Laban Shani Na Mungga - Hkristu a hpang hkan ni gaw myit galu kaba hkam sharang ra ai. ( Pranwan Ladaw 20 )

Pranwan Ladaw (20), C, 2022

Hkristu a hpang hkan ni gaw myit galu kaba hkam sharang ra ai.

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (20) ngu na laban rai nga ai.

“Mungkan de ngwi pyaw simsa ai lam jaw na matu, ngai du sa ai zawn nawn myit ni? Ngai nanhte hpe tsun made ga, dai hku n rai, shabra na she, du sa ring ngai. Ya kaw nna, masha marai manga nga ai nta dinghku hta, marai lahkawng maga ni, marai masum gaw maga mi rai nna shada da myit n hkrum hka bra na mara ai. Kawa ni gaw shadang sha ni hte, shadang sha ni gaw kawa ni hte, kanu ni gaw shayi sha ni hte, shayi sha ni gaw kanu ni hte, kamoi ni gaw kanam ni hte, kanam ni gaw kamoi ni hte, shada da n htan shai nna hka bra na ma ra ai”(Lk 12:51-53).

Madu Yesu a mungga ni gaw laklai nna hkrak tup hkawn hkrang na matu gaw n loi la nga ai. Raitim, Yesu Madu tsun ai mungga ni yawng hpe ahkyak da ra ga ai.

Yesu Madu gaw shinggyim myusha yawng a matu simsa lam hte myit hkrum kahkyin gumdin lam hpe gun sa ai

Yesu Madu gaw mungkan ga a matu grai nan ra kadawn ra ahkyak taw nga ai simsa lam hpe gun sa ya ai.

Karai Kasang hte shinggyim masha lapran prinem simsa lam nga na matu du sa ai.

Shinggyim masha shada sai rum, nau na myit majing shatai ya nna, Karai Kasang a kashu ksha majing ni shatai ya let simsa lam shabyin ya ai.

Yesu Madu gaw, Shinggyim masha ni hkap la na jin jin rai nga ai mara dat hkyamsa ai lam hpe jaw ya nna, masha hkum shagu a masin salum hta simsa shimlum lam hpe lu la shangun ai.

Myihtoi Isaiah hte Myihtoi Mihka yan gaw Messiah hpe “simsa lam a Madu” ngu tsawm htap ga si hte ndau shana da ai (Is 9:6; Mihka 5:5).

Ma Yesu shangai wa ai shaloi, lamu kasa ni sagu rem ni hpe ndau shana ai ya ma gaw “Matsaw lahta tang e Karai Kasang gaw hpung shingkang rawng nga u ga; ga ntsa e mung, shi sharawng awng ai masha ni hta, ngwi pyaw ai gaw anga nga nu ga law,” ngu ai rai nga ai (Lk 2:14).

Yesu Madu hkum nan tara mungga hkaw tsun hpang ai shaloi, “Ngwi pyaw simsa lam a matu galaw gunhpai ai ni gaw a lu ma ai; hpa majaw nga yang, shanhte hpe Karai Kasang a kashu kasha ni, ngu nna shamying na maru ai,” ngu kanu kawa ni hte kashu kasha ni lapran na matut manoi ai lam hte tsun shalen da ai (Mt 5:9).

“Gara nta hta mung nanhte shang myit yang, ndai nta ngwi pyaw nga u ga, ngu nna shawng tsun mu” (Lk 10:5).

“Ngwi pyaw sim sa ai gaw ngai nahte hpe tawn da ya ma sade ai; Nye a ngwi pyaw simsa ai nanhte hpe ngai jaw da made ai, mungkan ga na ni jaw ai zawn ngai nanhte hpe jaw made ai n rai” (Yh 14:27).

“Ngwi pyaw ai gaw nanhte hte rau nga nga u ga” (Yh 20:20).

YesuMadu a sak prat ting hta langai sha re ai myit yaw shada ai gaw shinggyim masha shagu hpe hkye la na matu ai nga ai

Yesu Madu mungkan ga de sa du ai gaw laja lana re ai majan hpaw na matu rai nga ai. Dai gaw Satan hpe gasat ai majan rai nga ai. Satan a lata kaw na shinggyim masha ni hpe hkye la na matu rai nga ai. Dai majan hpe awng dang lu na matu gaw kaba la ai lit magam rai nna ga shadawn hte tsun shalen dan n lu na daram re ai nni nkri yubak hkam ai lam rai nga ai. Dai nni nkri hkam ra ai lam hpe kashin kamun ya ai lam, hka shin jasan jaseng ya ai lam, hka tung kaba ai lam, ngu ai ga si ni hte shingdaw shalen da ai.

“Ngai hkam la na kashin kamun langai mi naw nga ai; dai garai n hkam hkam gaw, ngai nachying myit nni nkri hkrum nga nngai” (Lk 12:50).

Hka hpumlip ai wa a makau grup yin hta hka ni sha nga ai. Dai hte maren Yesu ap jaw da ai lit magam hpe gun hpai ai wa a makau hta mung nni nkri gaw nga na sha rai nga ai hpe chye na da ra ga ai.

Yesu Madu mungkan ga de sa du ai gaw shinggyim masha yawng a matu hkye hkrang la lam hta lai nna kaga lam n nga sai gaw dan dawng nga ai.

“Ga ntsa de wan jahkru dat na, ngai du sa ring ngai; dai wan ja jang chyi kap sai rai taw gaw, ngai hpa n dawt shara nga na a ta,” (Lk 12:49).

Yesu Madu shinggyim masha ni hpe hkye hkrang la mayu ai myit masin gaw hkru nga ai wan zawn hkru chyi nga ai. Anhte a hkye hkrang la lam rai nga ai kashin kamun hpe jaw ya mayu myit sharawng nga ai.

“Ngai chyawm gaw ga nna sharawt da ai hkrum jang, ngai masha yawng mayawng hpe ngai hpang de gang la na mawe ai” Yh 12;32.

Yesu madu shinggyim masha ni hpe tsaw ra ai gaw shi a asak hpe pyi jaw kau ai du hkra ap nawng ya ai sakse rai nga ai.

Mungkan ga hta sa pra ai masha shagu hta ra lata la lam nga ai.

Hkristu ladawn ya ai tsaw ra lam hte hkye hkrang la lam hpe hkap hkam la na mai ai zawn, dai hpe ninghkap kau na mung shalawt ai myit hpe Karai Kasang anhte masha hkum shagu hpe jaw da ai.

Anhte tinang myit masin kaw nna ra lata galaw lu ai ahkaw ahkang nga ai. Hkristu hpe i, shing n rai, mara hpe mahtang lata na i? Teng man ai hpe i, shing n rai, shut ai hpe lata na i? Kaja ai hpe i, shing n rai, n kaja ai hpe lata na i? Tsaw ra na hpe i, shing n rai, n dawng ai hpe lata na i? Karai Kasang hpe i, shing n rai, Satan hpe lata na i?  Ndai ra lata gaw tinang myit daw dan ai hta rai nga ai.

Langai hte langai ra lata ai lam n bung ai, hti htang re ai majaw gaw shada mara myit galu, shagrit shanem, hkam sharang, mara raw ya hkrat chye ra ga ai.

Teng man ai hpe, kaja ai hpe, tsaw ra na hpe, Karai kasang hpe kalang sha lata na ngut mat ai mung n rai nga ai. Shani shagu, aten shagu, shara shagu hta dai jaw ang ai hpe lata chye ra ga ai.

Karai Kasang gaw shinggyim masha ni a lapran garan ginhka lam byin shangun ai n rai nga ai. Karai Kasang a mara dat hkyamsa, hkye hkrang la lam, simsa lam hte tsaw ra myit ni gaw yawng a matu maren sha rai nga ai. Yawng a matu shi a lata ladawn ya nga ai.

Anhte shinggyim masha ni mahtang shi hpe n hkap la ai, ning hkap ai, koi yan ai rai nga ai.

Hkristu a hpang hkan ni gaw nni nkri hkrum ra na

Chyum daw langai hta na Myihtoi Yeremiah gaw Karai Kasang ap jaw da ai lit magam ni hta ga sadi dung ai lam gaw shi gun hpai ai prat htum ten du hkra agung alau langai zawn tai nga ai hpe mu lu ai.

Babylon masha ni Yerusalem hpe wang da ai rai nna, dai hpyen ni a jahten sharun ai kaw nna lawt lu na lam langai sha nga ai. Dai gaw laknak jahkrat na lam rai nga ai. Karai kasang e Myihtoi Yeremiah hku Yerusalem masha ni hpe shadum sadi jaw ai rai nga ai. 

Shanhte gaw shi hpaji jaw shadum sadi jaw ai hpe n hkap la ma ai. Shi hpe mung sadi run ai (tiksarhpawk) wa ngu je yang ma ai. Yeremiah gaw Yuda n re ai masha langai mi e lapran kaw nna hparan ya ai majaw si dam kaw nna lawt lu ai rai nga ai.

Yeremiah a ga hpe n madat ma ai sha, Babylon hpyen hpe ninghkap ma ai majaw, Yerusalem hte nawku htingnu ni yawng jahten hkrum ma ai. Yerusalem masha ni mung mayam hku woi wa hkrum ma ai. Yeremiah hte n law la ai masha ni chyu sha Yerusalem kaw ngam taw ra ma ai.

Babylon hkawhkam malai wa sat hkrum ai ten hta gaw ngam nga ai Yuda ningbaw ningla ni Egypt mungdan de hpawng pru mat na myit ma ai.

Yaweh Karai Kasang gaw, Myihtoi Yeremiah hku nna, dai zawn n hpawng mat ai sha, Babylon Hkawhkam a npu hta nga na matu shadum ai.

Myihtoi Yeremiah a hpaji jaw shadum ai hpe, ndai lang mung, ninghkap ma ai hte Yeremiah hpe mung shanhte hte rau Egypt mungdan de woi hprawn ma ai.

Gade nna yang Babylon hkawhkam gaw Egypt mundan hpe gasat zing la ai. Shimlum lam nga sai ngu ai Egypt mungdan hta shanhte ni yawng sat hkrum ma ai. Yeremiah gaw shi a myusha ni hkum nan sat kau ai hkrum ai mai byin ai, ngu chyum laika labau sagawn ai ni htang da ma ai.

Chyum daw langai a shadum jahprang ai gaw Karai Kasang a n ntsa ga sadi dung ai Yeremiah zawn nni nkri hkrum na lam nga ai hpe sumru la lu ga ai.

“Ngai hpe pyi zingri zingrat ma ai rai yang gaw, nanhte hpe mung zingri zingrat na mara ai” (Yh 15:20).

Hkristu a hpang hkan ai ni kabu pyaw ai lam ni hpe kau da ra ai ngu tsun mayu ai rai kun?

N rai nga ai. Hkristu gaw anhte a hpang prat a matu sumsing mungdan hta htum ngu n nga ai myit ngwi myit pyaw lam ga sadi jaw da ai. Madu a hpang hkan ai ni hta myit masin simsa lam hte kabu pyaw lam hpe kraw kata kaw nna nan hkam sha lu ai. Dai zawn re ai simsa lam hte kabu pyaw ai lam hkam la lu na hpe kadai mung jahkring shingdang kau ya n lu ai.

San Pawlu gaw dai myit ngwi myit pyaw lam lu la na hte seng nna, lagat shing jawng ai hta shang lawm ai ni hte shing daw da ai.

“Anhte a makam masham hpe npawt ndung hkren jahkum shatsup ya ai wa Yesu hpe ai yu nga ga” (Hebrew 12:2).

Yesu Madu gaw anhte a matu majan hta mara tam n lu ai kasi kamang rai nga ai. Shi gaw Kawa Karai Kasang ap jaw da ai lit magam hpe ga sadi dung let htep lahti rai gun hpai lai wa ai. Madu gaw nni nkri yubak hpe shakut sharang nna gun hpai ai raitim, kabu gara myit hte gun hpai lai wa ai. Dai majaw shawng na Hkristan ni gaw Yesu Madu hpe “myit ngwi myit pyaw ai hte san seng chyoi pra ai Madu” ngu shamying ma ai.

“Anhte gaw lam e dingbai dingna re ai lam shagu hpe yen seng kau nhtawm, gat na matu myit mada daw dan da ai bandung shadaw du hkra shakut sharang rai gat shadu wa ga” (Hebrew 12:1).

Moi shawng na lagat shing jawng poi hta shang lawm ai ni gaw bu hpun palawng raw da nna lagat shing jawng ra ma ai.

Anhte kashin kamun hkam ai shaloi mara mahkra raw dat, kashin kau hkrum sai rai nna, dai mara hpe bai hta gun ai rai yang, galoi mung pandung de du lu na n re.

Mara byin shangun ai agung alau mahkra hpe tawt lai di kau lu ra ai. Gawng ba, rai dum, nangmak lawhpa, (manalu) ai lam ni yawng gaw lagat shingjawng poi hta lakyin shangun ai.

Lagat shing jawng poi yu ni gaw lagat shing jawng ni lagat taw nga ai hta grau chyang hkra lagat na matu n-gun jaw ma ai.  Anhte lagat shing jawng poi hta shang lawm nga ai ni mung Karai Kasang myit ra ai hte maren atsam dat nna lawan dik lagat ra ga ai.

Hkam la lu na akyu chyeju kumhpa gaw Hkristu Madu hkum nan rai nga ai.

Akyu hpyi saga

Wa Karai Kasang e, Nang Madu a hpang hkan kaja ni shatai ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw Pranwan Ladaw hta (20) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) – Yeremiah 38:4-6, 8-10

Chyum Mungga Daw (2) – Hebrew 12:1-4

Kabu Gara Shiga – Lk 12:49-53

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.

 

Add new comment

3 + 8 =