Paska Poi Laban  A, 2023

Paska Poi Laban  A, 2023

 

Lang mi na mare langai hta mana langai gaw shana tup yupra ntsa kaleng taw let, "hpawtni gaw jan n pru hkra ngai hkap shingdang na" nga nna sumru let yup mat ai da. Dai shana yup aten kaw rawt nna, mare makau na tsaw dik bum ntsa de, jahpawt jan shingkan n dawng shi ai ten, du lung mat ai da. Bum ntsa kaw du jang, nsen kaba hte maren jahtau nga ai, "Jan e, pru wa na matu kachyi mi pyi hkum myit, ga ndai gaw nye a ga ndat re, nang gwi yang gaw lamu jut shara mi kaw paw pru yang paw pru yu u le, paw pru wa yang gaw ding-nye lu na ndai," ngu nna matut manoi jahtau marawng nga ai da.

Tim shi a aten du jang, singpraw maga lamu jut shara mi kaw nna, jan a n'htoi shingkang dan dawng paw pru wa ai. Jan a n'htoi shingkang gaw lamu na summwi ni kaw du hkra jang, ja nsam rawng ai summwi de gale mat ma ai. Bum tsaw shingyan ni mung Jan a n'htoi shingkang a majaw, gawngngwi ngwi dan dawng tsit tsawm wa ma ai. Gade nna yang, Jan hkum nan mung shingkawng shingwang kaba hte paw pru wa ai. Dai shaloi jang dai mana gaw myit htum ai hte bum lagaw de lagat yu wa nna, mare dum nta nhku de alawan gat shang wa mat ai da. Nta nhku de du jang jang, chyinghka ni la, Jan n'htoi shingkang hkyen shang lu na zawn re ai shakum hku ni hpe mung yawng magap ai hte, nba shagum up nga mat ai da. Dai gawk kata, nba npu e rawng nga let, "ya chyawm gaw n'sin chyip rai mat sai, ngai na makau grupyin hpe n mu lu sai, kaja nan teng sai, dai ni Jan n pru ai, ngai dang sai, awng sai," nga nna tsun nga ai da.

 

Dai ni na Kabu Gara Shiga hpe hti sumru yu ai shaloi, Yesu prat na Yuda masha ni a makam masham ningbaw ningla ni gaw, gade daram wa ningtawng ma ai raitim, shawng de tsun hkai dan ai, maumwi hta na, angawk ai wa myit let galaw ai hte nau n shai nga ai hpe mu lu nga ai.

Madu Yesu bai n hkrung rawt lu na matu, tau nau hkyen lajang ai lam ni hte makawp maga ai lam ni hpe shahte ni galaw shajing shatup da magang sai rai ma ai. Yesu hpe lup da ai lup wa hpe dazik dawk shakap, tara shang pat shingdang da nna, hpyenla ni hpe aten tup sin shangun da ma ai. shanhte ni gaw lup shinggan de na masha langai langai sa hpaw la n ra ai sha, lup kata kaw rawng nga ai dai Yesu hkum nan a hpung dagu hte bai hkrung rawt wa lu ai hpe malap da ma ai, myit n hkawn da ma ai. Madu Yesu hkrung rawt n lu hkra lam amyu myu hku lajang shachyip da ma ai gaw maumwi hta na angawk ai wa galaw ai hte maren sha rai nga ai.

Shanhte dazik dawk pat shingdang ai lungrawk kaba hpe ma kaji langai mi lungsha hpe hta kabai lu ai zawn, Madu a lamu kasa langai ngai loi loi hte hpaw malang kau lu ai hpe gaw kam nga ma ai.

N-gun atsam marai rawng myit kaba ai lup sin hpyenla ni wa, n-nang nawn nawn ai hpe chye ma ai hte hkrit kajawng, shagum up rai mat ma ai. Du gyi shalang ni hpang de labu tat, labye tat, gat hprawng wa mat nna, mabyin lam yan yawng hpe nsa kaba shaw let, tsun den dan ma ai.

Madu Yesu hkrung rawt ai lam teng man ai re hpe na chye ninglen, Yuda salang ni dai teng man ai lam hpe makoi magap na matu mayun gumhpraw jaw ma ai, n jaw n ang ai hku sakse hkam shangun ma ai. Shanhte galaw ai sat lawat ni gaw, shanhte n tsawm n htap ai myit masa hte mungkan ga hta gring ai, jaw ang ai, sadi dung ai tara a n'htoi shingkang n sang n hkra lu ga, pat shingdang nga ma ai hpe shanhte hkum nan shanhte n chye mat ma ai.

Kanu Nawku Hpung gaw ndai Paska laban shani hta Madu Yesu a lup hpaw malang taw nga ai hte, kaman rai taw nga ai hpe madung da nna myit sumru na matu tsun dan da nga ai. Dai hte matup manoi ai lam ni hpe gaw hpang na laban hta na lu na rai ga ai. Yuda salang ni gaw, Madu Yesu a sharin shaga ai lam ni hte lamyit kumla ni hpe n hkap la ma ai zawn, tengman tara hpe n mu jahpai hpai mayu ma ai majaw, shanhte a myi hpe pat da ma ai. Lk 24:6 hta, lamu kasa ni, "Shi nang e n nga sai, Shi hkrung rawt sai," nga tsun ai gaw Madu Yesu kaja wa hkrung rawt wa sai, ngu ai Kabu Gara Shiga hpe shawng n'nan na lu ai numsha ni rai nga ma ai hpe tsun dan nga ai re. 

Shanhte na lu ai Kabu Gara Shiga, Yesu a kasa ni hpe kalang lata wa tsun hkai dan ma ai; dai lam na ai shaloi jang, Petru hte Yawhan yan lup gat sa ma ai rai nna, numsha ni tsun dan ai hte maren, mu mau let nta de bai nhtang wa ma ai (Lk 14:22).

Chyum Laika Sara, Yawhan gaw, ndai mabyin hpe sung dik ai hku sumru da lu ai rai nga ai. Yh 20:8 hta, "Mu ai hte kam sham ai" nga nan tinang a lam hpe ka shalen da nga ai. Ngam nga ai kasa ni chyawm gaw, lachyum n nga ai, mai byin ai masa n nga ai, nga nna, numsha ni a ga hpe kaman zawn nawn ma ai, n kam ma ai (Lk 24:12).

Madu Yesu a sape lahkawng gaw, myit mada shara n nga sai, nga myit la nna, moi na zawn sha kanbau magam bungli bai galaw sha na matu myit daw dan let tinang a dum nta nga ai Emauk mare de bai htang wa ma ai.

Lama na, Madu Yesu kasa ni hte sape ni hpang de bai n du sa ai rai yang, shanhte shada da hka bra mat na, Madu Yesu hte matut mahkai lam mat mat na rai nga ai. Madu Yesu bai hkrung rawt ai hpang, Shi hte hkrum katut ai masha shagu gaw, kaja ai de galai shai wa ma ai.

Lup hpaw malang nga ai hpe mu ai numsha ni, Petru hte Yawhan, Emauk mare de htang wa ai sape lahkawng, kasa ni hte, n myit mada ai ten Madu Yesu a hkum hpe shadan dan hkrum ai ni yawng gaw sak hkrung nga ai prat lachyum n'nan hpe lu la shajang ma ai. Shanhte a matu Madu Yesu jaw ai sharin shaga ai lam ni, myit ru myit tsang ai lam ni, kabu pyaw ai lam ni hte myit mada lam ni yawng hpe asan sha chye na hkap la lu masai. Kadai mung, gara mahkrun lam hku mung, shanhte hte Karai Kasang lapran, sumprat dawk bang jahka kau lu na n rai sai.

Shahte Madu Yesu hte hkrum katut ai lam san ai rai yang, shanhte ni jaw ai mahtai bung ai lam langai sha nga ai. Dai gaw "anhte ni asak bai lu la saga ai, Madu a asak hpe lu la saga ai, dai Madu kaw na lwi pru wa ai simsa lam hte kabu awng sharawng lam lu la saga ai, nga ai rai nga ai. Dai asak hpe lu la ai wa kadai raitim, shawng na hte bung sana n rai sai.

Kasa ni hte sape ni a prat gaw bai hkrung rawt ai Madu Yesu hte n hkrum shi ai prat hte hkrum ngut ai ten na prat ngu ai n bung ai daw lahkawng rai mat sai.

Lama na, Yesu a lup hpaw malang taw nga nna kaman sha rai nga ai ngu ai labau hta htum mat ai rai jang, ndai Paska n'htoi hte anhte Hkristan ngu ai nga yang she nga sana, bai hkrung rawt ai Hkristu hte hkrum katut lu na mung, n mai byin sana re.

Hkristan masha ni a Paska Poi gaw kaja wa Madu Yesu hkrung rawt ai lam hpe shadum ya ai rai nna, Shi hta anhte ni mung bai hkrung rawt na ga ai, ngu ai hpe kam sham ai lam rai nga ai.

Madu Yesu a bai hkrung rawt ai teng man ai lam hpe mungkan ntsa hta kadai mung gara mahkrun lam hku nna mung, makoi magap da n lu ai. Bai hkrung rawt sai Madu Yesu gaw, anhte kadai kaw raitim, hkap la ai lam n nga ai sha, shadut kanaw shang wa na n re, ngu ai hpe chye da ra ga ai.

Anhte ni kun dinghku dum nta masha zawn, rau jawm hpawng de ai rai jang, hkrung rawt sai Hkristu hte hkrum lu na re. Shi hte hkrum lu na hte kun dinghku nta masha ni zawn hkrum lu na matu anhte yawng hkik hkam dik ai ndai shara, ndai Paska Missa Hkungga nawng jau ai, Paska nawku daw jau ai hta, shang lawm nga ga ai re.

Madu Karai Kasang saw shaga ai majaw anhte ni sa du nga saga ai. Numsha ni kawn, kasa ni hte sape ni hpe "Galilee hta hkrum ga" ngu ga sadi tawn da ai hte maren, ndai shara, ndai poi hta anhte hte hkrum nga matu Madu Yesu ga sadi tawn da nga ai re. Mt 28:10 hta, "Dai shara hta shanhte ngai hpe mu lu na mara ai," nga ka da ai. Madu Yesu Shi hkum hpe Shi madun dan na matu anhte hpe ala nga ai.

Anhte ni tengman myit malai hte anhte a myit masin salum chyinghka hpaw da ya na sha ra sai. Dai rai jang she, Madu Karai Kasang a n'htoi shingkang gaw anhte hta na n'sin hpe la kau ya nna Madu Karai Kasang a ngwi pyaw ai gaw anhte a yawn hpa lam hpe awng dang kau ya na re.

Madu Karai a sak hkrung lam gaw anhte a si hkrung si htan lam hta gale shang wa na re.

Hkristu Madu a matu nanhte a masin salum chyinghka hpaw da ya mu, nga nna Wa Sarabyin Yawhan Paulu (II) n-gun jaw da lai wa sai.

Madu a lamu kasa shadut ai ai majaw Petru hpe tinang dum nta de saw shaga ai Cisaria mung na hpyen du Kaleus hpe Petru gaw hkrunlam kaw Madu Yesu a lam tsun hkai dan yang lam lapran hta Chyoi Pra ai Wenyi gaw Pentecost shani kasa ni a ntsa e yu hkrat wa ai zawn Kaleus hte shi nta masha ni a ntsa yu hkrat wa ai. De hpang Madu Yesu a lam matut sang lang dan n ra mat sai. San Petru hkumtsup hkra sang lang dan n ngut shi yang, Madu Yesu gaw shanhte hpe Wenyi hte chyeju jaw bang ya ai lam mu lu ai.

Paska poi hta Hkristu gaw ngwi pyaw lam, simsa lam hte sak hkrung lam hpe anhte she myit kaba hte hkap yin la ai rai yang, kasa ni hte seng nna tsun da nga ai hte maren, Madu Yesu a chyeju hpe anhte ni hkam sha lu na re.

Anhte ni tinang hkum tinang, hkring hkring san jep yu ra ga ai. Gara hku myit sumru nga ga ai kun? Hpa lam hta myit lawm myit shang sha nga ga ai kun? Prat a matu ngai a myit mada shara gaw nhpa rai kun?

Ahkyak dik ai lam langai mi hpe matsing da ra ga ai. Dai gaw Kol 3:4 hta, "Anhte a asak ngu ai Hkristu gaw dan pru wa ai shaloi, anhte mung Shi hte rau hpung shingkang hta dan pru na ra ga ai, ngu ai rai nga ai.

Akyu hpyi shaga

Wa Karai Kasang e, Madu Yesu hkrung rawt sai lam hpe teng man ai hku sakse hkam sa let lani mi hta Madu Yesu hte rau hkrung rawt lu shangu ya rit. Anhte a Madu Hkristu a marang hpyi nem nga ga ai.

Hkristu hta hkungga ai kanu kawa tara hkaw sara/num ni hte nu wa hpu nau ni e, ndai laban gaw Paska ladaw hta (1) ngu na laban rai nga ai.

Chyum Mungga (1) Kasa 10:34a, 37-43

Chyum Mungga (2) Kol  3:1-4, (0r) 1Kor 5:6-8

Kabu Gara Shiga    Lk 24:13-35

Ndai Ja Chyum Mungga ni hpe hti nna ndai laban na nawku daw jau lamang ni hpe woi awn nga ga!

Add new comment

4 + 11 =