Madu Yesu Kashin Kamun Hkam Ai Laban ( Baptism Of The Lord )

“Madu Yesu Kashin Kamun Hkam Ai Poi” (A), B, C, 2022, Pranwan ladaw (1)

          Hkristu hta tsaw ra ai nu wa hpu nau ni e, ndai laban gaw Hkristmas ladaw jathum ai rai nna, “Madu Yesu Kashin Kamun Hkam Ai Poi” laban mung rai nga ai. Ndai poi nhtoi hpe pranwan ladaw hta (1) ngu na laban hta galaw ga ai.

Lai wa sai laban hta, Hkristmas Ladaw hpe, “Hkawhkam Masum Poi” (Epiphiny) hte jahtum ai. Ndai laban kaw nna gaw Pranwan Ladaw de bai shang wa sai rai nga ai.

Daining na nawku daw jau shaning a Pranwan Ladaw hpe “Madu Yesu Kashin Kamun Hkam Ai Poi” laban kaw na hpang nna, Pranwan ladaw matsat (8) du ai hpang gaw Lusha Gam Ladaw de bai shang wa ai. Dai hpang Paska Ladaw de bai shang ai. Paska Ladaw htum ai laban gaw “Chyoi Pra Ai Wenyi Yu Hkrat Wa Ai Laban (Pentecost) rai nga ai. Chyoi Pra ai Wenyi yu hkrat wa ai poi ngut ai hpang laban na she pranwan ladaw bai matut ai rai nga ai.

Dai ning gaw Pranwan Ladaw (10) kaw na bai hpang ai hpe mu lu na ga ai. Hpa majaw pranwan ladaw (8) kaw jahtum da nna, bai matut ai shaloi Pranwan Ladaw laban (9) kaw na n hpang ai rai? Nawku daw jau shaning a ladaw ni hta hkan nna, grau nna “Paska ladaw a nhtoi manga shi (50) hpe maram nna Paska a hpang jahtum laban hta Pranwan ladaw hpang ra ai raitim, nhtoi n gu ai shaning ni hta gaw Pranwan ladaw laban nkau ni hpe shalai kau ra ai majaw rai nga ai. Pranwan ladaw hta laban (5) hte (9) lapran hpe gaw Pentecost poi ngut ai hpang nhtoi hpe jahtum maram nna la ai hpe mu lu ga ai.

“Madu Yesu Kashin Kamun Hkam Ai Poi” laban na chyum daw ni gaw nawku daw jau shaning Year A, B, C, shaning shagu maren sha rai nga ai.

Ndai chyum mungga daw ni gaw anhte hpe sumru na ga san lahkawng (2) hpe htai da ya ai. Ga san gaw (1) Yesu Madu ngu ai wa, kadai rai, (2) anhte ni kaning rai ra na rai, ngu ai rai nga ai. (1) Yesu Madu gaw sak jaw daw jau na matu du sa ai Karai a Kasha Shingtai rai nga ai. (2) Anhte ni gaw Shi a kashu kasha ni tai nna daw jau magam hta sak jaw ap nawng na ni rai ga ai.

Kawa Karai Kasang a sak hkrung Mungga

“Ndai Wa gaw, ngai sharawng awng ai, ngai tsaw ra ai Kasha rai nga ai” (Mt 3:17; Mk 1:11; Lk 3:23). Chyum laika sara masum hte “Yesu Madu Kashin Kamun hkam ai lam” tsun hkai dan ai loi li shai hkat ma ai raitim, Kawa Karai Kasang tsun ai, ndai ga gaw yawng maren ngu na daram bung nga ai hpe mu lu ai.

Ndai ga lachyum hpe anhte ni hkrak hpring tup chye na na gaw n rai ga ai. Chye na ai made sumru, garan kachyan ga nga yang, “ndai lachyum gaw, “ngai langai hkrai sha a kasha, ngai a matu manu dan dik htum kasha, shi n lawm yang ngai Karai Kasang n mai bying ai, ngai hta nga manga, shi hta nga manga maren sha re ai; Ngai rai nngai hte maren shi rai nga ai, ngu Kawa Karai kasang tsun shadan shalen ai rai nga ai.

“Karai Kasang a kasha hpe kam sham ai ni nlang hte gaw, hten bya n hkrum ai sha htani htana asak lu la mu ga nga, Karai Kasang gaw shi a kasha shingtai hpe jaw kau ai kaw du hkra mungkan ga hpe grai tsaw ra wu ai,” (Yh 3:16).

Sak jaw ap nawng na Kasha Yesu Hkristu

Kawa Karai Kasang Shi a kasha shingtai hpe mungkan ga de shangun dat ai gaw, shinggyim masha ni hpe hkye la na matu rai nga ai. Kasha shingtai gaw anhte hpe daw jau na hte shi hpe mung anhte ni daw jau na matu rai nga ai.

“Ndai wa gaw ngai sharawng awng nga ai, ngai tsaw ra ai Kasha rai nga li ai,” (Mt 3:17).

“Ndai wa gaw ngai n-gun shaja ya ai nye a shangun ma, ngai lata la ai wa, ngai sharawng awng ai wa rai nga ai. Ngai gaw shi hpe nye a Wenyi hte jahpring ya ni ai, shi gaw masha amyu baw shagu hpang de teng man rap ra ai tara la sa ya na ra ai,” (Is 42:1).

Myihtoi Isaiah gaw Israel mungdan hta mying dan hkrung ai Myithoi rai nga ai. Yuda myusha ni gaw Messiah Hkyela Madu hte seng ai myihtoi htoi ya na hpe grain nan ra sharawng lai wa ma ai.

Myihtoi Isaiah gaw shanhte ra sharawng ai myihtoi ga hpe hkaw tsun da ai wa langai rai nga ai.

Karai Kasang gaw anhte hpe hkye hkrang la na matu sumsing lamu na yu wa nna shinggyim hkum sa la ai lam hpe Phi 2:6-8 hta San Pawlu tsun dan da ai hpe ndai hku mu lu ga ai, “Shi gaw galoi mung Karai Kasang gawng shingyan hte, nga pra nga timung, Karai Kasang hte maren rai nga tim maren mara n myit la ai sha, shi lu malu hpe kau da nna mayam a gawng shingyan hpe dagraw la let, shinngyim masha zawn shangai wa nna, masha a hpraw nsam hte shangai wa sai, dan pru wa sai. Shi myit hpe shagrit shanem nna, si ai kaw du hkra madat mara nu ai. Kaja wa wudang hta si ai du hkra madat mara nga ai.”

Kashin Kamun jaw ai Yawhan Baptista a mau hpa bai htang ai lam

Kabu Gara Shiga Chyum Laika San Mahte a chyum laika hta Kashin Kamun jaw ai Yawhan gaw Yesu Madu kashin kamun hpyi ai shaloi mau hpa bai htang ai lam hpe mu lu ga ai.

“Ngai mahtang she nang kaw nna kashin kamun hkam la na ra nga nngai, nang mahtang ngai kaw du sa rin ni, ngu nna shi hpe hkap ndang let tsun wu ai,” (Mt 3:14).

Yawhan gaw, shi hta mara nga ai rai nna, Yesu Madu gaw mara kata re ai hpe hkap la hkam la ai rai nga ai. Yawhan gaw shi a kanu Elizabeth a hkritung e naw rai nga ten, Nu Maria Yesu Madu hpe shi a hkritung e gun da let Wenyi e Elizabeth kaw woi sa ai shaloi mara hta na kashin kau ya ai hpe Yawham hkam la sai rai nga ai.

Yesu Madu a mahtai gaw Yawhan a matu asan sha rai nga ai. “Shaloi Yesu gaw, ya dai shabyin ya rit, hpa majaw nga yang, ding man ai lam shagu hpe shadik lu ra ai,” (Mt 3:15). Yawhan mung dai hpe hkap la nna Yesu Madu hte rau Karai Kasang hte shinggyim masha ni hpe daw jau ai rai nga ai.

Moi shawng na Hkristan ni gaw Yesu Madu hkum nan, myit malai kumla rai nga ai kashin kamun hkam ai hte seng nna chye na yak lai wa ma ai. Yesu Madu Yawhan hpe tsun ai ga hpe sumru yang asan sha chye na lu ai.

Yuda myusha ni Yawhan Baptista a lata hta kashin kamun hkam ai gaw mara a matu myit malai ai rai nna san seng lam hpe bai hpang na matu rai nga ai.

Yesu Madu Kashin kamun hkam ai gaw, shinggyim masha ni shanhte a shut hpyit mara ni a matu myit malai mu ga, malai dam hkam ya ai rai nga ai. Ndai lachyum hpe Yawhan Yesu Madu hpe madi madun let shi a lam tsun sang lang dan ai a marang e chye na lu nga ai.

“Yu Mu Karai Kasang a Sagu kasha, Mungkan mara la kau ya ai Madu rai nga ai,” (Yh 1:29).

Wenyi gaw, hkyela magam hta, Yesu Madu hpe lam woi ya ai

Wenyi gaw, Myihtoi Isaiah hku nna, Kawa Karai Kasang a daw jau ai lam hte seng ai Karai a mungga dik wa shangun ai. “Ngai gaw shi hpe nye a Wenyi hte jahpring ya ni ai,” (Is 42:1).

Yesu Madu gaw Kanu Nu Maria a hkritung e ma hkum sa la ai aten kaw nna nan Wenyi hpe hpring tup hkam la sai rai nga ai. Tsun ga nga yang Kawa Karai Kasang hte rau rai nga ai aten kaw nna nan Wenyi mung shan hte rau rai nga sai rai nga ai.

Yesu Madu tsun ai, galaw ai lam yawng gaw Kawa Karai Kasang sharawng awng ai lam hte teng man ai lam ni hkrai rai nga ai. Madu gaw galoi raitim, atik anang n shadut n galaw shangun ai sha, karum shingtau ya ai. Gawng kya ai ni, shagrit hkrum ai ni hpe myit galu kaba ai hte karum ya ai. Ning hkap ai lam hkrum shagu mung shi a magam hpe myit n htum, asum n jaw ai. Shi a lit magam hpe n hprai ai sha galaw gun hpai ai.

“Karai Kasang gaw Yesu hte rau rai nga ai majaw shi gaw shara shagu kawan katsan hkawm nna masha ni hpe mai kaja ai amu galaw ya let, nat gumlau e zingri zingrat hkrum ai ni yawng mayawng hpe shamai shatsai ya nga ai,” (Kasa 10:38).

Anhte gaw mayam tai lai wa yu saga ai raitim, Karai Kasang a kasha ni tai wa ga ai

Anhte sak hkrung nga pra ai a yaw shada ai gaw Karai kasang a kashu kasha ni tai let sak hkrung nga pra lu hkra matut manoi sharin hkam la na matu rai nga ai. “Nang gaw myi n mu ai ni hpe myi hpaw ya nna, nsin htawng hta sharen da hkrum ai ni hpe shalawt dat na rin dai,” (Is 42:7).

Kashin kamun hkam la sai anhte ni a sak prat gaw Yesu Madu a Karai asak hta shang lawm lu ai. Karai Kasang a kun dinghku masha tai lu na rai nna, Karai Kasang gaw anhte a Kawa, Yesu Madu gaw anhte a hpu shawng hpu ba rai nga ai. Kashu kasha ni hkam la ging ai kanu kawa a Sali wunli hkam lu ai ni tai wa ai.

“Anhte gaw shi a kashu kasha ni rai nga ga yang gaw shi a amyu masha ni a matu san da ai Sali wunli ni hpe anhte hkam la na ga ai,” (Rom 8:17).

“Nang gaw ngai tsaw ra dik ai Kasha, ngai sharawng awng nngai,” ngu Karai Kasang tsun ai ga anhte a matu mung rai nga ai.

Wenyi Karai Kasang chyu sha anhte hpe, Karai Kasang a kasha ni zawn, nga lu shangun ai.

Kashin kamun chyeju kumla anhte a matu ahkyak ai zawn, N-gun shaja Sakramentu chyeju kumla mung anhte a prat matu grai ahkyak ai. N-gun shaja chyeju kumla hpe hkam la ai shaloi, sak prat hta Karai Kasang a akyu rawng apu asi tai ai kasha ni tai wa nna makau grupyin hta Yesu Madu a hkye hkrang la magam hpe ndau shana, galaw gun hpai lu wa ai.

Karai Kasang hpe hkrit hpa hku n mu ai sha, kashu kasha ni kawa hpe tsaw ra hkrit hkungga ai zawn hkap la ra ai. Shi sharawng awng ai lam hpe aten shagu hkan shatup ra ai. Anhte a matu Shi a yaw sin ai lam shagu gaw matsan dum tsaw ra hte hpring rai nga ai. Kasa ni zawn mungkan masha yawng hpe daw jau ra ai. Shaloi mara a mayam prat kaw nna lawt lu na matu Karai Kasang anhte hpe karum ya na rai nna, anhte kashu kasha ni mung kabu pyaw lam hpe hkam sha lu shangun na ra ai.

Akyu hpyi saga

Wa Karai Kasang e, Yesu Madu zawn sha Karai Kasang a kasha majing ni tai nga lu hkra, Karai Kasang hte hpu nau ni hpe daw jau ai ni tai nga lu na chyeju atsam anhte hpe jaw ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban gaw “Madu Yesu Kashin Kamun Hkam Ai Poi”  laban mung rai, Pranwan ladaw (1) hpang ai laban mung rai nga ai.

Hti ang ai Ja Chyum Mungga ni gaw

Chyum Mungga Daw (1) Is 42: 1-4, 6-7

Chyum Mungga Daw (2) Kasa 10: 34-38

Kabu Gara Shiga Mt 1: 7-11

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.