai Kasang a nhtoi du wa na re lam ndau ai. Dai nhtoi hta Yerusalem hte ningbaw ningla ni, shanhte a shut hpyi mara a majaw dam hkam ra na, jeyang hkrum na ra ai.

Dingman dinghpring, myit san seng ai ni a matu chyawm gaw dai shani gara hku lawt lu na re lam tau nau tsun shana da ai. Shanhte gaw Karai Kasang hpe myit mada ala nga mu ga; Madu gaw shanhte hpe hkye hkrang la na ra ai; hkye la na mung myit sharawng ai. Shanhte a gawng kya ai lam a majaw mara lu ma ai hpe myit dum let shagrit shanem ai myit hte Karai Kasang hpe kam hpa ma ai. Shanhte gaw hpu nau nau na ni hte tara rapra ai hku kanawn mazum ma ai; daru magam ahkang aya lu ai ni zawn n rai ma ai; shanhte gaw kadai hpe mung dip lu dip sha ai n nga ma ai.

Yaweh Karai a mying ningsang hte sadi jaw shadum jahprang ai hpe hkan shatup ai kadai hpe raitim dingbai dingna n jaw lu ai lam Myihtoi shadum da ai. Yaweh a nhtoi du wa ai shani hta Yerusalem gaw jahten kau hkrum nna, ningbaw ningla ni, lu su sahti ni, hpaji chye dum ai ni, yawng hpe mayam hku woi la ai hkrum na ra ai lam tau nau shadum da ai.

Matsan mayan re ai ni chyu sha ngam nga na ra ai; matsan hkam ai lam mahtang shanhte hpe mayam hku woi la hkrum ai kaw nna lawt lu na ra ai. Bai nna, mayam prat kaw na tinang mungdan de bai wa lu ai shaloi mung, maigan mungdan hta masan sa ai ni gaw tinang buga de bai htang wa na ninghkap ma ai. Yerusalem de bai wa ai ni yawng ngu na daram gaw matsan ai ni rai ma ai.

Buga de bai du wa ai shaloi, shanhte gaw shawng ningnan Nawku Htingnu hpe bai gaw gap ma ai; dai hpang mare jarit nhpan ni hpe kum ma ai; dai lapran hta makam masham shamu shamawt ai lam langai byin pru wa ai. Yak hkak ai lapran Yaweh Karai a hkang da tara lam hpe hkan shatup na myit sharawng ma ai. Du sa na ra ai Messaiah Hkyela Madu hpe myit mada ala nga ma ai.

Kaja wa sha Yesu Madu shanhte a lapran shangai wa ai. Yaweh Karai hpe kam hpa ai lam kaman lila n tai ai.

Yesu Madu gaw matsan  jam jau ai lam hpe n ra sharawng ai; raitimung, matsan ai ni hpe gaw tsaw ra ai.

Yesu Madu gaw matsan mayan hkrum ai lam ni, hkrap ngu hkrap ngoi hkrum ai lam ni, zingri zingrat hkrum ai lam ni kaja ai ngu tsun mayu ai n rai nga ai; Madu gaw masha hkum shagu hpe matsan hku kaw na shalawt ya na, prat a matu ra kadawn ai lam yawng lu la na myit ra ai; n hkum n tsup ai lam hte kaw si hpang gara ai lam hpe Karai Kasang galoi mung, gara hku mung n byin shangun mayu ai; anhte shinggyim masha ni mahtang mara galaw shut nna shabyin ai rai ga ai.

Raitimung, Yesu Madu gaw matsan mayan re ai ni hpe tsaw ra ai; sumsing mungdan shang lu na matu matsan jam jau hkrum ra ai lam hkaw tsun da ai. Shawng kaw tsun ai ai hte maren matsan ai lam hte gawng kya ai lam gaw Karai Kasang a myit sharawng ai n re ai ngu tsun ai ga hte n htan n shai ai, hti htang n tai ai.

Chyum Laika hta Yesu Madu tsun mayu ai matsan ai lam hte seng ai lachyum hpe chye na lu na matu hka ja ga.

Palestine ginra gaw rap rap ra ra garan la da ai rai tim, gawng ngwi ngwi rai n law masha ni dai lamu ga hpe madu la lu ma ai. Dai masa hpe koi yen lu na matu Mawshe gaw lamu ga hpe galoi n dut na matu matsun da ai. Shaning (50) ning na wa ai shaloi mi na lamu ga madu hpe Jubilee shaning hta bai ap ra ai lam Jaw Jau 25:28 hta tsun da ai.

Raitim, dai tara hpe hkan shadik ai ni gaw grai shau ma ai. Dai majaw gade n na yang lamu ga lawm malawng hpe n law masha ni sha madu la ma ai. Matsan ai ni gaw lu su sahti ni a matu shani shagu nchyang tai wa ma ai. Mt 20:1-16 hta ga shadawn hte Madu tsun da ai hpe mu lu ga ai.

Yaweh Karai a matsan masha ni" shing n rai, "matsan ai mung masha ni" nga nna Chyum Laika hta tsun da ai gaw lamu ga madu n re ai matsan masha ni hpe tsun ai rai nga ai.

Shanhte myit kaji ai rai yang, Yaweh Karai hta kam hpa nna Yaweh Karai mung, Myihtoi hku nna, shanhte hpe makawp maga ya na lam tsun da ai.

Yesu Madu gaw matsan ai ni alu ma ai ngu tsun da ai.

"Wenyi hta matsan mayan re ai ni alu ma ai, hpa majaw nga yang, sumsing mungdan gaw shanhte a mungdan rai nga malu ai" (Mt 5:3).

Ndai alu ai lam gaw alu ai lam ni yawng hta na shawng hta hkam la lu ai alu ai lam hku nna Chyum Laika sara ka bang da ai hpe mu lu ga ai.

Yesu Madu gaw masha yawng madu lu ai lam law ai hte n law ai nga ai raitim, matsan mayan re ai lam hta myit dik chye na matu shadum da ai. Karai Kasang hpe kam hpa nna shinggyim masha a garum ai hte madu lu ai lam hpe myit n manoi ai rai yang matsan ai.

Shanhte gaw tinang a gawng kya ai lam hte mara hpe hkap la nna Karai Kasang a matsan dum myit hte mara dat hkyamsa ya na hpe myit marin ai ni rai ma ai. Karai Kasang n lawm yang n mai ai, grau nna gaw Karai Kasang chyu sha hkye la lu ai ngu hkam la ma ai. Shanhte madu ai yawng: asak, hkam ja lam, machye machyang, sut gan arung arai amyu myu gaw Karai Kasang jaw ya ai kumhpa rai nga ai majaw dai lam ni yawng a matu Karai Kasang hpe chyeju dum chye ai hte tinang n lu n su ai a majaw myit tsang ai lam mung n nga ma ai. Si hkrung si htan lam a madu Satan hte seng ai sut gan hpe myit n marin ai. Sumsing sut gan hpe marin ai wa rai nga ai.

"Yawn hkyen hkrum ai ni gaw a lu ma ai; hpa majaw nga yang, Karai Kasang shanhte hpe shalan shabran na maru ai" (Mt 5:4)

Si mani ai ngu ai ga si gaw matsan mayan ai ni shagrit shanem ai hpe tsun ai. Lu su ai ni gaw madu da lu ai sut gan hte mung, arawng aya a majaw mung gumgrawng gumtawng chye ma ai, arawng mala chye ma ai. Karai Kasang a hkye hkrang la lam hpe pat shingdang lam byin shangun chye ma ai.

Yuda masha ni a matu lamu ga ngu ai gaw ga sadi tawn da ai lamu ga (Palestine) hpe tsun ai. Yesu Madu a nam mali/zaibru jang ngu ai nni nkri hkam ai lamu ga hta hkawm ai ni gaw sumsing mungdan madu lu ma ai.

"Myit sumnung ai ni gaw a lu ma ai; hpa majaw nga jang, shanhte gaw Karai Kasang ga sadi jaw da ai lamu ga hpe madu lu na mara ai" (Mt 5:5).

"Karai Kasng a myit ra ai hte maren hkan sa galaw na matu ra sharawng dik ai myit ngu ai ding hpring ai hpe kawsi hpang gara ai ni gaw a lu ma ai; hpa majaw nga yang, Karai Kasng gaw shanhte hpe myit dik hkru kat hkra jaw na maru ai" (Mt 5:6).

"Masha kaga ni hpe matsan chye dum ai ni gaw a lu ma ai; hpa majaw nga yang, Karai Kasang shanhte hpe matsan dum la na ra ai" (Mt 5:7).

"Myit masin san seng ai ni gaw a lu ma ai; hpa majaw nga yang, shanhte gaw Karai Kasang hpe mu lu na maru ai" (Mt 5:8).

"Ngwi pyaw simsa lam a matu galaw gunhpai ai ni gaw a lu ma ai; hpa majaw nga yang, shanhte hpe Karai Kasang a kasha ni, ngu nna shamying na maru ai" (Mt 5:9).

"Karai Kasang a myit ra ai lam hte maren galaw ai majaw zingri zingrat hkrum ai ni gaw a lu ma ai; hpa majaw nga yang, sumsing lamu a mungdan shanhte a mungdan rai nga malu ai" (Mt 5:10).

Shanhte madu la lu ai mungdan hpe kadai mung la kau ya n lu ai. Shanhte ni zingri zingrat hkrum ai majaw myit kaji ai kaw nna kabu pyaw lam lu la na ma ai. Shanhte ni matsan jam jau hkrum ai shaloi, Karai Kasang gaw shanhte hpe shalan shabran ya ai wa rai na ra ai.

Sumsing mungdan hta shanhte hkam la lu na kumhpa gaw arung arai n re ai; Karai Kasang hpe hkum nan rai nga ai. Sumsing mungdan madu lu ai lam gaw Karai kasang hpe madu lu ai hpe tsun ai rai nga ai.

A lu ai lam matsat (8) hte gaw shawng na a lu ai lam hta lawm ai. Teng sha matsan ai ni gaw tinang a gawng kya ai lam hpe dum shai yin la nna Karai Kasnag hpe hpring tup kam hpa ai.

Shanhte gaw si mani ai, matsan dum chye ai, myit san seng ai, htingrai htingrat chye ai, prinem htingram chye ai ni rai ma ai.

Anhte a mahkrum madup hte maren Yesu Madu gaw matsan ai lam hpe alu ai lam de galai shai ya ai.

Chyum mungga daw langai hta, matsan ai Israel masha ni gaw lu su sahti ni hta grau nna chyeju hpring ma ai. Yesu Madu hpe madat mara ai ni gaw chyeju hpring ma ai. Shanhte gaw Madu hpe hkap la nna sumsing mungdan hpe mung hkam la lu ma ai.

Chyum mungga daw lahkawng hta San Pawlu gaw Hkristu Madu shaga la ai lam gaw kaga masha ni hta yu kaji hkrum ai majaw re lam madi madun da ai. Kaga masha ni hta grau kaja ai majaw n re ai; shanhte a matsan mayan re ai a majaw karai Kasang hpe kam hpa nna Hkristu hta kam sham ai majaw rai nga ai.

Akyu hpyi saga

 Wa Karai e, nang Madu hta kam sham nna, hpu nau wa a matu myit tau ya let tinang hkum hpe ap nawng shakut ai majaw matsan mayan hkrum ai raitim, dai matsan mayan lam hpe hkam jan lu na, hkap la lu na chyeju hte sumsing chyeju anhte hpe jaw ya rit. Anhte a madu Yesu Hkristu a marang e hpyi nem nga ga ai. Amen.

Hkungga tsawra ai kanu kawa tara hkaw sara sarama ni e, ndai laban gaw Pranwan ladaw hta 4 ngu na laban rai nga ai.

Hti ang na ja chyum mungga ni gaw

Chyum mungga daw   (1)  Ezakhiel 2:3, 3:12-13

 Chyum mungga daw  (2)  1Kor 1:26-31

Kabu gara shiga                  Mt 5:1-12

Ndai Ja Chyum Mungga ni hpe hti nna hpawtni na nawku daw jau lamang hpe woi awn nga ga!