Pran Wan Ladaw 33 : Karai Kasang A Mungga

Pran Wan Ladaw 33 : Karai Kasang A Mungga

 

          Hkristu hta tsaw ra ai nu wa hpu nau ni e, ndai laban gaw pranwan ladaw hta (33) ngu na laban rai nga ai.

Hpang na laban hta gaw “Hkristu Hkawhkam Poi” rai sai.  Hpang kalang na laban hta gaw nawku daw jau shaning ladaw shata hti laika hpe ningnan bai hpang sa na rai nga ai.

Nawku daw jau shaning ladaw a pranwan ladaw hpe kasa ni a ntsa Chyoi Pra ai Wenyi yu hkrat wa ai “Pentecost” shani kaw na hpang nna, Yesu Madu lahkawng lang ngu na bai du sa ai “du sa ladaw” bai hpang ai aten du hkra rai nga ai.

Raitim, Hkristan masha langai hpra a matu dai ladaw gaw, anhte ni kashin kamun sakramentu chyeju kumla hkam la ai aten kaw na hpang nna, si ai aten hta Yesu Madu du sa ai aten du hkra rai nga ai.

Dai aten ladaw gaw kaja wa sha nan grai ahkyak ai aten rai nga ai. Dai majaw Nawku hpung gaw, “Yesu Madu du sa na re majaw yawng a maja nga na matu” sadi jaw taw nga ai rai nga ai.

 

Ndai sadi jaw ai lam hpe ndai laban na Chyum mungga hta bai tsun shadum da nga ai. Anhte si jang Karai Kasang a ja mungdan hta matut nga lu na, n nga lu na hpe daw dan ya hkrum na rai ga ai. Anhte madung da shakut ra na gaw, anhte a sak prat hta apu asi si lu na matu rai nga ai.

Ga shadawn hta hkrun lam galu hkawm na sut du langai a lam tsun da ai. Shi gaw mayam ngu na magam gun masum sut hpaga na matu kam myit kaba hte ap da ai. Dai gaw shi a magam gun ni a ntsa tsawra myit kaba ai hpe madun dan nga ai. Shi a gumhpraw hpe laga masha langai ngai hpe ap da mai nga ai. Rai ti mung, shi gaw shi a n pu na magam gun ni hpe bungli bungsi hparan chye ai tsaw ai madang de sharawt ya mayu ai re majaw shanhte gaw dai aya hte ging dan ai ni re ai lam madun dan na matu ahkyak nga ai.

Shanhte a lata hta ap da ai gumhpraw manu kaba ai rai nga ai. English hku ka da ai Kahtawlik chyum laika buk hta mayam ni hpe jaw da ai gumhpraw hpe“talents”  hte shadawn shadang hpe lang da ai. Talent (kawk mi) ngu ai gaw Killo 40 ram nga ai n-hprang Ja, shing nrai, n-hprang gumhpraw, shing n rai, n-hprang sut a li ai shadang hpe tsun ai rai nga ai. Jinghpaw chyum laika ga hku nna gaw Joi hte shadawn nna tsun da ai.

 

Gumhpraw talent mi lu la na matu yu maya masha langai mi shaning 20 ning daram tam ra ai. Dai daram manu kaba ai hpe ap da hkrum ai shangun ma ni kyem da na matu n re ai; arang shatai nna law jat wa na matu she ap da ai rai nga ai.

Shangun ma lahkawng gaw lawan ladan, asharawng ashara rai hkrang shapraw ma ai. Dai majaw mung ap da ai daram bai tam lu ma ai. Tsa shadang hpring tup tup bai shalaw la lu ma ai.

Masum ngu na shangun ma chyawm gaw shi hpe ap da ai gumhpraw hta law jat wa hkra shakut n gwi ai majaw sim ai hku htu lup makoi da ai. Dai majaw gumhpraw madu bai wa ai shaloi gara hku tsun shatsawm la na hpe sha myit sumru let aten shama kau ai.

Ga shadawn hta arang shaw ya nna hkrun lam galu hkawm mat ai wa tawng marang mi na ai hpang bai du wa ai ngu tsun da ai. Dai gaw aten ram daw na ai hpe tsun nga ai. Shangun ma ni amyat tam la na matu aten law law lu ai hpe shadan shalen ai rai nga ai. Arang shaw ya ai madu gaw shangun ma ni a ntsa tsawra myit tawn da ai; shanhte hpe kam myit kaba hte ap jaw da ai sut gan law jat wa hkra hpaga ga na aten law law jaw da ai.

 

Arang shaw ya ai wa hpang jahtum hta kaja wa sha bai du wa ai. Shi bai du wa ai shaloi, shangun ma gum hpraw joi manga hte joi lahkawng ap da hkrum ai yan lahkawng hpe bung ai ga si ni hte shakawn shagrau ya ai hte bung ai kum hpa hpe mung shagrau ya ai. Mt 25:21-23 hta, “Shaloi shi a madu gaw, Ara rai sa, kaja ai hte sadi dung ai mayam e, arai loi sha hta nang kangka rai nit dai; dai rai nna arai law law a ntsa e ngai nang hpe san tsawn da na de ai, na madu a kabu gara ai hta nang shang lawm u, ngu tsun wu ai.”

Arang madu ahkyak tawn ai lam gaw shi ap da ai arang gumhpraw amount n rai nga ai; shangun ma a ga sadi dung ai lam she rai nga ai. Shi ap da ai gumhpraw shadang hpe kachyi mi ngu sha tsun da ai. Dai gaw shi a shawang tsaw ra myit hte jaw ya mayu ai myit hpe shadan shalen nga ai.Shangun ma ni a matu dai ap da hkrum ai gumhpraw gaw kachyi mi sha n rai nga ai; grai nan law ai gumhpraw amount rai nga ai. Shan lahkawng na matu akyu ara hkam la lu ai gaw Shan lahkawng a madu hte rau sut gan hpe rau hkam sha na matu rai nga ai. Madu hte maren hkam sha lu na matu gaw kadai shangun ma mung myit mada n gwi ai rai nga ai. Shanhte hkam la lu ai akyu ara ni hta na kaba dik htum ai kumhpa nan rai nga ai.

 

Lagawn dik ai shangun ma hpe yu yu ga. Nta madu bai wa yang gara hku hkap tsun na hpe sha hkring hkring sumru nna dai hpe shaman taw nga na rai lu ai. Kaja wa nga yang dai hku sumru nna galaw ai gaw ntsa lam sha rai nga ai. Shi gaw kadai na rai hpe mung n lagu ai, ap da ai gumhpraw hpe shamat kau ai lam mung nnga ai, gumhpraw madu bai wa ai shaloi mi na raw bai ap ya lu ai gaw sadi dung ai rai nna akyu ara kaba nan rai nga ai ngu myit la nga ai.

Raitim, dai zawn myit ai lam gaw shut ai lam rai nna, mara galaw shut ai tai nga ai. Shi shut ai mara gaw, Lagawn ai mara rai nga ai. Dai mara dam hkam sha ra ai lam gaw sadi dung shakut shaja ai yan hpe jaw ai kumhpa hte shai nga ai rai nna, grai nan sawng ai dam jaw ang ai rai nga ai.

Ap da ai gumhpraw hpe bai zing la kau ya ai. Tsun mayu ai gaw, hpa nan n ngam hkra zing la kau ya ai rai nga ai. Shi a madu jaw da ai, shi lu malu mahkra hpe bai dawm la kau ya hkrum nu ai. Lachyum gaw shi kaja wa sha nan matsan dik htum tai mat ai rai nga ai. Shi hta hpa nan n ngam mat sai majaw shi tsun gajai shara hpa nnga mat sai. Shi hta ngam taw ai gaw Lagawn lamawn ai lam sha rai nga ai.

 

Shi gaw wa utik let n sin htawng hta jashawn kau ai hkrum nu ai. Du na aten ni hta madu hte hkrum na lam nnga sai. Matut mahkai lam dawm la kau ai hkrum sai. Madu kaw na htani htana hka mat na lam sha nga mat sai.

Ga shadawn gaw grai nan dan len nga ai majaw matut sang lang na n ra na daram nan rai nga ai.

Arang shaw ya ai sut su ai nta madu gaw Hkristu nan rai nga ai. Shi hta sut su grau ai kadai nnga sai. Sumsing mungdan gaw shi a dum nta rai nna, gara de mung sa n ra ai rai nga ai. Mungkan ga ntsa hta Karai Kasang a sumsing mungdan lam tsun dan let shinggyim masha yawng hpe hkye hkrang la lam hpaw ya ngut ai hpang Madu gaw Shi a dum nta sumsing mungdan de bai wa mat ai. Sumsing mungdan gaw Hkristu Madu a nta rai nga ai; anhte a matu chyawm gaw maigan mungdan hpa rai nga ai. Raitim, Karai Kasang a tsaw ra matsan dum myit a majaw Shi a dum nta sumsing mungdan gaw anhe a dum nta mung byin tai wa hkra lajang da ya ai.

Ga shadawn hta na gumhpraw ap da hkrum ai ni gaw anhte Hkristan masha ni rai nga ai. Yesu Madu gaw anhte hpe mau hpa sut gan ngu ai akyu chyeju law law hpe hpan law law hku ap jaw da ai. Hkum hkrang, Myit masin, Wenyi kumhpa! Laklai ai Wenyi kumhpa ni hpe jaw da ai (1Htesaloni 5:23).

Hta sha n ga, anhte ni hte Hkristan kun dinghku makau grupyin yawng a akyu ara hkam la u ga matu anhte hpe aten hte asak hpe mung jaw da ai.

 

Masha langai hte langai, ap da hkrum ai sut gan gaw n bung pre ai raitim bung pre ai gaw Karai Kasang a chye ju yawng a ntsa maren mara jaw da ai lam rai nga ai. Kabu Gara Shiga hta, Yesu madu gaw “shi a atsam hte maren” ap da ya ai ngu tsun da ai (Mt 25:15).

Dai majaw, garan ginhka nna jaw ai nrai nga ai. Masha hkum shagu a atsam hpe manu shadan ya ai hte ahkyak la sumru ya, myit ya ai majaw rai nga ai. Masha hkum shagu, shi atsam hte maren kaja dik ai apu asi hpe pu si lu na masa hta Karai kasang tawn da ya ai. Masha hkum shagu awng ai apu asi lu na matu loi dik htum ai mahkrun lam hpe hpaw da ya ai.

Yesu Madu bai du sa na ngu ga sadi jaw da ai gaw masha hkum shagu a matu mau hpa rai nga ai. Karai Kasang a magam hta pu si ai masha ni a matu gaw mau hpa kaja rai nga ai. Raitim hpa apu asi nan pu si ai lam nnga ai ni a matu gaw hkrit tsang, hkrit kajawng ai mau hpa rai nga ai. Shanhte gaw shut hpyit mara htam lahkawng galaw shut ai zawn rai nna, ga shadawn hta na mara shagun hkrum ai wa hta mara kaba na ma ai.

Hpa majaw nga yang, shanhte hpe Karai Kasang ap jaw da ya ai wenyi asak kumhpa hpe mara a majaw shamat kau sai rai nna, Karai Kasang hpe bai n-htang jaw lu ai lam nnga ma ai majaw rai nga ai.

 

Shanhte a mara dam gaw shanhte hkrit tsang ai hta grau na ra ai. Karai Kasang gaw shanhte hpe jaw da ai chyeju sut gan yawng hpe bai zing la kau na re. Shanhte a matsan mayan lam hte sim lam n lu ai gaw sawng dik htum rai na ra ai. Shanhte shut hpyi kau sai shut hpyit mara ni hpe chyu sha shanhte madu lu na ma ai. 

Shanhte gaw Nsin chyip re ai shara de gawt sharawng da ai hkrum na ma ai. Shanhte a asak a ningpawt rai nga ai Karai Kasang hte hka mat nna, htani htana ngarai mung de shang ra mat na rai ma ai.

Ngwi pyaw simsa ai lam a ningpawt rai nga ai Karai Kasang hte tsang gang mat na rai ma ai. Shanhte gaw htani htana yak hkak jam jau ai dukhka, htum ngu nnga ai myit malai ai lam hte prat tup pyaw hpa lam nnga ai shara de du mat na ma ai.

Dai gaw Karai Kasang hte hka mat jang Ngarai mung nan rai nga ai. Ngai dam hkrum sha ai ni hpe hpang kalang dam bai jaw mung n ra sai.

Ndai laban na Chyum mungga daw langai hta sari hte hpring ai madu jan a lam hpe tsun da ai. Chyum mungga daw laingai hpe madat hkam la ai ni gaw tinang a kanu a lam sumru hkrup na re. Jahpawt yup rawt ten kaw na shana yupra shang ten du hkra bungli kying ai rai nna, dum nta masha yawng hpe htep lahti yu reng nga ra ai majaw tinang hkum sadi na matu pyi malap taw chye ai.

 

Sari rawng ai kanu ni sumru ai lam madung masum nga ai. (1) shi madu wa a mying, arawng shadang nhten hkra, madu wa ap jaw ai lit magam yawng hpe gun hpai let madu wa hpe galoi mung hkung ga lara di ai. (2) Kun dinghku dum nta masha ni a malu masha, bu hpun mawn sumli, tsi mawan, hpaji lam hte makam masham lam zawn re ai ra ai lam yawng hpe kata lam sadi maja let hkyen lajang ya ai. (3) Matsan ai ni a matu myit tsang ya ai rai nna, shi a myit masin salum hta yawng a matu shara nga ai.

Ga shagawp laika 31:20 hta, “Shi gaw matsan mayan ni hte ra kadawn ai ni hpe n-hpaw n-ya jaw lu jaw sha kam nga ai”, ngu shakawn da ai.

Dai numsha gaw Hkristan ni yawng a matu katsi la mai ai num sha rai nga ai.Hkristan masha langai hta mung ahkyak ai lam masum hpe aten shagu hta sadi let hkan nang ra ai. (1)Hkristu a matu kaya gahpa n nga ai sha galoi mung sak hkrung nga rai ai. (2) Tingkyen a matu n-myit ai sha hpu nau Hkristan ni a akyu ara matu sumru let ahkyak tawn da ra ai. (3) makau grupyin htingbu ni hta na matsan ai ni hpe garum shingtau ya na matu jing jing rai nga ra ai. Ndai lam ni hpe hkan shatup ai Hkristan masha gaw Karai kasang ap da ya ai sut gan hpe htam (100) shalaw jat hkra galaw ai wa rai nga ai.

Du sa na ra ai Hkyela Madu hpe kabu gara let ala ding da nga ga. Ndai akyu hpyi ga gaw Misa hkungga nawng jau ai Jau hpyi ai akyu hpyi ga rai nga ai. Dai gaw Yesu Madu du sa nna, chyeju kumhpa hpe teng sha jaw na re ngu kam hpa myit kaba hte a la nga ai Hkristan masha langai mi hkam sha lam rai nga ai.

 

Si hkrung si htan gaw hkrit hpa re ngu hkaw tsun ai wa, shing n rai, hkam sha ai wa gaw teng man ai Hkristan a lachyum hpe naw sharin la ra na re. Hkristu bai du sa na ngu ai ga sadi gaw Hkristan masha ni yawng a matu kabu pyaw shangun ai lam nan rai nga ai. Hkristu galoi ten, gara kaw du sa na ngu ai lam ni hpe ning dang hkat taw ai gaw kaman lila sha rai nga ai.

San Pawlu gaw dai zawn shuk ai lam ni hpe shazim da lu na matu shadum ga ni tsun da nga ai.

Karai Kasang du sa na aten gaw shinggyim masha shagu hpe mau hpa byin shangun na ra ai.Ahkyak ai gaw, anhte ni hkrit mau ai lam n re ai sha, kabu mau ai lam rai nga na ahkyak ga ai. Dai majaw mara kata kaw hkawm sa ai lam n-galaw ai sha, kam sham myit kaba hte ninghtoi hta hkawm sa nga na ra ga ai. Anhte ala ding da nga ai lam gaw Yesu Madu du sa na hpe ala ding da ai lam rai ra ga ai. Yesu du sa ai shaloi anhte myit mada ala ding da ai lam yawng hkum tsup wa na rai nga ai.

 

Akyu hpyi saga

Wa Karai Kasang e, ngwi pyaw ru yang ten hta rai tim, matsan lu su ten hta rai tim, kaw si hpang gara ten hta rai tim, hpringtsup ai ngwi pyaw lam jaw ya na Hkristu Madu Yesu du sa na aten hpe kabu gara let ala ding da nga lu na chyeju jaw ya rit. Anhte a Madu Hkrsitu a marang e, hpyi nem nga ga ai. Amen.

 

Hkristu hta tsaw ra ai kanu kawa tara hkaw sara/num ni hte nu wa hpu nau ni e, ndai laban gaw pranwan ladaw hta (33) ngu na laban rai nga ai.

Hti ang ai Ja Chyum Mungga ni gaw

 

CHYUM MUNGGA DAW (1) GA SHAGAWP 13:10-13, 19-20, 30-31

CHYUM MUNGGA DAW (2) 1HTESALONI 5:1-6

KABU GARA SHIGA MT 25:14-30

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.

 

Add new comment

8 + 0 =