Madu Yesu Hpraw Nsam Galai Nna Hpung shing kan Madun ai Poi (Pranwan Ladaw Laban 18)

Madu Yesu Hpraw Nsam Galai Nna Hpung shing kan Madun ai Poi

(Pranwan Ladaw Laban 18)

Hkristu hta tsawra hkungga ai Nu Wa hpu nau nawku hpung masha ni , ndai laban gaw Pranwan Ladaw hta ( 18 ) ngu na laban rai nna  daini e nawku hpung gaw madu yesu tsaw ai bum ntsa e hpraw nsam galai nna hpung shingkan madun dan ai Poi nhtoi shani hku nna mung masat galaw nga ga ai re.

Na la lu na jachyum mungga ni gaw daw langai hta na rai nga ai. dai hta e "Shaloi tingyang ni hpe shadun da nna, moi chyaloi nhkoi na wa langai mi dung nga ai du hkra, ngai mu mada nngai. Shi a hpun palawng hkyen zawn hpraw nna,shi a kara ni gaw sagu mun hte bung nga ai". bai Israela amyu masha ni ala dingda nga ai hkyela madu gaw hpungshing kang hte hpring zup ai wa rai nga ai. Dai Madu gaw hpung shingkan hte hpring zup ai wa rai nga ai hte shi a gumlau ni hpe jahten sharun kau nna, shi a mungdan hpe galoi mung up hkang nga na rai nga ai. Dai madu gaw Yesu hkristu nan rai nga ai ngu ai hte seng ai hpe na la lu na re..

Chyum mungga daw lahkawng, Peteru a shagun dat ai laika lahkawng 1:16-19 " Madu Yesu hkristu a hpung shingkang hte du sa ai lam hpe anhte hkum nan mu lu ai lam hpe sakse hkam nga ga ai. Shi gaw kawa Karai kasang kaw na, arawng shadang hte hpung shingkang hpe Lu la ai wa, Karai kasang a tsawra dik ai kasha rai nga ai ". Kasa petru gaw shi hkum nan madu yesu hpe law law lang ngyet kau ai wa rai nga ai. Raitm, Madu yesu a tsawra matsan dum ai myit hpe shi hkum nan hkamla lu ai shaloi, Madu yesu a kasi ningli ni hpe bai yu la nna ta tut hkrang shapraw let kabu gara shiga hpe gat hkai lai wa sai wa rai nga ai. Ndai lam ni a mrang e daini anhte a prat hta e n-gun la mai ai lam ni law law mung nga nga ai.

Chyum mungga daw masum, Madu a kabu gara shiga, Mahte a laika 17:1-9 hta  "Madu Yesu gaw Petru, Yaku hte shi a kanau Yawhan hpe woi nna bum ntsa de woi lung wa ai.  Madu yesu gaw shanhte a man e hpraw nsam galai nna hpung shingkan madun dan ai. Sumwi gaw shanhte hpe kaup let nsen kaba hte dai sumwi na pru wa ai nsen gaw, Ndai wa gaw ngai shrawng awng ai wa , ngai tsawra ai wa rai nga ai shi a ga matsun ni hpe hkan shatup nga mu" ngu ai ndai lam hte seng ai hpe na la lu na rai nga ai.

na la lu sai madu yesu a kabu gara shiga hpe rau sha bai myit sumru n-gun la nga ga. Mahte hku nna madu yesu a hpraw nsam galai nna hpung shingkang madun dan ai lam hpe ka shaleng da ai lam gaw Karai Kasang a mungdan rai nga ai, sumsing lamu mungdan a namchyim hpe madi madun ai sakse mung rai nga ai.

ndai madu a kabu gara shiga hpe bai sawn sumru ai shaloi, anhte Christian ni a matu myit mada shara hpe ngang kan ai hku nna sakse madun dan nga ai lam re hpe mu lu nga ai. Madu yesu gaw tsaw ai bum hta e shi a sepe ni a man e hpung shingkan madun let, kasa ni hpe sharin ya nga ai lam gaw, Madu Yesu gaw Kawa Karai Kasang a kasha majing re ai, bai si du hpe dang nna si ai ni kaw nna bai hkrung rawt ai wa, anhte ni yawng a matu myit mada shara, shimlum lam hpe jaw ya ai wa rai nga ai.

 Mahte a ndai kabu gara mungga gaw Karai Kasang a mungdan lam hpe grau grau nna chye na wa lu na matu sharin ya nga ai lam rai nga ai.  Isaraela amyu masha ni gaw shan hte hpe mayam prat kaw na hkye hkrang la na Messia hpe a la dingda nga ai ten hta e Moses hpe Karai Kasang Jaw tawn da ai Tara Kanu lam ni hpe hkan let, Myihtoi ni a hkaw tsun ai mungga ni hte rau hkawm sa nga ai lam rai nga ai. Ndai zawn hkawm sa nga  ai a ten hta myihtoi ni hkaw tsun da ai hte maren Hkyela madu kaja wa du sa wa ai ten ladaw hta masha law law gaw madu yesu hpe Karai Kasang a kasha hku nna bai nhkap la lu ma ai. 

Madu Yesu gaw, karai kasang a kasha majing re ai hte ga shaka dingsa hta hkaw tsun ai lam ni gaw dai ni e hpring zup wa sai lam hpe sharin ya ai lam mung rai nga ai. "Ndai gaw ngai tsawra ai kasha majing rai nga ai" nga nna sumwi kaw na nsen kaba hte tsun let shi a ga matsun ni hpe hkan shadik nga mu nga nna karai kasang gaw masha ni hpe sharin ya ai lam mung rai nga ai. Sumwi na nsen kaba hte tsun ai lam hpe anhte ni mu lu mai ai lam gaw, Madu Yesu gaw yawhan Baptista a la ta hta Baptisma hkam la ai ten hpe bai myit dum lu ai zawn, dai ni anhte ni galaw nga ai Madu yesu a hpraw nsam galai ai poi shani hta na la lu sai mathe a laika hta mu lu ga ai. Madu Yesu a myiman gaw Jan zawn htoi kabrim nna, shi a hpung palawng mung nhtoi zawn hpraw tu wa lu ai. Dai hta n-ga, Mawshe yan Elia mung shi hte rau ga shaga nga ai.

Pru mat wa ai Laika 24: 9" Sha loi Mawshe hte Arun, Nadab, Abilhu hte Israela salang sanit shi lung wa ma ai , shanhte gaw Israela a Karai Kasang hpe mu ma ai. Shi a lagaw npu e, saihpra lung seng zawan htoi ala ai hte lamu san kabrim ai zawn re ai nep  nga ai." Mawshe gaw Israela masha ni hpe Egypt ni a mayam hta na Karai Kasang a ga matsun hte maren Hkanan mung de woi awn ai wa rai nga ai. Mawshe gaw Karai Kasang a tara lam hpe madi madun ai wa rai nna Elia gaw Prophet re ai lam hpe madi madun ai lam rai nga ai. Madu Yesu gaw Tara lam ni a npawt re ai hte Prophet majing mung rai ai nga ai. Gasha ga dingsa hta byin ai mabyin lam ni yawng gaw Madu Yesu a ten ladaw hta hpring zup ai lam hpe mung madun dan ai lam rai nga ai.  Hebre masha ni kaw shagun dat ai laika 4:14 ( Dai rai nna, sumsing lamu de hkrang shang wa sai hkinjawng agyi kaba ngu ai, Karai kasang a kasha yesu gaw anhte lu ga ai majaw anhte yin la ai nawku htung hta maju jung nga ga). Petru gaw madu yesu a hpraw nsam galai ai hte Mawshe yan Elia hpe mu mada ai shaloi, myit hta grai pyaw ai hte  sum masum hpe galaw nna nga ga nga nna madu yesu hpe tsun ai lam mung mu lu ga ai. Ndai lam gaw Karai Kasang a sumsing mungdan lam a namchyim hpe Petru hkam sa ai shaloi byin pru wa ai lam rai nga ai. Karai Kasang a mungdan lam hpe lu ai shaloi yawng mayawng gaw hpring zup nga ai hpe Petru gaw hkam sha ai lam rai nga ai. Bum ntsa e lu na sha na hpa nnga ai raitim, sumsing mungdan a namchyim hpe hkamla lu ai shaloi petru a myit hta nchyetsun hkra kabu nna byin pru wa ai kraw hkrat gasi mung rai nga ai.  

Madu Yesu a ga matsun ni hpe hkan shatup nga mu nga nna sumwi kaw nna nsen kaba hte Karai Kasang tsun nga ai hte maren dai ni anhte hkristan tai nga sai kashi a kashu kasha ni anhte hpe ndai lam ni hku nna tsun shadum ai lam hpe myit yu la mai nga ai. Madu yesu gaw si hkrung si htan hpe hkamla nna masum ya nhtoi hta hpung shingkang hte si ai kaw na bai hkrung rawt wa sai rai nga ai.. Anhte mung hpang jahtum na nhtoi hta shi hte rau bai hkrung rawt wa na lam hpe myit mada nga ga ai ni rai nga ai.

Anhte ni kadai raiti mung tinang galoi mung galaw nga ai lam hpe galai shai na matu grai yak la nga ai, Jahpawt jau jau nrawt lu ai wa gaw jahpawt jau jau rawt na matu nkam galaw nga ai, rai tim Jahpawt jau jau rawt nna magam bungli law law hpe galaw lu ai shaloi gaw, jau jau rawt ai lam a akyu rawng ai hpe kadai mung hkam sha lu na rai nga ai. Anhte marai hkum shagu hta e kyanglai len langai hpe a ten law law ga law nga ai rai yang dai nkaja ai kyang lailen hpe galai shai na matu grai yak la nga ai. Anhte ni marai hkum shagu gaw, nhpring zup ai ni rai nga ai. Dai nhpring zup ai lam hpe mu chye nna Karai Kasang a ga matsun hte madu yesu a matsun madun ai lam hpe madat nna hkawm sa na matu gaw grai a hkyak la nga ai.

Daini na ten e Karia Kasang a kabu gara shiga hpe masha law law wa lam amyu myu hku nna hkaw tsun nga sai re. Rai tim mung karai kasang ra sharawng ai hku nna hkawm sa ai masha gaw kaja wa law a ni nga yang nlaw nga shi ai. nkaja ai lam hta nang ngai nlawm hkra shakut let madu a nsen hpe madat nna hkawm sa lu hkra shakut ra nga ai.

 Anhte tinang hkum tinang nang ga san san nna ngai gaw Karai Kasang a nsen hpe madat nga ai wa rai nga kun ngu nna san la mai nga ai?

Madu yesu gaw simsa ai shara hta sa nna karai kasang hte rau ga shaga ai, Kyu hpyi ai lam hpe galaw lai wa ai. Anhte mung simsa ai shara hta e aten la let, ti nang hkum hpe dinglit yu mai nga ai.  Ngai hkawm sa nga ai gaw Madu a mungga hte rai nga ai Kun? myit sumru let kyu hpyi la ra nga ai. Karai Kasang a magam hpe gunhpai nga ai, Jau, Ma Ma, Tara hkaw sara, Kanu Kawa ni yawng hte kashing kamun sacramentu hpe hkam la sai ni anhte yawng gaw karai kasang a ga hpe madat let hkawm sa ra nga ai. Karai Kasang hpe Chye chyang ai ni law htam wa na matu mung karai kasang a mungga hte maren masha law law hpe nhtoi jaw ya lu hkra shakut ra nga ai. Kanu Kawa tai nga ai anhte ni yawng mung karai kasang a mungdan lam hpe kashu kasha ni hta grau chye na wa lu na matu lam matsun madun la ra nga ai.

St. John Mary Vianney a lam hpe loi myit sumru ga. 

St. John Mary Vianny gaw jau tai ngut ai hpang, shi ang ai mare kaji Arch ngu ai mare kasha de lam hkawm sa wa ai. Arch ngu mare kasha gaw Mare Kaba Myo hte mung grai tsan ai hte hpung masha mung 200 ram sha nga ai mare kasha rai nga ai. John Mary Vianny gaw dai mare Arch ngu ai mare de sa wa ai ten hta lamdam nna jam jau hkrum nga ai. Dai zawn dam taw nga ai shaloi hkaisun kaw na wa ai makasha langai hte lam kaw hkrum nna, lam madun la na matu dai ma hpe garum hpyi u ai. Dai ma mung Wajau nnan  rai nga ai John Mary Vianney hpe Arch ngu ai mare de gara hku sa ra ai lam hpe Madun ya u ai. Shaloi Wajau John Mary Vianney gaw, "Dai ma hpe gatsun let chyeju dum nga ai. Nang ngai hpe Arch ngu ai mare de lam madun la ai zawn ngai mung nang hpe sumsing mungdan lam madun la na yaw nga nna tsun lai wa sai. Dai zawn jaw da ai ga sadi hte maren wajau John Mary Vianney gaw masha law law myit malai lu na lam hte Karai Kasang a tsawra myit hpe masha yawng hkap yin la lu hkra shakut let sakse hkam hkawm sa lai wa sai rai nga ai. Masha law law mung makam masham hta ngang kan let Madu yesu a kasi ningli hte maren hkawm sa let sakse hkam lai wa sai.

Dai ni e St. John Mary Vianney Madun lai wa ai sumsing mungdan a kasi ningli hpe yu nna anhte ni yawng gaw tinang a makrau grup yin hta ningli kaja kat hkai nga ai ni tai ra nga ai. St. John Mary Vianney gaw Karai Kasang a nsen hpe madat nna hkawm sa wa ai zawng anhte mung dai hte maren hkawm sa lu na matu kasi la shakut ra nga ai.

Dai ni na madu a kabu gara shi ga hpe dinglit yu ai shaloi, n-gun lu la mai ai lam ni law law rai nga ai. Hkristan ni a makam masham gaw htani htana asak prat hpe jaw ya nga ai lam mung rai nga ai. Daini nang ngai anhte yawng myit sumru la mai ai lam lahkawng nga ai, No langai ( Madu a nsen hpe madat ra nga ai), No lahkawng ( Madu a matsun madun sharin shaga ai lam hpe ta tut hkan sa ra ai) ndai lam lahkawng rai nga ai. Nang ngai gara madang hte rau karai kasang a nsen hpe madat nga ai kun, gara hku hkan sa, hkawm sa nga ai kun myit sawn sumru let kaja wa jet ai hkristan Langai hku shakut hkawm sa wa ga ngu nngun jaw dat lu nngai. Yawng hpe Karai Kasang shaman ya nga u ga.

Akyu hpyi saga oh hpan madu  karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n-gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.

Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw Pranwan Ladaw hta ( 18 )ngu na laban rai nna Madu Yesu Hpraw Nsam Galai Nna Hpung shingkang Madun ai Poi nhtoi shani

 rai nga ai. hti ang ai ja chyum mungga ni gaw chyum mungga daw langai ...Daniela Laika 7:9-10,13-14 chyum mungga daw lahkawng..Peteru a shagun dat ai laika lahkawng 1:16-19 kabu gara shiga  Mahte a laika 17:1-9

Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law