Laban Shani Na Mungga - Pranwan Ladaw 18, C, 2022 ( Shinggyim Prat A Tengman Ai Pandung )

Pranwan Ladaw (18), C, 2022

Shinggyim Prat A Tengman Ai Pandung

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (18) ngu na laban rai nga ai.

Sak kung sai ni “prat gaw lachyum n nga ai, yupmang zawn sha rai nga ai” ngu tsun ai hpe na yu chye ga ai. Ndai hku hkam la ai gaw n jaw ai rai nga ai. Lachyum nga ai.

Chyum daw langai na Myit Mada lam n nga ai wa a lam

Ndai Hpaji Ningli laika hpe Greek ga hte “Ecclesiasters”, Hebrew ga hte “Qohelet” nga ma ai. Ndai Masha myu ni a ga hte tsun da ai lahkawng yan hpe anhte n chye na ga ai raitim, “preacher” “Tara Sara a hkaw tsun ai tara mungga” ngu ai lachyum nga ai. Anhte ga hte Hpaji Ningli laika ngu lachyum la shamying ga ai.

Ndai Chyum Laika gaw Yesu n shangai shi yang shaning (300) ning daram aten hta ka lai wa ai. Ndai chyum laika hpe hka ja yu yang, san pra ai lam (makam hte seng ai) sharin shaga da ai lam ni hpe n mu lu ai sha, mungkan shara shagu na hpaji ninghkring ni a sharin shaga ga, ga malai ni hpe sha mu lu ga ai.

Ndai chyum laika gaw ndai mungkan kaw nga manga gaw kaman lila re ngu hpang nna jahtum hta mung dai ga hpe madi shadaw ai ga hte jahtum da ai. Chyum daw ni kadun ai raitim, “kaman lila” ngu ai ga (25) lang lawm ai. Hpaji Ningli laika hta na “kaman lila” ngu ai lachyum shai ai hpe mu lu na ga ai. “Nbung kawut ai” “nbung ga” ngu mung tsun mai ai. “Kaman lila a Kaman Lila” ngu ai a lachyum gaw “yawng gaw kaman lila sha re” ngu ai rai nga ai.

Ndai chyum laika ka ai wa nnan daw hta tsun ai hte maren, prat gaw bung taw ai nbung, shing n rai, chyahkring sha mu lu ai summwi zawn ngu ai, lachyum n nga ai nga nna myit la ai ni hte hkam la lam bung ai zawn rai nga ai.

Shi a ningmu gaw (1) sutgan ni hpe tam mahkawng ai gaw lachyum n nga ai. Hpa majaw nga yang mahkawng la lu na matu n sim n sa shakut ra ai majaw rai nga ai. Madu la lu ai raitim bai jasum kau na hpe myit tsang nga ra ai. Nang mak lawhpa ai ni dai hpe madu lu ai raitim, hpang jahtum gaw dai hpe kaman lila bai jai shama kau ai. (2) Machye machyang hpaji chye ai raitim akyu n rawng ai. Hpa majaw nga yang, machye machyang hpaji chye ai ni mung a-ngawk angak re ai ni zawn si mat ra na sha rai nga ai. Gade nna yang a-ngawk angak re ai ni mung, machye machyang hpaji chye ai ni mung maren sha si wa na ma ai rai nna, shanhte hpe hpang de malap mali kau na sha rai nga ai. (3) shinggyim kyang lailen nga ai raitim akyu n rawng ai. Mahkrum madup hte maren, myit n su ai ni mung atsawm sha hkikhkam ai hku nga lu ma ai. Hpang na prat hta hkam la lu na chyeju kumhpa hpe hkrak n chye ma ai majaw shanhte a myit mada lam gaw lachyum n nga ai. Ndai zawn re ai ningmu hte jahprang da ai hpe mu lu ga ai.

Ndai zawn re ai sharin shaga ai laika buk hpe chyum laika tai na a ni ngu anhte san shara nga chye ga ai. Wenyi gaw ndai laika ka ai wa hpe nhtoi jaw ai n rai, ngu hkam la chye ga ai. Ndai n kam n sham ai wa a ga gaw Karai Kasang a mungga n re, ngu myit la chye ga ai.

Ndai laika ka ai wa gaw Karai Kasang hpe n hkrit ai sha ka da ai zawn rai nga ai. Kaja wa nga yang dai hku n rai nga ai. Shi shut shai ai hku ka da ai a marang e shinggyim masha ni teng man jaw ang ai hku sumru la shangun ai.

Teng ai, yawng mayawng gaw ndai dinghta ga hta ngut mat jang prat gaw lachyum n nga ai. Raitim dai gaw n teng ai, n jaw ai. Laika ka sara wa, shi a laika hpang jahtum hta prat gaw lachyum nga ai lam ndai zawn bai tsun da ai.

“Ya ndai lam yawng mayawng shapraw ngut ai hpang, tsun dan na lama mi sha nga sai: Karai Kasang hpe hkrit hkungga u, shi a hkang da ai lam ni hpe madat mara nga u, hpa majaw nga yang dai gaw anhte hpan da hkrum nga ga ai a lam madung rai nga ai” (Hpaji Ningli 12:13).

Ndai zawn sak hkrung ai rai yang, prat jahtum ten du wa ai raitim, kadai mung myit malai lu na n rai sai.

Hpaji rawng sadi myit rawng ai yi sun hkauna galaw ai wa a lam

Yi sun hkauna galaw ai wa hpe ntsa lam yu yang angawk ai zawn raitim, hpaji rawng sadi maja rawng ai wa rai nga ai hpe mahkrup madup hku chye lu na ga ai.

Yuda ni hta nhtan shai hkat ai lam ni nga yang dai hpe kadai gara gaw jaw ai, kadai gara kaw shut ai hpe masam maram daw dan ya na matu “Rabbi” ngu ai sara ni hpe jahkrum bawng ban hpaji la ma ai.

Kabu Gara Shiga hta Yesu Madu hpe “Rabbi” Sara madang tawn ai masha langai mi sa nna, sahti kasha kanau wa, shi lu ang ai kanu kawa kaw na sutgan hpe garan jaw na lam hte seng nna hpaji hpyi ai. Yesu Madu gaw dai kanau wa a hpyi shawn ai hte seng nna ninghkap lai wa ai.

Yesu Madu gaw kadai gaw shut ai, jaw ai hpe jeyang dawdan na matu ndai mungkan ga de sa du ai n re hpe dum chye shangun ai. Karai Kasang a chyeju kumhpa ni hpe teng man ai hku jai lang chye na gaw ahkyak ai.

Yesu Madu shadum ai gaw (1) nang mak lawhpa ai a majaw hpu nau ni hte myit n hkrum n ra byin shangun ai (2) Madu da ai mungkan sutgan ni gaw anhte shadu ai zawn manu n dan ai, ngu ai rai nga ai. Mungkan sutgan hpe myit manoi, shamyat shanat ai, kam hpa ai gaw a-ngawk angak ai lam rai nga ai. Dai ni hpe kamhpa n mai ai. Karai Kasang a ja mungdan shang lam hpe mung pat shingdang ya ai.

Yesu Madu, yi sun hkauna galaw ai sahti langai a lam ga shadawn hte hpaji jaw shadum sharin shaga ya ai.

Dai sahti wa gaw shi a shawng lam a matu masin jahkrat da ai. Dai masin mung byin wa ai. Raitim, kaja wa nga yang, n byin ai, n awng dang ai. Shi myit ai lam ni wan hkut zawn hpang jahtum hkoi mat ai.

Yi sun hkauna galaw ai ndai sahti wa gaw shi hkum hpe chyu madung da kam hpa ai wa rai nga ai. Kaga masha ni a garum madi shadaw ai hpe n ra ai. Shi hta nga ai hte law htam ai ngu hkam la ai wa rai nga ai. “Ngai” ngai a sutgan ngai a matu ngu kahtap kahtap nna tsun ai.

Nye wenyi hpe ngai tsun na. Oh nye wenyi e nang hta sutgan law law nga ai, ngu shi hkum shi hkum tsup dum ai wa rai nga ai. Nihtep ai ni hpe n sumru ai;

Shi hkum a matu sha tsang nna, jan ai sutgan ni hpe makau grupyin hta ra kadawn ai ni hpe garan jaw garum jaw na n myit ai sha, dum hta mahkawng da na matu sha hparan na myit ai. Tingkyen myit kaba ai wa rai nga ai.

Nsi nai mam law law lu jang Karai Kasang hpe n dum n sumru byin chye ai hpe dum ra ga ai. Madu Yesu a ga shadawn hta na sahti wa gaw shi hkum shi shaga ai shaloi Karai Kasang hpe kachyi mi pyi n dum ai. Hkam la lu ai nsi nai mam a matu Karai Kasang hpe chyeju dum ga hkaw mi pyi n tsun ai. Shi hkum shi shakut na lu ai ngu hkam la nna shi hkum hpe shi nawku ai. Gumrawng raidum ai myit hte shi hkum hpe sha kam hpa myit kaba ai.

Nsi Nai Mam, sutgan ni gaw Karai Kasang kaw na hkam la lu ai chyeju kumhpa re ai hpe myit dum ra ga ai.

Shi hta n dum shami kajawng kaja byin wa ai. Karai Kasang gaw dai wa hpe, “Masha angawk e, dai na jang na a asak hpe dawm la kau ya na ra ai, dai rai nna, nang mahkawng shachyip da ai arai ni gaw gade a matu tai na rai ta,” ngu nna tsun wu ai (Lk 12:20).

Tinang madu da lu ai nsi nai mam hte arung arai, sutgan ni sha, anhte hpe kabu pyaw lam jaw ya ai ngu hkam la ai gaw sut kaba rai nga ai. Chyum mungga daw langai hte maren kaman lila tai mat ai.

Anhte sak hkrung ai a yaw shada ai gaw Karai Kasang a man hta sumsing sutgan sut su na lam rai nga ai

Anhte a sak prat gaw Karai a manu dan htum kumhpa rai nga ai. Tinang sak hkrung aten hpe kaman lila di kau na matu n re ai. Anhte a sak prat hta pandung ngu ai nga ra ai. Dai pandung hta wenyi hte seng ai sutgan ni nga ai. Dai wenyi sutgan ni gaw anhte a hpang prat hta sut su nga mai shangun na ra ai.

Chyum daw lahkawng hta, San Pawlu Hkristan ni hpe tsun shadum ai hpe sumru yu ga.

(1) Kashin kamun chyeju kumla hkam la ai hta n hten n run mat lu ai sak ningnan hpe hkam la lu ai (Kol 3: 1). Ndai ya e ngai hkrung nga ai asak gaw, ngai hpe tsaw ra nna nye a matu mara shi a asak nawng kau ai Karai Kasang a Kasha hpe kam sham ai a marang e hkrung nga ai asak rai nga ai (Gal 2:20).

(2)Kashin kamun hkam la ai shaloi lu la ai galai shai lam kaba hpe n-gup a-ga hte tsun shapraw dan n lu ai. Kashin kamun n hkam la shi ai ten gaw mawhpyi zawn prat gaw la hpa n nga ai mara hta lup nga ai hte bung ai ngu San Pawlu shing daw da ai. Kashin kamun hkam ai a marang e, wenyi asak rai nga ai Karai Kasang a asak hte san seng lam hpe jahpun ya hkrum ai (Gal 3:27; Kol 3:10).

(3) Masha langai ngai a hpun palawng shap hpun ai ten, dai bu hpun palawng madu re ngu shadu chye ma ai. San Pawlu tsun mayu ai gaw, anhte Hkristu hpe bu hpun ga ai rai yang, dinghta ga hta raitim, si wa ai shaloi raitim, Hkristu hte bung na rai ga ai (Kol 3:10).

(4) Hkristu gaw sumsing mungdan hta nga nga ai. Anhte mung gade n na yang, ndai dinghta ga hta n lu mai ai asak hte kabu pyaw lam hpe hpring tup hkam la lu na ga ai.

Hkristan n rai shi ai aten na prat de hkum bai wa masa; n kaja ai lam ni, grau nna lawhpa ai myit ni hpe sadi let koi yen kau mu; matsan lusu ginhka ai lam ni hkum galaw mu; yawng gaw karai kasang a kasha ni hkrai rai ga ai hpe dum mu, ngu San Pawlu sharin shaga da nga ai.

Mungkan ja sutgan madu ai hte seng nna Karai kasang a myit gaw ganing hku rai?

Kanu kawa ni gaw kashu kasha ni a bu na hpun na, hkam ja lam, hpaji lam hte kaga rawt jat lam ni a matu myit ra ai. Ja sutgan tam mahkawng ai gaw anhte a prat a matu rai ra ai. Dai sak prat gaw htani htana sumsing mungdan ningngai na matu rai ra ai. Dai majaw wenyi hkye hkrang la lam a matu ja sutgan tam, jai lang na matu gaw ahkyak la nga ai.

“Masha gaw mungkan ting hpe awm dawm madu lu da nna tinang a asak sum mat a yang gaw, shi a matu hpa akyu nga lu ta?” ( Mt 16: 26).

Akyu hpyi saga

Wa Karai Kasang e, shinggyim prat a teng man pandung sumsing sutgan hkam la na hta anhte a mungkan sutgan ni hpe tam bram sung lang chye shangun ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw sPranwan Ladaw hta (18) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) – Hpaji Ningli 1:2, 2:21-23

Chyum Mungga Daw (2) – Kol 3:1-5,9-11

Kabu Gara Shiga – Lk 12:13-21

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.

 

Add new comment

10 + 10 =