Paska Ladaw Laban ( II ) B Shaning, 2024

Paska Ladaw Laban ( II )

Hkristu hta tsawra hkunggga ai nu wa hpu nau ni ndai Laban Paska Ladaw hta Laban Lahkawng rai nga ai hte Divine Mercy Sunday ngu ai Madu Yesu a matsan dum lama ai laban nhtoi shani mung rai nga ai..

Tsawra ai nu wa hpu nau ni Madu Yesu si ai kaw na bai hkrung rawt wa ai hpang shi a Sape ni hpe hkum hkrang hte nawng sa shadan shadawng dan ai ten Kasa Thomas gaw shinggan  de pru hkawm sa taw nga ai a majaw Madu Yesu hpe n mu hkrum kau dat ai..kasa Thomas  shingan de na  bai du wa ai shaloi shi a sape manang ni gaw shanhte Madu Yesu hpe hkrum ai lam tsun dan ma ai shaloi ... kasa Thoma gaw madu a lata hta hpri gayat da ai hkang n mu ai bai shi a ningma ni hte  garep  shara ngu na ni hta nye a lata layung hpe nshawn lu yang ngai n kam lu nngai..nga nna bai htan tsun lai wa ai rai nga ai..dai majaw  kasa thoma gaw tatut mu yang she hkap lu ai baw masha  hpan rai nga ai hpe asannsha mu lu ai.

Madu Yesu hkum nan shi a si ai kaw na bai hkrung rawt wa ai lam gaw teng man nga ai lam re hpe sakse madun nga ai rai tim yuda hpung woi ningbaw ni kawn kam sham ai lam hta ningra lai wa rai nga ai..

daini e kasa yawhan hku na sharin achyin ya nga ai lam gaw tinang hkum nan lup wa de lagat sa  nna wa yu ai ten hta lup hpaw malang taw nga ai hpe mu ai shaloi lup hku de gum yu dat yang baw daw hte hkum hpe hkayawp tawn da ai sumpan ni gaw u ga san san rai nga taw ai hpe mu dat ai shaloi kam sham ma ai..

Tsawra ai nu wa hpu nau ni daini madu yesu gaw kasa thoma hpe na a lata layung hpe nang e shawn yu u na a lata hpe ladawn nna  hkra masawp yu u ngu nna tsun dat ai shaloi n galaw ai sha nye a madu nye a karai kasang nga nna mahtang bai htan tsun lai wa ai...dai ten e madu yesu bai tsun ai dat ga gaw yawhan a laika 20: 29  nang gaw ngai hpe mu lu ai majaw sha kam sham nni? n mu timung kamsham ai ni gaw a lu ma ai ngu nna tsun lai wa ai rai nga ai..kasa thoma hpe ya zawn tsun dat ai lam gaw daini e anhte yawng hpe mung tsun shadum ya nga ai lam rai nga ai..anhte yawng myit kraw kata hta hkam la da ra ai lam gaw hpungtang hpaji ( science) ngu ai gaw hpa rai? gara hku ta? hpa baw byin ai rai gara hku byin ai? ngu ai ga san ni hte sha hkan tam sawk sagawn nna hpa baw byin ai gara hku byin nga ai ngu ai lam hpe mahtai jaw ya nga ai...bai ndai zawn ga san ni hte sakse shagrin la ma ai..myit sawn hpaji (philosohpy ) ngu na gaw hpa baw majaw hpa baw majaw ngu ai lam hpe mahtai tam nna mahtai hpe shapraw ma ai..

Tsawra ai nu wa hpu nau ni nawku hpung bai rai yang gaw kadai kadai wa kaning re ai masha ta ngu ai ga san hte  mahtai jaw ai.. hpungtang hpaji hte myitmang hpaji ni gaw karai kasang hte seng nna tara ai lam hte  tengman ai lam ni a rudi jaw ai lam ..teng man ai lam hpe hkan tam nna shapraw ya ai lam galaw ya ai..hpung tang hpaji hte myitmang hpaji ni kawn makam masham lam ngu na hpe gaw n lu myit mada ai..karai kasang hte seng nna hpung tang hpaji hku myitmang hpaji hku hparan ai lam hta e jaw ai lam hpe chye wa lu ai rai tim kam sham ai lam byin wa lu na matu n galaw ya lu ai..

Tsawra ai nu wa hpu nau ni daini gaw ..Madu yesu a matsan dum lama ai poi shani rai nga ai...dai majaw ndai poi nhtoi byin wa ai lam hpe loi mi garan gachyan ya mayu ai...1931 feb 22 kaw na poland mungdan kalogaw myu mare kaba kaw na ma ma Fostina hpe madu yesu hkum nan shadan shadawng dan lai wa ai lam hpe..1938 ning du hkra madun dan lai wa nna shi a tsawra myit kade kaba la nga ai hpe madun dan lai wa ai mung rai nga ai..masha shagu shi a tsawra myit hpe hkam sha lu hkra hte hkungga lara kam sham nawku lu na matu Fostina hpe hkaw tsun shangun lai wa ai rai nga ai..hkumhkrang hte nawng shadan dan ai hta ai paska poi ngut ai hpang shawng du ai laban hpe shi a matsan dum lama ai laban ngu nna masat galaw na matu matsun lai wa ai..rai nga ai..

Madu yesu a ya na zawn hkum hkrang hte nawng madun dan ai lam teng n teng hte madu yesu nan re ai n re ai ngu ai hpe kanu nawku hpung gaw san jep sawk sagawn ai lam ni hpe shaning law law galaw lai wa sai rai nga ai..masha law malawng gaw shaman chyeju ni hte karai kasang a matsan dum lama ai lam hpe hkam la lu ai mau hpa lamik kumla gaw sakse madun nga ai zawn matsan dum lama ai madu yesu karai kasang a hkum hkrang hpe shadan dan hkrum ai ma ma Fostina na mung si mat wa ai hpang san pra ai masha langai hku shi hpe shatai na matu ninggam.masum san jep ai lam hpe galaw ra ai dai ngut ai hpang she san pra masha shatai ai rai nga ai..dai zawn shi hpe san pra masha hku masat lu na matu forstina si mat hpang shaning hkun sanit ning hta she  awng dang ai hte galaw lu ai rai nga ai..ndai ninggam ni hpe awng dang lu na matu hpung tang hpaji ni hte sake madun n lu ai mau hpa shamai shatsai ya ai lamik kumla ni hpe law law lu la lai wa ai rai nga ai..

dai majaw AD 2000 ning april 30 ya shani gaw tsaban masum a hpang jahtum na san pra masha hku nna shagrau hkrum lai wa ai rai nga ai..mungkan shadang hku nna shawng nnan na matsan dum lama yesu karai kasang a laban nhtoi hpe 2001 ning na paska poi ngut ai hpang shawng du ai laban hta e galaw lai wa ai..dai shani e Wa Sarabyin yawhan pawlu Lahkawng kawn hkaw tsun lai wa ai hta na shadum ga  nkau mi hpe bai tsun dan mayu ai..karai kasang a tsawra matsan dum lama ai gaw paska ladaw a karai jaw ya ai laksan kumhpa rai nga ai.dai majaw.shingran laika 1 : 17-18 hta hkum hkrit et ngai gaw ningshawng wa hte jahtum wa mung rai nga ai..ngai gaw asak hkrung nga ai wa rai nga ai..ngai si ni ai raitimung yu u htani htana prat dingsa e ngai ahkrung nga nngai..

ndai chyum daw hku nna anhte yawng hpe saw shaga nga ai lam gaw madu yesu hpang de bai kayin wa let myit maju jung nga ra ai lam rai nga ai...madu gaw anhte hte galoi.mung anga nga ai lam hpe bai myit dum shangun ai..n bung pre ai lam shagu hte manghkang ni hta e madu yesu a tara mungga ni hpe bai myit dum la nga ga ..hkum hkrit myit ngai gaw ningshawng hte jahtum wa mung rai nga ai. bai asak hkrung ai wa mung rai nga ai..ngai si ni ai ya ngai htani htana asak hkrung nga nngai... ngai karai kasang hta nnan hpang ai nanhte mung ngai karai kasang hta si ai du hkra nhkrit nkang ai hte kam sham ai let sak hkrung nga mu ngu nna hkang da ai lam rai nga ai..

karai kasang a tsawra myit gaw si ai hte mara ngu na n kaja ai lam ni htan grau nna n gun kaba nga ai..madu yesu gaw ya na zawn san pra ai Fostina hpe hkumhkrang hte nawng shadan shadawng dan ai ten hta tsun ai lam langai gaw masha yawng mayawng kawn ngai karai kasang a matsan dum lama ai hta kam hpa manoi nga ai hte bai nhtang wa ai lam n nga dingyang gaw simsa ai lam ngu ai lu la na nrai nga ai..karai kasang a matsan dum lama ai lam masha yawng kaw du na matu si ai kaw bai hkrung rawt wa ai madu yesu gaw shi a sape ni hpe shangun dat ya ai..yawhan 20: 21-23 hta Yesu gaw nanhte hta ngwi pyaw nga myit ga nye wa ngai hpe shangun dat nngai hte maren ngai mung nanhte hpe shangun dat made ai..sape ni a ntsa e shi kawut nna chyoi pra ai wenyi hkap la mu gade a yubak mara hpe raitimung nanhte raw dat myit yang gaw raw mat na ra ai..gade a yubak mara hpe raitimung nanhte sha-gun da myit yang gaw mara nga na ra ai..dai majaw mara raw dat hkyem sa ai lam gaw karai kasang a matsan dum lama ai kaw paw pru wa ai lam rai nga ai..karai kasang a salum.kaw na shinggyim masha ni hpang de hkye hkrang la ai chyeju lwi hkrat wa nna san seng wa ai hte nat tsadan a lata na hkye mawai la ai lam hpe hkam la lu nga ai...madu yesu kawn san pra ai Fostina hpe shadan dawng dan ai ten shi a salum.na ahkyeng hte ahpraw nhtoi  lahkawng pru lwi nga ai rai nga ai..dai gaw Yesu a garep na pru taw nga ai sai hte hka hpe lachyum shaleng ai lam mung rai nga ai..

sai hku na shadum ai lam gaw kalawari kawng ntsa e udang hta jen noi si hkam let shi hkum shi sak jaw ap nawng kau ya nna chyoi pra hkum a mungsung lam rai nga ai..ahpraw nsam kumla rai nga ai...hka hku nna shadum ai lam gaw kasa yawhan tsun dan da ai hta na kashin kamun chyeju kumla rai nga ai  hka hte chyoi pra ai wenyi karai kasang a shaman chyeju ni rai nga ai..yawha 3:5 hta ngai nang hpe kaja wa tsun de ga hka hte wenyi e n shangai masha gaw karai kasang a mungdan hta shang lu na nrai..yawhan 4: 14 hta e ngai jaw ai ntsin gaw dai wa hta htani htana asak a matu lwi pru ai hka hpawk tai na ra ai..nga nna tsun da ai..

madu yesu san pra ai Fostina hpe sa shadan shadawng dan ai ten madu yesu sharin achyin ya lai wa ai kyu hpyi ga hpe  masha yawng bai hkan hpyi na kyu hpyi ga gaw O madu yesu karai kasang e nang hpe ngai kam sham manoi nga nngai ngu ai kyu hpyi ga kadun sha rai nga ai..ndai kyu hpyi ga hte anhte mung jahpawt nhtoi htoi ai ten kaw na shana yupra shang ai ten du hkra dum ai ten shagu hta tsun akyu hpyi mai ai hte karai kasang a tsawra myit kata hta sit shang shanu shingbyi nga ga.. yawng hpe karai kasang shaman ya u ga..

Akyu hpyi saga oh hpan madu  karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.

Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw shaning B a paska ladaw lahkawng rai nga ai.. . ..hti ang ai ja chyum mungga ni gaw chyum mungga daw langai ..Langai ngu na..Kasa laika 4 :32 - 35 .chyum mungga daw lahkawng 1 yawhan  laika   5: 1-6 kabu gara shiga yawhan 20: 19-31

Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law