LU SHA GAM LADAW LABAN ( V ) B Shaning, 2024

LU SHA GAM LADAW LABAN ( V )

Hkristu hta tsawra hkungga ai nu wa hpu nau ni ndai Laban gaw B shaning a Lu Sha Gam Ladaw Laban ( V )  rai nga ai..

Nanhte hpe ngai kaja wa teng teng tsun made ai gaw Mam nhkyep gaw ga hta hkrat nna n hten mat yang gaw langai sha arai nga ai..hten mat yang she asi law law si wa ai..tinang a asak hpe tsawra ai wa gaw asak sum na ra ai..ndai mungkan ga e tianang a asak hpe n dawng n yawt ai wa chyawm gaw htani htana asak lu la hkra shi a asak hpe makawp maga nga ai..nga nna Yawhan 12:24-25..tsun da ai hpe mu lu ai..

Tsawra ai nu wa hpu nau ni anhte shinggyim masha ni gaw ndai mungkan ntsa e shamu shamawk hkawm sa nga ai rai yang she mahkrum madup  ni nga wa ai hte prat a lam mahkrun ngu na ni hpe mung atsawm sha chye wa ai rai nga ai.. dai majaw masha langai a prat ngu ai gaw salu salat hkrat n-gun atsam dat rai nna shakut shaja yang she apu asi ngu na ni hpe hkam la lu ai rai nga ai..dai zawn sha anhte yawng mung Karai Kasang a jet ai kashu kasha ni tai lu na matu tinang a prat hpe gawgap ai lam hta mai kaja ai apu asi ngu na ni pu wa lu hkra shakut ra nga ai..dai zawn asi si wa lu na matu mai kaja lam ni hpe sharawng awng ai myit hte hkaja da ra ai.. mai kaja lam hpe hkaja ra ai ngu ai hta tinang a prat ngu na hpe jai lang hkam gwi ra ai machyi hkam ra ai ngu ai lam hpe tsun mayu ai mung rai nga ai...ndai bat na yawhan a kabu gara shiga hta Mam nli tum a mabyin zawn rai ra nga ai...mam nli tum ngu ai gaw hka hte ga kata hta e hkrat nna  shi a hkum hpe yet hkam kau yang she shi hta na makru ni prut pru wa ai hte yet yet rai galu kaba wa ai  hpun tai wa ai hte apu asi ni law law hpe si wa lu ai rai nga ai..mam nli tum gaw mi na zawn sha hpa galaw mung nhkam yang apu asi ni hpe n jaw ya lu na re...Madu Yesu gaw mam nli tum a lam tsun ngut ai hpang bai matut tsun dat ai lam gaw tinang a sak hpe lahpawt dum ai hte n dawng n-yawt n gwi ai masha a a prat gaw asak sum ra na re nga nna mung tsun da nga ai..

Tsawra ai nu wa hpu nau ni mungkan ga e sak hkrung nga ai ten Karai Kasang hte rau Karai Kasang hta rai nna kam sham manoi let hkawm sa nga ai nga yang galaw sa ai tsun shaga ai... myit ai mang ai... hkam sharang ai hkrum wa ai yak hkak jam jau lam... mara ni hpe koi yen tawt lai shakut ai lam ndai zawn lam mahkra hta shi madu a sharawng awng ai myit hte maren ap nawng hkawm sa  nga sa ai nga yang atsawm sha  anhte gaw  hkan shadik lu na ni teng sha rai nga ai..

Ya sha tsun lai mat sai lam mahkrun ni gaw anhte hpe mai kaja wa lu na matu hte makam masham lam hta  grau grau nna ngang grin wa lu na matu ahkaw ahkang kaba ni mung rai nga ai..Madu Yesu hku nna anhte shinggyim masha ni hpe saw shaga nga ai lam hpe... mtt 16:24 hta yu ga  Madu yesu gaw Ngai hpang de sa wa mayu ai wa kadai raitimung tinang a hkum hpe nyet kau lu na rai nna shi a wudang hpai let ngai kaw hkan nang ruga...tsun da nga ai..Anhte hkristan ni a madung hkan shadik ra ai lam gaw tinang a sharawng awng ai myit ni hte ra marin marit ai lam ni gaw Karai Kasang a sharawng awng ai myit hte tara lam ni hte galoi mung shading la sharai la rai na Karai Kasang a sharawng awng ai myit hte ninghtan shai nga ai lam ni mahkra hte ra marin marit nga ai lam mahkra hpe nyet kau ai lam rai nga ai..Karai Kasang a sharawng awng ai myit hte tara lam ni hpe  atsawm sha hkan shadik nga ra ai lam rai nga ai...

shani shagu Udang hpai lam ngu ai gaw shani shagu anhte yeng seng nga ra ai lam hpe  karai kasang atsa e sadi dung kam sham nga let jahtum du hkra  hkan shadik nga ai lam rai nga ai.. tsun mayu ai lachyum gaw madu yesu hta e sadi dung nna mungkan ga na jaw wa ai n kaja dik lam ni yak dik lam ni hta pi shi madu a tsa jahtum du hkra sadi dung nga na lam rai nga ai..

hkristu a hpang hkan nang ai lam ngu ai gaw hkristan hpung masha ni gaw tinang a prat hpe Madu Yesu hte rau prat bung shinggyim masha yawng a matu jai lang hkam let sak hkrung ai lam hpe tsun ai rai nga ai..tinang a tingkyeng sak hkrung a matu nmai re ai. kadun la nga ai shinggyim prat ndai hta Karai Kasang a ntsa e sadi dung kam sham let nga ai nga yang Karai Kasang kaw na mung htawm hpang prat e anhte a atsa e sadi dung nga na teng rai nga ai..nga nna tsun da ai lam..2 Timo 2:12 hta anhte shakut sharang nga ga yang gaw shi hte rau mung up lu na ra ga ai..shi ndang kau yang gaw shi mung anhte ndang kau na mi ai..tsun da ai hpe mu lu ai..

Tsawra ai nu wa hpu nau ni n kaja ai lam hte seng nna hkaja ai ten hta e bung ai hpe chyawm dat na nga yang lam lahkawng  nga ai hpe mu lu ai..dai lam lahkawng gaw mu lu ai hkumhkrang a n kaja ai lam ni hte.. n mu mada lu ai Wenyi hte seng ai n kaja ai lam ngu na ni rai nga ai..

mu mada ai hkumhkrang ngu na a nkaja ai lam ni gaw matsan dik ai ra rawng ai..machyi makaw hkrum ai..dawhten ai..myi n mu ai..shamu shamawt n lu ai.. hkum yet mat ai.. manggang ana lama ma kap ai.. si ai..ndai zawn lam ni law law rai nga ai..ya na zawn mu mada lu ai n kaja ai lam ngu na ni gaw masha hpe e Ngarai ngu na de n du shangun ai..

nmu lu ai wenyi hte seng ai lam hta gaw myit magaw ai sawt ai myit.. gawng dum rai dum ai..namak law hpa ai..hkum sai shan ra marin ai pawt sindawng ai..lu lai sha lai ai..manawn masham ai.. lagawn lamawn ai..ndai zawn lam ni hta e mahta nna gali galaw hkat.. matsa mawa tsun ai..sat hkat nat hkat ai..masu magaw ai.. shatan nhkan tsun ai..ndai zawn law la ai mara ni hpe myit hte n-gup hte amu bung li ni hte galaw tawt lai shut hpyit ai ..bai galaw ra ai hpe n galaw ai ndai zawn.lam hku na mung tawt lai shut hpyit kau ai rai nga ai..

ndai zawn Wenyi lam yan hte seng ai n kaja ai lam ni gaw Karai Kasang hpe roi ai hte asawng asang ngawn nsawn di ai zawn prat bung shinggyim.masha ni a ntsa e mung hkra machyi wa shangun ai..bai tinang hkum mung roi ai lam galaw ai..dai majaw ndai Wenyi lam.yan hte seng ai n kaja ai lam ni  gaw masha a prat hpe e ngarai mung ngu na de du shangun kau nga ai..masha hpe ngarai ngu na hta jahten shaza  nna sumsing mungdan hte tsan gang shangun kau ya ai..karai kasang gaw masha hpe Wenyi lam hte seng ai n kaja ai myit masin ni hpe tawt lai shut hpyit na lam hpe gaw kachyi mi mung n ra sharawng  ai zawn ahkang mung n jaw ai..tawt lai shut hpyi ai lam galaw ai gaw masha hkum nan a mara sha rai nga ai..hpa majaw shi madu gaw anhte hpe wanglu wanglang shanglawt ngu na ahkaw ahkang hpe jaw da ya ai...

ya na zawn tawt lai shut hpyit nga ai masha ni gaw mara ngu na  n kaja ai lam hta na tawt lai awng dang lu na matu physical evil ngu na mu mada lu ai hkumhkrang a n kaja lam ngu na hpe  masha hta e ahkang jaw da ya ai..masha hta hkrum katut shangun  ai..ndai lam hte la kap nna luwis ngu ai wa a ga matsun langai gaw ana zingli ngu na yubak lam ni gaw hpawm let nga taw ai mungkan ga hpe bran wa shangun ya ai nsen htawn kaba rai nga ai nga nna tsun lai wa ai..ma hkrat yang she lakang htan ngu ai ga malai nga ai zawn anhte shinggyim masha ni ni gaw yak hkak jam jau wa yang she karai kasang hpang de kayin wa ai..bai  makam masham lam hta e shakut wa ai ni mung rai nga ai..nawku hpung a mying gang nna nawku hpung langai hte langai galaw hkat ai ndai mungkan ga hta e mu mada ai hkumhkrang lam hte seng nna hka hpyen wan hpyen ngu na ni du pru  wa ai a majaw a majaw nawku hpung ni gaw ndai zawn lam ni hta garan gin hka ai lam n nga ai sha rau lata gin dun let hkye mawai ai magam lam hpe rau jawm galaw wa rai nga ai..

dumsu uhpung garan yang sharaw garawt hkrum ai ngu myen ga malai nga ai zawn masha lanagai hte langai.. nawku hpung langai hte langai myit garan nga ai rai  yang shingra tara masa gaw garawt sha kau na matu azi yu nga ai hpe dum nga ga.. ..lama na garawt hkrum nna jasan jaseng hkrum sai nga yang anhte hkumhkrang lam hte seng ai ana zingli ni hpe hkam la hkrum nga ding yang rai nga ai..

tsawra ai nu wa hpu nau ni anhte mungkan masha ni hkam sha ra nga ai yak hkak jam jau lam ni kaw na Karai Kasang a kaba la ai tsawra myit hpe shayawm kau ai shagrit kau ai lam  n galaw ai..grau nna pi Karai Kasang a jet ai tsawra myit hte jet ai lam hku madaw dandawmg wa shangun ai..anhte a shawng hta nni nkri yak hkak jam jau lam ngu na hpe tatut  hkrak rai gunhpai hkrum sha  lai wa ai..wa gaw daini e anhte kam sham.nga ai madu yesu nan rai nga ai..jet ai hpung shingkang dandawng ai lam.hte jet ai htani htana mungdan ngu na sumsing lam  de du wa hkra sa ya nga ai lam  gaw nni nkri hte yak hkak jam jau lam ni sha rai nga ai hpe shi madu nan gunhpai nna tara mungga  jaw ya let hkye hkrang la ai amu magam hpe galaw lai wa ai...madu yesu hkum nan  hkawm lai wa ai nni nkri lam hta  hkumhkrang lam hte seng nna zingri zinhrat hkrum ai lam ni gaw masha a myi hte yu n gwi na ram rai nga ai ningma ni hte sai ni hte hpring chyat nga ai raitim madu yesu hta e Wenyi lam yan ngu na zai hpyang ai n kaja ai lam.ngu na gaw tsap kawp kachyi mi mung n nga ai..madu hpe anut gayat ai zinri nga ai ni ...shi hpe sat ai ni a ntsa e pi grai myit machyi mat ai pawt sindawng ai  hte mara ndat ya lu ai lam ngu na  n nga lai wa ai ..dai sha n ga ai shanhte a ntsa hta shi a tsawra matsan dum lama ai lam mahtang madun lai wa ai..Lk 23:34 hta Yesu gaw Wa e shanhte a mara dat kau ya e..shanhte galaw ai lam hpe shanhte n chye nga ma ai..nga nna tsun da ai hpe mu lu ai...

dai majaw ndai bat na Yawhan a kabu gara shiga hta madu yesu gaw ga hta hkrat ai mam nli gaw n yet yang langai sha rai nga ai yet mat yang she law la ai apu asi ni hpe hkam la lu na rai nga ai hpe  mungga jaw tsun shadum ya ai. nli tum a yet hkrum ai lam gaw hten nna si mat ai lam hpe tsun ai gaw n rai nga ai..nli tum a maranng e mayat law wa na lam a matu yet hkrum dat ai gaw  laga myu nli nnan a matu npawt nhpang ngu na de mahtang galai shai mat wa ya ai lam rai nga ai..

Yawhan 12: 26 hta nye a amu gunhpai ai wa rai yang gaw nye a hpang hkan nang ruga ngai nga ai shara e nye a shangun ma mung nga na ra au nye a amu gunhpai ai wa rai yang gaw nye Wa dai wa hpe shagrau na ra ai...

Tsawra ai nu wa hpu nau ni yak hkak jam jau lam ngu ai gaw masha ngu  tai wa sai hte masha hte nawng kalang lata rau rai nna  lawm nang wa ai rai nga ai..dai majaw anhte mung masha wa yak hkak jam jau hkrum nga ai ten  rau jawm hkam sha ra ai lam rai nga ai..dai zawn yak hkak jam jau lam hpe madu yesu hta ap nawng sak jaw da let tinang a prat hpe ap nawng nna hkawm sa ai nga yang mung lachyum pru nna mai kaja lam ngu na apu asi ni law law hpe pu si wa ai de du wa lu na rai nga ai..ya na zawn yak hkak jam jau lam ni hpe rau jawm hkam sharang gunhpai ai lam a jahtum e gaw rau awng dang ai lam ngu na myit ngwi simsa lam ni hpe hkam sha lu na rai nga ai..yak hkak jam jau lam.ni hpe law law gunhpai nna sharawng shara ai hte hkam la ai wa hku na tsawra myit hte hpring  ai Karai Kasang hpe kam sham ai shi a kashu kasha ni rai nga ai lam dandawng nna makam masham ngang kang ai ni rai nga ai....yawng a ntsa e karai kasang shaman ya u ga...

Akyu hpyi saga oh hpan madu  Karai Kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.

Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw shaning B a lu sha gam ladaw manga rai nga ai.. . ..hti ang ai ja chyum mungga ni gaw chyum mungga daw langai ..Langai ngu na..Yeremia a laika 31 :31 - 34, .chyum mungga daw lahkawng hebre hpung masha ni hpang de san paulu shagun dat ai laika   5: 7-9 kabu gara shiga yawhan 12: 20-33

Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law