Laban Shani Na Mungga - Lusha Gam Ladaw Laban II, A, 2023

 2nd Sunday of Lent

Tsawra ai Nu Wa Hpu Nau ni e, ndai laban shani na chyum mungga langai hta Karai Kasang Abraham hte Sara kun dinghku hpe lata ai gaw shi a laklai a chyeju langai rai nga ai. Lamu ga gasau nkaja ai kaw nga ai dinghku hpe shi a chyeju hpring ai gasau kaja ai lamu ga nnan hpe hkam la na matu lata la ai rai nga ai. Karai kasang dinghku langai hpe sha lata ai gaw dai dinghku langai a marang e pi mungkan ntsa nga manga kun dinghku hpe shi a chyeju jaw ya lu ai hpe madun ai rai nga ai. Abraham dinghku hpe tinang a buga hpe kau da nna shi san da ai lamu ga de htawt sa shangun ai gaw dai ni anhte ndai lusha gam ladaw hta anhte a mungkan anhte a myit manoi nga ai nkaja ai lam ni hpe kau da lu na matu rai nga ai. kaja ai kaw na pi grau kaja ai de hkawm sa lu na matu rai nga ai. Anhte dinghku nta masha ni hpe mung karai kasang shaga nga ai. Anhte a dinghku marang e anhte a htingbu, anhte a buga masha ni a karai kasang a chyeju lu la mu ga. Anhte a dinghku hta karai kasang a ninghtoi htoi nga ai hpe mungkan hta nga ai dinghku shagu mu lu u ga ndai lusha gam ladaw hta karai kasang jaw ai mai kaja ai magam lam hta hkawm sa nga ga. Tinang hkum hpe nyet kau nna Lusha gam, Akyu hpyi, Alu atan galaw ai lam ni, tatut magam hta nloi la nga ai dai namchyim hpe, lusha gam ladaw hta kaja hkan shatup nga ai ni yawng dum shai na re. 

Karai kasang a hpung dagu hte sha anhte ni Lusha gam lu ai re. ndai zawn laklai ai lam ni galaw lu ai gaw Karai kasang kaw na hkamla lu ai chyeju ngu ai ga shi langai hte sha nre.  Karai kasang hkum nan dai chyeju hta lawm taw ai majaw re. San Paulu tsun da ai hta hkristu a hkum hta jawm pawng ai a marang e shi a nni nkri yubak lam hta mung jawng pawng nga saga ai re. dai nni nkri hta jawng pawng ai ni gaw shi a hkye hkrang la ai hta mung jawng pawng lu na teng sha rai nga ai. Ndai lusha gam ladaw hta chyum mungga ndai hte anhte hpe ngun ban ya nga ai re. “Karai kasang gaw anhte galaw sai mai kaja dum ai amu bungle lama ma a majawa n’rai. Shi nan a yaw shada ai lam the chyeju a majaw anhte hpe hkyehkrang la nna shi a amyu masha tai na matu shaga la mani ai. Shi gaw mungkan nnan la tai ten a shawng kaw nna Hkristu Yesu a marang e dai chyeju anhte hpe jaw da mani ai” (2Tim 1:9). Nu maria hpe chyeju hte hpring nga ndai ngu ai shaloi karai kasang a tsawra myit hpe Nu Maria lu la sai rai nna, dai tsawra myit hte nan tsawra mayu na zawn shi tai wa sai rai nga ai. dai majaw madu yesu a mying ningsang hta karai kasang a chyeju lu ai wa gaw tsawra myit hpe lu la ai rai nna tsawra mayu na zawn re, masha tai wa sai rai nga ai. Dai tsawra myit nga ai wa gaw, htingbu wa hte hpyan wa hpe myit galu kaba ai hte mara dat ya lu ai, tsawra daw jau lu wa ai, rai nga ai.

Dai ni na kabu gara shiga hta na Yesu a ahpraw nsam galai ai mabying hpe ga shaka dingsa prat na Mawshe hta bying ai lam hpe shingdaw la yu ga.

Langai, tsaw ai bum a lam yu yu ga. Ga shaka dingsa prat hta Mawshe Karai Kasang a Tara kanu Lam shi hpe hkam la ai Sainai bum hpe, chyum laika hta dandang nga ai. prumat mat wa ai laika 24:12 hta hti yu yang mu lu ai. Madu yesu ahpraw nsam galai ai bum hpe chyum laika hta ka bang da ai nmu lu ai. Raitim mahte laika hta “tsaw ai bum” nga tsun da nga ai hpe lakap nna, mai bying ai bum gaw Meron bum re lam chyum laika sawk sagawn sara ni sawk sagawn da ma ai hpe chye lu ga ai. Lahkawng ngu na hta, (6) ya na ai hpang Sinai bum hta summwi gaup wa jang mawshe bum ntsa de lung wa ai. (6) ya na ai hpang, ngu ai gaw gara shani ang ai hpe ngu mayu ai gaw, nu wa ni myit lu na re ngu kam ai. dai gaw laban shani ang na rai nga ai. Mt. 17:1 hta mung “Ya kru ya na jang” nga lawm nga ai. Hebrew mayam labau hta shanhte a madu ni hpe (6) ning mayam yam ngut jang, sanit ning ngu na shaning kawn mayam prat kaw na lut lu sai re da. Mawshe hte madu yesu gaw laban nhtoi hta karai kasang hte laksan shaga ai. laksan shaga ai ngu ai shaloi, karai kasang a nseng madat la ai lam grau dandawng ai hpe mu lu nga ai. Tinang ra ai lam hpe sha hpyi la ngut jang, wa mat chye ai masha ngai tai nga ai kun? Karai kasang ngai hpe hpa baw tsun ai kun, Ngu madat la nna, na la yu sai kun? Tinang hkum bai san sagawn aru yu nga ga.

Masum hta, Karai Kasang gaw Mawshe hpe, Aoron, Nadab, Abihu hte hte Israela mingbaw marai sanit shi hpe, Sainai bum de lung wa na matu shaga ai hpe (prumat ai laika 24:1 hta mu lu ai. Madu Yesu Petru, Yaku hte shi kanau Yawhan hte hpe nsam galai bum de woi lung wa ai. Bum de woi lung ai hta Marai (3) ngu ai nambat mung wa bung taw nga ai. Mawshe kaw hkan ai hte masum Hkingjawng tai wa ma ai zawn, yesu nsam galai ai hta lawm ai marai masum hte mung Madu yesu a hkingjawng ni tai wa ma ai. Aoron gaw hkingjawng ni hta hkingjawng kaba tai wa ai zawn, Petru mung Nawku hpung a Ningbaw tai wa ai. Yawhan gaw Madu yesu a tsawra dik ai kasa tai wa ai. madu yesu ahpraw nsam galai ai hta hkan nang ai ndai marai masum gaw madu yesu hte Gathsamane kaw bai mu ai du hkra chyum laika kaw laksan arau nga ai ten hpe bai nmu sai. Madu yesu Roma hpyen la ni a lata hta rim hkrum na shawng e, Gathsamane bum kaw akyu hpyi nga ai. dai shaloi mung ndai sape masum sha madu yesu hte arau nga nga ma ai. ndai mabying lahkawng gaw Ja chyum laika hta madu yesu shi a sape ni the arau hkam sha ai hta na grau nihtep ai lam lahkawng rai nga ai nga nna chyum laika sawk sagawn ai ni htai da nga ai. San petru ndai lam hpe shi a laika hta bai tsun dan da nga ai. (2 Peter 1:16-18).

Mali ngu nah ta, Moshe Karai kasang hte hkrum shaga ngut ai hpang myiman nsam tsawm taw nga ai. (prumat ai laika 34:29) shi a myiman htoi tsawm taw ai gaw Israela myusha ni a matu karai kasang a hpung shingkang hpe shadan shadawng ai nsam/kumla rai nga ai. Yesu nsam galai ai ten shi a kata, shinggan yawng hta htoi san ai. Dai shaloi, Mawshe yan Elia dan pru nna yesu hte rau ga tsun nga ai.

Manga ngu na hta, Karai kasang summwi ntsa kaw na ga shaga ai. (prumat ai laika 24:16) Mawshe shi a sape Aoron, Hadab, the Abihu the marai masum hpe woi lung wa tim mawshe shi langai sha karai kasang the hkrum na matu laksan shaga la hkrum ai re. (prumat ai laika 24:1-2). Madu yesu mung shi a sape masum hpe akyu hpyi na, la nga na matu htet da let, shi langai hkrai sha karai kasang hte shaga na matu sit sa mat ai. dai shaloi ahpraw nsam galai nga ai hpe sape masum mu nna sakse hkam ma ai. Aoron, Hadab, Abilu hte masum mung, mawshe hta bying ai lam hpe sakse hkam ma ai.

Kru ngu na hta, Mawshe hpe mung, Madu Yesu hpe mung, Karai kasang summwi ntsa kaw na shaga ai hpe mu lu nga ai. (Tara Jahprang laika 18:15) “Shi hpe madat mu.” Mt 17: 5 hta “ndai wa gaw ngai sharawng awng ai, ngai tsawra ai ngai sha rai nga ai, shi a ga madat mara mu” nga ka da nga ai. Israela masha ni mawshe a myiman ahpraw nsam hpe mu ai shaloi hkrit kajawng nga ma ai. Mt 17:4 hta petru gaw, “madu e, ndai yang e anhte nga na mai nga ai. Nang hkraw n yang gaw, ndai kaw sum masum –na a matu langai mi, mawshe a matu langai mi, Elia a matu langai mi, ngai gap na nngai. Ngu nna tsun ai hpe mu lu nga ai.

Ndai mabying ni hpe yu yang anhte ni karai kasang a magam hta karai kasang hpe dawjau yang kaning re chyeju lu la ai ngu ai hpe mu lu nga ai. Mawshe a sape masum the Madu Yesu a sape masum ni gaw shanhte a sara/madu/ningbaw hte rau nga rau sa rau dawjau ai hta apnawng ai a marang e Hking jawng ni tai wa ma ai, hkawhkam Ningbaw ningla Kaja ni tai wa ma ai, sumsing chyeju lu la ma ai, San pra ai masha ni tai wa ma ai. Ndai Lusha gam ladaw hta paska chyeju hpe myit mada let tinang kanu nawku hpung lam woi ai hta hkannang hkansa nga ga.

hte shi a nawku hpung, bai nawku hpung ningbaw ni the rau nga rau dawjau magam ni hpe jawm galaw yang kaning re chyeju hpe lu la na re ngu mu mada na ngu kam kaba nngai.

 

“Isreala masha ni karai kasang hta kam ai Makam yawm ai hte karai kasang hpe aput angut di ma ai” nga nna Tara Jahprang laika 32:5 hta mu lu nga ai.

Akyu hpyi saga: wa karai kasang e, nang madu a ngup aga hta na pru ai mungga nlang the the hkrung nga lu na matu anhte hpe lam woi ya rit. Anhte a madu Yesu Hkristu a marang e hpyi nem nga ga ai. Amen.

Hkungga tsawra ai kanu kawa tara hkaw sara sarama ni e, hpawt ni gaw lusha gam ladaw hta II ngu na laban rai nga ai. Hpawt ni hti na ja chyum mungga ni gaw

Chyum mungga daw   (1) hta Ningpawt Ninghpang 12:1-4,

Chyum mungga daw  (2) hta 2Tim 1:8-10

Kabu gara shiga hta             Mt 17:1-9

Ndai Ja Chyum Mungga ni hpe hti nna, hpawt ni na Nawku dawjau lamang ni hpe woi awn nga ga.

Add new comment

3 + 6 =