Pran Wan Ladaw (14) – Karai Kasang a Mungga

Pran Wan Ladaw (14) – Karai Kasang a Mungg

Hkristu hta tsaw ra ai nu wa hpu nau ni e, ndai laban gaw pranwan ladaw hta (14) ngu na laban de du shang wa saga ai. Ndai laban na la na Chyum mungga ni hpe lakap nna, “Madu Yesu a Myit Masa hpe chye sai kun?” ngu ai ga san hte hpang na nngai.

Karai Kasang Yuda masha ni a matu, ga sadi tawn da ai “Messiah” ngu ai shangun dat na Hkyela Madu hpe shaning tsa kaba myit mada ala ding da lai wa masai. Grau nna shanhte a mungdan hta lama ma hkrit tsang hpa bying wa shagu, myit mada chye ma ai. Babilon mung de, rim la, mayam shatai hkrum ai hpang tinang mungdan de bai du wa ai shaloi dai myit mada lam grau sung grau kaba wa ma ai.  Tinang buga de bai htang nga lu ai majaw kabu pyaw ma ai raitim, mung masa lam hta gaw shanglawt lu ai lam galoi mung n nga ma ai. Shanhte a mungdan hpe n gun ja ai mungdan ni sha ga-up da ma ai.

Dai majaw Messiah gaw Karai Kasang a hpung dagu hte Yuda masha ni shanglawt ai mungdan lu hkra, tsasam mung up ni hpe, gawng ngwi ngwi gasat dang manga kau ya na re ngu, kam let myit mada nga ma ai. Shi gaw mungkan ting hpe awng dang lu ai ningbaw kaba rai na re ngu myit mada da ma ai. Yerusalem hpe mung mungkan ting na ahkyak ai ginjaw shatai na myit mada da ma ai.

Myihtoi Zechariah gaw Isreael myu sha ni a matu Messiah a hkrang kumla hte magam bungli ni hpe shadan shadawng shachyan ya ai.

Karai Kasang gaw shi a myusha Isreael ni a matu Myihtoi Zechariah hpe shangun dat ai yaw shada lam nga ai. Hten run mat sai Yerusalem hpe matsan tim bai gaw gap na matu; du sa na Messaih hte seng nna myit shut, sawn shut ai lam ni hpe bai gram shatsawm na matu hte, wenyi lam ni hpe bai gaw gap shatsawm na matu rai nga ai. Messiah hte seng nna Myihtoi Zechariah laika hta tsun da ai ni hpe hka ja yu ga. (1) Yerusalem amyu masha ni e, kabu gara jahtau garu nga mu! Yu mu, nanhte a hkawhkam wa gaw nanhte hpang de sa wa nga ai! (2) Messiah gaw galoi mung asum n jaw na re gaw teng sha rai nga ai. Raitim, mungkan shinggyim hkawhkam ni zawn awngdang lam hta gumrawng gumtawng nga na nre. Tinang hkum hpe sha kam ai hta Yaweh Karai Kasang hpe madung kam hpa ai, yu maya matsan masha zawn, shagrit shanem dik ai wa rai nga ai. (3) Messiah a mungdan gaw mungkan kaw nga ai hkawhkam up mungdan ni hta grau kaba na ra ai. Mungkan ting hpe ga-up da na gaw teng sha re. (4) Hkawhkam up ai mungdan law malawng gaw hkawkam si jang hten rum mat ma ai. Raitim, Messiah a mungdan gaw htani htana agring nga na ra ai. (5) Hkawhkam up ai mungdan hpe makawp maga na matu n gun ja ai hpyen dap law law ra ai. Messiah a matu gaw dai zawn n ra ai. Shi a matu gaw hpyen dap hte laknak ni n ra ai. Hpyen gasat ai gaw manawn masham nangmak law hpa ai a majaw rai nga ai. Dai majaw manawn masham, nangmak lawhpa myit ni hte laknak ni hpe jahten kau ra nga ai. Messiah du sa ai a yaw shada ai lam gaw mungdan langai hte langai simsa lam la na matu hte mungkan masha shada lapran hta simsa lam nga na matu rai nga ai. (6) Mungkan hkawhkam ni gaw tinang hkrai up sha na matu mungdan law law hpe gasat la ma ai. Messiah gaw shi a mungdan matu, masha ni hpe mayam shatai la ai hku nre ai sha, teng man nna shanglawt lu ai ahkaw ahkang jaw ya ai lam hte mungdan hpe gaw de sa wa na she rai nga ai.

Zechariah 9:9 hta “Shi gaw padang ninglaw hte awng dang ai lam lu la nga ai; rai ti mung shagrit shanem ai myit hte lawze ntsa e jawn nga ai; lawze kasha langai a ntsa e, lawze kanu a kasha a ntsa e jawn nga ai.” Kabu gara shiga hta San Mahte hte San Yawhan gaw ndai lam hpe hkan shatup ai Messiah gaw kadai re ngu ai hpe shadan shadawng da nga ai. Mt 21:5, Yawhan 12:15 hpe hti yu ga. Kasa ni mung Yesu Madu Yerusalem de lamang hte shang wa ai hpe Isreael ni zawn sha, hkam la shut ma ai. Yesu Madu gaw Roma hpyen hpe gasat dang manga kau nna, mungkan ting hpe zing la sana re ngu shadu ma ai. Shanhte myit ai grai shut mat ai. Kasa ni shanhte shut ai lam hpe bai mu chye hkap la na matu aten law law na mat ai re. San Mahte hte San Yawhan Kabu gara shiga ka ai ten gaw teng man ai lam hpe chye na hkap la sai rai nga ai. Dai gaw, Messiah hta Karai Kasang a hpung dagu hte sha nrai, shi a matsan dum tsawra myit hte chye na hkap la ya ai myit ni a marang e Yerusalem hte mungkan ting hpe up hkang lu ai rai nga ai.

Shinggyim masha ni gaw Hkristu Madu a marang e Karai Kasang a mai kaja ai lam hpe chye na lu ma ai.

Ga shaka dingsa hta Wenyi lam madun ai a marang e Myihtoi ni gaw shinggyim masha ni hta Karai Kasang a hkye hkrang la magam hte shi a matsan dum lama ai hpe madun dan ma ai. Raitim, Yuda masha ni na zawn sha, Karai Kasang a tsawra matsan dum lama ai hpe chye na na matu grai hpang hkrat ma ai. Karai Kasang Isreael myusha ni hpe grai tsaw ra ai majaw shanhte hpe hkye la na matu du sa na rai nna, kaga masha ni hpe gaw jahten sharun kau na re ngu shut sai ai hku hkam la ma ai.

Yesu Madu mungga htawn shagu, shi du sa ai gaw shinggyim masha yawng hpe hkye la na matu re ngu tsun tim kasa ni mung mi tsun sai hte maren sha hkam la shut ma ai (Yawhan 3:16). Karai Kasang a masing masa lam hte seng nna kasa ni teng man jaw ang ai hku chye na lu hkra Wenyi lam madun dan hpang ai (Kasa 10:47, 11:17, 15:9).

Shani shagu Karai Kasang hte shi myit ra ai lam hpe grau grau chye na jat wa nna, tinang hkye hkrang la hkrum lu na matu hkan shatup na gaw anhte prat a yaw shada lam rai nga ai. Raitim, anhte ni mung, kasa ni zawn sha, Karai Kasang gaw makau grupyin htingbu ni a ntsa yaw sing ai lam nga ai hpe shut sai ai lachyum hku hta la chye ga ai.

Daini na kabu gara shiga hta Madu Yesu anhte hpe lahkawng lang sadi jaw da ai. (1) Kadai mung, Karai Kasang hpe shi a shi chye lu na n re. Hkristu Madu hta sha shi hpe chye lu na re. Anhte a matu Karai Kasang tawn da ai masing hpe tam mu la nna hkam la lu na re. (2) Wenyi lam hta ma ni zawn hkam la nga sa jang she Karai Kasang hte hkau chyap lu na re ngu ai rai nga ai.

Anhte ni Yesu Madu hpe chye chyang ra ga ai. Shi gaw Kawa Karai Kasang hpe chye lu na matu hpaw da ai laika buk zawn rai nga ai. Mt 11:27 hta, Yesu Madu gaw “Nye Wa hpe mung, dai kasha hte, dai kasha shadan dan mayu ai ni hta kaga kadai n chye lu ai,” ngu tsun da nga ai. Yesu Madu Kawa Karai Kasang a lam masha n kau ni hpe sha chye shangun nna, n kau ni hpe n chye shangun ai n rai nga ai. Yesu Madu a kaba dik ai myit mang lam gaw shinggyim masha yawng gaw Kawa Karai Kasang hpe chye chyang nna hkye hkrang la hkrum lu na matu rai nga ai. Raitim, masha shagu n awng dang ma ai.

Nkau ni gaw Hparishe ni zawn (myit tsaw myit dap ai) rai dum ai majaw sharing shaga ai lam hpe n madat ai sha, Hkristu hta Karai Kasang hpe chye chyang jahpai hpai ma ai. Hparishe ni gaw Mawshe tara hpe hkrak tup hkan nang jang hkye hkrang la hkrum sai ngu kam ma ai. Hkristan masha nkau ni dai zawn sha hkam la ma ai. Shanhte gaw tara shadik ma ai raitim, tinang hte ni htep ai htingbu ni hpe tsawra ra ai ngu ai tara hpe gaw kabai da ma ai. Dai zawn galaw ai a marang e shanhte a Hkristan sak prat hpe n hkrat sum ging ai sha hkrat sum mat ma ai. Nawku hpung tara hpe kade hkan shadik ma ai raitim, Karai Kasang hte shi a tsawra myit hpe n chye na, n chye garan gachyan ma ai.

Nkau ni gaw Yesu Madu hte shi a sharing shaga ai lam ni hpe kabu gara hkap la lai wa ma ai. Raitim, kaga lam ni a majaw Karai Kasang hpang de sa na matu pat shing dang la hkrum ma ai. Shanhte Karai Kasang hpe chye ma ai hte tsawra ma ai. Raitim, rai dum ai myit, law hpa ai myit, mungkan ra marin ai myit ni kawn lawt lam n lu ma ai. Roma 8:13 hta, “Nanhte gaw hkum shan a myit ra ai hku asak hkrung myit jang gaw nanhte si na rai nga myit dai;” ngu tsun shadum da nga ai. Anhte ni rai dum myit, law hpa myit, hte ra marin ai myit ni zawn re ai n kaja ai lam ni hpe la kau lu na matu shani shgu na anhte a prat hpe shading sharai la ra ga ai. Karai Kasang hpe chye na, hkap la, hkan sa ai hta kade madang rai ga ai gaw anhte ni a mara hpe kade daram koi gam kau lu nga ga ai hta madung tai nga ai.

Karai Kasang hpe chye chyang tsaw ra nga lu na matu anhte ni a wenyi lam hta sasana ma ni zawn rai nga ra ga ai. Mt 11:25, hta “Sumsing lamu Mungdan hte ginding aga a Madu Wa e, hpaji byeng-ya rawng ai ni hte myit kung hpan ai ni hpe n chye shangun hkra makoi mgap da nhtawm, hpaji kata ai ni hpe madun dan ndai majaw, ngai nang hpe shakawn kungdawn nngai.” ngu Madu Yesu Kawa Karai Kasang hpe shakawn da nga ai. Ndai shakawn ga hpe anhte ni lachyum shalen ai hta nmai shut ai. Madu Karai a chye ju hpe mara galaw ai a majaw nchye na ai lam nga na re. Raitim, matsan mayan ni, hpaji nchye ai ni, grit nem ai ni, masha ningmu hta kam hpa shara n nga ai ni gaw, Wenyi lam madun ya nna Karai Kasang hta kam hpa kam shamyat ai a majaw Madu Karai a tsawra myit hpe tam la lu nna hkye hkrang la hkrum ma ai. Dai lam ni a majaw Yesu Madu kabu sharawng nga ai.

Shinggyim masha a nyan hpaji gaw Karai Kasang hpe chye chyang na matu n hkum tsup ai; akyu nrawng ai ngu tsun mai nga ai. Laika hpaji nchye ai, bum masha langai mi laika hpaji chye Karai hpaji ninghkring langai mi hta Karai Kasang a tsaw ra myit hpe grau chye na ai rai nna Madu hpe grau tsaw ra lu nga ai. Dai zawn sha, ahkyak ai ngu, myit la chye ai daru magam, hpung dagu ni, sut su ai lam ni hte arawng aya ni gaw, Karai Kasang hte ni htep na matu madi shadaw ya ai hta dingbai dingna jaw pat shing dang ai lam grau law nga ai. Karai Kasang hpe chye chyang na matu langai sha re ai mahkrum lam gaw tinang a ra rawng gawng kya ai lam hte hpring tup nga ai mara ni hpe dum shai myit malai let, Karai Kasang a mai kaja ai hte matsan dum la ma ai hpe kam hpa kam shamyat na lam rai nga ai.

Karai Kasang gaw makoi magap da ai mai kaja lam hpe ma ni hta shadan shadawng ya ai. Hkye hkrang la hkum lu na matu “nta masha ni hta na ma ni hpe yu la mu” ngu tsun ai rai nga ai. Shanhte gaw hpa lam hta rai tim, masha kaba ni hpe kam hpa ma ai. Kaba ai ni a tsawra myit hpe grau hkam sha lu ma ai. Karai Kasang hte seng nna mung dai hku hkan shatup nga ga ai rai yang galoi mung akyu hkam la na rai nga ai.

Madu Yesu shi hkum nan hpyi shawn da ai lam.

Madu Yesu gaw Shi a masin salum hta manoi let hkam sha ai lam hpe tsun shapraw mu ga, shingyim masha hpe saw shaga nga ai. Mt 11:28-30 hta, “Lit li gun nna hkri ba la ai ni yawng hte e, ngai kaw wa marit; ngai nanhte hpe ban sa shangun na made ai. Ngai gaw myit sumnung ai hte myit gyip nga nngai rai nna, nye a kandang hpe hpai mu, nanhte a myit masin ban sa ai hkrum na malit dai. Hpa majaw nga yang, nye a kandang hpai loi ai hte, nye a lit mung tsang nga li ai” ngu nna tsun da nga ai.

Yesu Madu mungga hpe madat nna sung sung myit sumru ai ni gaw teng sha, ra sha na re. Kadai gara myihtoi mung shi zawn ntsun lai wa yu ai.

Lit li gun nna hkri ba la ai ni yawng hte e, ngai kaw wa marit, (Mt 11:28). Na ai ni yawng gaw shi kaw lagat sa mayu na re. Mungkan ntsa hta myit ru myit tsang ai lam langai ngai gaw nga ai ni re majaw rai nga ai. Yesu Madu shi a saw shaga ga hpe galoi mung bai n dawm la kau ai. Masha shagu hpe aten shagu saw shaga nga ai. Anhte ni dai Madu a saw shaga ai ga hpe hkap la na matu hpa rai hting nut nga na i? Madu hta myit ru myit tsang lam ni hpe jahkoi kau lu ai tsi n nga ai rai yang dai ga hpe tsun na nrai nga ai. Anhte marai hkum dingdep a myit tsang ai lam ni hpe tsi shamai ya lu ai majaw she Madu tsun ai rai nga ai.

Ngai nanhte hpe ban sa shangun na made ai, (Mt 11:28). Ngai nanhte hpe n gun ban ya na nngai ngu ai hte maren sha rai nga ai. Shi a pahkam hkam ai lam gaw mau hpa nan rai nga ai. Myit ru myit tsang ai masha langai a masin salum hpe tsi lajang lu ai hpung dagu hte hpring nga ai wenyi tsi sara gaw kadai ta? Yesu Madu arawng mala shakawn taw ai nre. Dai zawn re ai magam hpe Yesu Madu mungkan ga ntsa kaw naw nga ai ten, law law lang galaw lai wa sai re. Mt 8: 3, hta “Ngai hkraw nga nngai, san pra wa nu!” Mt: 9:2 hta, “Sha e, ngwi praw nga n-ga, na a yubak dat kau ya ai hkrum nit dai!” Lk 7:13 hta, “Hkum hkrap sa!” Yh 20:26 hta, “Nanhte ngwi praw nga mi ga!” ngu ai ga hte hkum katsing si ai ni, mang gang kap ai ni, si mat sai ni, yubak mara galaw ai ni, myi di, na hpang ai ni a ru tsang ai lam yawng hpe tsi shamai ya lai wa ai.

Ngai gaw myit sumnung ai hte myit gyip nga nngai, (Mt 11:29). Yesu Madu dai ten hta masha ni chye na hkra htuk manu dik ai ga si hte sharing shaga da ai rai nga ai. Dai ga si hpe Madu Yesu zawn myit malang myit san seng ai hte tsun lu ai masha kadai naw nga ai rai? Yesu Madu gaw gumrawng ai wa, myit shang sha ai lam nnga ai wa, tsawra myit nrawng ai wa, matsan dum myit nrawng ai wa ngu kadai wa mara shagun lu na rai?

Akyu hpyi saga:

Tsawra ai Madu e, hkriba hkum nna lit li gun ai ni yawng hpe shaga la nga ai majaw chyeju dum nga ga ai. Anhte ni tinang a mara hpe yin la chye nna, nang Madu hta ban sa lu ai chyeju jaw ya rit. Anhte a madu Hkristu a marang e, hpyi nem nga ga ai.Amen

 

Hkristu hta hkungga tsawra ai tarahkaw sara/ num ni hte nu wa hpu nau ni e, hpawt ni gaw Pranwan ladaw hta (14) ngu na laban rai nga ai.

Hpawtni hti ang ai ja chyum mungga ni gaw

Chyum mungga daw (1)  Zecha 9:9-10

Chyum mungga daw (2)  Rom 8:9,11-13

Kabu gara shiga   Mt 11:25 - 30

Ndai ja chyum mungga ni hpe hti nna, hpawtni na nawku daw jau lamang ni hpe woi awn nga ga!

Wa Jau Gawmaw Hkawng Yae

Add new comment

3 + 2 =