Pran Wan Ladaw Laban 15 : Ga Shaga Ai Karai Kasang

Ga shaga ai Karai Kasang

Karai Kasang kaw na lu la ai chyeju ni hta, manu dan dik ai lam langai gaw, ga shaga chye ai lam rai nga ai. Anhte ni ga shaga let langai hte langai matut mahkai ga ai. Ga hte, anhte, a kabu pyaw lam, yawn madai ai lam hte mahku mahkau lam ni, kaga masha ni hpe tsun hpaw dan chye ga ai.

Ga shaga nchye ai wa hpe mu hkrum ai shaloi she, ga shaga lu ai chyeju kade ram manu dan nga ai hpe, grau chye na wa na re. Shangai ai kaw na nan, ma a ai ma hpe mu ai shaloi, anhte, shi a matu kade daram myit n pyaw ya ai rai? Anhte ni shi hpe matsan dum ai myit kaba hte, ta lawat let matut mahkai chye ga ai. Dai zawn re masha ni gaw, law malawng tsawra mayu na zawn rai nna, bawnu kaja ai ma ni rai ma ai. Raitim, ga shaga nlu ma ai.

Kahtawlik nawku hpung hpe Hkrang sumla naw ai ngu, mu shut, chye na shut ai lam ni naw nga nga ai. Chyum laika hta, Hkrang sumla nawku ai ni hpe, jahprap da ai gaw “Hkrang sumla ni hta n gup lawm tim ga nchye shaga ma ai” (Shakawn 115:5). Anhte a Karai Kasang gaw ga shaga ai Karai Kasang re. (1) Adam yan Eve hpe shaga ai. (2) Naoh, Abraham hte ga shaka dingsa pra na masha ni hpe shaga lai wa ai. (3) Mawshe hpe grai na hkra shaga ngut ai hpang, Isreael myusha ni hpe hkye la na matu shangun dat ai. Karai Kasang a tara kanu lam shi hpe Isreael myusha a matu Mawshe kawn shalai ya ai. (4) Karai Kasang gaw shi a myusha ni, mara a mayam prat de ndu lu na matu Myihtoi ni hku sharing shaga shading sharai ya nna, anhte, Karai a Kasha Madu Yesu Hkristu hpe hkap la na matu lajang shachyip da ya ai.

Hebrew 1:1-2 hta, “Moi prat hta Karai Kasang gaw anhte a ji wa ni hpe ga shaga ai lam law law lang, lai ladat amyu myu hku nna, myihtoi ni a n-gup ga hte htawn tsun lai wa sai. Rai ti mung, hpang jahtum na nhtoi ladaw ni hta chyawm gaw shi a Kasha a n-gup hte anhte hpe shi a mungga jaw da mani ai,” ngu ka da nga ai. Chyum laika hti ai wa, chyum laika hti ngut jang “Madu a mungga rai nga ai” ngu shachyan ya ai. Dai shaloi na la hkam la ai ni yawng gaw “Karai Kasang hpe chyeju dum nga ga ai” ngu bai tsun ai. Karai Kasang gaw anhte shinggyim masha ni hpe ga hte sharing shaga lam madun ya ai gaw kaba la ai tsawra myit nan rai nga ai. Dai tsawra myit hpe anhte ni chye na ra ga ai. Karai Kasang ga shaga ya na, anhte ni kadai mung gingdan ga ai nrai. Dai majaw anhte ni Karai Kasang a ga hpe na la shagu Karai Kasang a tsawra matsan dum ai lam hpe chyeju dum ga ai ngu tsun shapraw ga ai.

Yesu Madu gaw Karai Kasang shangun dat ai wa teng teng rai nga ai. Bai shi gaw shinggyim masha yawng a matu Karai Kasang a Mungga nan rai nga ai. Yawhan 1:1 hta, “Shawng ningpawt e Mungga nga ai; dai Mungga gaw Karai Kasang hte rau rai nga ai; dai Mungga nan Karai Kasang rai nga ai. Shi gaw Karai Kasang hte rau rai nga ai,” ngu ka da nga ai. Dai hpang kade nna yang “Mungga gaw shinggyim hkum hkrang dagraw la nna, chyeju hte teng man ai hpring let anhte hta nga nga yu sai,” (Yawhan 1:14).

Yesu Madu gaw Kawa Karai Kasang tsun ai shiga hpe shalai ya ai hta grau sung ai. Yesu Madu Bethelehem kaw shangai wa ai kaw na wudang ntsa si hkam ai ten du hkra anhte ni a matu Karai a Mungga rai nga ai. Yesu Madu a prat hte tsawra matsan dum ai lam hpe mu hkrup na sha Karai Kasang anhte hpe tsawra ai majaaw shi a kasha shingtai hpe anhte kaw shangun dat ai re ngu anhte kadai mung tsun na nrai ga ai.

Anhte hpe jaw ya na matu Kawa Karai Kasang ap jaw da ai kabu kara shiga hpe kang ka gun hpai wa sai. Yesu Madu masha ni nga ai mare kaba kaji ni kaw nhkring nsa du hkawm nna Karai mungga hkaw tsun nga ai lam Kabu gara shiga laika ni hta anhte chye la lu saga ai. Shinggyim masha ni a matu ahkyak madung kabu gara shiga gaw “Mara koi yan kau nna, kabu pyaw lam a matu Kawa Karai Kasang matsun madun ai lam hpe hkap la na lam rai nga ai.” Daini anhte hpe dai kabu gara shiga jaw ya nga ai rai nna, mungkan htum hkra matut jaw taw nga na rai nga ai. Dai lam ni hpe Nawku hpung hku matut jaw ya nga ai. Dai majaw Nawku hpung a lit magam gaw masha ni myit malai nna, Karai Kasang ra sharawng ai hta hkan nang hkan sa let hkye hkrang la hkrum na matu rai nga ai. Yesu Madu gaw galoi mung, Karai Kasang a shangun dat ai hkyela Madu hte Mungga nan rai nga ai.

Yesu Madu hta grau ai sara kaba nnga ai.

Yesu Madu kabu gara shiga hpe masum ning daram sharing ya lai wa ai. Chye chyang kung hpan ai sara ni nan chye chyang kung hpan ai sape ni tai na matu aten la nna sharing hkam la ra ma ai. Raitim, Yesu Madu gaw nnan kaw na nan wuhpung masha ni kade law la ai rai tim, shi a ga hpe madat ai ni a masin salum hta shang hkra hkra tsun dan lu ai.

Madu gaw si mani ai hte shaga ai; Myit san seng ai hpaji nchye ai ni, hkau hting hkauna galaw sha ai ni, nga hkwi ai ni gaw madung rai nga ai. Shi Madu a ga hpe grau chye na hkra shani shagu mu hkrum nga ai prat a mahkrum madup ni hte ga shadawn ni hte anhte chye na hkra jai lang wa ai. Ga shadawn nkau ni gaw galu, nkau ni gaw gadun rai nga ai. Dai ga shadawn ni hta Karai Kasang a sumsing mungdan lam hpe sang lang dan ai. Ndai laban hte hpang na laban lahkawng hta mung nawku hpung gaw anhte hpe dai zawn re ga shadawn nkau ni hpe sumru shangun da nga ai.

Karai Kasang a mungga rai nga ai nli tum kaw na apu asi si wa na matu nli gat ai Yesu Madu hte rau anhte mung n gun dat galaw shaja ra ga ai.

Nli gat ai wa hte nli tum a lachym hpe Yesu Madu hkum nan sang lang da ya ai. Dai ga shadawn tsun ai shaloi nan dan dawng ai hku chye na sai rai nna, bai sang lang dan nra sai rai nga ai. Ma ni pyi chye na na rai nga ai. Rai tim, Karai mungga lachyum hpe hkrak tup chye na na matu tsun hkai dan lu ai ga shadawn mau mwi nnga ai. Ndai maumwi hte anhte hpe tsun dan nga ai gaw (1) Nli gat Madu Yesu gaw anhte a masin salum hta kung kaba wa nna apu asi si lu ai atsam hpring ai kaja htum nli tum hpe hkai bang da ya ai. (2) Masha hkum nan gaw dai nli tum kung kaba apu asi si na matu lamu marang jahtuk na nmai bying ai. Yesu Madu sha galaw lu ai. (3) Raitim, masha gaw ga hpe jahtuk shatsawm na bungli nga nga ai. Dai zawn galaw ya ai lam nnga jang nli tum kade kaja tim apu asi si nlu ai sha nyip si mat na rai nga ai. Anhte ni Madu Mungga hpe hkap la na myit hkut da ra ga ai. (4) Anhte a bungli gaw ga hpe shatsawm jahtuk na sha nrai ga ai. Nli tum kaw na bawng tai wa nna, kung kaba wa ai hpun tai hkra aten shagu yu tsing magang pawm ya ra ga ai. Dai nli tum hkai da ai lamu ga shara hpe n hpan kum la ra ga ai. Shing di jang she, du sat hpyen kaw na makawp maga la lu na rai nga ai. Sadi maja lam nnga, hkrup mara nga taw ai rai yang anhte myit mada tawn ai apu asi ni hpe jasum kau na rai nga ai.

Anhte gaw Karai mungga rai nga ai nli tum tu kung kaba wa nna, apu asi hpe dan la shu la ai shaloi pu ba hkam ra ga ai. Raitim, jahtum hta gaw kabu gara nga ga ai.

Chyum mungga daw 2 Roma 8:22-23 hpe bai hti yu ga. Hkristan sak prat hta hkrum katut ra ai dukhka hte yawn madai ai lam ni hpe ma shangai ai a hkam sha lam hte shabung da nga ai. Yawhan 16:21 hta, “numsha langai mi gaw kasha shangai na rai yang, shi a machyi hkam sha na ahkying aten du ra ai majaw yawn hkyen nga ai, rai ti mung kasha shangai ngut jang, ndai mungkan ga e ma langai mi shaprat tawn nu ai majaw shi kabu gara nga ai rai nna shawng na ru tsang ai hpe ndum nu ai.”

Anhte ni a yak hkak jam jau lam hta kabu gara lam hpying tup nga nga ai ngu San Pawlu kahtap tsun da nga ai. Hpa majaw nga yang, anhte hkrum sha ai mayak mahkak kaw na shalu shalat a majaw sumsing mungdan hta shadawn ndang ai kabu pyaw lam hpe lu la na rai nga ai. Shu la dan la ai shaloi shaning tup pu ba jam jau ai hpe myit malai lu ai yi sun hkauna galaw ai masha nga ai kun?

Hkristan Masha ni gaw Karai mungga hpe hkap la ai wa mung, gat hkai ai wa mung rai nga ai. Karai mungga gat hkai ai hkristan shagu gaw myit mada lam hpe kabu gara let tawn da ma ai.

Nli gat ga shadawn hta ga hta hkrat ai nli tum ni gaw htam mali hta na htam mi sha ga sau kaja ai kaw hkrat tu kaba wa nna, ngam ai nli tum ni gaw hten za mat ai majaw myit npyaw hpa rai nga ai. Mungga htawn ai ni mung dai zawn myit n pyaw lam bying chye nga ai. Tinang hkaw tsun ai lam yawng akyu ara hte seng nna myit n gun nlu bying chye ai sha n ga, jahtum hta tinang hkaw tsun ai lam ni gaman sha tai ai ngu shadu chye nga ai.

Raitim, Yesu madu a ga shadawn tsun ai hta kadai hpe mung myit htum na matu tsun ai nrai nga ai. Shi hkum nan mung dai zawn hkaw tsun ai hta n kaja ai hku mu la hkam la ai lam nnga ai. Karai Mungga hpe gat hkai ai ni gaw shanhte a magam hta kabu gara let myit mada kaba tawn da nna galaw shakut ra ai.

Raitim lachyum kata kaja lam hkrai mu chye ai lam gaw nrai nga ai. Myihtoi Isaiah a myihtoi ga gaw Madu Yesu sang lang dan ai ga shadawn hpe chye na na matu madi shadaw shadan shalen ya ai.

Nli tum gat hkai ga shadawn gaw Karai Kasang a sharawng shara jaw ya mayu ai lam hpe madun dan nga ai. Mungkan shingra maka hpe yu yu yang Karai Kasang a sharawng shara jaw ya mayu ai myit hpe mu lu ga ai. Hpun hta si ai asi kaw na nli tum ni law law rai tim, kachyi mi sha tu kaba wa nna, ngam ai nli tum ni yawng gaw htum mat ma ai. U ni mung dai nli tum ni hpe sak hkrung lam a matu sa hta sha ma ai. Dai zawn sum mat ai lam law ai rai tim anhte a yi, sun, hkauna hte lamu ga ni hta tsi tsawm ding yang rai nga ai.

Dai hte maren, Karai Kasang gaw shi a mungga nli tum hpe shinggyim masha ni a masin salum kata hta gat hkai da ai. Karai Kasang a galu kaba ai myit hpe chyeju shakawn ra ga ai. Madu gat hkai ai mungga nli tum ni hta na nkau mi sha anhte hta apu asi si wa ai. Raitim, Karai Kasang gaw shinggyim masha ni hpe hkye la lam de myit galu kaba ai hte woi awn ningshawng ya ai a marang e awng dang lu ga ai.

Karai Kasang sharawng shara jaw ya ai hpe anhte hkum nan myit galu kaba ai hte shakut gat hkai ai yang she chye na lu ga ai. Ga shadawn hta ntsun da ai lam langai myi nga ai. Dai gaw “Anhte ni shu la dan la ai aten hta sum yawm ai majaw hpang de n hkai sana re” ngu tsun na jahkring da ai kun? Laning mi n awng jang laning mi awng dang na re ngu myit la let matut hkai shaprut nga ga ai nrai ni? Karai Kasang gaw anhte hta grau ai wa rai nga ai. Dan la shu la na yawm taw ai rai tim, Karai Kasang gaw anhte a masin salum hta shi mungga nli tum hpe matut gat hkai ding yang rai nga ai. Mungkan shingra maka hta nmai bying tim shinggyim masha salum kata hta gaw bying mai ai lam nga nga ai. Lamu ga hte bung ai anhte a masin salum gaw mani masha lai lam zawn ga ja ai, shing nrai, ju hpun ni hte ga –up da ai zawn re ai kaw na daini Karai Kasang a tsawra myit kaba hte yu lakawn ai npu hta ga sau kaja ai lamu ga bying tai wa lu ai. Dai majaw anhte ni Karai mungga nli tum hpe aten shagu gat hkai na ra ga ai.

Karai Mungga nli tum gaw n gun kaba dik ai hpe galoi mung dum sai ra ga ai. Myihtoi Isaiah Laika hta tsun da ai hpe sumru yu ga. (1) Marang nhtu hkra jahkring lu ai kun? Dai zawn sha, anhte a masin salum hta Karai Kasang shaga ai hpe mung jahkring da nlu ga ai. (2)Marang hka gaw ga kata de shang nna nli tum hpe tu wa shangun ai kaw na jahkring la lu ai kun? Dai zawn sha, Karai Mungga gaw masha ni a masin salum kata du shang nna apu asi si wa ai hpe jahkring da nlu ga ai. (3) Marang hka gaw (hka) salu de gale wa nna lamu ntsa nga ai summwi ni bying tai let hka bai tai marang jahtu ya ai mabying lam yan tsang hte tsang kadai wa lat yu maram nna aten masat lu na rai ta?

Myihtoi Isaiah a sanglang ai lam hpe atsam sha chye lu ai gaw Karai mungga hpe hpung bawng tu wa nna apu asi si ai hpe anhte a myi hte law malawng mu lu nga ai. Karai mungga hpe ninghkam ai majaw mat mat ai masha law law rai nga ai. Raitim hti ndang ai masha ni Karai mungga hpe hkap la nna hkye hkrang la hkrum masai.

Anhte ni Karai Mungga nli tum hpe gat hkai na matu myit htum lung hkung nmai tai ga ai. Dai nli tum tu kaba wa nna apu asi si na matu shi hta ladat amyu myu nga nga ai. Galoi aten, gara shara kaw gara mahkrun lam hpe jai lang na hpe anthe hkrak tup nmu lu hkra makoi magap da ai. Anhte ni a matu Karai Kasang lit la da ai hpe chye na hkap la hkan sa jang rai sai.

Karai Mungga gaw Yesu a kanu Nu Maria a masin salum hta htam latsa n ga, law htam ai apu asi si wa ai.

Karai Mungga matu kaja htum ai masin salum hpe shajing shachyip nna hten run ai lam nnga ai sha, dai masin salum hta htam latsa n ga galoi mung si shapraw ya ai wa gaw Yesu a kanu Nu Maria nan rai nga ai.

Nu Maria gaw (1) Karai Mungga hkam la ai hta katsi la mai dik ai wa rai nga ai. Lk 2:19, 51 hta, “Maria chyawm gaw dai lam yawng mayawng matsing gun la nna, shi kraw kata e aru yu nga ai.” ngu nna lahkawng lang tsun da nga ai. (2) Maria gaw Karai mungga hpe matsing gun la ai sha n ga, hkan nang hkan shatup ai hta shingdaw nlu ai katsi kamang tai nga ai. Shi gaw Wenyi lam matsun ai hpe galoi mung hkam la hkan sa ai. Lk 1:38 hta, “Na ga hte maren, ngai hta bying wa u ga!” (3) Maria gaw mungga nli tum gat hkai ai ni yawng a matu katsi kamang mung rai nga ai. Nu Maria tara hkaw ai lam nna yu ai. Raitim, Shi a sak prat gaw kasha Yesu zawn kabu gara shiga nan rai nga ai. Yawhan 2:5 hta, Maria mung anhte hpe saw shaga gaw “Shi nanhte hpe tsun matsun galaw mu” ngu ai rai nga ai.

 

Akyu hpyi saga

Wa Karai e, Na mungga hpe anhte a masin salum hta gat hkai bang ya nga ai hpe anhte galoi mung dum chye nna dai mungga nli tum anhte a masin salum hta tu kaba wa nna apu asi si let masha yawng hpe daw jau lu na chye ju matut jaw ya rit. Anhte a Madu Hkristu a marang e hpyi nem nga ga ai.AMEN

 

Hkristu hta hkungga tsawra ai tarahkaw sara/ num ni hte nu wa hpu nau ni e, hpawt ni gaw Pranwan ladaw hta (15) ngu na laban rai nga ai.

Pran Wan Ladaw 15 ya ngu na laban shani hti ang ai Chyum Mungga Ni

Chyum mungga daw (1)  Is 55:10-11

Chyum mungga daw (2)  Roma 8:18-23

Kabu gara shiga   Mt 13: 1-23

Ndai ja chyum mungga ni hpe hti nna, hpawtni na nawku daw jau lamang ni hpe woi awn nga ga!

 

Wa Jau Patrick Gawmaw Hkawng Yae

 

Add new comment

1 + 3 =