Lusha Gam Ladaw Laban ( I ) A, 2023

Lusha gam ladaw ( I ), A, 2023

Tsawra ai nu wa ni e, ndai bat gaw lusha gam ladaw laban (I) rai nga ai.

Ndai lusha gam ladaw a yaw shada lam gaw tinang hkum hkrang myit masin wenyi hpe bai gram la ai. Tinang hkum n kaja ai hpe nyet kau ai. Shut hpyt mara kaw na myit malai wa ai. Akyu hpyi ai hte alu atan galaw ai. Madu yesu hkrung rawt wa ai paska chyeju hkam la lu na matu shajing shachyip ai rai nga ai.

Ndai lusha gam ladaw hpe anhte kahtawlik nawku hpung sha galaw ai n re. Hpu nau ni rai nga ai Anglican, Eastern Orthodox, Lutheran, Methodist, Moravian, Oriental Orthodox hte Reformed Church (nawku hpung) ni mung galaw shadik ma ai rai nga ai.

Alexandria kaw na Peter I gaw, Madu Yesu nam maling kaw lusha gam ai lam hpe hkristan masha ni hpe shawng nnan shachyan ya hpang wa rai nga ai. Tsaban mali (4) hkan daram tha shachyan hpang ai rai nga ai. Dai ten lusha gam ladaw ngu n nga shi ai.

Daining na lusha gam ladaw gaw lai wa sai febuary 26, bat masum ya, wanwu chya ai shani kaw nna hpang nna, du na April 11 ya, chyoi pra ai laban Kru ya shana yuptung Paska Missa ten du hkra rai nga ai.

kahtawlik nawku hpung a nawku dawjau shaning na Missa Hkungga hta hti ang ai ja chyum mungga ni hpe grai sadi nna lata san da ai rai nga ai. Grai sadi ai ngu gaw shani shagu, na la ai ja chyum mungga gaw Ga Shaka Dingsa prat hte ga shaka ningnan prat hta karai kasang anhte hpe hkang da ai lam maren sha re; karai kasang a mungga gaw moi prat, ya prat, hpang prat hta maren sha re, ngu ai hpe grau shadan shadawng ai hpe tsun mayu ai re. bai mungkan ting shani shagu karai kasang a lam sumru ai hta myit langai sha re ngu ai hpe mung shadan shadawng ai rai nga ai.

Adam a majaw yubak mara mungkan ga de du shang wa ai. dai yubak mara a majaw si hkrung si htan ngu ai nga wa ai. Dai si hkrung si htan gaw mungkan masha shagu hkam sha ra mat ai yubak rai nga ai. yubak mara gaw tara upadi ngu ai nnga shi ai kaw na nga taw sai rai nga ai. tara upadi nnga shi ai shaloi tara tawt lai ai ngu nnga ai.

Daini na chyum mungga daw 1 hta, hkye hkrang magam labau hpe Adam yan Eve Karai kasang a sumsing chyeju hkrat sum mat ai kawn nna hpang wa ai hpe myit shadum ya nga ai. ningpawt ninghpang laika daw kaba 1 hta karai kasang gaw ga yun loi mi la nna Adam hpe shinggyim hkrang shachyaw nna nsoi nsa kawut bang ya ai. de a hpang Adam a garep langai shaw la nna Eve hpe hpan ai. dai ten kaw na Karai kasang gaw Adam yan Eve hpe shi a weney hte bung pre ai hku hpan da sai rai nga ai. Karai kasang a Eden sun hta nga pyaw taw ai shaloi sadan gaw lapu hkrang sumla hte Adam yan Eve hpe gumlau ai. Sadan a gumlau ai hta hkrat sum mat masai. Dai ten kaw na Karai kasang a sumsing chyeju hpe shamat kau sai. Ari dan hpe hkam la ra masai. Bungli galaw shaja ra masai. Npawt mara ngu ai hpe shu mashi shu masha prat dingsa gun la ra mat sai. Sumsing chyeju nlu mat masai. shamat kau sai dai sumsing chyeju bai hkam la lu na matu hkye hkrang la ai lam bai ra wa sai. ndai labau gaw moi prat hta bying ai labau maumwi kaja re ai nre ai ngu hta, daini anhte a shani shagu sak hkrung nga sa ai prat gara hku gumlau hkrum nna gara hku shut hpyit mara lu wa ai. dai mara hta gara hku hkrat sum chye ai. ngu ai lam ni hpe myit shadum ya nga ai. lapu a gumlau ai hta shut hpyit loi ai Adam yan Eve zawn anhte ni mung prat hta hkan nna shut hpyit loi la nga ai.

Daini na la ai chyum mungga daw 2 hta San Paulu gaw chyum mungga daw 1 hpe bai madi nna anhte hpe shadum nga ai. Adam karai kasang hte tsang gang mat ai lam gaw anhte mara kap ai shinggyim masha yawng hta bying taw nga ai hpe hkrang shapraw ai rai nga ai. Adam a n’madat n’mara ai lam gaw karai kasang hte tsang gang shangun ai. Roma 5:12 hta “Masha langai mi a jaw e yubak mara gaw ndai mungkan de shang wa nna, dai yubak a majaw si hkrung si htan ngu ai byin pru wa sai; de a majaw si hkrung si htan gaw masha amyu baw shagu hta chyam bra shang wa sai. Hpa majaw nga yang, masha shagu gaw yubak galaw ma ai.” nga nna tsun dan nga ai. Anhte ni kadai raitim tinang manu shadan nna galaw shachyaw da ai arung arai hpe manu shadan ai zawn karai kasang gaw Adam a shut hpyi mara hta na bai hkye la mayu nga ai. Dai majaw shi a kasha hkristu hpe dat nna anhte hpe hkye la ai rai nga ai.

Madu yesu a madat mara ai a majaw hkye hkrang la ai lam hpe bai hkam la lu ga ai. Roma 5:19 “Masha langai mi Karai Kasang a ga hpe n madat n mara ai a majaw daw dan ai hkrum nna masha hpung gaw yubak mara lu ai ni tai wa sai hte maren kaga masha langai mi Karai Kasang a ga madat mara ai a marang e masha yawng gaw Karai Kasang a man e ding hpring ai ni tai wa lu na mara ai.” nga nna kada nga ai.

Anhte shinggyim masha ni karai kasang hpe nmadat mara ai a majaw tsan gang mat ai sumsing chyeju hpe Madu yesu chyu sha bai jaw ya lu ai. hpa majaw nga yang madu yesu chyu sha shinggyim atai, karai atai rawng ai rai nga ai. Masu magaw ai, manawn masham ai, hpra lu hpra sha ai, nkaja ai lam hte hpring chyat nga ai ndai mungkan ga kaw na shanglawt lu nna, hkye hkrang la hkrum lu na matu gaw, dai madu yesu hta kam shamyat nga ra ga ai. madu yesu hpe bu hpun da nga ra ga ai.

 kanu nawku hpung gaw ndai lusha gam ladaw nnan hpang ai kaw nna nan anhte a makam hpe san jep ai ladaw re lam dum chye shangun ai rai nga ai. madu yesu yawhan baptista a lata hta kashing kamun hkam la ngut ai hpang, satan a gumlau ai hpe 40 ya 40 na tup hkam la nna tawt lai dan sai re. Dai majaw anhte madu yesu hta kashing kamun hkam la sai ni mung shani shagu hkrum ang ai agung alau ni hpe tawt lai nna hkye hkrang la ai hkrum lu na matu shakut nga ra ga ai hpe myit hprang shangun ai rai nga ai. Ndai yaw shada lam a matu kanu nawku hpung gaw ndai lusha gam ladaw hpe tawn da ya nga ai re. madu yesu a sasana magam gaw karai kasang a hkye hkrang la ai lam hpe anhte hta hpaw ya na matu rai nga ai. anhte a prat hta hkan nna chyena hkap la na ra ga ai. satan gaw nsan nseng ai hpaji hte, malu masha lam hku, arawng power hku, nangmak lawhpa ai myit ni rawng wa hkra madu yesu hpe lam nshe shang na matu amyu myu gumlau ai. madu yesu gaw satan a gumlau ai lam langai hpang langai karai hpaji hte ninghkap kau ai. Sadan wa mungkan hpaji hpe akyu jashawn let anhte hpe gumlau ai hpe karai hpaji hte anthe bai adawt jahten kau lu na ga ai re. sadan wa hta gumrawng gumtawng myit a akyu ni gaw Kaman lila rai nga ai. karai kasang hta gumrawng gumtawng ai lam gaw chyeju rai nga ai nga nna san paulu hkum nan mahkrum matup hta lakap nna tsun dan da nga ai.

Lusha gam ladaw hta ngai gam na gaw hpa rai ta? Lusha gam ai ngu ai hpe ngai gara hku chye na ai kun? Malu masha hpe sha ngu ai kun? Kun, nkaja ai lam ni hpe koi gam kau ai sha kun? Kun, nkam tim kaja ai lam re ai ni hpe hkan shatup ai ni re kun? Lusha gam ai lam hta ntsa lam chye na ai. kata lam sung ai hku sumru yu nga ai kun? Ngai na matu lusha gam ai gaw sung dik ai lachyum gaw hpa rai ta? Ngai mayu ai lam hta hkan nna ngai lachyu shapru nga ai kun?

Masha langai hte langai nbung na re ngu anhte myit sawn la na re. lusha gam ai masa lam nbung yang nbung na re, raitim bung ai yaw shada ai lam nga ai. bung ai pandung nga ai. bung ai matsun lam nga ai. ndai lu sha gam ladaw hta malu masha gam ran a. akyu hpyi ai lam hta shakut ra na. alu atan galaw ai hta shawoi na hta grau shakut ra na. ndai lam ni hkan shatup ai hta tengman ai, jaw dik ai lachyum nga ra na. tinang myit shadang ai. tinang ra sharawng ai lam hta rai jang myit yu hpa tai wa sai. Hpa majaw nga yang ngai gaw shinggyim masha rai nga ai. ngai jaw sai ngu galaw ai, htap htut sai ngu myit ai lam a shingdu de,shing nrai, myit kata kaw ngai nmu lu ai, ndum ai shut shai lam makoi rawng taw nga chye nga ai.

Moi na masha ni Mara kaw na myit malai ai shaloi lusha gam ma ai. Ps 3:8-9 Yawhan Chrysostom Dionisius gaw nlu nsha ai sha nga ai gaw mara kaw na myit malai ai kum la rai nga ai, bai madu karai kasang hte hkrum lu na matu shajing ai lam mung rai nga ai nga nna ka da nga ai. ga shadawn pru mat ai laika 34:28 hta Karai kasang a tara kanu lam shi hpe hkam la lu na matu sainai bum lagaw kaw mawshe the Israela myu sha ni lusha gam kyu hpyi nga ma ai hpe mu lu ai.

Myihtoi Ezra gaw Karai kasang kaw na shingran ga lu la na matu 7 ya tup lusha gam ai hpe mu lu ai. shi lusha gam ngut ai hpang lamu kasa shi kaw sa nna karai kasang kaw na chyoi pra ai matsun laika sa tsun dan ai.

Dai majaw madu yesu nam mali kaw lusha gam ai gaw kawa karai kasang the matut mahkai ai. shingran ga hpe hkam la ai. sadan a gumlau ai hpe awngdang kau na matu rai nga ai. anhte hkristan masha ni mung madu yesu zawn karai kasang the ni htep ai hku nga sa lu na matu lusha gam ra ga ai rai nga ai nga nna yawhan Chrysostom Dionisius tsun jahpra da nga ai re.

Wa sarabying Francis langai gaw shi hkum nan chyoi pra ai laban bat manga shana na nawku daw jau lamang hta kasa 12 a lagaw kashin ai lamang hta la sha / num sha ni hte ma ni a lagaw ni hpe mung kashing ya ai. De lachyum gaw num la ginhka ai lam nnga ai ngu ai hkrang kumla rai nga ai.

Akyu hpyi saga:

wa karai kasang e, nang madu a ngup aga hta na pru ai mungga nlang the the hkrung nga lu na matu anhte hpe lam woi ya rit. Anhte a madu Yesu Hkristu a marang e hpyi nem nga ga ai. Amen.

Hkristu hta, hkungga tsawra ai kanu kawa tara hkaw saranum ni hte, nu wa hpu nau ni e, ndai laban gaw lusha gam ladaw hta (1) ngu na laban rai nga ai.

Hti ang ai ja chyum mungga ni gaw

Chyum mungga daw   (1) hta Ningpawt Ninghpang 2:7-9, 3:1-7

Chyum mungga daw  (2) hta Roma 5:12-19

Kabu gara shiga hta             Mt 4:1-11

Ndai Ja Chyum Mungga ni hpe hti nna, hpawt ni na Nawku dawjau lamang ni hpe woi awn nga ga.