Lu Sha Gam Ladaw Laban III - Madu Karai a tsawra myit Madu Yesu hta kam sham ai ni a myit masin salum hta ru bang ya nga ai

Lusha Gam Ladaw (3), A, 2023

Hkristu hta tsaw ra ai  nu wa hpu nau ni e, ndai laban gaw Lusha Gam Ladaw hta (3) ngu na laban rai nga ai.

Daini na kabu gara shiga na mabying gaw Yesu kadai re ngu ai hpe a Lusha Gam Ladaw hta myit dum shangun ai rai nga ai. Dai Madu Yesu gaw chyeju lama ma gun sa ai wa rai nga ai.

Lai wa sai laban hta Madu Karai Kasang a tsawra myit gaw Madu Yesu hta nga nga ai hpe Yesu a ahpraw nsam galai ai hta mu lu saga ai re.

Ndai laban gaw Madu Karai a tsawra myit Madu Yesu hta kam sham ai ni a myit masin salum hta ru bang ya nga ai lam rai nga ai.

Hkrun lam hkawm ba ai hte hka hpang gara ai majaw madu Yesu gaw Samaritan masha ni ja lu ai, Yaku a labau shang hka htung hta dung nga ai. hka lu mayu tim hka kamai nnga ai. hka htung mung grai sung nga ai. Dai Yaku a hka htung na hkaja lu na matu nmai bying ai Madu yesu, shani kaang ten hka ja sa na masha langai ngai nga na re hpe myit mada let la dung nga ai gaw aten masa hpe chye maram ai lam madun dan nga ai (Yh 4:5,6).

Samaritan numsha hka ja na matu du sa wa ai; dai shaloi Yesu gaw “ngai hpe ntsing jaw lu rit” ngu hpyi nyem ai, dai hpyi nem ai ga hte Samaritan numsha hpe matut mahkai hpang dat ai, Samaritan numsha mung “nang Yuda masha langai mi rai da nhtawm me, ngai Samaritan numsha kaw gara hku ntsin hpyi lu lu nta?” ngu bai htan ai (Yh 4:7-9). Dai gaw shan lahkawng chyasam shada hkrum hpang ai lam rai nga ai. Yuda masha ni gaw Samaritan masha ni hte kayau ai lam n nga ma ai. Grau nna hkakawk hkawan ni n kayau lang ga ma ai. Shada mung n htuk hkak ma ai. Yesu a matut mahkai ga tsun jahta hpang ai lam, htung hking lam yan hte makam masham lam yan hku yu jang, matut nna tsun jahta hkat na lam yak wa ai hpe mu lu ai. Raitim, shyinggyim masha shada matsan dum lama ai lam yan hku yu jang, matut mahkai ai hpe matut galaw sa wa lu ai hpe mu lu nga ai.

Yawhan 4:10-15 hta Samaritan numsha Yesu hpe chye wa ai lam tsun da ai. Yawhan 4:10 hta “karai kasang jaw ya ai chueju kumhpa hpe mung, nang kaw ntsing hpyi nga ai wa hpe mung, nang chye wu taw gaw, nang shi kaw hpyi nna shi gaw nang hpe asak jahkrung ya ai ntsin jaw na mit dai” nga nna Yesu bai tsun ai. shaloi dai numsha mung “Madu e, nang ntsin ja na, arai hpa mung n lu n dai, hka htung mung sung nga ai; dai majaw, nang kanang na dai asak jahkrung ya ai ntsing lu la na nta? Nang gaw Ji Yaku hta grau kaba nni?” ngu nna bai htan ai.

Yesu gaw “Yaku a hka htung hta na hka ntsin lu ai wa kadai mung, bai hpang gara na ra ai; dai ngai jaw ai ntsin lu ai wa chyawm gaw, galoi mung bai hpang gara na n rai; dai gaw shi a matu asak hka hpawk tai na ra ai; dai asak hka hpawk gaw shi hpe htani htana asak lu la shangun na wu ai.” nga na tsun ai.

Dai numsha mung “Madu e, ngai galoi mung hpang bai n gara, ndai kaw hka mung n sa ja ra u ga, ntsin dai ngai hpe jaw rit” ngu nna hpyi wu ai.

Matut mahkai ai lam ndai hta, Yesu gaw Samaritan numsha hpe Shi a chyeju jaw ya na atik anang shanawng ya ai lam n re ai; shi myit lawm wa hkra myit galu kaba ai hte tsun sanglang dan ai mahtang rai nga ai. Madu Yesu tsun hkai dan ai lam gaw, maumwi n rai, ten man ai ga rai nga ai. Dai majaw dai numsha Yesu tsun hkai dan ai hpe myit lawm wa ai. Yesu tsun hkai dan ai lam dai numsha ra sharawng wa ai.  

Kalang marang, anhte matut mahkai tsun shaga taw ai wa ra sharawng ai hpe, dum shai na malai, tinang ra sharawng ai hpe tsun hkai dan mayu myit anhte hta grau law taw nga chye ai.

Tinang tsum mayu ai, sharing ya mayu ai, shadum ya mayu ai, jaw ya mayu ai, ndai lam ni galaw ai shaloi hkam la ai wa chye na hkawn hkrang hkra tsun shang lang dan nna jaw ya ai gaw grau nna akyu rawng nga ai.

Yawhan 4:16-26 hta, Yesu gaw Samaritan numsha hte tsun jahta ai lam grau sung ai de sit shang nna woi jahta hpang ai. “Na a madu wa hpe naw wa shaga la nna, nang de sa rit?” ngu nna Yesu tsun jang dai numsha gaw “ngai la n lu ai” ngu bai htan ai. Yesu dai numsha a shingdu labau chye da wu ai. “Ngai la n lu n-ngai nga nna nang htan ai ga gaw teng nga lit dai; hpa majaw nga yang, nang la manga lu yu nit dai, ya nang hte rau nga ai la mung, na a madu wa majing n rai nga lit dai.” ngu nna shi hpe tsun wu ai.

Yesu dai numsha a shingdu labau n’pawt n’dung hkreng tsun dan ai majaw Samaritan numsha gaw mau um-ang mat sai. “Madu e nang myihtoi rai nga ndai hpe ngai dum chye se ai” nga nna Samaritan numsha tsun ai ga hta Yesu gaw Myithtoi re ai hpe mu chye wa ai lam madun dan nga ai. Anhte Yesu hpe gara hku mu chye saga ai kum? Anhte Yesu hpe gade ram madang hta hkap la tawn saga ai kun?

Yawhan 4:28-30 hta Samaritan numsha gaw Yesu tsun hpaw dan ai shi a n tsawm n htap re ai shingdu labau maka hpe hkap la chye ai hpe mu lu ai. Samaritan myusha ni a makam hte Yuda ni a makam hpe shingdaw nna chye na hkawn hkrang ai hpe mu lu ai. Dai zawn re ai myit masa kaja rawng nga ai hte tinang a makam, htunghking lam yan hpe chye na da ai a marang e Madu Yesu sang lang dan ai hpe lawan dik ai hku shingdaw chye na hkawn hkrang wa ai.

Shi hte ga tsun nga ai wa gaw hkristu nan re ai hpe Yesu tsun dan jang jang nan chye wa nna kam sham wa ai. Kam sham ai hte maren sakse hkam sa mat ai. “shaloi dai numsha gaw shi a ntsin dibu tawn kau da nna mare de bai wa nhtawm, mare masha ni hpe, ngai galaw lai wa sai lam yawng, ngai hpe bai tsun dan ai wa hpe sa yu maru, dai wa gaw Hkristu mi rai na kun?” ngu nna wa tsun mu ai.

Yawhan 4: 27,31-38 hta, Yesu a kasa ni malu masha tam hkawm mat ai kaw na bai nhtang wa ai shaloi, Yesu gaw Samaritan numsha hte tsun shaga taw nga ai hpe wa mu kajawng nna mau um-ang mat ma ai.

Yesu galaw nga ai hpe nau n ra sharawng ma ai masa hta nga ai. Raitim gara hku jahtuk tsun na n chye ma ai majaw, Yesu galaw nga ai lam hpe jahkring la na matu “sara e shat sha u” nga tsun let ga shatsawm ma ai.

Ahkying aten hpe yu yang kaja nan, shanhte a shat sha ten mung rai nga ai. Yesu tsun ai “nanhte n chye ai lusha ngai lu da we ai.” Kasa ni n chye na shi ma ai majaw “ngai hpe shangun dat ai wa a myit ra ai hku hkan galaw na hte, shi ap ya da ai magam bungli ngut kre hkra galaw na lam gaw nye a shahpa rai nga li ai.” nga nna sang lang dan ai.

Malu masha gaw hkum hkrang a matu lusha rai nga ai zawn, anhte a magam bungli gaw anhte a wenyi lusha rai nga ai hpe Yesu tsun dan ai rai nga ai.

Tara Jahprang laika 8:3 hta “masha gaw muk hte sha asak hkrung nga lu ai n rai; lam magup hta dai Madu tsun ai mungga hte sha asak hkrung lu nga ai hpe sharin la lu myit ga nga, ndai lam shi galaw nu ai” nga nna ka da ai hpe Yesu madi nna tsun ai mung rai na re.

Yawhan 4:33 hta, “masha langai ngai shi hpe shat sa jaw masai kun” nga nna kasa ni shada da san nga ma ai. Yesu wenyi lam hte seng nna tsun ai hpe hkum hkrang hte seng nna myit la shut chye ai lam, kasa ni myit ai myit masa hte, anhte hpe shadum nga ai.

“Hkauna pa ni de atsawm sha sharawt mada yu mu, mam ni mying htoi nga sai rai nna, shu la ten du nga sai,” nga nna Madu tsun ai gaw dai Samaritan numsha sakse hkam ai a marang e shi kaw sa du ai ni hpe tsun ai rai nga ai.

Nli gat hkai ai langai, dan la shu la ai wa gaw langai raitim arau sha kabu lu ma ai nga nna madu tsun ai gaw Madu Yesu shi hkum nan gat hkai da ai hpe kasa ni dan la shu la lu na re; bai kasa ni gat hkai da ai hpe mung laga masha ni shu la lu na re ngu ai lachyum rai nga ai. Tinang gat hkai da ai hpe tinang shu la n lu tim, tinang a kashu kasha ni, tinang a hkang galai ai ni, shu la lu ai hpe mu jang kadai mung kabu ai, shu la lu ai ni mung kabu ai. Dai majaw lahkawng yan rau sha kabu lu na ma ai nga nna madu tsun ai rai nga ai.

Yawhan 4:39-42 hta, Samaritan numsha “ngai galaw yu sai lam ni yawng shi ngai hpe bai tsun dan ai” nga nna sakse hkam ai ga a majaw, dai mare na Samaritan masha ni Yesu hpe kam sham ma ai. Mare masha ni yawng dai numsha tsun ai hpe myit lawm nna yawng sa yu ma ai, ngu ai gaw dai numsha sakse hkam ai lam kade daram hpung ja nna, namchyim rawng, akyu pru ai hpe madun dan ai.

Anhte a gawng kya ai/ shut shai ai lam ni hpe Madu chye ya nga ai; dai shut shai lai wa sai lam hpe bai mu lu ai gaw Madu anhte hpe tsun hpaw dan nga ai majaw rai nga ai. Dai tinang shut shai ai hpe mu chye lu nna hkap la chye ai, dai lam hpe sakse hkam gwi ai gaw madu Yesu jaw ya ai atsam kaba rai nga ai. Dai atsam kaba gaw masha law law hpe Yesu Madu hte shachyan ya lu ai. Dai tinang gat hkai dat ai a marang e masha ni Yesu kaw na chyeju lu la ma ai shaloi, shachyan ya ai wa mung chyeju lu ai. Dai majaw shachyan ya ai wa mung, hkam la ai wa mung, arau kabu lu ma ai.

“Dai rai nna, shanhte ni Yesu hpang de du mayang shanhte hte rau nga nga na matu hpyi ma ai. Yesu mung, dai yang e, nhtoi lahkawng ya hkring nga ai. Shi a mungga majaw, kam sham ai ni grau nna law wa ma ai. Dai masha ni gaw, dai numsha hpe “ya gaw na a ga majaw sha kam sham ai n rai saga ai, shi a mungga hpe anhte nan na la lu nna, ndai wa gaw mungkan ga a hkye hkrang la ai Madu majing rai nga ai hpe anhte chye saga ai ngu mu ai.”

Yesu dai Samaritan masha langai hte matut hkan tsun jahta hpang wa ai lam gaw dai mare masha yawng hte matut mahkai tsun shaga lu ai rai nna Madu Karai Kasang a hkye hkrang la magam hpe mung jaw da ya lu sai rai nga ai.

Akyu hpyi saga

wa karai kasang e, na a mungga gaw htani htana hkye hkrang la ai asak hka hpawk rai nga ndai. Anhte ni galoi mung hprang bai n gara u ga dai asak hka hpawt hta na, na a mungga the anhte hpe wenyi lusha jaw rit. Anhte a Madu Yesu Hkristu a marang e hpyi nem nga ga ai. Amen.

Hkungga tsawra ai kanu kawa tara hkaw sara/num ni hte nu wa hpu nau ni e, hpawt ni gaw Lusha Gam Ladaw hta (1) ngu na laban rai nga ai.

Hti na ja chyum mungga ni gaw

Chyum mungga daw   (1) Pru Mat Wa ai 17:3-7

Chyum mungga daw   (2) Roma 5:1-2,5-8

Kabu gara shiga hta          Yawhan 4:5-42

Ndai Ja Chyum Mungga ni hpe hti nna, hpawt ni na nawku dawjau lamang ni hpe woi awn nga ga!