Pran Wan Ladaw Laban (23) @ 33rd Sunday In Ordinary Time (5 SEPT 2021)

Myihtoi Esaia a myihtoi ga dik wa ai lam

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (23) ngu na laban rai nga ai.

Karai Kasang gaw shinggyim masha shagu hpe hkyela na matu aten shagu magam galaw taw ai. ndai laban na chyum daw ni a Kabu Gara Shiga hpe kadun ai hku ginchyum dat tsun ga nga yang, Karai Kasang gaw shinggyim masha ni hpe matut manoi hkye hkrang la ai na amtu masin jahkrat da ai. Madu gaw lai sai ten hta ga sadi tawn da ai hte maren byin tai wa shangun ai.

Mungdan shinggan de mayam yam ra ai Yuda Myusha ni

Yuda ni a mungdan hpe hpyen ni e chyahkring hkring shang gasat ai hpe mu lu ga ai. Dai zawn byin ai gaw shanhte ni Karai Kasang a ntsa ga sadi n dung ma ai majaw rai nga ai. Shang gasat nna awng dang shagu Yuda myusha ni hta na n kau ni hpe woi la mayam shatai ai hpe mung mu lu ga ai.

Hkristu n shangai shi ai BC 528 daram aten hta hpyen ni e shang gasat ai mabyin gaw Yuda ni a matu sawng dik htum rai nga ai. Babylon hkawhkamm gaw Yerusalem mare hpe zing la ai rai nna, Yerusalem hte nawku htingnu hpe jahten sharun kau ai hte Yuda law malawng hpe mayam shatai la na matu woi mat ai.

Daini na anhte ni law malawng gaw hpyen gasat nna mayam shatai la ai lam hpe atsawm n chye na na ga ai.

Hpyen ni mungdan hpe zing la ai hpang la wa ngan ni, num mahkawn tsawm tsawm re ai ni, shangun sha mai na ma ni yawng hpe woi la ma ai rai nga ai. Woi la hkrum ai ni gaw li la ai lit hpe gun ra ma ai; malu masha gaw n law n la rai nna lagaw lam hkawm ra ma ai. Asak kung sai ni hte ma kaji ni gaw hkrunlam n hkawm jing ai majaw hkam ja lam hkra machyi chye ma ai. Lam n lu hkawm ai ni hpe lam lapran kaw ngam kau da hkrum ma ai, shing n rai, sat kau ma ai.

Masat da ai shara de du jang kun dinghku masha ni hpe jahka nna nga shangun ai. Jahpawt kaw nna shana aten du hkra n dang n la ai bungli shaja ni hpe galaw ra ma ai raitim lusha gaw kachyi mi sha lu sha ma ai. Du sat ni a matu pyi n htuk ai shara ni hta nga ra ma ai.

Shanhte gaw tinang a buga de bai htang wa lu na myit mada lam nan n nga ma ai. Ndai zawn re ai masa gaw Yuda myusha ni a prat maka nan rai lai wa ai. Shanhte manu shadan ai Yerusalem kaw nna grai tsan ai shara hta myit yawn myit machyi let nga ra ma ai. Shanhte gaw myusha langai hku hkam jan nga pra lu na myit mada shara nan n nga lai wa ma ai.

Mayam prat hku nga ra ai Yuda myusha ni a matu Karai Kasang tawn da ai ga sadi

Ndai laban na chyum mungga daw langai gaw mayam prat hku nga ra ai Yuda myusha ni a matu Karai Kasang tawn da ai ga sadi hte seng ai rai nga ai.

Yaweh Karai Kasang gaw shanhte hpe hkye la na ra ai; shanhte a hpyen ni hpe shaden kau na ra ai. Shanhte a prat hta mau hpa lam ni hpe mu hkrum na mara ai; myi di, na lahpang ai ni hte ma-a ai ni myi mu, na na wa nna ga lu shaga wa na mara ai. Zaibru jang ni hta hka hpawk ni lwi pru wa na ra ai. ndai zawn re ai Israel myusha ni a akyu ara ni hpe Karai Kasang ga sadi jaw da ai hpe na lu ga ai.

Ndai ga sadi ni gaw tara maigan mungdan de mayam yam hkawm mat ai matsan mayen re ai Israel myusha ni a matu myit mada lam hpaw ya ai rai nga ai. Tsun ga nga yang, Israel myusha ni Yerusalem mare de bai htang wa lu na, yak hkak jam jau ai prat kaw nna bai lawt lu wa na, hkum hkrang machyi makaw ai kaw nna mai tsai wa na, shanhte a buga hta apu asi pu si shangun na matu lamu marang, ga sau jahpring ya na ngu ai rai nga ai.

“Hka” a kumla gaw ntaw ntsang sutsu ai kum la rai nga ai. Hka taw ai shara kaw dai zawn hka hpe lu la ai gaw chyeju langai rai nga ai. Hka gaw asak hpe jaw ya ai zawn, nsi nai mam hpe mung kaja shangun ai. Dai majaw hka gaw Karai Kasang a chyeju kumla langai re ngu moi na ni hkam la ma ai.

Karai Kasang ga sadi da ai lam langai hpang langai hpring tsup wa ai hpe ndai laban na kabu gara shiga hta anhte mu lu ga ai.

Myihtoi Esaia a langai ngu na myihtoi ga hpring tsup wa ai lam

Israel myusha ni myit mada shara n nga sai ngu hkam la ai aten shanhte a mungdan de bai n htang wa lu ma ai. Karai Kasang gaw Persia hkawhkam a myit hpe shadut ya ai a marang e Israel myusha ni shanhte a mungdan de bai htang wa lu ma ai.

Raitim, Yuda myusha ni hta na nkau ni gaw dai hkawhkam a shalawt ya ai ahkaw ahkang hpe n hkam la ma ai; shanthe mayam prat hku nga taw ai maigan mungdan hta sha sut hpaga yunga lam ni hpe galaw let ngam taw ma ai. Shanhte hta na matsan dik dinghku ni hte gaida gaidaw ni sha Yerusalem de bai htang wa ma ai.

Myihtoi Esaia a langai ngu na myihtoi ga hte maren shanhte a buga de bai du wa sai majaw kabu pyaw ma ai raitim, nnan daw hta kan bau magam lam hta yak hkak jam jau lai wa ma ai. Mung masa lam hku yu yang mung, shang lawt n lu ma ai. Tara maigan ni up ai npu kaw nga ra ma ai. Mayam prat n re shi ai aten na zawn Yerusalem hte nawku htingnu ni shingkang shingwang n nga ai; matsan mayan rai nga ai. Ndai zawn re ai masa hta Karai Kasang gaw Shi a ga sadi hpe hkrang shapraw na n rai sai ngu myit um-ang nga ma ai.

Ndai lam ni yawng hpe Yesu madu a lak htat hta hpying tsup wa ai.

Yesu Madu tara hkaw tsun ai shaloi galaw ai shamai shatsai ai lam ni gaw myihtoi Esaia a lahkawng ngu na myit htoi ga dik wa ai rai nga ai. Yesu Madu myi kraw ai ni hpe myi shamu ya ai, na lahpang ai ni hpe na shana ya ai, ma-a ai ni hpe ga shaga lu shangun ai, manggang kap ai ni hte machyi ai ni hpe shamai shatsai ya ai, nat satan hpe shaden kau ya ai, ma kaji ni hpe shaman ya ai, matsan mayan ai ni hpe jahku shakat ya ai, hkum katsing si ai ni hpe shamai ya ai, yawn hkyen ai ni hpe shalan shabran, n-gun jaw ya ai. (Mk 2:1-12; 6:5; 7:31-37; 8:22; 10:13-16, 46-52)

Myihtoi Esaia a masum ngu na myihtoi ga sadi, anhte hta hkum tsup wa ai.

Ana ahkya shamai shatsai ya na matu Yesu Madu hpe hpyi shawn shagu ning dang kau ai ngu galoi n na yu ga ai. Mungkan ga hta nga ai ana akya yawng hpe myit mat hkra shaden kau ai gaw n rai nga ai. De a matu du sa ai mung n rai nga ai. Shi du sa ai a madung yaw shada ai gaw mungkan ga hpe hpye la na matu she rai nga ai.

Anhte gaw Yesu madu shamai shatsai ya ra ai myi kraw ai ni rai ga ai; Yesu Madu jahpaw ya ra ai na n na ai ni rai ga ai; Yesu Madu shamai shatsai ya ra ai hkum katsing si ai ni rai ga ai.

Myi she hpaw da ga tim, Yesu a tengman ai lam hpe n mu byin chye ga ai; na she hpaw da tim, Yesu Madu a Kabu Gara Shiga hpe n na lu byin chye ga ai; Ra kadawn ai ni hpe garum na hte Yesu Madu hpang sit sa na n kam, byin chye ga ai.

Wenyi a shadut ai a marang e ndai lam ni hpe Yesu madu myit ra ai hte maren hkan galaw shatup lu na rai ga ai.

Karai Kasang gaw shi a ga sadi hte maren mungkan masha ni hpe mungkan htum ten du hkra matut hkye la na rai nga ai.

Shinggyim masha shut hpyit ai majaw kau da hkrum ai kaw nna dai shinggym masha ni hpe hkye la ai magam hpe hpang wa ai. Hkye la ra ai masha langai sha nga ai aten du hkra raitim, matut hkyela na rai nga ai. Mungkan htum ai shani hta she myihtoi Isiael a masum ngu na myihtoi ga hkum tsup wa na rai nga ai.

Dai ten yawng gaw, sumsing mungdan madu lu na mara ai. Mara a majaw hkra machyi, hkrat sum mat ai hkum hkrang hte wenyi lahkawng yan shalawt la hkrum na rai nga ai.

Dai shaloi masha yawng gaw sumsing mundan hpe madu lu na rai ma ai.

“Nye a Karai Kasang hte hkawhkam wa e, na a galu kaba ai lam hpe ngai htawn tsun nga na nngai, ngai nang hpe htani htana prat dingsa chyeju shakawn nga na nngai, shani shagu nang hpe ngai chyeju dum shakawn nga na nngai; nang hpe ngai htani htana prat dingsa shakawn kungdawn nga na nngai,” (shk.kd 145:1) ngu akyu hpyi let Karai Kasang a ga sadi anhte hta hpring tsup wa u ga, Karai Kasang a hkye hkrang la ai magam hta shang lawm nga ga.

Akyu hpyi saga

Wa Karai Kasang e, Nang Madu gaw Myihtoi Esaia a marang e, ga sadi tawn da ai lam prat bang shagu hta na shinggyim masha ni hpe jahkrum shatsup ya nga ai hpe kam sham nga ga ai. Anhte hta mung nang madu a ga sadi ni dik wa shangun ya rit law. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw Pranwan Ladaw hta (23) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) – Myihtoi Esaia 35:4-7

Chyum Mungga Daw (2) – Yaku 2:1-5

Kabu Gara Shiga – Marku 7:31-37

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.

By; Rev. Fr. Paritck Gawmaw Hkawng Yae

RVA-Kachin Service (Myitkyina)