Paska Ladaw ( III ), A, 2023

Paska Ladaw (3), A, 2023

Hkristu hta tsaw ra ai nu wa hpu nau ni e, ndai laban gaw Paska Ladaw hta (3) ngu na laban rai nga ai.

Bai hkrungrawt ai Hkristu hta kamsham ai makam hte seng nna, lai wa sai Paska ladaw (2) ngu na laban hta na la lu saga ai. Hkristu a matsan dum lama ai masing hta anhte langai hpra tinang hkum hpe Madu kaw ap tawn da ra ga ai. Hkristu a masin salum hte bung ai Hkristan kun dinghku langai hpe gawde lu na matu, shi Madu hta sha kam ai makam hte sha lu la na re lam rai nga ai.

Ndai laban hta na la na lu ai Chyum Mungga gaw, lai wa sai laban na kabu gara shiga hpe jahkum shatsup ai lam rai nga ai. Bai hkrungrawt ai Madu hta kam ai makam teng man ai rai yang, anhte Hkristu hte nihtep grau ai hku galai sai wa na re. Anhte Kanu Nawku Hpung matsun ai hte maren, nawku dawjau lamang ni hta rau shang lawm ai rai yang galai shai na matu madi shadaw lam kaba tai nga na re.

Yesu Madu bai hkrung rawt ai shaloi, shi hta mauhpa galai shai lam langai bying nga ai. Kasa ni gaw, Yesu Madu hta shinggyim atai rawng ai lam hpe madung da hkaw tsun sanglang da ma ai. Shanhte a hkaw tsun ai mungga hta, bai hkrung rawt sai Yesu Madu gaw laksama bungli galaw sha ai wa; mara hta lai nna anhte ni zawn sha, shinggyim masha re ai wa, ngu ai rai nga ai. Yesu Madu gaw Karai atai mung rawng ai wa rai nga ai.

Madu Yesu madun lai wa sai mauhpa lam ni a marang e, Karai Kasang gaw hpung dagu rawng ai wa re ai hpe myit um-ang hpa n nga ai sha hkap la na yak na n re. Madu Yesu gaw Kawa Karai Kasang a Kasha rai nna, mungkan ga hpe hkye la na matu shangun dat hkrum ai Messiah rai nga ai.

Raitim, Yuda ningbaw ningla ni gaw Madu Yesu hte shi a Kabu Gara Shiga hpe n’hkap la ma ai. Madu Yesu hpe jahtum du hkra jeyang na matu Roma hpyen du ni a lata de ap kau dat ma ai. Yesu hpe si ari dam jaw na matu Pilatu hkawhkam ta masat htu da ai.

Kasa laika 2:23 hta, Petru Yuda masha ni hpe “nanhte shi hpe jeyang manit dai” nga nna tsun da ai. Yh 19:11 hta mung, Madu Yesu Pilatu hpe “Ngai hpe nang kaw ap ya ai wa gaw mara grau kaba nga ai” ngu tsun ai. Petru a ga ndai a madung yaw shada ai lam gaw Yuda masha ni hpe mara shagun da ai lam n re ai sha, hkye la na matu she rai nga ai. Kasa 2:24 hta, “Kawa Karai Kasang gaw shi hpe si hkrung si htan kaw na shalawt dat ya na matu bai hkrung rawt shangun ai re” nga ai. Yesu Madu hpe sat ai ni gaw anhte hte shinggyim masha ni galaw ai mara rai nga ai.

Madu Yesu hpe bai hkrung rawt shangun ai gaw, Kawa Karai Kasang rai nga ai. Dai gaw mauhpa kaba kaba rai nga ai. Yesu Madu bai hkrung rawt ai shaloi, shinggyim atai rai nga ai shi a hkum hkrang hpe asak bai hkrung shangun nna, jan shingkang hta grau htoi tu ai hpung shingkan hpring ai, chyahtum chyalai hpung dagu hte Karai atai hpe bai dagraw la ai, rai nga ai.

Mungkan shinggyim atai hte nga ai shaloi, shi hta shinggyim masha a gawng kya ai lam n nga ai. Yesu Madu a hkum hkrang na Wenyi hta shinggyim ga hte shapraw dan n lu ai hpung dagu hte mauhpa kabu gara lam hte hpring tsup nga ai. Kawa Karai Kasang gaw Kasha Yesu hpe Karai atai, Masha atai, nga yawng nga pra hpe up hkang ai hkawhkam hte Karai Kasang ngu ai hkinghtawng ap da ya sai.  

Bai hkrung rawt sai Yesu Madu a hpung shingkang hte kabu gara lam gaw wudang ntsa hkrum katut lai wa sai nni nkri lam hte gaya kahpa hkrum, hkrat sum ai lam ni hte n bung mat sai. Kashing kamun chyeju kumla hpe hkap la ai shaloi Hkristan masha shagu a myit masin hta galai shai lam kaba bying wa sai.

Dai ni, na la ai Kabu Gara Shiga Chyum Laika hpe sumru yu ga. Shinggyim masha yawng gaw wenyi lam hta kashing kamun chyeju kumla garai n hkam la shi yang mayam tai nga ma ai rai nna, kashin kamun chyeju kumla hkam la ai hpang gaw mayam prat kaw na lawt lu sai. Nat satan gaw shinggyim masha ni a bungli madu hku hkam la ai rai nna, mara gaw shanhte hpe mayam hpe zawn gyit hkang da ai sumri ni rai nga ai nga nna kasa ni Hkristan masha ni hpe sadi jaw sharing shaga da ai.

Hkristu a shawang tsawra myit hte shinggyim masha ni hpe mara kaw na shalawt dat ya let hkye hkrang la sai.

Roma uphkang tara masa hta mayam langai gaw tinang a lawt lam hpe mahkrun lam amyu myu hku hkam la lu mai nga ai. Ja gumhpraw law law hte tinang hkum nan jaw nna, shalawt la lu ai zawn, masha langai ngai matsan dum nna ja gumhpraw jaw ya ai hku na mung shalawt la mai nga ai. Dai zawn jaw ai hpe “Ransom” masha shaw manu ngu nna shamying da ma ai da.

1Petru 1:18,19 hta “Nanhte a kaji kawa ni kaw na hkan dagraw la ai manu n rawng ai asak hkrung lam a arawn asam hta na nanhte hpe hpa baw hte galai hkrang shaw la sai lam nanhte chye nga myit dai. Dai gaw jahten sharun kau lu ai ja gumhpraw zawn re ai arai lama ma hte n rai, ana n kap, ra n rawng ai sagu kasha hte bung ai hpu la ai Hkristu a asak hpe nawng ya kau ai hku, hkye hkrang la ai rai nga ai” nga nna sharing shaga da ai.

Dai gaw anhte hpe mara hte satan a mayam prat kaw na shalawt ya na matu ja gumhpraw gade law ai hte raitim, mari la lu na n re, ngu San Petru tsun ai rai nga ai. Hkristu gaw anhte hpe shalawt dat ya ai rai nna, shi a kasha ni anhte gaw Hkristu Madu hpe kasi la nna, lani hte lani, shi hte grau bung wa hkra shakut ra ga ai. Dai zawn galai shai ai lam hpe kashing kamun hkam la ai ten kaw na hpang wa sai rai nna, prat hkrunlam tup hta si du hkra hkum tsup ai hte matut shakut sa wa ra nga ga ai.

Anhte ni sumsing mungdan de du shang wa jang hkam la lu ai myit dik myit pyaw lam gaw anhte Hkristu hte bung nga ai hpe mauhpa hkam sha ai lam rai nga ai. Hkrung rawt ai Madu hta kam sham ai makam gaw anhte sak hkrung ten Wenyi a karum shingtau ya ai hte Madu Karai a myit ra ai hta hkan nang hkan sa ai hkum tsup dik ai galai shai lam hpe jaw ya na ai.

Emauk mare na sape lahkawng gaw Yesu Madu hpe tsawra dingyang rai ma ai. Raitim, shan lahkawng myit htum myit kaji ai majaw makam lam hta hkrat sum maw masai rai ma ai. Madu Yesu hta tawn da ai myit mada shara ni hpe kau da let tinang a mare de, moi na zawn sha, bungli galaw sha na matu, nhtang wa ma ai. Dai ten, Yesu Madu shan kaw du wa ai rai nna, shan shawng de kalang pyi nna yu ai hku chyum laika a lachyum ni hpe sanglang dan ai. Shan mung yu maya masha gaw n rai na re, ngu myit la let myit sharawng awng ai hte madat hkam la ma ai.Tim, Madu re ai hpe gaw n dum n chye ma ai. Shan gaw dai tsasam masha hpe yu matsan dum myit rawng wa ma ai rai nna, shan hte rau hkring sa la na matu shaga ma ai. Shi hpe malu masha hte mung daw jau ma ai. Dai tsasam masha gaw muk hpe la nna, shan hpe karan jaw ai shaloi, bai hkrung rawt ai Madu re ai hpe dum chye wa ma ai. Shan gaw shi hpe hkum hkrang malu masha hte daw jau ma ai. Yesu Madu gaw shan hpe Wenyi shat hte bai daw jau ya nga ai.

Sape lahkawng Madu Karai Kasang hpe matsing wa ai shaloi, shan hta ahkyak grau ai galai shai wa ai lam bying wa sai. Madu Karai, n myit mada mat mat ai hpe yawn ai lam, myit daw ai lam shan hta n nga mat masai. Shan a matu Yesu Madu teng sha hkrung rawt sai lam chye la lu ai gaw ahkyak grau ai galai shai lam rai nga ai. Ya shan a makam bai ngang wa ai hte manu daw dan n lu ai chyeju sutgan tai wa sai. Dai makam gaw shan hpe shadut ya ai hte n-gun ban ya nga sai.

Dai ten gaw jan du n’sin sin nga sai; ba mung ba masai; raitim shan pru sa wa ai Yerusalem de kalang lata bai nhtang wa ma ai hte kasa ni hpe bai tsun dan ma ai. Shan hpe gum lau ai zawn anhte ni Hkristu hta kam sam ai makam hpe jahten sharun kau ya n lu tim, laja lana rai jahkrit shama ai lam gaw hkrum chye nga ga ai.

Nawku Hpung ningbaw ningla ni hku nna, anhte hpe Karai Mungga a tengman ai lachyum hpe shalen dan ya nga ai. Nawku daw jau ai lam hta pawng hpawng nna, sak hkrung mungga hpe madat hkam la ai a marang e, Karai Kasang a tsawra myit hpe chye na hkam sha lu wa ga ai. Nawku daw jau lamang hta lawm ai gaw Hkristu a malai anhte hta na kaji htum wa hpe prat tup akyu jaw ya ai tai nga ai rai nna, anhte ni kabu praw ai chyeju kaba rai nga ai. Karai Mungga hpe hti sumru ai gaw Hkristu Madu a tsawra myit hpe chye na na matu madi shadaw akyu ara nan rai nga ai.

Missa hkungga nawng jau ai Jau daju wa Chyoi Pra muk hpe ahkyep nna anhte hpe gam garan jaw ai ten gaw Madu Karai anhte hpe shi hkum shi shadan madun dan ai ten rai nga ai. Anhte ni Chyoi Pra Hkum chyeju kumla hta tinang a makam hpe nsen kaba hte jahtau tsun shapraw tim, Madu Yesu a hkum nan zawn hkrak tup galai shai na gaw n re. Tengman ai galai shai ai ngu ai gaw Nawku Jawng kaw na pru wa ai hpang tinang dum nta du jang, dai laban bat magam ni galaw ai teng rai nga ai.

Anhte Hkristu hpe tinang dum nta kaw hkap la da ai rai yang, nat sadan a matu shara n nga na re. Emauk mare na sape lahkawng zawn bai hkrung rawt sai hkyela Madu hta anhte a makam hpe makau grupyin masha ni kaw sharawng awng ai myit hte tsun hkai dan ai hte daw jau ai gaw Hkristu hpe daw jau ai nan rai nga ai.

Akyu hpyi saga

Wa Karai Kasang e, Madu Yesu a hkrung rawt sai lam hpe kam sham let Chyoi Pra ai Wenyi shadut ya ai hpe hkap la hkan sa lu ai chyeju anhte hpe jaw ya mi. Anhte a Madu Hkristu a marang e hpyi nem nga ga ai.

Hkristu hta tsawra ai kanu kawa tara hkaw sara/ num ni hte nu wa hpu nau ni e, hpawtni gaw Paska ladaw hta (3) ngu na laban rai nga ai.

Hti ang ai ja chyum mungga ni gaw

Chyum mungga daw     (1)   Kasa 2:14, 22-29

Chyum mungga daw     (2)   1Petru 1:17-21

Kabu gara shiga                    Lk 24:13-35

Ndai ja chyum mungga ni hpe hti nna, hpawtni na nawku daw jau lamang ni hpe woi awn nga ga.