Laban Shani Na Mungga - Kaja htum akyu hpyi ai ladat ni ( Pranwan Ladaw (29), C, 2022

Pranwan Ladaw (29), C, 2022

Kaja htum akyu hpyi ai ladat ni

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (29) ngu na laban rai nga ai.

Akyu hpyi ai a marang e majan hta awng dang lu ai

Amalek masha ni gaw grai n hkru ai hte zingri zingrat galaw ai ni rai ma ai. Shanhte gaw Israel ni hpe Karai Kasang ga sadi tawn da ai de sa lam hta pat shingdang dingbai dingna jaw lai wa ai ni rai ma ai.

Shanhte gaw Yaku a kahpu Esau a aru arat ni rai ma ai. Shanhte gaw shaning tsa hku Israel myusha ni a hpyen tai lai wa ma ai. Shaning 300 ning na lai wa sai rai nna Sawlu hte David yan a prat ni hta pyi hpyen naw tai nga ma ai (1Hk.Hk 15:1-9).

Mawshe a prat hta, Mawshe gaw Amalek hpyen ni hpe gasat na matu shi a hpyendu Joshua hte rau hpyen hpung ni hpe shangun dat ai rai nna, shi hkum nan mung akyu hpyi ai hku nna shang lawm ai.

Bum ntsa de lung nna lata ladawn let akyu hpyi lai wa ai. Hkra maga lata hta Karai Kasang ap jaw da ai sumdoi hpe lang da ai. Dai sumdoi gaw, Karai Kasang Mawshe hpe shawng na lang ga shaga ai shaloi ap jaw ai, lapu tai ai, sumdoi rai nga ai (Pru Mat 4:2-3). Pharo hkawhkam a shawng lamik kumla madun ai (Pru mat 7:8-13), panglai lai di ai shaloi hka hpe gayat nna ga karan shangun ai (Pru Mat 14:16), Egypt hpyen ni hpe hka hta lup mat shangun ai (Pru Mat 14:26), ndai aten ni hta jai lang ai sumdoi rai nga ai.

Mawshe dai sumdoi hpe lang da let lata ladawn akyu hpyi nga yang Karai Kasang a hpung dagu gaw Israel myusha ni maga de nga nga ai. 

Mawshe a akyu hpyi gaw grai nan akyu pru lai wa ai. Shi akyu hpyi jang, Israel myusha ni, Amalek hpyen ni hpe majan gasat ai hta awng dan lu ai; akyu n hpyi ai rai yang gaw Amalek ni bai dang ka-up wa ai.

Dai majaw, Arun hte Hud yan a hpaji jaw hpyi shawn ai hte Mawshe a lata hpe jan shang ten du hkra jum tek da ya nna akyu hpyi nna Amalek hpyen ni gasat jahprawng kau lu ma ai.

Ndai mabyin anhte hpe shadum sharin shaga ya ai. (1) Akyu hpyi ga gaw anhte hpe ga sadi jaw da ai buga de du hkra sa na lam hta hkrum ang ai hpyen ni a dingbai dingna hpe gasat awng dang lu ai atsam rawng ai laknak langai rai nga ai. (2) Akyu hpyi ai lam gaw, majan gasat ngut ten du hkra, jan shang ten du hkra, sak prat htum ten du hkra nga nga ra ai. (3) Awng dang ai lam gaw, shakut shaja ai hte akyu hpyi ai lam lahkawng yan jai lang ai mahtai rai nga ai.

Anhte hkum nan atsam dat ai hte Karai Kasang a garum shingtau ai hpe mung ra kadawn ra ahkyak ga ai. Tinang hkum hpe kam kaba ai hku n re ai sha, Karai Kasang hpe kam hpa kam shamyat ai akyu hpyi ai lam rai ra ai.

Myit htum let myit mada ala nga ai Nawku Hpung Hpe San Luka N-gun Jaw

San Luka a Kabu Gara Shiga Laika gaw, zingri zingrat hkrum ai majaw myit htum myit kaji nga ai Hkristan ni hpe shalan shabran, n-gun jaw, gaw sharawt ya na matu ka da ai rai nga ai.

Dai ten na Hkristan ni gaw Madu Yesu kalang bai du sa wa na re ngu ai ga sadi hte seng nna myit um-ang nga ma ai. Shanhte gaw Madu Yesu kalang bai du sa nna, matsan jam jau, nni nkri hkrum nga ai ni hpe garum ya na; dai zawn matsan jam jau ai lam hpe n byin shangun sana re, ngu htang da lai wa ma ai.

Raitim, aten law law la ai hpang, Madu gaw bai sa na re kun?, ngu ga san san lai wa ma ai.

San Luka gaw dai zawn re ai Hkristan ni a makam yawm ai hte akyu hpyi ladat n jaw ai hpe madi madun lai wa ai. Dai hte seng nna “n tara ai tara agyi hte aput hpyi la ai gaida num” ga shadawn hte Madu tsun da ai hpe ka shalawm da ai.

Dai ten na Hkristan ni gaw dai Madu Yesu a ga shadawn hte hpyi shakut ra ai hpe Chyoi Pra ai Wenyi e shadum ya ai hte San Luka myit dum nna ka da ai rai nga ai.

N tara ai tara agyi rai nga tim, aput hpyi ai gaida num hpe, shi kaw na pru mat wa hkra, gaidan num hpyi shawn ai hpe jaw dai ra ai.

Karai Kasang gaw mahkra a ntsa kaja ai wa rai nna, shi a kashu kasha ni hpyi ai hpe jaw na hte sumsing mundan hta mung shi hte rau ningngai nga shangun mayu ai. Anhte a akyu hpyi ai hpe n madat ai sha nga na n rai nga ai.

Anhte akyu hpyi nsen hpe Karai Kasang bai htang ai, na ai ngu hkam sha ai gaw, Madu hpe grau kam hpa na matu rai nga ai. Myit um-ang, n tsen n hten ai lam n mai nga ga ai. Madu gaw anhte hpe, Shi a htani htana nta de bai shaga woi la na teng sha rai nga ai.

Anhte Hkristan Nawku Hpung masha ni a prat masa

San Luka a Kabu Gara Shiga Laika hta ka da ai Hkristan ni a prat hta byin lai wa ai hpe, chyamna hpe yu ai zawn, bai yu maram jahtuk la mai nga ai.

Anhte gaw loi loi hte myit daw myit hten loi ai, hkrat sum loi ai rai ga ai n rai ni? Hkristu hta kam sham ai myit yawm na ga ai n rai ni? Hkristu hta kam sham myit yawm wa ai majaw matsan mayan ni tai nna, Hkristan nsam n rawng mat chye ga ai.

Anhte myit daw myit hten ai lam amyu myu nga na ga ai. (1) Agung alau a majaw mara hta hkring hkring hkrat sum chye ga ai. Nawku Hpung hpe myiman shaka ya ai, saru shayawm ya ai lam ni hte hkrum chye ga ai. (2) Hpu nau ni hpe Hkristu hpang de woi sa na myit n rawng chye ga ai. (3) Laban nawku daw jau lamang kadun sha shang lawm nna, myit masin hpe hkyen lajang shachyip ai hta n-gun yawm chye ga ai.

Anhte ni kaning hku shut chye ga ai kun? San Luka tsun hkai da sai hte maren, dai ten na Hkristan ni hta gawng kya hkrat sum ai lam ni nga lai wa ma ai zawn, anhte mung shut shai nga ai gaw teng sha rai na re.

Anhte a prat hta Hkristan law malawng shut ai lam langai mi gaw, chyahkring myi sha akyu hpyi ai hte dai akyu hpyi mung shut shai myit masa hte hpyi ai akyu hpyi ga ai lam rai na htang ai.

Shani shagu, tinang tinghkrai, shing n rai, kun dinghku masha ni hpawng de nna, masat da ai akyu hpyi ten ni nga ga ai kun; bai sum ru la ga.

Anhte, ang katut akyu hpyi ga ai raitim, myit n lawm ai hte hpyi ai ten law law rai na ga ai. Akyu hpyi ga ni hpe, n-gup a-ga hte tsun shapraw ga ai raitim akyu n hpyi chye ai ni mung lawm na nhten.

Ndai gaw ahkyak ai. Teng man akyu hpyi lam n nga ai rai yang Hkristu hta kam sham myit n nga ai lachyum tai nga ai. Makam masham n lawm ai akyu hpyi ai gaw lachyum n nga ai.

Akyu hpyi ai lam hte makam masham gaw shada akyu jaw ai.

Hkristan ni a akyu hpyi gaw Chyum Laika hta npawt da ai

Ndai laban na chyum daw lahkawng mung San Pawlu Timothy hpang de shagun dat ai laika lahkawng hta na rai nga ai. Hkristan ni a mayak lam ni hpe chye ai majaw n-gun jaw dat ai laika rai nga ai.

“Kaja wa Hkristu hta asak hkrung nna tara hkungga ai lam hta asak hkrung mayu ai wa kadai mung zingri zingrat ai hkrum na ra ai” (2Tim 3:12).

Timothy naw kaji yang, shi a kawoi dwi Lois hte kanu Eunice gaw shi hpe chyum laika lam gara hku sharin lai wa ai hpe San Pawlu bai tsun dan ai (2Tim 1:5). Kawa chyawm gaw tara maigan masha rai nga ai.

Chyum laika hpe hka ja nna, akyu hpyi ai hta mung, hkaw tsun ai hta mung jai lang na matu lam matsun lai wa ai.

Chyum laika ga ni gaw Karai Kasang anhte a matu yaw sin da ai hpe mung, kaga masha ni a matu yaw sin da ai hpe mung madun dan na htuk manu jaw ang dik ai gaw Chyum laika ga ni rai nga ai.

Anhte hkum nan a shut hpyi ai lam ni hpe mu la nna sharai la lu na hte hpu nau ni a shut shai ai lam ni hpe shading sharai ya lu na matu madi shadaw tai ya ai. Anhte hte hpu nau ni, sak hkrung lu ai kaja dik lam matsun mung rai nga ai.

“Nang hpe ma kaji prat kaw nna machye machyang jaw nna Hkristu Yesu hpe kam sham ai a marang e hkye hkrang la ai lam lu la na matu lam matsun madun ai, dai chyoi pra ai Chyum Laika hpe atsawm sha chye ai wa rai nga ndai hpe mung adum nga u” (2Tim 3:15).

Ndai gaw, Chyum Laika hta na, Madu Yesu a akyu hpyi ai yaw shada lam nan rai nga ai.

Anhte akyu hpyi ai shaloi, chyum laika ga hpe nau n lang chye ga ai rai yang, anhte a akyu hpyi ai lam gawng kya na, n hkum n tsup na nhten.

Dai hku ngu nna, anhte naw kaji ten sharin hkam la ai akyu hpyi ga ni hpe kabai kau na hpe tsun ai gaw n rai nga ai. Chyum laika ga hte anhte a akyu hpyi ga ni hpe namchyim rawng shangun ai hpe tsun ai rai nga ai.

Kahtawlik Nawku Hpung a Missa hkungga, hte nawku daw jau ten na akyu hpyi ga ni law malawng gaw chyum laika kaw na rai nga ai. Nawku Hpung labau hta na San Pra ai ni hte nawku hpung woi ni e jahtuk shatsawm da ai Chyum laika hta na shaw la ai akyu hpyi ga ni hte makam kawa ni a akyu hpyi ga ni hpe madung jai lang nna shawa akyu hpyi ai mung, sakramentu hkam ai shaloi na akyu hpyi ai mung dai hte maren sha rai nga ai.

Hkristan ni a akyu hpyi gaw Karai Kasang hpe hkungga manu shadan let hkrum shaga ai rai nga ai

Anhte akyu hpyi shagu, Karai Kasang hpe shawng shaga shangun ra ga ai. Tsun mayu ai gaw shi hpa tsun nga ai hpe shawng madat la ra ga ai. Anhte hkum tsun shaga ai hta, Karai Kasang hpe tsun shaga shangun ai gaw grau ahkyak nga ai.

Madu shawng tsun rit, ngu hpyi shawn chye ra ga ai. Anhte shut shai ai lam ni nga yang nhtoi jahtoi ya na matu hpyi shawn chye ra ai.

Karai Kasang hpe madat ngut ai hpang she anhte bai hpyi shawn ai gaw grau lachyum nga nga ai.

Karai Kasang a htum ngu n nga ai tsaw ra matsan dum lama ai a matu chyeju dum ra ga ai.

Anhte a shut hpyit mara ni a matu myit yawn myit malai ra ga ai.

Madu a sharawng awng ai masin lam hte maren, anhte a hkye hkrang lam hkrum lam hta hkawm lu na matu Shi kaw na garum hpyi shawn la ra ai.

 Karai Kasang hte  nihtep nga shagu, Shi kaw na n-gun jaw garum shingtau ai hpe hkam la lu ai.

Akyu hpyi saga

Wa Karai Kasang e, Nang Madu hta n-gun awai la let, hkrum ang ai dingbai dingna nga ai raitim dai hpe shim lum ai hku tawt lai let Nang Madu lajang da ai sumsing nta du lu na matu garum ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw Pranwan Ladaw hta (29) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) – Pru Mat 17:8-13

Chyum Mungga Daw (2) – 2Tim 3:14-4:2

Kabu Gara Shiga – Lk 18:1-8

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.