Madu Yesu Sumsing Lamu De Lung Wa Ai Poi Nhtoi Mungga

Karai Kasang A Hpung Shingkang

Hkristu hta tsaw ra ai nu wa hpu nau ni e, ndai laban gaw (7) ngu na Paska ladaw laban rai nna, Yesu Madu Sumsing Lamu De Lung Wa Ai poi n’htoi rai nga ai.

Ndai laban gaw Madu Yesu Sumsing Lamu De Lung Wa ai laban rai nna, dai lam tsum shagu anhte a myit gaw bum ntsa na Sanlun sun na mabyin hpe shingran pra mu lu ga ai. Bai hkrung rawt sai Madu Yesu Kasa ni a lapran, shanhte hpe matsun ga ni jaw da, shaman ga tsun da ngut ai hpang sumsing lamu de angwi ngwi sha lung wa ai. Dai hpang sumsing chyinghka hku shang nna Kawa Karai kasang e hkap hkalum la ai hpe Lamu Kasa ni shakawn shagrau nga ma ai. Yesu Madu hpe “hpan da hkrum nga yawng nga pra a Hkawhkam rai nga ai” ngu Lamu Kasa ni hte rau shinggyim masha ni, ndau let shakawn shagrau ma ai.

Ya tsun hkai dan nga ai gaw anhte a myit shingran ni rai nga ai. Raitim, Chyum laika hta tsun ai hte maren, ndai mabyin gaw kaja wa sha byin lai wa ai rai nga ai.

Ndai poi a yaw shada lam gaw Yesu Madu Kawa Karai Kasang hpang de bai lung wa ai lam hpe sumsing mungdan hta anhte hkum nan du lung wa ai shaloi teng man ai lam hpe hkrak chye na wa na hpe tsun ai rai nga ai.

Wenyi shadut ya ai a marang e, nawku hpung ndai poi hpe sha-ang gaw de da ai lam gaw (1) Kawa Karai Kasang shinggyim masha ni hpe hkye la ai amu a majaw Yesu hpe shakawn let chyeju kumhpa jaw ya na matu rai nga ai, (2) Hkristan masha ni Yesu Madu sharawng awng ai hkye hkrang la magam hpe matut gun hpai na matu rai nga ai.

Yesu Madu sumsing lamu de lung wa ai hte seng nna Chyum Laika hta gara hku tsun da ai rai?

Makam masham ga gaw anhte Hkristan ni a makam masham daju rai nga ai. Kasa ni kaw nna yu hkrat wa ai makam masham rai nga ai. Dai hpe “Apostolic Symbol” ngu mung tsun ma ai.

Dai makam masham ga hta “Yesu Madu sumsing lamu de lung wa ai hpe mung kam sham ga ai” ngu anhte hkam la ai hpe tsun ai.

Ndai lam hte seng nna Mahte hte Marku yan a Chyum laika hta n tsun da ai. Marku gaw laika yan lahkawng hte tsun da ai gaw mu lu ai. “Yesu madu sumsing lamu de woi shalun la hkrum nna, Karai Kasang a hkra maga de dung nga ai (Mk 16:19).

San Luka gaw Yesu Madu Yerusalem kaw nna Betheny makau de sa nna Kasa ni hpe shaman ai lam hpe tsun da ai. Bai “Shing rai shanhte hpe shaman ya nga yang, shi shanhte kaw na hka matut wa nna sumsing lamu de woi shalun la ai hkrum wu ai,” ngu tsun dan da ai (Lk 24:51). Kasa ni Yerusalem de kabu gara let nhtang wa ma ai lam hpe mung San Luka ga hpungdim hta tsun da ai. Kasa laika hta mung dai lam hte seng nna bai tsun da ai.

Yesu Madu sumsing lamu de lung wa ai lam hpe anhte ni kata lam n chye ga ai rai tim, myit kaji myit n pyaw shara n nga ai. Dai hte maren chyum laika hta tsun da ai lam ni hta ntsa lam sha tsun da ai ngu mu mada ai ni a matu mung myit kaji myit n pyaw shara n nga ai. (Ks 2:33; 7:55; Rom 8:34; Ehp 2:20; Kol 3:1; Heb 8:12; 10:12; 1Pet 3:32).

Ndai chyum daw kadun ni gaw ya tsun dan na shiga ni hpe jaw ai. Yesu Madu bai hkrung rawt ai shaloi Kawa Karai Kasang a hpung hta shang lawm hkam sha let shinggyim atai hte Karai atai hta, Kasa ni, bai shinggyim masha ni hte hpan da hkrum nga yawng nga pra yawng a Hkawhkam shatai ya ai.

“Shi a myit hpe shagrit shanem kau nna, si ai du hkra madat mara nu ai. Kaja wa wudang hta si ai du hkra madat mara nga ai. Dai rai nna, Karai Kasang gaw shi hpe tsaw htum ai sumsing lamu du hkra shagrau nna, amying shingteng yawng hta grau kaba ai mying ningsang hpe jaw da wu ai. Dai majaw sumsing lamu lahta tang na, dinghta tsang na hte lawu tang na, hkrung mahkrung yawng hte gaw, Yesu a mying ningsang hpe, shagrau sha-a hkungga jaw let, hput di dingmyawm nna, Kawa Karai Kasang a hpung shingkang a matu mara, Yesu Hkristu gaw Madu rai nga ai nga, shinglet yawng mayawng e yin la hkam la na mara ai” (Hpi 2:8-11).

Roma hkawhkam up ai shara ni hta “Madu” (gumsan magam) ngu ai ga si hpe hkawhkam ni a matu sha sha-ang nna shaga ma ai. Tsun mayu ai gaw, tinang up ai npu na masha ni hte nga manga yawng hpe tinang kam ai hku up hkang lu ai hpung dagu nga ai hpe tsun ai; si dam hte sak hkrung lu ai ahkaw ahkawng jaw lu ai hpe tsun ai rai nga ai.

Ndai poi gaw anhte galaw nga ai poi a lachyum rai nga ai. Nde mi hpung dagu ja ai wa, anhte tsawra ai wa a marang e kabu pyaw lu ai poi rai nga ai.

San Luka tsun ai Yesu Madu sumsing lamu de lung wa ai hte seng ai kata lam

Anhte ni Yesu Madu a lam hpe ka da ai Chyum laika hpe sumru shagu Chyum laika hpe kata lam hka ja na ngu ai hta Shi a teng man ai lam hpe hkrat chye lu na matu madung da ra ga ai. Tsun mayu ai gaw Madu Yesu a lam chye hkra madi shadaw ya ai kata lam ni hpe mung ra yang ra ai hku hka ja ra ga ai. San Luka laika hta Yesu Madu sumsing lamu de lung wa ai hte seng nna kata lam tsun da ai ni mung nga ai hpe mu lu ga ai. Dai gaw Yesu sumsing lamu de lung wa ai hte seng ai shiga hpe anhte ni chye na na matu rai nga ai.

Yesu Madu gaw bai hkrung rawt ai hpang n’htoi 40 ya rai yang Kawa Karai Kasang hpang de bai lung wa ai. Yuda myu sha ni a matu masat 3, 7, 10, hte 12 ni gaw hkum tsup ai, shing n rai, hpung dagu rawng ai masat ni re ngu hkam la ma ai.

Chyum laika hta na masat 40 hte seng nna tsun da ai hpe sawk sagawn yu ga. (1) Israel myu sha ni ga sadi da ai lamu ga de shaning 40 ning hkawm sa ra ma ai. (2) Myihtoi Eliah hpe lamu kasa ni malu masha gun sa ai shaloi 40 ya nam mali kaw nga nga ai. (3) Yesu Madu tara hkaw garai n hpang shi yang n’htoi 40 ya tup lusha gam lai wa ai. (4) Ya ndai laban na lu ai hta Yesu Madu bai hkrung rawt ai hpang n’htoi 40 ya lapran Kasa ni hpe shadan dan ai.

Hkristan masha ni a labau hta ndai masat hti hkum ni hpe jai lang ai shaloi mabyin langai ngai hta atsawm sha awng dang lu nna, Karai Kasang a sharawng awng ai hte mung htuk ang ai hpe madun dan ai.

Yesu Madu kaja wa sha sumsing lamu de lung wa ai re.

Yuda masha ni Universal hpe daw masum garan da ma ai. (1) Karai Kasang nga ai ngu hkam la ai sumsing lamu, (2) shinggyim masha ni shangai ai kaw nna si ai ten du hkra nga ai ndai mungkan ga, hte (3) moi shawng de “sheol” ngu shaga shamying ai si ai ni a lamu ga kata shara ni rai nga ai.

Anhte ni mung lamu de madun let sumsing mungdan ngu shaga shamying nna, lamu ga npu de madun let ngarai mung ngu shamying shaga ga ai.

Raitim sumsing lamu gaw lahta de, shing n rai, ga lawu de nga n nga gaw hkrak n chye ga ai. Dai shara gaw masa lam hpe tsun ai sha rai nga ai. Sumsing mungdan gaw Karai Kasang nga ai shara hpe tsun ai rai nna, dai shara hta Karai Kasang hte rau nga let kabu pyaw lu ai hpe tsun ai rai nga ai. Yesu Madu ahpraw nsam galai ai hpe dum na ma ai. San Petru hte manang ni Yesu a hpung dagu hpe a kajawng sha mu lu ai. Dai shaloi bum ntsa hta aten shagu nga mayu ma ai. Dai shara gaw shanhte a matu sumsing mungdan rai nga ai.

San Luka chyum laika hte maren nga yang, Yesu Madu sumsing lamu de lung wa ai ngu gaw, lamu ntsa, shing n rai, lawu de n re ai sha, Kawa Karai Kasang a hpung shingkang hta shang ning-ngai ai lam hpe tsun ai rai nga ai.

Yesu Madu Kawa Karai Kasang a hpung shingkang, shing n rai, sumsing lamu de galoi lung wa ai rai.

Si ai kaw nna bai hkrung rawt ai hpang byin ai gaw dan len ai labau nga nga ai. Dai zawn byin ai lam hpe makoi magap shamat kau n ra ai. Kaja wa nga yang, Madu gaw Kasa ni hpe dan dan lai wa ai. Raitim, Kawa Karai Kasang a hpung shingkang hta jawm pawng nga sai rai nga ai.

Rai jang ndai laban na poi hpe naw galaw ra na i?

Anhte ni Yesu Madu a hpung shingkang hta shang ningngai ai poi hpe galaw nga ga ai. Ndai mabyin gaw teng sha byin lai wa ai kun ngu n kam n hten ai lam n mai nga ai. San Luka chyum laika hta kasa ni kaw Yesu Madu shadan dan ai lam hpe tak ga hte tsun da ai mung n rai nga ai. Shi tsun mayu ai gaw Yesu Madu aten ladaw langai laman hta kasa ni kaw dan dan ai hpang shanhte kaw na mat mat ai lam rai nga ai (Lk 24:51).

Kawa Karai Kasang hpang de bai lung wa ai Yesu madu gaw shi a kasa ni hpe lit magam langai jaw da ai. Dai gaw shinggyim masha yawng Karai Kasang a tsawra matsan dum lama ai hpe bai htang let hkye hkrang la lam hpe hkam la na matu rai nga ai.

San Mahte, San Marku hte San Luka chyum laika masum (3) hta Yesu madu kasa ni hpe jaw da ai lit magam a lam ka da ma ai. Shanhte gaw Yesu madu a magam bungli hpe matut gun hpai na matu rai nga ai.

“Nanhte mungkan ting chyam hkra hkawm sa nna shinggyim masha amyu baw shagu hpe, dai Kabu Gara Shiga hkaw dan mu,” (Mk 16:15).

Yesu Madu ndai hku tsun ai ngu sumru la mai ai. “Mungkan ga ntsa ngai a magam bungli galaw ngut se ai. Ya gaw nanhte a aten rai sai. Nye Wa a sharawng awng ai lam gaw nanhte ni ngai a magam bungli hpe matut gun bai na matu rai nga ai. Nanhte hpe Kabu Gara Shiga shachyam shabra ai ni shatai na we ai. Wa gaw nanhte hte masha ni a mara ni hpe raw dat ya na hte sumsing lamu hta shi hte rau nga na hpe sharawng awng nga ai. Nanhte a matu sumsing chyinghka hpaw da ya ai. Shang mayu ai ni yawng shang mai ai.”

Yesu Madu Kasa ni hpe lit magam ap da nna tawn da ai n re. Shanhte dai magam lit hpe gun hpai na matu n-gun atsam n nga ma ai. Dai re majaw shanhte hpe ga sadi lahkawng jaw da ai. (1) Shanhte hte rau nga nga na. Madu n nga dawng ai gaw shanhte hte rau teng sha nga nga ai lam grau nna dan dawng nga ai. (2) Yesu Madu bai hkrung rawt ai hpang shanhte hpe jaw da ai Wenyi gaw shanhte hpe garum ya nga ai rai nna, n’htoi loi na ai hpang Pentecost shani hpring tsup hkra laksan bai jaw ya ai.

“Shanhte chyawm gaw shi hpe nawku nna, grai kabu gara let, Yerusalem mare de bai wa nhtawm; Karai Kasang hpe shakawn kungdawn let, Nawku Htingnu e, tut nawng anga nga ma ai,” (Lk 24:52). Shawng de tsun dan sai ga sadi lahkawng gaw San Luka a hpang jahtum ga yan hpe grau chye na shangun ai. Kaja wa nga yang, Kasa ni shanhte a sara Yesu hpe n mu ma sana rai nna, myit kaji myit yawn nga na ma ai. Raitim, dai hku n rai ma ai sha, shanhte hta Yesu Madu a Wenyi aten shagu rau nga nga ai hte shanhte hpe Yesu Madu mungkan ga de yu sa wa ai a magam bungli ni hpe kam myit kaba hte ap jaw da ai majaw n-gun awai la lu ma ai. Anhte mung dai lit magam hpe hkam la lu saga ai hte de a matu sung htum kabu pyaw lam hpe lu la saga ai.

Akyu Hpyi Saga

Wa Karai Kasang e, nang Madu ap jaw da ai lit magam hpe anhte htep lahti gun hpai let ngwi pyaw simsa lam hpe hkam la lu nna hpang jahtum n’htoi hta mung nang Madu a hpung shingkang hta shang ning ngai nga lu na chyeju jaw ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw (7) ngu na Paska ladaw laban rai nna, Yesu Madu Sumsing Lamu De Lung Wa Ai poi n’htoi rai nga ai.

Hti ang ai Ja Chyum Mungga ni gaw

Chyum Mungga Daw (1) Kasa 1:1-11

Chyum Mungga Daw (2) Ehp 1:17-23

Kabu Gara Shiga Mk 16:15-20

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.