Madu Yesu Lamu De Lung Wa Ai Poi

Yesu Lamu De Lung Wa ai Poi   24-5-2020

Hkristu hta tsawra ai,

Nu wa hpu nau ni e, ndai laban gaw Yesu lamu de lung wa ai poi rai nga ai. Makam masham ga tsun ai shaloi “Sumsing lamu de wa nna, Karai Kasang a hkra maga e hkaw dung nga ai” ngu tsun shapraw ga ai. Daini Yesu Madu lamu de lung wa ai poi nhtoi hpe galaw nga ga ai.

Dai makam masham ga gaw hpa lachyum nga a ta?

Makam masham hpe tsun shapraw ai shaloi, anhte ni mawn mawn tsun ai makam re ngu anhte chye na hkap la ga ai. Dum lahkum hta dung na tsap na, Karai Kasang a pai hkra hta nga lu na ngu ai lam tsun ai nre hpe ma ni pyi chye na na re. Bai sumsing mungdan gaw ntsa de mung lawu de mung nre ai hpe anhte hka ja yu ai. Sumsing mungdan ngu ai gaw Karai Kasang hte rau nga nga ai lam rai nga ai. Karai Kasang hte rau nga ai lam gaw tsaw ai lamu de lung ai shing nrai kaga shara ra kaw sa ai hpe tsun ai n’rai nga ai.

Kasa ni a makam masham hpe hka ja ai shing nrai Yesu lamu de lung wa ai lachyum hpe hka ja ai lam

Anhte ni ndai laban na

Yesu Madu sumsing lamu de lung ai poi hta Yesu Madu Karai atai Masha atai, atai lahkawng hpe hkam la ai poi hpe galaw nga ga ai. Ndai poi hpe nawku hpung labau hta hpang hkrat na galaw wa ai lam chye lu ai. Yesu shangai ai hpang tsa ban (4) hkan she galaw ai lam chye lu ai. Yesu lamu de lung wa ai moi na sumla gaw Yesu wudang ntsa ta lahkawng maga sharawt da ai sumla nre ai da. Lata lahkawng maga yan jahkrat da ai Yesu a n ma ni hpe madun dan ai sumla she re da. Dai zawn hkrang shapraw ai sumla gaw anhte Yesu a n ma ni hpe madung da sumru lu na matu re lam chye lu ai. Yesu a n ma ni hpe dam lada ai hku madun dan ai lam gaw Yesu lamu de lung wa ai poi a lachyum hpe shalen ai re hpe chye lu ai.

Hpri dit nna lu ai Yesu a n ma ni hpe yu u. Dai n ma gaw shi hpe machyi kaba hkrum shangun ai raitim, hpung shingkan rawng kabu pyaw ai lam bying shangun ai. Kawa Karai Kasang ap da ai shinggyim masha yawng hpe hkye hkrang la na matu nni nkyi hkam si hkam hkam ai lam hpe hkam la ai lam re ngu tsun ga ai sumla rai nga ai. Yesu, ga sadi dung ai a majaw Kawa Karai Kasang shi hpe laklai kaja htum ai hpung shingkang hte shagrau ya sai.

Dai hpung shingkan gaw Yesu shinggyim hkumhkrang sa dagraw ai shaloi gun raw da ai rai nga ai. Shinggyim hkum sa la ai raitim, mungkan shinggyim hta nga ai hpung shingkan hpe mung raw da ai rai nga ai. Hpa majaw nga yang Yesu gaw Karai atai Masha atai htani htana grin na re majaw re ngu karai hpaji ninghkring ni tsun da nga ai.

Kawa Karai Kasang gaw Yesu hpe Karai atai Masha atai san da ai rai nna, lamu kasa ni hte shingyim masha ni yawng hte hpan da hkrum sai nga yawng nga pra hpe up hkang na ahkang aya jaw da ai. Shi a up hkang ai n pu kaw na lawt lu ai lam hpa n nga ai. Nawku hpung labau hta shawng de na Hkristan masha ni gaw, Kawa Karai Kasang Yesu Madu hpe ap ya da ai laklai hpung dagu hte hpung shingkan hpe kabu gara ai myit hte hkap la hkam la hkaw tsun sakse ma ai. Dai majaw Hkristan masha ni gaw Yesu hpe “Madu Karai” ngu ai amying shingten hte shagrau shaga ma ai.

Yesu hpe “Madu Karai” “Gum san Magam” ngu shaga jang Roma hkawhkam a lam hpe mung sumru du na re. Dai aten ni hta Roma hkawhkam ni a arawng arna gaw mungkan shara shagu de up hkang lu ai rai nna, hkawhkam sha up hkang ai uphkang masa rai nga ai. Tara Upadi hta nan Madu Karai “Gum san Magam” ngu ai ga si hpe hkawhkam wa a matu sha jai lang matu san da ai re da. Raitim, dai ten na Hkristan masha ni dai tara upadi hpe kabu gara let sha tawt lai ma ai rai nga ai. Hpa majaw nga yang Kawa Karai Kasang Yesu hpe ap jaw da ai hpung dagu hte hpung shingkang gaw matsaw lahta tang, lawu tang hte nga yawng nga pra hta kaga hkawhkam hkawseng ni hta kaba grau htum ai majaw rai nga ai.

Misa hkungga nawng jau ai ten hkawn ai “lamu e Karai Wa kaw shingkang” mahkawn a nnan daw hta “Hpa rai me law Nang chyu chyoi pra; Nang chyu sha Madu re” ngu ai rai nna, Yesu sumsing lamu de lung wa ai poi hpe akri madung daju hku tsun shapraw da ai lam rai nga ai.

Yesu Madu lamu de lung wa ai poi hta anhte kabu lu ai gaw Yesu Madu shinggyim masha yawng hpe shi hte rau hkam sha lu ai hpung shingkang hpe rau hkam sha shangun nna, kaga masha ni hpe mung dai zawn hkam sha hkra garan gachyan na matu anthe hpe lit shatsam da ai lam rai nga ai. Yesu Madu sumsing lamu de lung wa nna, sumsing chyinghka hpe pat shingdang kau ai n’rai nga ai. Shinggyim masha yawng shang lu hkra hpaw da ya nga ai. Mungkan shinggyim hkawhkam ni gaw mung masha ni hpe tingkyen myit jasat hte up hkang ma ai. Yesu Madu hpe shinggyim masha yawng a “hkawhkam ni a Hkawhkam” amying shingteng jaw ai gaw Madu shi chyu sha masha yawng a hkyela Madu re ai majaw rai nga ai. “Langai sha re ai Madu” ngu amying shingteng jaw da ai lam gaw shi Madu langai hta lai nna, kadai mung hkye hkrang magam n’lu galaw ai majaw rai nga ai.

Kaja wa nga yang Madu Yesu si ai kaw na bai hkrungrawt ai hpang, kasa ni hpe gara shara kaw gara hku shadan dan ai ngu ai lam ni gaw Hkristan masha ni a matu ahkyak madung nrai nga ai. Kaja wa ahkyak ai lam gaw (1) Bai hkrungrawt ai hpang, Yesu Madu hpe mu hkrum yu ai masha law law nga nga ai. Dai majaw Madu Yesu kaja wa si ai kaw na bai hkrungrawt sai hpe madun nga ai. (2) Madu si hkam ai a marang e shinggyim masha yawng mara kaw na lawt lu ai hte anhte shinggyim masha yawng wenyi hta Karai Kasang a kasha ni tai shangun nga ai. (3) Anhte ni gaw Karai Kasang a wenyi hpe rau hkam la lu na matu, shaga la hkrum ai majaw, Yesu Madu hkum nan kabu gara hkam la ai hpung shingkang hta shang lawm lu ga ai.

Dai majaw ndai poi hta anhte kabu pyaw nga ga ai. Grau nna, kabu pyaw lu ai gaw Yesu Madu gaw anhte hpe shi hte bung pre shangun nga ai majaw shi hkum nan hkam la ai hpung shingkang hpe shinggyim masha ni mung hkam sha lu mu ga lam madun lam woi ya nga ai. Dai majaw ndai poi na chyum mungga a hkang da ai lam gaw “Dai majaw nanhte pru sa nna, shara shagu na masha amyu baw shagu ni hpe nye a sape ni shatai let, Kawa, Kasha, Chyoi Pra ai Wenyi a amying nsang hta shanhte hpe kashing kamun chyeju jaw ya mu” ngu ai rai nga ai. Mt 28:18

Shawng na Hkristan masha ni gaw dai hpe lit li gun ai ngu n’myit la ma ai sha, ahkaw ahkang langai hku mu mada hkam la ma ai. Yesu Madu shi hkum nan hpe Kawa Karai Kasang ap da ai lit magam hta sadi dung ai majaw shi hta hpung shingkang danhkrung nga ai zawn, shi ap da ai hpe hkam la ai ni mung dai hpung shingkan hpe shi hte rau hkam sha lu na rai nga ai.

Kasa 1:3 hta kasa ni Yesu hte rau hkrum zup nna hpawng nga ma yang, shanhte gaw “Madu e, ndai aten e Israela amyu masha ni hpe dai Mungdan bai de ya na rai sani?” ngu nna shi hpe san ma ai. Yesu Madu “mahtai n’jaw ai” ngu mu mada ga ai raitim, kaja wa nga yang shi mahtai jaw da nga ai. “Nanhte a marang e mungdan hpe gaw de na nngai. Nanhte myit mada ai “masha ni hpe mayam shatai nna, nanhte gaw hkawhkam amyu ni shatai ai mungdan nrai ai sha, masha yawng hkawhkam amyu hte hpung shingkan hpe arau hkam sha ai lam she rai nga ai. Mungkan hta ngai bying shangun mayu ai lam hpe nanhte kaw ap ya nga nngai. Dai lit magam gaw masha yawng hpe Karai Kasang a ja mungdan de shang ningngai lu ai lam hpe lam woi ningshawng tai woi shang na matu rai nga ai.

Shawng na Hkristan masha ni gaw Yesu Madu hpang jahtum jaw da ai ga shaka hpe sadi maja let shanhte a lit magam ni hpe kabu gara myit hte gun hpai ma ai. Dai ga sadi gaw “Lamu ga prat htum hkra ngai nanhte hte rau dinggrin anga nga na nngai law” ngu ai rai nga ai. (Mt 28:20) Dai rai nna, dai aten hta Hkristan ni a matu Yesu lamu de lung wa ai poi nhtoi kaw Yesu Madu hpe dan len ai hku mu mada lu na lam gaw madung n’re ai sha, Madu ap jaw da ai lit magam hpe gun hpai nna, shanhte hte arau nga nga ai gaw ahkyak grau ai lam re ngu hkam sha ai lam rai nga ai. Lani mi hta shanhte hpe sumsing mungdan de woi shang na matu du sa na re hpe kam sham ma ai. Dai rai nna, shanhte hkye hkrang la hkrum nna, kaga masha ni hpe mung garum ai Madu Karai hte arau kabu gara lu na rai nga ai.

Yesu Lamu de lung wa ai poi a lachyum hpe hkum tsup dik ai hku chye na na matu ahkyak nga ai. Kasha Yesu hpe shinggyim masha kadai mung sawn la nlu ai ahkang aya hte hpung shingkang hpe jaw da ai Karai Kasang hpe anhte ni kabu gara shakawn kungdawn shagrau sha a ga ai. Shinggyim masha shagu langai sha re ai Kasha Karai Kasang a asak hpe mungkan hta rau hkam sha let, sumsing mungdan hta shi a hpung shingkang sali wunli hpe hkam la na shaga ai majaw Karai Kasang hpe shakawn nga ga ai. Kasha Karai Kasang hkam la ai hpung shingkang hpe anhte ni mung hkam la lu na matu shaga la ai hte kahpu kanau ni hpe hkyela lam de lam woi ya lu ai majaw anhte ni kabu gara nga ga ai. Kasa 1:11 hta Yesu gaw nanhte a man na sumsing lamu de shalun la ai zawn, dai hku bai du na ra ai” re  majaw ya jang kabu nga ga ai. Dai shaloi anhte hta hkye hkrang la ai lam hta na lu la ai hpung shingkang hte shu la dan la ai hta htam lahkawn jat la lu na ra ai. Dai hta sha n ga, kaga masha ni hpe garum lu ai majaw kabu pyaw na ma ai. Dai majaw Yesu Hkristu lamu de lung wa ai poi hta anhte ni a kabu pyaw lam gaw sung dik ai hku ru jung nga ai.

San Pau lu a kyu hpyi nsen

Daini hti ang ai chyum mungga daw (2) gaw kasa laika kaw na rai nna, shawng daw de sang lang da ai hpe Kabu gara shiga hpe bai shangang shakang shagrin ai rai nga ai. Dai aten hta, San Pawlu gaw Roma kaw htawng rawng nga ai rai nna, shawoi na zawn Hkristan masha ni hpe mungga hkaw tsun sharing shaga na nmai bying taw nga ai; akyu hpyi garum ya ai hku sha bying mai nga ai. Hkristan ni hta na kadai ni a matu shi akyu hpyi ya ai kun? (1) Hkristan ni gaw Hkristu hpe grau chye na wa mu ga, yawng gaw Yesu a mau hpa hkye hkrang la ai magam hpe grau chye na hkap la wa mu ga matu akyu hpyi ya nga ai. (2) Sumsing mungdan hta Hkristan ni a matu Yesu Madu lajang da ai chyeju kaba ni a lam hpe sumru let n-gun la mu ga matu akyu hpyi ya ai. (3) Hkristan ni hte kaga masha ni hpe hkye hkrang la lam de woi awn sa na matu Karai Kasang a mau hpa hpung dagu hte matsan dum lama hpe chye na hkawn hkrang na matu akyu hpyi ya ai.

Anhte Hkristan ni a lit magam ni gaw n’mai byin ngu ai lam n’nga ai majaw, kangka myit hte gun hpai ra ai, nga nna, San Pawlu tsun da nga ai. Lachyum gaw, Karai Kasang Yesu Madu a bai hkrungrawt ai lam hte maren shahkrung sharawt la ai chyeju jaw ya na rai nga ai. Karai Kasang gaw shi a kasha hpe si ai kaw na bai hkrungrawt shangun ai hpe kadai wa pat jahkring kau lu na a ni? Dai zawn sha anhte ni hpe hkye hkrang la na matu hte kaga masha ni hpe hpung shingkang hta shang ning ngai lu na matu shaga la ai hpe kadau wa pat jahkring kau lu na a ni?

Akyu hpyi saga

Wa Karai Kasang e, Madu Yesu a bai hkrungrawt ai hta anhte ni hpung bai hkrungrawt nna, Madu Yesu sumsing lamu de lung wa nna, Karai Kasang a hkra maga e hkaw dung ai ai zawn anhte ni mung sumsing chyeju lu na matu ndai mungkan hta shani shagu ra nga ai ra nga ai chyeju ni hpe jaw ya rit. Anhte a Madu Hkristu a marang e hpyi nem nga ga ai.

Yesu lamu de lung wa poi laban shani hti ang ai ja chyum mungga ni gaw

Chyum mungga daw (1)  Kasa 1:1-11

Chyum mungga daw (2)  Eph 1:17-23

Kabu gara shiga   Mt 28:16-20

Fr.Patrick Gawmaw Hkawng Yae