Pranwan Ladaw 2, A, 2023 - (Hkyehkrang la ai hpe dingbai dingna byin shangun ai "Shut hpyit Mara")

2 Pranwan Ladaw, A, 2023

Hkyehkrang la ai hpe dingbai dingna byin shangun ai "Shut hpyit Mara"

Hkristu hta, tsaw ra ai nu wa hpu nau ni e, hpawtni gaw Pranwan Ladaw hta (2) ngu na laban rai nga ai.

Yesu Madu gaw Karai Kasang a Kabu Gara Shiga gun sa ya ai wa rai nga ai: shinggyim masha yawng hpe hkye hkrang la na lit magam gun hpai na hte shut hpyit mara ni kaw na shalawt ya nna chyeju hte simsa lam jaw ya na wa rai nga ai. Yesu Madu a magam bungli matut gun hpai na matu Karai Kasang anhte hpe saw shaga nga ai.

Yaweh Karai a shangun ma

Is 42:1-9; 49:1-6; 50:4-11; 52:13-53:12

Ya tsun mat sai chyum daw ni gaw "Yaweh Karai a shangun ma mahkawn Mangwi ni" ngu shamying ai. Yaweh karai "nye a shangun ma" ngu tsun da hkrum ai wa a lam Myihtoi Isaiah hku nna tsun da ai majaw shamying ai rai nga ai. Myihtoi Isaiah tsun da ai "Yaweh Karai a shangun ma" gaw Yesu Madu rai nga ai hpe kade n na yang chye lu na rai nga ai.

Shi gaw shi a lit magam hpe gun hpai ai a marang e Yaweh Karai Kasang hpe kaba la ai hpung shingkang/dagu hpe jaw ya ai shangun ma rai nga ai.

Yaweh Karai gaw shi a shangun ma (Yesu) hpe, kaga masha kadai mung n hkam la yu shi ai, n hkam la lu ai, hpung shingkang hte shagrau ya ai.

Shangun ma a lit magam gaw Israel myusha ni hpe sha n re, mungkan shinggyi masha yawng hpe Yaweh Karai Kasang hpang de bai shaga woi wa na matu rai nga ai.

Karai Kasang, Isaiah hpe tsun shangun ai "Yaweh Karai a shangun ma" lam gaw Yesu Madu hpe madi nna tsun ai, kaga masha hpe mung madi nna tsun ai.

Ndai hte seng nna asan sha chye na da ra ga ai. Mabyin masa lam langai ngai hpe raitim, marai langai ngai a lam hpe raitim, tsun ai shaloi, anhte tsun mayu ai gaw langai hpe sha, mabyin langai hpe sha tsun ra ai.

Karai Kasang hta langai sha n re ai lachyum ni shalawm lu ai hpaji atsam nga ai. Chyum daw langai gaw shaning law law tsan gang mat sai masha, shing n rai, mabyin lam ni hpe lachyum shalen ya lu ai.

Isaiah hpe Madu tsun shangun ai "Yaweh Karai a shangun ma" lam gaw kaning re ai shangun ma hpe tsun mayu ai rai kun?

Chyum laika daw langai hpe hti sumru yu yang, Yaweh Karai Kasang a shangun ma lam tsun ai hta shi hkum nan a lam tsun ai gaw mau na zawn rai nga ai.

"Kanu a hkritung kaw nna nan" (Is 49:1) lata la hkrum ai.

Shi gaw Karai Kasang tam nga ai shiga gun wa tai na jin jin rai nga ai. "Ngai nang e nga nga nngai, ngai sa na nngai, ngai hpe shangun dat e! (Is 6:8).

Yuda masha ni hpe sha n rai, shinggyim masha yawng hpe hkye la na lam ndau na matu, Karai Kasang shangun dat ai ni hta na shawng ningnan lang shangun dat hkrum ai wa gaw Myihtoi Isaiah rai nga ai. Mungkan htum ten du hkra nhtoi shingkang langai hpe kam sham ai wa rai nga ai.

Yerusalem hte grai tsan ai kaw hkaw tsun ai Isaiah a sharin shaga lam gaw dai ni ten du hkra lam matsun langai rai nga ai.

Israel myusha ni mung, wuhpung ni hku, Karai Kasang a masin hta, Yaweh Karai a shangun ma rai nga ai.

Karai Kasang Israel myusha ni hpe myiman pa shangun ai ahkyak da ai majaw lata la hkrum ai shanhte myu ni sha hkye hkrang la hkrum na ngu hkam la lai wa ma ai. Kaga ni yawng gaw hten run mat na ngu hkam la ma ai.

Raitim, Karai Kasang gaw Israel myusha ni hpe jai lang nna mungkan hta teng man ai Karai hte du sa na ra ai Hkye la Madu hta kam sham myit shanhte hta shangang shakang ya nna, kaga myusha ni hpe mung dai makam jaw na shangun dat ai.

Israel myu ni ga sadi n dung ma ai rai tim, Karai Kasang gaw shanhte hpe, nsin chyip re ai mungkan ga hta nhtoi tai shangun ai. "Nya a shangun ma, Israel" ngu Krai Kasang chyahkring hkring tsun lai wa ai (Is 41:8; Lk 1:54).

Myithoi Isaiah hpe Karai Kasang tsun shangun ai "Yaweh Karai Kasang a shangun ma" ngu ai gaw "Hkye la Madu Yesu hpe madung tsun mayu ai gaw rai nga ai. "Maigan amyu ni a man e na a myit ra ai lam shadan dan na nhtoi" (Lk 2:32), "Dai nhtoi gaw mungkan ga de du sa nna, masha nlang hte a ntsa e jahtoi ya ai nhtoi majing rai nga ai," (Yh 1:9).

Ndai myihtoi ga gaw Yesu Hkristu du sa ai hte sha gaw n ngut kre shi ai.

San Pawlu gaw shi hkum hpe shi, Myihtoi hkaw tsun ai "Yaweh Karai a shangun ma" hku nna hkap la ai, mu la, yin la ai.

Kanu a hkritung kaw nna nan, Myihtoi Isaiah zawn lata la hkrum ai (Gal 1:15) ngu hkam la da ai.

Hkristu Madu a shangun ma, hku nna hkam la da ai (Rom 1:1; Phi 1:1).

Tsan tsan kaw na tara maigan myusha ni hpang de sasana galaw ai (Kasa 22:21)

San Pawlu hpe sha n rai, anhte yawng gaw makau grupyin hpu nau ni a matu shangun ma hte nhtoi tai na matu Karai Kasang sharawg awng ai.

Karai Kasang gaw, mungkan ga garai n lat shi ai kaw nna nan, anhte hpe, Hkristu a mying ningsang hta lata shaga la sai (Ephe 1:3-14).

Nawku Hpung hte Hkristan hpung masha shagu hpu nau ni hpe Karai Kasang hpang de woi sa ai nhtoi tai nga ra ai.

Mungkan masha ni hpe hkye hkrang la na wa gaw Madu Yesu re ngu madi madun ga ai raitim, Yesu a hkye hkrang la magam hta Myihtoi ni, Israel myusha ni, Nawku Hpung hte anhte nawku hpung masha ni yawng hpe mung dai magam hta shang lawm gun hpai na saw shaga nga ai re.

Anhte a grupyin na masha ni hpu nau ni hkye hkrang la hkrum u ga matu garum ya ai a marang e tinang hkum nan a hkye hkrang la lam mung hpring tsup wa ai.

Mara gaw Karai Kasang a hkye hkrang la masin hpe dingbai dingna tai ya ai.

Ningpawt Ninghpang laika hta, Adam yan Eve gaw Karai Kasang a masin hpe ninghkap ai, n madat n mara ma ai, dai masa hku nna hkye hkrang la lam hpe dingbai dingna shabyin ma ai lam hti la lu ga ai.

Shan a mara gaw prat galu gang sharen da ai tai nga ai. "Masha langai mi a jaw e yubak mara gaw ndai mungkan de shang wa nna, dai yubak a majaw si hkrung si htan ngu ai byin pru wa sai; de a majaw si hkrung si htan gaw masha amyu baw shagu hta chyam bra shang wa sai. Hpa majaw nga yang, masha shagu gaw sut hpyit mara galaw ma ai" (Rom 5:12).

Myihtoi Isaiah hte rau Myihtoi shagu, kasa ni, san pra ai ni, dinghpring dingman ai ni, kadai raitim, Karai Kasang hpe kalang n rai law law lang shut lai wa ma ai rai nna dai shut hpyit mara a matu myit malai lu tawng ban ra na ma ai. Yawhan tsun ai hte maren teng nga ai. "Anhte yubak n lu ga ai, nga nna tsun ga yang gaw, anhte a hkum hpe anhte masu hkalem kau ga ai rai nna, teng man ai lam anhte hta n rawng ai ni rai saga ai" (1Yh 1:8).

Tsun ga nga yang, mara gaw Karai Kasang a tara lam hpe tawt lai ai rai nga ai. Grau sawng ai tawt lai ai rai yang mara kaba grau ai. Hkristan langai mi a matu Karai Kasang a tara hpe tawt lai ai gaw, mung shawa masha langai mungdan Asuya tara hpe tawt lai nna mara lu ai zawn sha rai nga ai.

Hkrat shadawn gaw n mai ai. Shai hkat ai lam kaba nga nga ai. Mara gaw Karai Kasang a matsan dum lama hpe ninghkap ai rai nna, anhte a hkye hkrang la lam hte nhtan shai ai.

Kadik kaw hkrat maw ai masha langai shi a lata hpe kawa ai rai yang shi hkum a asak dingbai dingna nga na gaw teng sha rai nga ai. Mara hta hkawm ai gaw dai hte maren sharai nga ai.

Kadai wa mi anhte hpe mara hta na shalawt ya lu na kun?

"Yu mu, Karai Kasang a sagu kasha, mungkan mara la kau ya ai Madu rai nga ai" (Yh 1:29).

Yawhan Batista gaw Yesu hpe "Karai a sagu kasha" ngu shingdaw ga hte madi madun da ai. Yawhan a hpang hkan ni hkum nan dai ga hpe hkrak tup n chye na lai wa ma ai.

Karai Kasang matsun ga hte maren, jahpawt hte shana daw shagu sagu kasha langai mi hpe Yerusalem Nawku Htingnu hta Israel myusha ni a mara matu Mawshe hkungga nawng jau ya lai wa ai (Pru Mat Wa Ai Laika 29:38-42).

Paska poi hta, Yuda kun dinghku langai hpra a matu, Paska htung lai hte maren lu sha na matu sagu kasha hpe hkungga nawng jau ra ai. Egutu na Pharol hkawhkam a mayam prat kaw nna shanhte a dum nta chyinghka hta sai chya da ai a marang e lawt lu wa ai mabyin hpe bai myit dum na matu rai nga ai (Pru Mat Wa Ai 12:1-14).

Yawhan Baptista a ga hpe madat na la, sumru la ai ni gaw Yesu Madu gaw Israel myusha ni hpe hkye hkrang la na sagu ni hte matut manoi ai lam nga ai hpe chye na da ma ai.

Israel myusha ni hkungga nawng jau lai wa ai sagu a asai gaw mara hta na shalawt ya n lu ai. Karai Kasang a hkungga gaw dai mara kaw na shalawt ya ai.

Prat hte prat hkungga nawng jau lai wa ai sagu hkungga gaw hkye la Madu Yesu hpe madi madun ai rai nga ai. Madu Yesu a asai gaw shinggyim masha ni hpe mara hta na shalawt ya ai Karai Kasang a sagu kasha majing rai nga ai.

"Nanhte a kaji kawa ni kaw na hkan dagraw la ai manu n rawng ai asak hkrung lam a arawn asam hta na nanhte hpe hpa baw hte galai hkrang la sai lam nanhte chye nga myit dai. Dai gaw jahten sharun jaw lu ai ja gumhpraw zawn re ai arai lama ma hte n rai. Ana n kap, ra  n rawng ai sagu kasha hte bung ai hpu la ai Hkristu a asak hpe nawng ya kau ai hku nna, hkye hkrang la ai lam rai nga ai" (1Ptr 18:19).

Kashin kamun chyeju kumla gaw anhte a mara hpe jahten kau ai, shatsai kau ya ai.

Mara raw sakramentu, Chyoi Pra Hkum sakramentu hte kaga sakramentu chyeju kumla ni a marang e mara dat hkyamsa hkam la lu ai, hkye hkrang la hkrum lu ai.

"Sat kau hkrum ai Sagu Kasha gaw, hpung dagu, sut gan, hpaji atsam, n-gun lagaw, arawng sadang, hpung shingkang hte, shakawn kungdawn ai hpe hkam la ging nga ai law" (Shingran 5:12).

Akyu hpyi saga:

Wa Karai Kasang e, Hkyehkrang la ai hpe dingbai dingna byin shangun ai "Shut hpyit Mara" ni hpe koi yen kau lu na chyeju jaw ya rit. Anhte a Madu Hkristu a marang e hpyi nem nga ga ai.

Hkristu hta, Hkungga tsawra ai kanu kawa tara hkaw sara/num ni hte nu wa hpu nau ni e, hpawtni gaw Pranwan Ladaw hta (2) ngu na laban rai nga ai.

Hti ang ai chyum mungga ni gaw

Chyum mungga daw (1) Is 49:3, 5-6

Chyum mungga daw (2) 1Kor 1:1-3

Kabu gara shiga  Yh 1:29-34

Ndai Ja Chyum Mungga ni hpe hti nna hpawtni na nawku daw jau lamang hpe woi awn nga ga!