Lusha Gam Ladaw V, A, 2023 -MYIT MADA RA AI LAM

 5 Lusha Gam Ladaw, A, 2023-

MYIT MADA RA AI LAM

Hkristu hta tsawra ai nu wa ni e, ndai laban gaw lusha gam ladaw hta (5) ngu na laban rai nga ai.

Myihtoi Ezekela shingran mu ai lam

Ga Shaka Dingsa prat na Myihtoi ni hta na Isaiah, Yeremiah, Ezekhieh hte Daniel; ndai Myihtoi mali gaw Myihtoi kaba ni ngu masat da ga ai. Shanhte gaw Messaiah Madu du sa na lam hte Karai Kasang kaw na shiga ni hpe ka da ma majaw myihtoi kaba ngu masat da ai rai nga ai.

Ndai marai mali hta na Myihtoi Ezehkieh hte Myihtoi Daniel ya gaw, Israel myusha ni Babylon mung ga de woi htawt sa hkrum ai ten, shanhte hte rau nga nga ai yan rai ma ai.

Rim la hkrum nna hpyen ni a mungdan hta mayam tai nga pra ai Israel myusha ni a matu tinang mungdan, buga, dum nta de bai nhtang wa lu na myit mada shara n nga ma ai. Dai zawn re ai yawn hpa hta grau ai yawn hpa kaga n nga na sai.

Grau sawng ai gaw, Yuda masha ni tinang makam, yat hte yat mat wa nna, chyasam masha ni a makam hta hkan nang hkan sa nawku daw jau ra ma ai lam rai nga ai. Myusha langai hku nna Israel ngu ai amying shingteng mat mat sai ngu tsun mai nga ai.

Karai Kasang gaw, Myihtoi Ezehkieh hpe kadit pa shara langai mi kaw shinggyim masha langai mi hta lawm ai nrut nra ni ayai aya taw nga ai hpe shingran madun dan ai. Dai hpang, Karai Kasang gaw Myihtoi Ezekhieh hpe, dai nrut nra ni asak bai hkrung lu na ra ai ngu nang shadu nni, nga nna ga san san ai.

Dan dawng ai mahtai gaw, galoi mung, gara hku mung n mai byin ai. Raitim, dai Myihtoi gaw dum hprang ai myit hte, "Oh Karai e, nang grau chye ndai" nga nna bai htan ai.   Ezekhieh gaw, nrut nra ni shi shara hte shi katsu wa ai hpe mu nna mau nga ai. Nrut nra shada matut wa nna laswi lasa ni prut pru wa ai. Hkum shan mung rawt kap magap wa ai. Hpang jahtum Karai Kasang nsa kawut bang dat jang, dai nrut nra kaw na byin pru wa ai masha hkumtsawp sak hkrung wa ai.

Dai rai nna, Myihtoi Ezekhieh gaw, masha atsam hte n galaw lu ai hpe Yaweh Karai Kasang shi a atsam hte galaw lu ai, mu la nu ai. Mungdan kaga de du hkawm mat wa ai Israel myusha ni gaw, dai nrut nra kaw nna masha tai wa ai hte bung nga ai.

Karai Kasang gaw Israel myusha ni hpe, mau hpa magam madun dan na rai nna, Israel myusha ni gaw, tinang buga de bai nhtang wa lu na mara ai; shanhte a mungdan kaba langai mi hku gaw de lu na mara ai. Jaw Jau 26:12 hta, "Ngai gaw nanhte hte rau anga nga nna nanhte a Karai Kasang tai nga na nngai, nanhte mung nye a amyu masha ni tai nga na rai myit dai," nga nna tsun da ai gaw shawng na ga shaka zawn bai rai wa na, ngu ai rai nga ai.

Hkristu n du sa shi ai aten na shinggyim masha ni a masa lam

Madu Karai Kasang a ga sadi, ga shaka hte maren, Israel myusha ni Yerusalem de bai shang lu ai ahkang lu ma ai. Shinggyim masha gaw htani htana asak jasum da sai rai nna, shi a matu Karai Kasang matsan dum ai hte jaw ya ai sumsing mungdan de bai shang lu na matu mai byin nga ai.

San Pawlu Roma hpung masha ni hpang de shagun dat ai laika hta, "Masha langai mi a jaw e yubak mara gaw, ndai mungkan ga de du shang wa nna, dai yubak a majaw si hkrung si htan gaw masha amyu baw shagu hta chyam bra shang wa sai. Hpa majaw nga yang, masha shagu gaw, mara galaw ma ai, nga nna tsun da nga ai.

Raitim, Karai Kasang gaw, shi a kasha shingtai hpe, mungkan masha ni hkrat sum mat sai sumsing sutgan hpe bai hkam la lu na matu, ndai mungkan ga de shangun dat ai rai nga ai.

Yh 3:16 hta, "Kaning rai nme law, Karai Kasang a Kasha hpe kam sham ai ni nlang hte gaw, hten bya n hkrum ai sha htani htana asak lu la mu ga nga, Karai Kasang gaw shi a kasha shingtai hpe jaw kau ai kaw du hkra mungkan ga hpe grai tsaw ra wu ai," nga nna Madu Yesu hkum nan tsun da nga ai.

Lazaru bai hkrung rawt ai lam

Madu gaw anhte ni bai hkrung rawt lu na matu du sa ai, nga nna ndai laban na Kabu Gara Shiga hta tsun ai rai nga ai.

Ndai Yawhan laika hta, Lazaru hpe bai hkrung rawt shangun ai, lachyum shalen ai myu hpan mali rawng nga ai.

(1) Lazaru a nta masha ni hte Madu Yesu lapran, ngang kang ai hku hkau lam nga nga ai hpe mu lu ai. Madu Yesu a matu Lazaru yan nau ni a nta gaw hkringsa la na manu dik ai nta rai nga ai. Yesu Madu hpe kun dinghku nta masha langai mi hku nna hku hkau ai lam dan dawng ai gaw Yh 11: 3 hta na "Madu nang tsaw ra ai wa machyi taw nga ai,' ngu ai ga si hta mu lu ai.

(2) Madu Yesu a ntsa tawn da ai Maria hte Marthar yan nau a makam kaba lam rai nga ai. Madu Yesu, hpang jahtum na lang, Betheny mare na, Marthar hte Maria yan nau a nta kaw du sa ai shaloi, shan nau yan a jahkrum da ai n nga ai, bung ai hkam sha lam hpe mu lu ai. Yh 11:21-22 hta, "Madu e, nang nga ndai rai aw gaw, ngai yung wa n si na re! Ya tai ti mung, Karai Kasang kaw nang hpyi mahpyi hte gaw, shi nang hpe jaw na ra ai, ngai chye nngai ngu nna Marthar, Yesu hpe hkap tsun wu ai."

(3) Manang Lazaru si mat ai shaloi, Yesu yawn hkyen ai lam rai nga ai. Nachying wa myit n pyaw ai hte hkap ai, ngu ai gaw Yesu a yawn hkyen ai lam hpe madun nga ai. Yesu hparai hkrap ai i? Shi hkrap ai gaw kaja wa yawn hkyen ai lam re kun, nga nna myit ai ni nga yang nga na ma ai. Si hkrung si htan hte seng nna hkam sha yak dik ai gaw Yesu Madu nan rai nga ai. Hpa majaw nga yang hpan Madu Karai Kasang shinggyim masha hpe hpan ai shaloi, htani htana sak hkrung nga lu na matu re. Karai Kasang gaw shinggyim masha hpe hpan ai shaloi, si na matu, hten run mat na matu n myit mada da ai.

(4) Kawa Karai Kasang hpang de Madu Yesu hpyi nem ai akyu chyeju ni rai nga ai. Yesu Madu gaw hku hkau ai myit, hkam sha ai myit kaba ai hte "Aba" tsaw ra ai wa e, ngu shaga hpang let akyu hpyi ai. "Aba" ngu ai ga si gaw Aramic ga si rai nna, de a lachyum gaw, tsaw ra ai wa e, ngu ai rai nga ai. Tinang tsaw ra dik ai, kam hpa dik ai kawa hpe shaga ai shaloi tsun lang ai ga si ga ngau rai nga ai. Kawa Karai Kasang gaw anhte ni hpyi ai akyu ara yawng hpe jaw ya nga ai kun? Anhte hta ra kadawn dik ai hte kaja dik ai lam yawng hpe jaw ya nga ai re. Anhte Hkristan masha ni a matu si hkrung si htan lam lachyum pru akyu pyu ai re ngu ai gaw, Madu Yesu si du hpe awng dang kau ai majaw rai nga ai. Si hkrung si htan lam gaw, si ai ni, ngam nga ai ni yawng a matu myit machyi myit yawn hpa rai nga ai.

Hkristan ni a matu si hkrung si htan lam a lachyum

Marthar hte Maria yan nau tsun dan ai a majaw Lazaru a lam Madu Yesu na ai shaloi, sape ni hpe tsun da ai ga gaw, anhte masha shagu a si hkrung si htan lam hte mung seng nga ai. Yh 11: 4 hta, "Dai machyi ai gaw si machyi n rai, Karai Kasang a hpung shingkang dan hkung shangun na matu hte de a majaw Karai Kasang a Kasha gaw hpung shingkang dan hkung wa na ra ai, nga nna Madu Yesu tsun ai.

Si hkrung si htan lam gaw anhte a asak Karai Kasang hpe ap nawng ai hpang jahtum akyu hpyi ai lam hte nawku daw jau ai lam rai nga ai. Anhte a si hkrung si htan gaw Madu Hkristu si hkam ai a marang e, Karai Kasang a hpung shingkang hpe shadan shadawng ai lam rai nga ai.

Si hkrung si htan gaw Karai Kasang a htani htana hpung shingkan de shang ai chyinghka ngu mung mai tsun ai.

Yesu Madu, Marthar hpe tsun ai ga si gaw, Hkristan masha shagu a matu, si ai ten hta tsun ai ga si mung rai nga ai. Yh 11: 25-26 hta, "Yesu gaw, Ngai gaw bai hkrung rawt ai lam hte asak hkrung ai lam rai nga nngai. Ngai hpe kam sham ai wa kadai mung, shi si mat ti mung, ahkrung nga na ra ai. Asak hkrung nna ngai hpe kam sham ai wa kadai mung, si aigaloi n hkrum na ra ai. Ga ndai hpe nang kam sham nni? Ngu nna Marthar hpe san wu ai."

Hkristan myit mada lam hte seng ai npawt tara

San Pawlu Roma hpung masha ni hpang de shagun dat ai laika hta, Hkristan masha ni gaw si hkrung si htan lam hpe kabu gara ai hte hkap la ra ai. Anhte hta Karai Kasang jaw da ai wenyi ngu ai nga ai majaw si du hpe awng dang lu ga ai, nga nna tsun da nga ai. Anhte ni si du hpe dang manga kau lu ai, ngu ai lam gaw (1) anhte gaw Hkristu hte seng nga ga ai majaw re. Rome 8:9 hta, "Kadai raitim, Hkristu a wenyi n rawng ai wa gaw Hkristu hte n seng nga ai, nga nna tsun da nga ai. Anhte gaw si du hpe awng dang ai Hkristu hte seng nga ga ai re. Shi hte seng ai wa kadai raitim, sak hkrung nga lu na, teng sha rai nga ai. (2) anhte a wenyi gaw Hkristu a htani htan gring ai lam hpe hkam la lu ga ai rai nga ai. Mara a majaw anhte ni hkum hkrang si yang si ra na ga ai raitim, nanhte hta Hkristu anga nga ai rai jang, nanhte ni a wenyi ni gaw asak hkrung lu na ndai nga nna San Pawlu tsun shadum da ai. Jan a nhtoi shingkang hkra ai shara hta htoi tu nga ai zawn Hkristu hte hkrum matut ai wa mung sak hkrung nga lu na ra ai. (3) Si hkrung si htan lam jahten shamat kau ai n gring ai anhte a hkum tsawp gaw, lani mi na nhtoi hta bai hkrung rawt na ra ai hpe kam sham myit kaba rawng ga ai re. Madu Yesu a Wenyi hpe hkap hkam la ai a marang e, Anhte ni a masin salum hta asak hka hpawk hpe madu lu ga ai re. Dai majaw, kasa ni a makam masham ga hta, asak ningnan jaw ai Madu re ai Chyoi pra ai wenyi mung nga ai, ngu anhte ni a makam masham hpe tsun shapraw nga ga ai re.

Akyu hpyi saga:

wa karai kasang e, Mara a majaw si hkrung si htan hpe hkrum ang ai raitimung, Ningsha shingtai Yesu Hkristu a hkye hkrang la ai hkrum lu u ga, anhte hpe lam woi la ya rit. Anhte a madu Yesu Hkristu a marang e hpyi nem nga ga ai. Amen.

Hkristu hta, hkungga tsawra ai kanu kawa tara hkaw saranum ni hte, nu wa hpu nau ni e, ndai laban gaw lusha gam ladaw hta (5) ngu na laban rai nga ai.

Hti ang ai ja chyum mungga ni gaw

Chyum mungga daw   (1)    Ezakela 37:12-14

Chyum mungga daw  (2)     Rom 8:8-11

Kabu gara shiga                   Yawhan 11:1-45

Ndai Ja Chyum Mungga ni hpe hti nna, hpawt ni na Nawku dawjau lamang ni hpe woi awn nga ga.