Laban Shani Na Mungga - Pranwan Ladaw (33), C, 2022 ( Anhte A Hpang Prat )

Pranwan Ladaw (33), C, 2022

Anhte A Hpang Prat

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (33) ngu na laban rai nga ai.

Chyum Daw Sang Lang Daw

Hpang na laban gaw Hkristu Hkawhkam Poi laban rai nna, de a hpang laban kaw nna gaw nawku daw jau shaning ningnan hpang sana rai nga ai. Du Sa Ladaw hte hpang ai.

Myihtoi Malahki “Yaweh Karai Kasang a Nhtoi” hpe ndau shana ai lam

Myihtoi Malihki Chyum Laika gaw laika man masum daram sha nga ai. Chyum laika ni hta na kadun dik chyum laika buk rai nga ai. Ga Shaka Dingsa Chyum Laika Buk a hpang jahtum hta mu lu ga ai.

Ga Shaka Dingsa Chyum Laika ni hta na hpang jahtum ka ai Chyum Laika gaw n rai nga ai. Yesu Madu n shangai shi ai, BC 450 aten hta ka lai wa ai rai nga ai. Ga Shaka Dingsa Chyum Laika buk a hpang jahtum hta bang da ai gaw, Myihtoi kaji (12) hta hpang jahtum na wa re majaw rai nga ai.

Ndai Chyum Laika, kadai ka lai wa ai hpe gaw anhte hkrak n chye lu ga ai. Malahki ngu ai lachyum gaw “shiga gun ai wa” ngu ai lachyum rai nna, Myihtoi yawng hpe madi ai mung mai byin ai. Laksan Myihtoi langai hpe sha madi ai mung mai byin ai.

Shawng na laban ni hta lang hte lang sang lang da sai hte maren, maigan mungdan ni a mayam prat kaw na bai htang wa ai Yuda masha ni shanhte a mungdan, nta de bai du wa ai shaloi kabu pyaw ma ai, myit sharawng ai hte Nawku Htingnu hte mare nhpan ni hpe lawan dik gaw gap ma ai.

Raitim, shanhte a myit sharawng awng ai lam na na n hkam lai wa ai. Hpa majaw nga yang, shanhte ni matsan ma ai; htingra nta hte kun dinghku arung arai yawng hten run mat sai hpe ningnan bai hpang ra ai hta grai yak lai wa ma ai; yi sun hkau na, sun wang ni hpe shaning kaba kabai kau da ra ma ai. Makau grupyin na hpyen ni a matut manoi dingbai dingna jaw ai hpe hkam sha lai wa ra ma ai.

Grau sawng ai gaw, woi awn ningbaw ni akyang lailen hten mat ma ai. Nawku Htingnu ni hta n jaw, n ang, n htuk ai hku nawku daw jau woi ma ai; lu su grau ai ni gaw matsan grau ai ni hpe dip lu dip sha ma ai.

Ndai zawn re ai masa hta, shanhte hkum nan, Yaweh Karai Kasang a hpung dagu hte tsaw ra matsan dum lama gaw kaba la ai ngu tsun lai wa ai hpe, n kam n hten hpang wa ma ai.

Yaweh Karai Kasang anhte hpe kaja wa sha kau da sai rai kun? Hpa majaw ndai lam ni hpe ahkang jaw byin shangun ai kun? Shi a ga sadi hpe malap kau sai kun? Hkum sum hpa myit um-ang lam ni hte ga san law law pru wa ma ai.

yak hkak jam jau shinggyim masha ni hpe Karai Kasang ga sadi jaw da lai wa ai mahtai gaw ndai laban na chyum daw langai, Myihtoi Malihki laika a jahtum daw hta mu lu ga ai.

Lani mi na nhtoi hta, Yaweh Karai Kasang a nhtoi du wa na ra ai; dai shaloi, dinghta ga ntsa na n kaja ai baw shagu hpe jasan jaseng kau na ra ai; hpun chyahkraw ni gaw wan hkru nna hpun ru ni yawng hpe wan kap hkru mat mat ai zawn, n kaja ai hpaw shagu gaw galoi mung makru bai pru wa sana n rai.

Yaweh Karai du sa ai shaloi, n kaja ai baw shagu hpe hkru nga ai wan shatai kau na ra ai. Shi hpe kam hpa ai ni a matu gaw akyu jaw ai jan shingkang tai na ra ai. Shi lata da ai myu ni a ana hpe tsi shamai ya ai tsi tai na ra ai.

Yaweh Karai hpe kam sham kam hpa nga na matu Myihtoi shadum jahprang da ai. Shanhte gaw myit htum myit kaji sana n rai; Karai Kasang a ga sadi gaw hpring tsup wa na ra ai.

(Myihtoi Malihki a ndau shana ai lam lahkawng gaw mying kaba lai wa ai.)

Ndau ai lam langai gaw, shanhte gaw gap da ai Nawku Htingnu a hkinghkam ai lam hpe Solomon hkawhkam gaw gap da ai Htingnu hte shingdaw n law ai raitim, hpung shingkang (hpung dagu) grau kaba na ra ai. Israel myusha ni n myit mada ai aten hta, “Yaweh Karai a kabu gara shiga gun ai Messiah hkum nan du shang nga na ra ai.

“Nanhte myit mada nga ai ga sadi jaw da ai kasa gaw shi a htingnu kata de, ya jang du shang na ra ai; yu mu, dai Madu du sa na ra ai, ngu sumsing Madu htani htana Karai Kasang hkang dat nga ai” (Malihki 3:1).

Nawku Hpung gaw, nhtoi mali shi (40) ya na jang, Ma Yesu hpe Htingnu hta sa ap ai nhtoi (Lk 2:38) hpe tsun mayu ai re ai hpe chye na da ai.

Ndau ai lam lahkawng gaw, Mungkan ting hta laklai ai hkungga nawng jau na ra ai lam hte seng ai rai nga ai. Ndai gaw Yerusalem na Nawku Htingnu hta n htap n htuk ai hkungga nawng jau nga ai lam ni hpe galai shai kau ai rai nga ai.

“Jan pru ai shara kaw nna jan shang ai shara du hkra tara maigan ni hta Nye a mying ningsang danhkrung nga na ra ai; mungkan shara shagu hta, Nye a mying ningsang hpe, manam pyaw ai baw ni hpe wan nat nna sanseng ai hkungga ni ap jaw na rai ma ai; Nye a mying ningsang gaw maigan myusha ni hta danhkrung na ra ai,” (Malihki 1:10).

(Kahtawlik Nawku Hpung gaw ndai tau nau hkaw tsun da ai hpe “Missa Hkungga” rai nga ai ngu chye na da ai.)

Yesu Madu Ndau Ai “Yaweh Karai Karai Kasang a Nhtoi”

“Malihki” mying gaw “shiga gun ai wa” ngu anhte tsun lai wa saga ai. Kaja wa nga yang, Yesu Madu mahtang “shiga gun ai wa” ngu ai mying hte tup hkrap htap htuk dik ai rai nga ai.

Malihki tsun ai “Yaweh Karai a nhtoi” gaw mungkan ga de “Messiah du sa ai nhtoi” hpe tsun ai rai nga ai.

Wudang ntsa si hkam nna, mara hpe sat kau ai. Shi hpe kam sham hkap la ai ni a myit masin wenyi hta na mara hpe mung matut gasat shamyit kau ya ai; kashin kau ya ai.

Matsan mayan ni hte zingri zingrat hkrum ai ni hpe sumsing mundan shang shangun nna myit dik myit pyaw lam jaw ya na ra ai.

Ndai “Yaweh Karai a nhtoi” gaw Madu Yesu du sa ai shani kaw nna mungkan htum ai shaloi Yesu Madu bai du sa aten du hkra rai nga ai.

Kabu Gara Shiga hta, Yesu Madu mung, shi kalang bai du sa na lam hte rau kaga mabyin lahkawng byin wa na hpe ndau da ai. (1) Yesu Madu si hkam ai hpang shaning mali shi (40) ning hta byin lai wa ai “Yerusalem hte Nawku Htingnu hten run mat ai lam, (2) mungkan htum mat ai shani, dinghta arung arai hten run mat na lam rai nga ai.

Yerusalem hten run na lam hte shi bai du sa na lam hpe kaprawn nna ndau ai yaw shada lam gaw, Yerusalem hten run ai gaw dinghta arung arai hten run na kumla rai nna, ngam ai tsin-yam tsin-dam lahkawng gaw shi hpang jahtum du sa wa na lam hpe ndau shadum ai kumla rai nga ai.

Yerusalem na Nawku Htingnu hten run mat na lam hpe Madu Yesu Betheni de sa ai lam hta shana daw maga tsun ai rai nga ai (Mt 24:1: Mk 13:1; Lk 21:5). Yerusalem de, lamang hte rau shang ai hpang bat lahkawng ya shani rai nga ai. Hpang shani, bat masum ya shani tup Betheni mare hta grai ahkyak ai mabyin lam ni a matu hkyen lajang ra na rai nga ai. Dai hpang shani gaw Yerusalem de kalang bai shang nna kasa ni hte rau Paska daw sha poi galaw nna nni nkri hkam hpang sana rai nga ai.

Kasa ni gaw Yerusalem Nawku Htingnu hten run na lam Madu Yesu tsun wa ai shaloi mau kaba mau ma ai. Yuda ni a matu dai Nawku Htingnu gaw mungkan hta grai nan manu dan ai sut rai langai hpa rai nna Karai Kasang gaw shanhte hpe hpyen ni a lata kaw na makawp maga ya ai shara re ngu hkam la lai wa ma ai.

Yesu Madu Ndau Shana Ai Yaw Shada Lam

Ndai laban na lu ai, Kabu Gara Shiga hta na, Madu Yesu tau nau ndau da ai a yaw shada lam hpe shut shai ai hku myit la chye ga ai. Anhte ni hpe mara hte jahkrit nna, myit malai lu shangun ai yaw shada lam re ngu myit la ai rai yang gaw shut ai hkam la lam rai na re. Hpa majaw nga yang, Madu Yesu gaw shinggyim masha ni hpe jahkrit nna galai shai na lam hpe galoi n lata ai. Shinggyim masha ni hpe shang lawt ai myit jaw bang da ya sai rai nga ai.

Madung yaw shada ai gaw, hten run mat na matu n re ai sha, hkye hkrang la hkrum na matu she rai nga ai. Shinggyim masha ni hpe hkrit kajawng shangun ai hku n re ai sha, hpang hkan ai ni hpe n-gun jaw na matu she rai nga ai.

“Dai lam ni byin hpang wa jang, rawt tsap nna baw ni hpe sharawt mada yu mu; hpa majaw nga yang, nanhte hpe hkye hkrang la na aten ni wa ra ai,” (Lk 21:28).

“Sa rit, Madu e, sa rit” (1Kol 16:22; Shingran 22:20) ngu hkalum la ra ga ai.

Hkristu Madu Du Sa Wa Na Hpe Gara Hku Myit Mada Ala Nga Ra Na Rai?

Hkristan law malawng bung ai lam langai gaw matsan jam jau ai lam rai nga ai. Shawng na Hkristan ni gaw Hkristu lahkawng lang ngu na bai du sa wa na hpe asharawng ashara rai ala dingda lai wa ma ai. Raitim, shaning na wa ai hte maren, Madu bai n du sa wa ai majaw myit htum wa ma ai hte Hkristan makam hta lam dam hpang wa ma ai.

Htesaloni hpung masha ni mung dai zawn hkam sha lai wa ma ai. San Pawlu sasana galaw ai majaw shanhte ni galai shai wa ma ai raitim, Yuda ni shanhte hpe ninghkap ma ai majaw, San Pawlu gaw shanhte hpe makam npawt lahkam nnan hte seng ai hpe pyi atsawm n sharin ya lu mat ai (Kasa 17:1-9).

Yesu Madu lahkawng lang ngu na bai du sa na lam hte seng ai lachyum hpe atsawm n sharin la, n hkam la lu ma ai sha, ni magang wa sai ngu hkam la nna tinang hte seng ai bungli pyi n galaw mat ai sha nga shalai kau ma ai.

San Pawlu gaw shanhte hpang de shagun laika lahkawng ka shagun dat ai. Shi a ga hpaw daw hte, Madu Yesu kalang bai du sa na hte seng nna shanhte chye na shut ai lam ni hpe shading sharai ya ai.

Anhte gaw Yesu Madu hpe myit mada ala nga ra ga ai teng ai raitim, Mai kaja ai amu ni hpe galaw ai hta myit htum ai lam n mai nga ai (2Thes 3:13). N kaja ai lam ni yawng hpe anhte kaw nna mung, hpu nau ni kaw nna mung, ru pyi n ngam hkra shamyit kau ra ai, shaw la kau ra ai.

Madu Yesu a matu nni nkri hkam nna Hkristu bai du sa na hpe myit mada ala nga ra ga ai. Madu Yesu hkum nan chyahkring hkring tsun shadum lai wa ai ga rai nga ai. Nni nkri lam a majaw myit daw myit hten mat na malai, sumsing mungdan ga sadi hkum tsup wa na sakse ni rai nga ai hpe myit dum let kabu gara hkam la ra ai.

Satan gaw loi loi asum n jaw ai sha, bai gasat wa chye ai. Raitim, Satan a sindawng ai gaw shi hpe hten rum mat shangun ai kaw nna lawt lu na n re. Shi a pawt sindawng ai gaw shi hpe sha bai jahten kau na ra ai.

“Nanhte gaw dakring dalang rai ngang ngang tsap nga mu, shaloi nanhte hkye hkrang la ai hkurm na marin dai,” (Lk 21:19).

Anhte hta, n-gun atsam marai a matu, n shut lu ai akyu hpyi ai lam ni nga ai.

“Nanhte gaw dai byin wa na ra ai lam ni yawng hpe lai di nna lawt lu na n-gun atsam lu la myit ga hte Masha Kasha a man e tara daw dan hkam na matu tsap lu ging ai ni tai lu myit ga akyu hpyi nga let a-maja nga mu” (Lk 21:36).

Anhte gaw, kam sham myit kaba hte Yesu Madu du sa na hpe myit mada ala nga ra ai. Anhte gaw tinghkrai shingtai n rai ga ai.

Hkristu gaw Satan hpe gasat ai hta, wudang ntsa si hkam ai a marang e, ningtawng ai wa rai nga ai. Kadai hpyen du mung, Yesu Madu zawn awng dang na n htang da yang gaw, hpyen man de shi a hpyen ma ni hpe sa na n rai nga ai.

“Nanhte a kara singgawng langai mi pyi hten lu na n rai” (Lk 21:18).

Akyu hpyi saga

Wa Karai Kasang e, Madu Yesu a lahkawng lang ngu na bai du sa ai ten du hkra tinang hte seng ai magam bungli ni hpe shani shagu galaw shatup lu ai atsam jaw ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw Pranwan Ladaw hta (33) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) – Malihki 3:19-20

Chyum Mungga Daw (2) – 2Thes 3:7-12

Kabu Gara Shiga – Lk 21:5-19

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.