Pran Wan Ladaw Laban (22) @ 32nd Sunday In Ordinary Time (29 AUG 2021)

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (22) ngu na laban rai nga ai.

Ndai laban na chyum mungga daw langai hpe Tara Jahprang Laika (Deuteronomy) hta na shaw da ai. “Deuteronomy” a lachyum gaw “lahkawng ngu na tara” ngu ai rai nga ai. Dai chyum laika buk gaw Yaweh Karai Kasang gaw nam maling kata hkrun lam hkawm nga ai Israel myusha ni a matu garum ya ai hpe bai myit dum shangun ai lam ka da ai majaw “lahkawng ngu na tara” ngu shamying ai rai nga ai.

Mawshe gaw shi n shang lu ai Karai Kasang ga sadi tawn da ya ai bu ga de Israel myusha ni shang lu na mahka hta matsan dum myit hte hkam sharang myit ni a majaw Yaweh Karai Kasang hpe sadi dung nga na matu sadi jaw da lai wa ai.

Shanhte galoi mung myit dum ra ai gaw, (1) shanhte a akyu ara ni a matu Karai Kasang madun dan lai wa sai hpung dagu ni, (2) Yaweh Karai Kasang a tara hte lam matsun ni, (3) shanhte a Yaweh Karai Kasang a ntsa kahtap kahtap nna sadi run lai wa ai lam ni, hte (4) shanhte gaw mara a majaw Yaweh Karai Kasang hpe kau da ai shaloi Yaweh Karai Kasang gaw myit galu kaba hkam sharang ya ai lam ni rai nga ai.

Ndai laban na chyum daw langai gaw Mawshe shi a myusha ni a matu tara lam hpe jaw da ai a marang e Yaweh Karai Kasang a tsawra myit hte hpaji byen-ya hpe myit dum sumru na matu sadi jaw da ai rai nga ai.

Karai Kasang gaw prat shagu na shinggyim masha ni hpe jaw da ai tara ni hta lai nna, Yuda myusha ni a matu mara sha Messiah du sa ai ten du hkra madi ai lam ni hpe mung chyum laika hta mu lu nga ai.

Israel myusha ni a matu sha yaw shada let Karai Kasang jaw da ai tara nkau ni hpe anhte n hkan shatup sai hpe mu lu ga ai. Ga shadawn, (1) Yuda myusha ni gaw shanhte hte myu bung ai ni hpe sha dinghku de ma ai. (2) Kanu gaw la sha shangai ai rai yang nhtoi mali shi (40) ya lapran, num sha rai yang nhtoi matsat shi (80) ya lapran masha wuhpawng hte nawku daw jau ai lam hta n mai shang lawm ai (Jaw Jau 12:2-6; Lk 2:22). (3) Yuda myusha ni gaw daini na Muslim ni zawn wa shan n mai sha ai (Jaw Jau 11:7; Tara Jahprang 14:8).

Anhte ni n hkan shatup ai raitim, Yuda myusha ni htep lahti hkan shatup sa wa ra ai htung tara ni nga nga ai.

Karai Kasang gaw Mawshe a marang e, Israel myusha ni a matu tara hte htung lailen ni jaw da ai. (1) Karai Kasang a tara kanu lam shi (10) hte rau manu dan tara ni hpe jaw da ai, (2) Shani shagu na prat hta shanhte hpe lam matsun lam woi ya na matu htung lailen ni hpe jaw da ai. Ga shadawn: dinghku de ai hte kun dinghku hte seng ai htung lailen, kanu kawa sut gan madu na lam hte seng ai htung lailen, mara hte mara dam jaw ai htung lailen, ana zingli hte seng ai htung lailen, san seng san pra wa ai hte seng ai htung lailen ni zawn re ai lam ni hpe jaw da ai.

Dai majaw Israel myusha ni a matu makam lailen hte shinggyim htung lailen hpe garan ginhka ai lam n nga ai daram rai nga ai. Yuda myusha ni a matu dai lailen lahkawng yan hte seng ai hpe makam htung lailen hku sha hkap lai wa ma ai.

Israel myusha ni hpe jaw da ai Karai Kasang a tara kanu lam shi (10) zawn re ai tara ni gaw prat shagu na masha ni a matu yaw shada ai tara ni rai nga ai.

Htung lailen tara ni gaw Yuda ni a matu prat hta hkan nna jaw da ai tara ni rai nga ai. Israel myusha ni hpe jaw da ai Mawshe a tara gaw, Yesu madu du sa ai hpang, yawng a matu yaw shada ai Karai Kasang a tsawra tara hte galai shatsawm da ya sai rai nga ai.

Ndai laban na Kabu Gara Shiga hta, masha nkau ni Yesu Madu hpe shapawt ma ai. Shanhte gaw Pharisee ni hte chyum laika sara ni rai ma ai. Madu Yesu a sharin shaga ai lam ni hpe yaw shada myit hte nan masing jahkrat nna ningdang ninghkap ma ai.

Shanhte a lapran hta mung Nikodemu zawn re ai Yesu Madu maga tsap ai masha nga nga ai (Yh 3:1;7:50;19:39). Dai ni hta San Pawlu a Sara, tara shara kaba Gamale ngu ai Hparisee langai mi mung lawm nga ai (Kasa 5:34; 22:3). San Pawlu hkum nan mung Hparisee langai mi re ai ngu shi hkum hpe shachyan gwi ai wa rai nga ai (Kasa 23:6).

Hparisee ni gaw, “laksan nga ai ni” Masha ni zawn tara upadi hpe n tawt lai ai ni ngu hkam la ai ni rai nga ai. Shanhte gaw, shanhte a san seng ai lam hpe arawng mala nna, kaga masha yawng hpe gaw jahpyak ma ai; Mawshe a tara kaw langai ngut langai jat bang ma ai majaw hkan shatup lu na gara hku mung n mai byin rai wa ma ai. Shanhte jahkrat da ai tara hpe n hkan shatup ai ni gaw “tara jeyang hkrum na ni” “ngarai wan hte gingdan ai ni ngu hkam la sharin shaga ma ai.

Shanhte gaw tara hpe hkan shatup yak hkra shalau ma ai (Mt 23:4; Lk 11:46). Shanhte hkum shanhte gumrawng myit kaba hte arawng mala ma ai rai nna, shanhte ni gaw htung lailen tara ni hpe htep lahti hkan ai majaw Karai kasang shanhte hpe hkye la na lit nga ai ngu kam nga ma ai. Shanhte a myit kraw kata hta sawt ai, hpyi hpun ai, dingman dinghpring jahpai hpai ai, nammak lawhpa ai sha rawng ai (Mt 23:13-32). Grau nna gaw, Yesu Madu a sharin shaga ai lam ni hpe ninghkap ma ai majaw Karai Kasang a ja mungdan de kaga masha ni n shang lu hkra pat shingdang lam tai ma ai.

Ndai laban na Kabu Gara Shiga hta, Kasa ni lusha maw yang lata n shin ai hpe mara shagun ga tsun ma ai. San Luka gaw, Yesu Madu hkum nan mung kaga masha ni zawn lata n kashin ai lam ka da nga ai (Lk 11:37-44).

Lusha n sha shi yang lata kashin ra ai teng ai. Lata n shin ai sha lu sha yang lata kaw kap ai ana kanu, shing n rai, maza ni a majaw kan machyi na teng ai. Raitim, makam masham htung lai hte gara hku mung n seng ai.

Makam masham gaw myit kata lam hte grau seng ai. Myit masin san seng hkra yawng gaw shakut ra ai. Makam masham lam hta ahkyak ai gaw tinang a myit masin salum hpe Karai Kasang hta ap nawng da ra ai. Shinggan tara lam ni hpe hkan shatup ai gaw madi shadaw gaw tai lu ai. Raitim, masha hpe Karai Kasang hta kamsham lam hte dingman dinghpring lam hpe n jaw lu ai.

San Yaku gaw Kaja ai Hkristan masha gaw kadai re ai ngu sang lang da ai. Kaja ai Hkristan masha gaw (1) Karai Kasang a Mungga hpe myit machyu myit manoi let madat hkam la nna htep lahti hkan nang hkan sa ra ai, (2) Tinang a myit masin salum hpe shachyoi shapra jasan jaseng da ra ai, (3) Hpu nau ni a ra kadawn ai lam ni hpe garum ya ra ai.

Karai Mungga gaw, masin salum hta hkai da ai nli tum rai nga ai. Dai majaw, San Yawhan gaw Karai mungga gaw masin salum hta hkai da ai hpun hte bung ai ngu shingdaw da ai. Dai hpun gaw apu asi hpe pu si ya ai.

Anhte a masin salum hta Karai Kasang hte nihtep ai ni a ntsa tengman tsawra myit ngu ai apu asi pu si ra ai.

“Dai re majaw matsat shabat re ai sat lawat shagu hte n hkru n kaja ai arawn alai yawng hte hpe yeng seng kau mu. Karai Kasang kaw sumnung ai hte shawng kaw nna nanhte a kraw lawang ni hta e shi hkai da ya sai nanhte hpe hkye hkrang la lu ai mungga hpe hkap la mu,” ngu Yaku shadum da ai (Yh 1:21).

Karai Kasang a mungga gaw, Anhte a shut hpyit mara hpe mu chye shangun ai. Anhte a mara hpe mu chye jang jang lawan dik tsi tsi hkam la ra ai. (Yk 1:23-24).

Tinang a myit masin hpe mara hta na shalawt la ai rai yang tengman makam masham hta hkawm sa ai nan rai nga ai (Yk 3:13-18).

Hka hpawk san seng ai rai yang, dai hka hpawk kaw na lwi hkrat wa ai hka mung san seng ai. “Ndai n hkru  n kaja ai lam ni yawng gaw masha langai mi a kata na pru wa nna shi hpe awu asin di kau da wu ai,” (Mk 7:21-23).

Tsawra myit gaw makam masham hte seng ai tara yawng a akri madung rai nga ai.

“Shada da tsaw ra nga mu, ngu nna tara ningnan ngai nanhte hpe jaw made ai. Ngai nanhte hpe tsaw ra made ai zawn, nanhte mung shada da tsaw ra nga lu na rai myit dai. Shing rai nanhte shada tsaw ra myit rawng nga myit yang gaw, nanhte nye a sape ni rai nga myit dai gaw masha yawng mayawng chye lu na mara ai,” (Yh 13:34).

Tinang a ni htep ai htingbu wa hpe tsaw ra ai, n tsaaw ra ai gaw tinang a makam masham hte seng ai tara jet ai, n jet ai hpe madun dan nga ai.

Akyu hpyi saga

Wa Karai Kasang e, ndai laban na mungga hte maren tengman makam hta hkawm sa shangun ai jet ai tsawra myit anhte hta bang ya nna, dai tsawra myit kaba hte nang Madu hte htingbu ni hpe tsaw ra daw jau lu ai atsam jaw ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, Ndai Laban gaw, Pranwan Ladaw hta (22) ngu na laban rai nga ai.

Hti ang ai Ja Chyum Mungga ni gaw -

Chyum Mungga Daw (1) – Tara Jahprang 4:1-2, 6-8

Chyum Mungga Daw (2) – Yaku 1:17-18, 21:22-27

Kabu Gara Shiga – Marku 7:1-8, 14-15, 21-23

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.