Laban Shani Na Mungga -Karai a Kanu Nu Maria Poi Hte, Shaning ningnan Mungga

Karai a Kanu Nu Maria Poi, Shaning ningnan

          Hkristu hta tsaw ra ai nu wa hpu nau ni e, hpawtni gaw shaning ningnan mung rai, Karai a Kanu Nu Maria poi mung rai nga ai.

“Anhte a Madu Yesu a Kawa rai nga ai Karai Kasang hpe chyeju dum shakawn ga law! Hpa majaw nga yang anhte Hkristu hte langai sha tai lu ai a marang e shi gaw sumsing lamu lahta tang hta e wenyi hte seng ai shaman chyeju lam shagu hpe jaw ya nga mani ai” (Ehpes 1:3).

Shaning ningnan shani, laklai kumhpa masum a majaw Karai Kasang hpe chyeju dum nga ra ga ai: (1) Nu Maria kumhpa (2) Simsa kumhpa, (3) Aten kumhpa, ni rai nga ai. Ndai ni gaw Karai Kasang anhte hpe jaw ya ai kumhpa kaba masum rai nga ai. Ndai kumhpa masum a lam shaning ningnan hta sumru la na matu Nawku Hpung anhte hpe saw shaga nga ai.

Nu Maria hpe jaw ya ai

“Anhte gaw Karai Kasang e kasha yin la ai chyeju hkam la lu u ga, dai kasha wa gaw jep ai Tara a npu e rai nga ai masha ni hpe hkrang shaw la na matu shinggyim kanu hta shangai wa nna Yuda ni a jep ai Tara npu e prat pra wa sai” (Gal 4:5).

Nu Maria gaw Karai Kasang anhte hpe jaw ai kumhpa rai nga ai hpe San Pawlu asan sha tsun da ai rai nga ai. Shaning ningnan shani Nu Maria hpe shagrau sha-a shakawn kungdawn ai hkinghtawng mying gaw “ Karai a Kanu Nu Maria” ngu ai rai nga ai. Ndai amying hkinghtawng a marang e Karai Kasang gaw kaga chyeju kumhpa law law hpe mung matut manoi ru jaw ya nga ai. Nu Maria hpe hkyehkrang la lam a kanu hku lata san da ai majaw rai nga ai.

Simsa lam hpe jaw ya ai

Simsa lam gaw laklai manu dan kumhpa langai rai nga ai. Hting hkang da na mung yak ai rai nga ai. Mara galaw ai a marang e simsa ai lam hpe jahten hpang sai rai nga ai.  Shaloi, dai simsa lam gaw anhte a masin kaw nna mat mat chye ai, anhte kun dinghku hte wuhpung wuhpawng kaw nna mat mat chye nga ai. Hkristan wuhpung wuhpawng kata kaw na pyi mat mat chye nga ai.

Dai Karai Kasang jaw ai simsa lam hpe n shamat kau hkra anhte marai hkum shagu hta lit nga ai. Masa lam amyu myu a majaw gan shamat hkrup ai rai yang mung Karai Kasang kaw kalang lata bai hpyi la ra ga ai. Anhte gaw simsa lam hpe gun sa ai kasa ni, simsa lam hpe shabyin ai ni tai nga ra ga ai.

Aten hpe jaw ya ai

Anhte a matu “aten” gaw Karai Kasang jaw ya ai manu dan dik kumhpa langai rai nga ai. Laning mi hta nhtoi 365 ya gaw Karai Kasang anhte hpe jaw ai laklai kumhpa rai nga ai. Ndai nhtoi ni hpe mai kaja lam a matu jai lang na kun, n hkru ai hta jai lang na kun, tinang hkum tinang bai sawn dinglik let akru rawng ai hku jai lang lu hkra sadi maja nga ga.

Anhte gaw aten ngu ai chyeju kumhpa hpe atsawm sha jai lang na matu Karai Kasang a yaw sin ai masin lam hpe atsawm sha sumru tam la ra ai.

Shaning ningnan hta tinang hkum hpe tinang san mai ai. Daining gaw ngai a matu kaning rai wa na kun? Kabu pyaw lu na kun, shing n rai, myit ru lam law na kun? Shaning htum hkra ngai naw nga na kun?

Karai kasang chyu sha ndai ga san ni a mahtai ni hpe htai ya lu na hpe ngai atsawm sha chye na da ai. Anhte a matu shawng lam ngu ai hpe asan sha n mu lu ai. Karai Kasang chyu sha dai anhte a shawng lam hpe asan sha mu ya, chye ya ai.

“Sagu rem ai ni dai ma hpe mu ma ai shaloi, dai ma a lam lamu kasa ni shanhte e tsun dan ai ga hpe, shanhte tsun kajai dat ma ai. Sagu rem ai ni tsun kajai dan ai ga na mana ni mung, dai ga a majaw mau ma ai” (Lk 2:17-18).

“Maria chyawm gaw dai lam yawng mayawng matsing gun la nna, shi kraw kata e aru yu nga ai,” (Lk 2:19).

Sagu rem ai ni tsun kajai dan ai lam ni gaw Nu Maria a matu laklai lam langai rai nga ai. Shi gaw Yesu a lam kaga masha ni hta grau chye ai wa rai tim, Yesu hte shi a matu Karai Kasang tawn da ai yaw sin lam yawng hpe gaw chye na lu na n rai nga ai.

San Luka gaw Nawku Htingnu hta Ma Yesu hpe sa ap ai hte asak 12 ning hta kanu kawa n lawm ai sha nawku htingu kaw ngam taw ai lam tsun da ai. Simeon gaw Kanu Maria gaw kasha Yesu a majaw matsan jam jau law law hkrum ra na lam tau nau myihtoi htoi da ya ai. Nawku Htingnu hta Yesu ngam da ai majaw Nu Maria myit tsang ai, kajawng ai, mau mat ai.

Nu Maria gaw shi a prat tup hta Yesu hte shi a matu Karai Kasang yaw sin da ai hpe (1) shani shagu na prat mabyin ni hta, (2) shagrit shanem ai hte, (3) anhte hte rau nga rau hkawm let tam la nga ai.

Laning mi tup, aten shagu hta, Karai Kasang hte rau anhte a hkyehkrang la magam hpe galaw gun hpai sa wa nga ga.

Yesu Madu gaw Kawa Karai Kasang hte rau hkye hkrang la magam hpe galaw nga ai. “ Yesu gaw, Nye Wa gaw ya du hkra pyi amu galaw nga ai rai nna, ngai mung galaw lu na rai nga ai, ngu nna shanhte hpe htan mu ai,” (Yh 5:17).

Karai Kasang gaw anhte hpe hkye hkrang la na matu langai sha re ai magam bungli hpe n hkring n sa a galaw nga ai.

Karai Kasang a hpung dagu hte shi a matsan dum lama ai gaw anhte hpe hkye hkrang la ya ai. Anhte shamu shamawt ai lam shagu, aten shagu hta, Karai Kasang a myit ra ai hte maren sha rai nga ra ga ai. Karai Kasang a sharawng awng ai hte hkang da ai hpe htep lahti hkan shatup ra ai. Dai zawn hkan shatup ai gaw anhte a myit mada shara pandung gaw Yesu Madu mungkan ga ntsa naw nga ten na myit mada pandung hte maren sha rai nga ai.

“Shi sharawng awng ai amu hpe, ngai tut nawng agalaw nga nngai majaw, shi ngai hpe hkrai sha n tawn kau da nngai,” (Yh 8:29).

Karai Kasang gaw anhte hpe lani hte lani, shaning ningnan kumhpa hpe jaw ya nga ai majaw, myit su myit kawp ai kashu kasha ni tai nga na hpe Shi anhte a ntsa sharawng awng nga ai.

Chyum Mungga daw lahkawng, San Pawlu Galati Hpung Masha ni hpang de shagun dat ai laika hta Karai Kasang shinggyim hkum sa la nna mungkan ga hpe kaba dik hkye hkrang la kumhpa jaw ya ai hpe madi madun da ai. Ndai gaw Karai Kasang a kasha majing ni tai wa ai Wenyi kumhpa rai nga ai.

“Anhte hpe Karai Kasang a kashu kasha ni ngu nna shamying ni ai hte maren kaja wa mung anhte Karai Kasang a kashu kasha ni rai nga ga ai,” (1Yh 3:1).

San Pawlu gaw anhte hpe sak prat ningnan hte gingdan ai hku sak hkrung nga na matu mayam ngu n myit la ai sha, Karai Kasang a tsaw ra ai kashu kasha ni zawn Kawa a myit ra ai hpe aten shagu galaw shakut ra ai, ngu sharin shaga da ai. Kawa Karai Kasang a myit ra ai hta kabu gara let sak hkrung nga ra ai hpe tsun ai rai nga ai.

Yesu Madu hkum nan anhte Karai Kasang a kashu kasha ni mara n galaw shut na sadi jaw da nga ai.

“Yesu gaw, Ngai nanhte hpe kaja wa teng teng tsun made ga, shut hpyi mara galaw ai wa kadai mung dai mara a mayam rai nga ai. Mayam ngu ai gaw, nta dinghku langai mi hta tut nawng e nga nga lu ai n rai, kasha chyawm gaw tut nawng e nga nga lu ai,” (Yh 8:34-35).

Anhte Hkristan ni hpe jahkrit shama ai langai sha re ai gaw, mara a majaw byin wa ai dingbai dingna rai nga ai. Mara hta lai nna anhte hpe kadai mung, gara hku mung dingbai dingna n jaw lu ai.

Masha langai a prat hpe Karai Kasang a kasha tai wa ai hta shingnyip ka-up lu ai mabyin kaga n nga sai.

Chyum daw lahkawng hta San Pawlu gaw, “Karai Kasang a kasha tai lu ai hta ahkyak ai lam hpe tsun dan da nga ai. “Dai rai nna, nang gaw mayam n rai; kasha langai mi nan rai nga nit dai. Shi a kasha nan rai nga nit yang gaw, Karai Kasang kaw na shi a kasha ni a matu lajang da ai Sali wunli yawng mayawng mung nang hpe jaw na rin dai,” (Gal 4:7).

Karai Kasang a kasha ni tai wa ai a marang e, anhte ni sut su nga mai dik kun dinghku hta shang lawm lu ai. Yesu Madu zawn sha Kawa Karai Kasang a sutgan hpe hkam la lu ai. Sumsing mungdan hta Kawa Karai Kasang a htani htana kabu pyaw ai hta shang lawm lu ai.

Anhte yawng gaw Karai Kasang a kashu kasha ni tai nga ga ai rai yang shinggyim masha shagu langai hte langai kahpu kanau majing ni tai let bung pre ai chyeju sutgan hpe arau hkam sha lu na ga ai.

Ya ndai prat de gaw, mungdan shagu hte makam hpung yawng, shinggyim masha yawng gaw maren mara re, hpu nau ni hkrai re, bung pre ai shinggyim ahkaw ahkang nga ga ai ni re ngu hkap la ndau nga ga ai. Mungkan Rapdaw UN kaw lawm ai mungdan ni gaw shinggyim ahkaw ahkang hte seng ai hpe manu shadan shatsaw sharawt, makawp maga lam hpe ladat amyu myu hku galaw shakut nga ai.

Hkristu gaw shinggyim hkum sa la nna shinggyim sari manu hpe shadan shadawng shalen nna, shinggyim ahkaw ahkang ni hpe ndau ya ai. Yesu Madu n du sa shi ai prat ni hta makam masham hpung law law nga lai wa sai rai nna, dai makam hpung ni hta masha madang garan ginhka hkat nna hku hkau kanawn mazum ai lam law law nga taw sai rai nga ai.

Amyu bawsang lakung kaji kadun ai ni hpe mayam shatai mayam yam sha ma ai. Up hkang ai ni hte up hkang hkrum ai ni a lapran garan ginhka ma ai. Prat shagu hta, shinggyim ahkaw ahkang nga wa na matu shakut shaja ai ni gaw dai shinggyim ahkaw ahkang hte mung masa lam hpe nsen kaba hte jahtau ndau nga ma ai.

Karan ginhka ai lam ni gaw Hkristan ni a lapran hta mung byin chye nga ai. Sadi ra ga ai. Anhte gaw Karai Kasang a kasha ni rai nga ai hpe teng man jaw ang ai hku n chye myit la, n chye hkam la ai majaw, madang nyem ai mayam ni zawn nga pra ra chye ga ai.

Shinggyim makau grupyin hta hpaji machye machyang sutgan nga mai lam, madang nyem tsaw garan ginhka hkat ai lam anga nga ding yang rai taw nga ai. Karai Kasang hkum nan bawnu hte sawn sumru na hte hkum hkrang a matu machye machyang hpe n bung pre ai hku jaw da ya ai majaw shinggyim masha ni hta galoi mung hkrak tup bung pre na gaw n rai nga ai.

Raitim, Karai Kasang anhte hpe hkang da ai gaw, lusu matsan raitim, hpaji chye, n chye ai raitim, bung pre ai sumsing sutgan hpe maren mara jaw ya ai majaw shinggyim masha yawng gaw teng man kahpu kanau ni zawn hkam la kanawn mazup nga ra ga ai.

Ndai gaw, shinggyim masha yawng Karai Kasang a shawg hta bung pre ai hpe shadan shadawng ai. Anhte shinggyim masha lapran garan ginhka ai, n bung pre ai, ndai zawn re ai lam ni Karai Kasang a matu lachyum n pru, ahkyak n re ai gaw anhte dum chye da ra ga ai.

Anhte ni Karai Kasang a kasha ni rai ga ai hpe kaja wa kam sham ga ai rai yang shinggyim masha yawng hpe teng man dinghpring ai hte tsaw ra ga ai rai yang, anhte hte Karai Kasang a kun dinghku masha ni tai nga na matu galoi mung saw shaga la hkrum na rai ga ai. Hpa majaw nga yang, sumsing mungdan hta lajang da ya ai sutgan hpe garan hkam sha na matu rai nga ai. Masha shagu hpe hkrum shagu anhte tsun dan ra na gaw, hpu nau hte Karai Kasang a kasha ni tai na, Karai Kasang a chyeju hkam la na wa re majaw, mayam prat hpe kau da u, Karai Kasang gaw mai kaja ai wa rai nna nang hte anhte a matu sumsing mungdan hta “htani htana chyeju sutgan lajang da ya ai, ngu ai rai nga ai.

Akyu hpyi saga

Wa Karai Kasang e, Anhte a Madu Hkristu a marang e hpyi nem nga ga ai.  Amen.

 

Hti ang ai Ja Chyum Mungga ni gaw

Chyum Mungga Daw (1) Buhk. 6:22-27

Chyum Mungga Daw (2) Gal 4:4-7

Kabu Gara Shiga  Lk 2:16-21

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.

 

Add new comment

3 + 5 =