Paska Ladaw ( II ) A, 2023

Paska Ladaw (2), A, 2023

Hkristu hta tsaw ra ai nu wa hpu nau ni e, ndai laban gaw Paska Ladaw hta (2) ngu na laban rai nga ai.

Lai wa sai laban hta, Madu Yesu a lup hpaw malang, kaman rai nga ai hpe madung da nna tsun da ai hpe na chye lu shaga ai. Ndai laban hte ngam nga ai Paska laban ni hta gaw dai hta matut manoi byin lam yan ni hpe na lu na rai ga ai.

Ndai laban na Kabu Gara Shiga hta Yesu Madu gaw kasa ni hpe lahkang lang tup Shi hkum shadan dan ai lam na lu ga ai.

Shawng lang shadan dan ai lam gaw Yesu Madu bai hkrung rawt ai hpang shana hta rai nga ai. Lahkawng lawng ngu na shadan dan ai gaw bat mi na ai hpang shadan dan ai lam rai nga ai.

Chyum Mungga daw langai na Kasa Laika hta, Pentecost poi ngut ai hpang, Yerusalem Mare kaba na, shawng na Hkristan Nawku Hpung a lam hpe shingran pra pra mu lu na hku tsun dan da ai.

Chyum Mungga daw lahkawng hta na  Petru Laika Langai gaw San Petru Yesu Madu bai hkrung rawt ai hpang (30) ning daram na ai aten sak hkrung nga ai Hkristan masha ni a matu ka da ai rai nga ai.

Kawa langai hku nna mung, Sagurem hpa langai hku nna mung, San Petru gaw Hkristan masha ni yawng hpe agung alau hkrum ai hte zingri zingrat hkrum ai hta, myit marai bang, hkam jan nga lu na matu n-gun jaw ai rai nga ai.

Hpa majaw nga yang, shanhte ni a lapran hta shanhte hte rau nga ai dai bai hkrung rawt ai Madu gaw pawng hpawm ai hpyen ni hta n-gun atsam grau kaba ai majaw re, ngu tsun da nga ai.

Kanu Nawku Hpung gaw anhte hpe ahkyak ai ga san hpe htai shangun mayu nga ai. (1) Bai hkrung rawt ai Hkristu hta kam sham ai anhte hpe hpa hpaw hpyi shawn nga ai kun? (2) Anhte a makam gaw anhte hpe kaning re ai Hkristan kun dinghku rai nga na matu akyu ara jaw nga ai kun? Bai hkrung rawt ai Madu Yesu hpe kam sham ai hta tinang hkum hpe tsep kawp  ap da ra ga ai. Kabu Gara Shiga hta Htawma gaw kade daram gara hku shakut shaja ai hpe, Yesu Madu a matu tsap ya ai re ngu tsun da hkap la da nga ai hpe mu lu ga ai. Lazaru a nau na yan kaw na shiga lu la ai hpang,  Yesu Madu Yerusalem de sa na myit daw dan ai hpe sape ni ninghkap, pat shingdang ya ma ai. Hpa majaw nga yang,dai ten gaw, Yuda masha ni Yesu Madu hpe jahte tam rim la na matu hkan tam nga ai aten rai nga ai. Raitim, Htawma gaw, "Madu hte rau shi hkam na matu anhte mung hkan sa ga," ngu tsun da nga ai (Yh 11:16).

Shawng na laban bat hta, kasa ni hpe Madu Yesu shadan dan ai shaloi, lama na Htawma nga ang ai rai yang, numsha ni wa tsun dan ai hpe "lachyum n nga ai," ngu shawng tsun na gaw shi rai nga ai.

Yh 20:25 hta,  kasa ni, "Anhte Madu hpe mu lu saga ai" ngu Htawma hpe tsun ai shaloi, shi bai htan ai ga hta, bai hkrung rawt ai lam hpe kachyi mi pyi n kam ai hku ningdang ai lam dan dawng nga ai.

Htawma gaw, "Shi a lata ni hta na hpyi hkang ni hpe ngai n mu, dai hpyi hkang ni hta nye a layun nan ngai n shawn yu, shi a karep hta nye a lata n manaw yu yang gaw ngai kam na nngai n rai," ngu nna shanhte hpe tsun mu ai.

Ga ndai tsun da ai gaw kam na matu hpyi shawn ai n re ai sha, "ngai galoi mung n kam lu ai, bying mung n mai bying ai, bying mung bying na n re," ngu tsun ai hte bung nga ai.

Htawma gaw lani hta lani, bat hte bat lat mat wa tim, Yesu Madu a lam hpa mung n na ai majaw kade daram myit htum taw nga ai, myit yawn taw nga ai lam hpe sam maram yu mai nga ai.

Shi gaw kaga kasa manang ni a kam loi ai myit jasat hpe kalang n ga, mara shagun shadum lai wa ai hpe mu nga ai. Shi gaw shanhte hpe, "gai, mu sai n re i, nanhte gaw Madu hpe mu sai ngu kam nga ma ai, dai rai yang shi ya gara kaw ta, nanhte tsun ai lam yawng gaw marit shingran ran ai lam she n rai i, ngu kaga sape ni hpe tsun nga na re.

Maga mi hta kaga kasa ni mung shi hte ningdang kalang hkat taw n mai nga ai. Shi myit dik hkra, ngang kang ai sakse sanggan ni hte tsun sang lang dan na n mai byin taw ma ai. Yesu bai hkrung rawt sai lam hpe shanhte kam taw ma ai. Shanhte a myit masin salum hta Madu jaw bang ya ai langai sha re ai sakse gaw simsa lam hte kabu pyaw ai myit she rai nga ai. Raitim, Htawma chye na hkra tsun sang lang dan na matu gaw yak nga ma ai. Htawma hpe Madu Yesu hkum nan sha hkye la lu na rai nga ai. Kaja wa mung Madu shi hpe hkye la sai rai nga ai.

Htawma, shi hkum shi makawp maga na matu, "baw ja" ngu ai shakum mading hpe Yesu Madu loi loi hte sha malawk kau ya sai. Htawma "n kam ai" ngu tsun da ai ga hpe Yesu gaw, "Na a layun nang e shawn yu nna, Nye a lata ni hpe yu u, na a lata ladawn nna nye a garup hpe mung manaw yu u, n kam hkum rai et, kam sham nga u, ngu tsun wu ai (Yh 20:27).

Yesu Madu a garep hpe hpyenla langai mi nri hte galun waw nna lu ai nma hpe Htawma lata hte manaw yu nna kam sham ai ngu ai hta, Chyoi Pra ai Wenyi shi hpe shadum jahprang ai a majaw kam sham ai rai nga ai.

Yesu a garep hpe manaw yu sai raitim, shi baw naw ja ai rai jang, Yesu hpe minla re ngu naw mai tsun nga ai. Mt 14:26 hta, Madu Yesu hka ntsa hkawm nna kasa zawn ai hkali nga ai de hkawm sa wa ai shaloi, kasa ni Yesu hpe minla rai nga ai, nga tsun ma ai. Dai zawn sha Htawma naw tsun mai nga ai.

Yesu gaw minla n re ai hpe Htawma hte kasa ni yawng kam sham masai. Dai gaw Madu hkang da ai Wenyi shanhte hpe shadut ya ai majaw kam sham lu ma ai rai nga ai.

Lai wa sai bat hta kasa ni hpe Wenyi shadut ya ai zawn, ndai laban hta, kasa Htawma hpe Wenyi shadut ya ai rai nga ai. Yh 26:28 hta, "Nye a Madu, Nye a Karai Kasang rai nga ndai" ngu shi a kam sham ai hpe tsun shapraw dat nu ai. "Nye a Madu" ngu ai gaw nye hkum ting hpe Madu kaw ap da sai, Madu a mayam tai let sak jaw daw jau na matu hkam la da se ai, ngu tsun ai mayu ai rai nga ai. "Nye a Karai Kasang" ngu ai gaw Madu Karai n lawm yang nye a prat gaw lachyum n nga ai, Madu gaw nye a mungkan re, nga nna htai da ma ai.

Tsun dan n ma hkra ngai hpe tsaw ra ai Karai Kasang hte htani htana arau nga nga na matu myit hkut myit daw dan da se ai, ngu ai lachyum mung rai nga ai.

Htawma gaw, India hte mungkan mungdan law law de, Madu a Kabu Gara Shiga hkaw tsun gat hkai hkawm lai wa sai hte shi a si hkam labau gaw Madu Yesu a matu shi a asak hpe jaw kau ai sakse nan rai nga ai.

Anhte ni, tinang hkum hpe tinang bai san dinglik yu ga. Bai hkrung rawt sai Madu Htawma a makam hpe zawn, anhte a makam hpe chyam dinglik ai hkrum yu saga ai kun?

Htawma gaw Madu hta kamsham ai makam hpe chyam dinglik ai hkrum yu lai wa ai. Tim, shi a makam yawm, makam lam numshe shang wa shagu Wenyi gaw shi hpe, Madu a ra sharawng hta prat nnan de galai shai let, Madu hpe kam sham myit kaba hte bai ap nawng daw jau lu ai. "Nye a Madu, Nye Karai" ngu ai gaw Htawma prat tup a akyu hpyi ga madung rai nga ai.

Anhte a makam hte Hkristan Nawku hpe gara hku gawde gaw sharawt lu na ta? Anhte ni tinang kun dinghku masha ni rau dep da ai sumla ni hpe bai yu ai shaloi, tinang a jiwoi jiwa, kanu kawa, kahpu kanau ni a sumla hpe lata madi madun nna kabu pyaw nga chye ga ai. Sumla nkau ni hta kun dinghku masha yawng gaw tsawm dik buhpun palawng buhpun da ai hte, kaji htum wa hpe pawn da ba da nna, mani sumsai re ai hpe bai mu chye ga ai. Dai gaw kabu pyaw ai hpe madun dan nga ai. Raitim sumla kaw na zawn aten shagu arau n nga lu ga ai re. Sumla kaw na zawn, buhpun mawn sumli tsawm tsawm hte aten shagu nga lu na n re.

Dai ni na Kasa Laika hpe hti yu ai shaloi, Yerusalem kaw Hkristan masha ni htani htana gring nga na n re ai hpe anhte chye na la ga ai. San Luka madun mayu ai lam gaw bai hkrung rawt ai Madu hpe kam sham ai hta, kaning re ai masha rai ra ai hpe tsun dan mayu ai lam rai nga ai. Bai hkrung rawt ai Hkristu hpe kam sham ai Hkristan masha gaw kasa ni a sharin shaga ai hpe galoi mung myit lawm myit shang sha ai wa rai ra ai. Tsun mayu ai gaw, Hkristu hpe kam shamyit ai machye machyang hpe sung grau ai hku chye na lu hkra shakut shaja ai, shing n rai, dai ni na prat masa hta hkan nna, makam masham hpe lachyum sung dik ai hku chye na hkra galoi mung shakut nga ai Nawku Hpung masha rai nga ra ga ai.

Anhte gaw, "ngai", "nang" ngu ai tingkyen myit jasat hpe, "anhte", "nanhte" ngu ai yawng hpe hkawm la ai ga-si ga-ngau de gale nna galai shai tsun shaga chye ra na re. Kadai raitim, tingkyen a matu madung n da ai sha, Nawku Hpung ting a akyu ara hpe yu ra ga ai. Grau nna, Nawku Hpung kata na matsan jam jau dik ai kun dinghku masha ni ra kadawn ai lam ni hpe madi shadaw karum lu na matu madung da shakut ra ga ai re.

Akyu hpyi shaga

Wa Karai Kasang e, Madu Yesu bai hkrung rawt sai hpe kam sham let Chyoi Pra ai Wenyi shadut ya ai hpe hkam la, sak hkrung hkawm sa lu na chyeju jaw ya rit. Anhte a Madu Hkristu a marang hpyi nem nga ga ai.

Hkristu hta hkungga ai kanu kawa tara hkaw sara/num ni hte nu wa hpu nau ni e, ndai laban gaw Paska ladaw hta (2) ngu na laban rai nga ai.

Chyum Mungga (1) Kasa 2:42-47

Chyum Mungga (2) 1Pt 1:3-9

Kabu Gara Shiga    Yh 20:19-31

Ndai Ja Chyum Mungga ni hpe hti nna ndai laban na nawku daw jau lamang ni hpe woi awn nga ga!

Add new comment

12 + 5 =