PASKA POI, B SHANING, 2024

PASKA POI

Madu Yesu Si Du Hpe Dang Kau Sai Allelua!

Tsawra ai nu wa hpu nau ni ga shaka dingsa prat hta  Eden sun ka-ang e tu ai hpun hta na asi hpe hkum sha mu ngu nna jahkrat da ai tara hpe  tawt lai nna sha kau ai Adam hte Ewa a ga n madat mara ai lam a majaw mungkan ga hta kahting kahtang byin lai wa sai rai nga tim ga shaka nnan hta e hpun  a asi hku nna udang ntsa e asak si mat ai ten du hkra jen noi si hkam ai Madu Yesu a kawa Karai Kasang a ga hpe madat mara lai wa ai akyu chyeju a marang e mungkan ga hpe nnan bai gram lajang nna atsawm rai bai galaw lajang ya lai wa ai..

Wan hpe Wan rau n lu sat ai zawn, Adam a n madat  mara ai rai dum ai myit  hpe mara lu ai masha ni gaw kadai mung n lu galaw ai...dai majaw ga shaka nnan a adam nnan rai nga ai Madu Yesu gaw shi a shagrit shanem ai lam yan hku nna jahtum ten du hkra madat mara ai lam hte atsawm hte bai galaw shangut  ya lai wa ai..

tsawra ai nu wa hpu nau ni kasha si mat ai lam hte lakap nna laika ka ai sara Ganta hku nna tsun lai wa ai lam gaw  si ai lam ngu ai gaw shangai chyinghkai lam zawn prat a mabyin lam langai sha mung rai nga ai .raitim hpang jahtum na lam tai mat wa ai gaw n rai nga ai nga nna tsun lai wa ai..1cor 12:27 hta ya nanhte gaw hkristu a hkum hkrang rai nga ai hte langai hte langai de a daw shan ni rai nga myit dai..nga nna tsun da ai hpe mu lu ai..

Tsawra ai nu wa hpu nau ni anhte a baw rai nga madu yesu gaw si ai kaw na bai hkrung rawt wa ai hkye la madu rai nga ai hte maren...shi a  hkum hkrang daw shan ni rai nga ai..anhte yawng mung dai madu yesu hta e bai hkung rawt nga ga ai..yawhan 14 : 19 hta loi hkring mi rai jang mungkan ga gaw ngai hpe n mu dat na wu ai..nanhte chyawm gaw naw mu lu na marin dai..nga nna tsun da ai..

ndai lam gaw madu karai kasang a ga sadi ngu na rai nga ai zawn anhte a matu kabu hpa shiga mung rai nga ai..

Tsawra ai nu wa hpu nau ni sak jaw ap nawng ai lam hte seng nna mungkan ga e nga ai laga hpung nau nawku hpung kaba n kau mi gaw shanhte a hkan nang hkan sa hkan shadik ra ai lam ni gaw ram ram bung nga ai..ga shadawn hpu nau bukda ni a sak jaw ai tara lam hte seng nna yu dat ga nga yang lam lahkawng mu lu ai..sak jaw ap nawng ai  lam kaba hte sak jaw ap nawng lam kaji ngu ai rai nga ai. ndai lam lahkawng hpe loi mi chye na hkra tsun ga nga yang.. yu maya sak jaw ai lam hte laklai hkikhkam ai hku sak jaw ai lam ni rai nga ai..yu maya ngu ai gaw mu lu ai ntsa lam sak jaw lam hte seng arai ni rai nga ai..hkrikhkam ai lam ngu ai gaw masha a myit kata lam hte seng ai rai nga ai..dai hta e lam manga nga ai..hkawhkam zawn lu su ai lam kaw na sak jaw ap nawng kau ai.. tinang a hkum hkrang na langai langai hpe sak jaw ai..kashu kasha ni hpe karai kasang a amu magam a matu  sak jaw kau ai lam.. madu jan hpe tawn kau da nna tinang hkum hpe tara sadik ai hku sak jaw  kau ai...tinang a asak hpe n lahpawt ai sha asak  jaw ai lam ni rai nga ai..ndai lam manga hta e tinang a asak hpe jaw kau ai lam gaw kaba dik rai nga ai..

Tsawra ai nu wa hpu nau ni madu yesu gaw mungkan masha ni hpe hkye hkrang la na matu gritnem ai shinggyim hkumhkrang ngu na hpe sa dagraw hkam la let shangai chying hkai wa ai ...shangai chyinghkai ngut ai ten kaw na udang ntsa hta shi a asak hpe nawng jau kau ai ten du hkra shi a prat ting ngu na hpe  sak jaw ap nawng ya lai wa ai lam hpe galaw lai wa ai... dai  gaw anhte a matu grai kaba la nga ai..shi hkum nan nni nkri lam hpe hkam nna sak jaw ap nawng ai lam hta e sai hkyep mi pi n nga hkra lwi hkrat kau hkam ai..sai hkyep ni gaw asak rai nga ai..madu yesu gaw mungkan masha ni a matu asak jaw ap nawng lai wa ai hte sumsing mungdan sa na lam hpe shi a sai hte lam hpaw ya lai wa ai mung rai nga ai...madu yesu hkaw ya lai wa ai sai gaw lamu hte ga ..masha hte karai a lapran e sinda kayep hkra bai galaw htingram dat ya ai  lam rai nga ai..

madu yesu shi lu ai gawm gaw kawa karai kasang a lata kaw na du sa wa ai gawm rai nga ai a majaw dai gawm gaw mungkan masha ni a mara hte hpring nna kabret nga ai..dai gawm hpe hkyep mi pi n nga hkra nni nkri hkam rai let udang ntsa e asak nawng jau ai lam hku nna lu kau lai wa ai mung rai nga ai..

tsawra nu wa hpu nau ni lagat ni e chyup la hkrum ai nampu nam pan gaw dai lagat ni a marang e sha nli nnan ngu na ni hpe bai shaprat la lu nga ai..nni nkri zingri zingret ngu na gawm a majaw madu yesu gaw asak nawng jau ra lai wa ai rai tim dai nni nkri gawm a majaw sha mungkan masha ni asak nnan ngu na hpe lu la lai wa ai mung rai nga ai..Esia 53:5 hta shi gaw anhte a tara tawt lai ai a jaw e hkala nba hkrum nna anhte shut hpyit ai a majaw ahpye alam hkrum sha nga ai..anhte ngwi pyaw nga lu hkra shi ari ahpri hkrum sha nga ai..shi a nma majaw anhte mai tsai lu ga ai...

dai majaw mung kasa yawhan mung 4 : 16 hta  Yesu gaw na madu wa hpe naw shaga la nna nang de sa rit ngu wu ai..

dai majaw tsun ai hpyi ai lam mahkra gaw anhte kata na  tsawra myit sha rai nga ai..

madu yesu a si ai kaw na bai hkrung rawt wa ai lam hte seng nna Mtt 28 12-15 hpe mahta nna bai myit sawn sumru yu ga nga yang shaloi shanhte salang ni hte zup hpawng nna bawng hkut ngut yang shanhte gaw hpyen ma ni hpe gumhpraw law law wa jaw nhtawm shana aten e anhte yup pyaw nga yang shi a sape ni shi hpe sa lagu la kau mu ai nanhte ngu mu..munggyi gaw dai lam hpe na la dam yang nanhte rung tsang nhkrum myit ga anhte shi shalen na gaw ai ngu dat mu ai..shingrai shanhte dai gumhpraw hpe la nna sharin dat ai hte maren di da mu ai..dai rai nna ga dai gaw yuda masha ni hta dai ni du hkra kajai gara pri rai wa sai..ngu nna tsun da nga ai..

lat htu nna madu yesu a bai hkrung rawt wa ai lam hpe n gup pat shiga shazim lai wa ai lam rai nga ai...kaja wa sha kasa ni moi mang hpe shaw makoi la kau ai nga yang yuda masha ni hte Roma na ahkang aya lu ai ni gaw rau pawng nna sawk sagawn hkan tam na gaw teng sha rai na re..madu a hkum tsawp hpe mu wa ai shaloi mung yerusalem myu ka ang hta gang garawt nna ndai wa i si kaw na bai hkrung rawt wa ai nga nna tsun let  ya nanhte myi chyaw mu sai nrai i..hpa baw naw tsun na.. ngu nna ndai zawn ga ni hte sakse shatai gaya jahkrum ai lam hpe galaw mat na gaw teng sha rai nga ai..lama na dai hku she byin wa ai rai yang anhte ni mung hkristan hpung masha byin wa na lam n nga ai..

kaja wa nga yang shi a kasa ni gaw moi mang lagu shaw chyawm shaw shagri brep nna e hkrit let nga taw na gaw teng sha re.. dai hta e yadu iskarut gaw madu hpe dut sha ai..magwi she rim na zawn rai grai tsun taw nga ai petru mung madu hpe masum lang nyet kau ai..kasa yawhan kawn lai nna laga kasa ni gaw shanhte a hkum lawt na matu galaw lai wa ai..raitim nau gaw nna ai madu yesu gaw si kaw na bai hkrung rawt ai hte  kalang lata sumsing mungdan de n lung mat ai sha nhtoi mali shi ya laman shi a kasa kaba ni hpe lang hte lang rai hkum hkrang hte nawng madun dan nna ra kadawn ai lam ni hpe jahpring da ya ngut ai hpang she san lun bum ntsa e shi a kasa ni a ka ang kaw na sumsing mungdan de lung mat wa ai rai nga ai..

lung mat wa ai hpang kade nna yang shagri brep let nga taw ai shi a kasa ni hpang de chyoi pra wenyi shayu dat ya ai dai hpang kawn n hkrit ntsang ai myit hte rawt malan hpang wa nna  sasana bungli hpe galaw lai wa ai..dai zawn galaw gwi wa ai lam ni gaw madu yesu kaw na lu la ai n -gun atsam a majaw re ai zawn madu a si ai kaw na bai hkrung rawt wa ai lam gaw kaja wa jaw teng nga ai ngu ai lam hpe sakse madun ai lam  mung rai ai..bai shi a lang hte lang shadan dan ai lam a majaw mung rai nga ai...hkristan ngu ai masha langai pi n nga hkra sat na shakut lai wa ai sawlu ngu na paulu gaw hkristan ni hpe gasat nawng let madu a tara mungga hpe grai sharawng awng ai hte mahtang bai hkaw tsun lai nat wa ai..hpang e. kasa kaba pawlu tai wa nna shi a prat htum ten du hkra tara mungga hkaw ai hte tengman ai tara ni lam a matu asak si hkam lai wa nna daini e nawku hpung a share shagan langai hku nna masat da hkrum nga ai..

ga shaka dingsa prat hta udang ntsa e jen sat hkrum ai masha gaw karai kasang a dagam dala hkrum ai wa nga nna hkap la lai wa ma ai re.ndai lam hte seng nna tara jahprang 21:23 hta na a karai kasang nang hpe sali wunli jaw ai mungdan hpe awu asin n hkrum na matu dai wa a si mang hpe dai shani jang ga hta teng teng lup kau na rai ndai..hpun hta shana tup noi da lu na nrai kaning rai nme law noi kau hkrum ai wa gaw karai kasang kaw na dagam dala hkrum ai wa rai nga ai.. nga nna tsun da ai hpe mu lu ai..

yuda masha langai wa ndai zawn asak si hkrum ai nga yang gara hku mung karai kasang shangun dat ai hkye la madu yesu re ngu nna hkap la lu na n rai nga ai... ga shaka nnan a bawnu ngu nna shakawn shamying hkrum ai kasa pawlu gaw nyan marai hte hpring nna tara lam ni hpe nhting nhtang grai chye ai wa re ai majaw shi a matu hkap la na.. ngu ai gaw  grau nna pi nmai byin nga ai...dai majaw shi hkum nan hkristan ni hpe hkan sat ai hte  ..matut nna hkan sat na matu damascus ngu ai de sa wa ai hkrun lam hta sawlu sawlu hpa rai nang ngai hpe hpa rai hkan sat nga n-ta nga nna nsen ngoi pru wa ai ten nang kadai ta nga nna bai san dat ai shaloi madu gaw  si ai kaw na bai hkrung rawt wa ai madu yesu rai nngai ngu ai  nsen hpe na let..sumsing lamu na nhtoi shadan  hkrum katut dat ai a marang e... shi a prat gaw galai shai mat nna madu hpe kam sham ai hte mungkan jut shara shagu de tara mungga ni hpe shachyam shabra ai kasa kaba byin tai wa ai rai nga ai...

madu yesu gaw si ai kaw na bai hkrung rawt wa nna shi hkum shi bai sa shadan dan ai ten hta  kasa ni bai nhtang tsun ai lam nkau mi hpe yu ga nga yang ...yawhan 20:28 hta Thoma gaw nye a madu nye a karai kasang rai nga ndai ngu nna htan tsun lai wa ai..

dai majaw e madu yesu a si kaw na bai hkrung rawt ai lam hpe kasa  ni gaw  asak jaw ai hte tara mungga ni hpang jahtum ngu na ten du hkra hkaw tsun sakse hkam lai wa ai rai nga ma ai..tsawra ai nu wa hpu nau ni anhte mung daini e si du hpe  awng dang kau ai madu yesu a shaman chyeju hpe hkam la lu let makam masham lam hta ngang grin ai kashu kasha ni rai nga myit ga...yawng hpe karai kasang shaman ya u ga...

 

 

Akyu hpyi saga oh hpan madu  karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.

Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw shaning B a lu paska poi rai nga ai.. . ..hti ang ai ja chyum mungga ni gaw chyum mungga daw langai ..Langai ngu na..Kasa laika 10: 34,37-43 .chyum mungga daw lahkawng Kawlose hpung masha ni hpang de san paulu shagun dat ai laika   3: 1-4 kabu gara shiga yawhan 20: 1-9

Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law

 

Add new comment

1 + 0 =