Laban Shani Na Mungga -Hkristmas Poi

Hkristmas Poi Shani, A, 2022

Mungkan masha ni kabu pyaw ai "Poi"

 Hkristu hta tsaw ra ai nu wa hpu nau ni e, ndai hpawtni gaw Hkristmas poi rai nga ai.

Myihtoi Isaiah a mauhpa ndau ga

Chyum mungga daw langai gaw, Myihtoi Isaiah, n na shi a aten kaw na yawn hpa mabyin langai hpe bai myit dum nna ka lai wa ai laika rai nga ai.

Dingdung Israel mungdan a hpyen ni gaw dai mungdan a Galilee ginwang grupyin hpe gasat zing la kau ma ai. Mare ni hpe wan nat jahten kau, yi sun hkauna ni hpe jahten kau, mare masha law law hpe mayam shatai na matu rim woi la ma ai.

Dai prat hta, mayam shatai na matu rim la hkrum ai ni a myit masin hta yawn hkyen myit machyi ai lam gaw ndai prat na anhte ni sumru hkam sha n lu na ga ai.

Hpun tawng langai hta masha marai masum a lahpa ni hpe gyit da nna, nhtoi galu lusha n jaw, hkring sa n shangun ai sha lam hkawm shangun ai rai nga ai. N hkawm jin ai ni hpe sat kau ai, kabai kau da, ngam kau da ma ai rai nga ai.

Ndai zawn re ai yawn myit machyi lam ni hte rai nga ai aten, Myihtoi Isaiah gaw laklai mabyin langai byin nga ai hpe mu lu ai.

Rim la hkrum ai mayam ni a nsin chyip re ai shana aten hta, htoi tu ai nhtoi shingkan langai shanhte a ntsa yu hkrat wa nna, hpung dagu grai ja grai kaba ai masha langai du sa ai. Shanhte hpe gyit hkang da ai sum ri ni hpe raw, shanhte a lahpa hta gyit da ai hpun tawng ni hpe daw daw di nna daw kau ya ai. Hpyen la ni a laknak ni, hpun palwng hking ni hte kyepding kaw na hkawt yawng wan nat kau ya ai.

Ndai hpung dagu ja ai wa gaw htani htana gring ai simsa lam hpe jaw na ra ai; majan shazim kau ya ai hte gade n na yang, mungkan shara shagu hta simsa lam lu shangun na ra ai lam Myihtoi Isaiah mu ai rai nga ai.

Mungkan hta gara majan hpe raitim, gasat dang la mai ai, mungkan ting hpe mung shanglawt jaw lu ai, hpung dagu madu hte mauhpa Karai Kasang a lam tsun hkai ai Myihtoi ga

Myihtoi Isaiah a myihtoi ga gaw shangai wa na ra ai wa langai hta dik wa na ra ai. Ndai wa hpe gara kaw mu lu na rai? Dumsu wakang hta mu lu ai ma rai nga ai. Yawsep hpe lamu kasa hku nna Karai Kasang tsun da ai wa rai nga ai.

"Shi gaw shadang sha shangai na ra ai rai nna, nang shi a mying hpe, Yesu ngu nna shamying lu na rai nga ai; hpa majaw nga yang, shi a amyu hpe tinang a yubak mara kaw na hkye hkrang la na shi rai nga ai," (Mt 1:21).

Ndai wa gaw Solomon hkawhkam hta grau ai hku shinggyim masha ni a ntsa hpaji byeng-ya hpring ai hte tara ai hku jeyang na wa rai nga ai.

Ndai wa gaw hpung dagu kaba ai Karai Kasang rai nga ai. Mungkan ga na hpung dagu nga manga shi a hpung dagu hpe n dang lu ai.

Shi gaw tsawra myit kaba ai kawa, kashu kasha ni gaw kanu kawa ni hpe n chye shi ai aten kaw nna nan tsaw ra ai wa, chyeju n dum n htang ma ai raitim, n prai mat ai tsaw ra myit kaba ai wa rai nga ai.

Shi gaw simsa lam madu rai nga ai. Shinggyim masha ni hta ra kadawn ra ahkyak dik htum rai nga ai "simsa lam" gun sa ai wa rai nga ai.

Shi gaw wenyi lam hta hkrat sum taw nga ai ni hpe shalawt ya ai wa rai nga ai.

Shi du sa ai a yaw shada lam ni gaw (1) matsan dum myit n rawng, n hkru ai hku zingri zingrat hkrum ai ni hpe shalawt ya na matu, (2) shinggyim masha ni hpe gyit hkang da ai mara ngu ai sumri hpe di kau ya na matu, (3) Karai Kasang hpang de bai htang wa ai hkrun lam hpe bai mu lu ai nhtoi shingkang shnggyim mashan ni kaw gun sa ya na matu hte (4) shinggyim masha ni a masin salum hta Karai Kasang a kabu pyaw lam hte simsa lam hpe jahpring ya na matu rai nga ai.

Shangai daidaw hkam la ai hpang, hkye hkrang la magam hpe sagu rem ni hku nna hpang wa ai

Dai prat hta sagu rem ni gaw mying n lu ai, arawng n nga ma ai. U-dat shara ni hta sagu hpung ni hpe rem sin nga ra ma ai rai nna, nawku jawng n lung ai malawng ma ai; laban nhtoi hta mung sagu rem sin ra ma ai. Mawshe a tara ni hpe mung n hkan shatup lu ma ai. Lagut damya hte shingdaw hkrum ma ai.

Yesu Madu shangai wa ai hte rau ndai zawn re ai masha ni hte shi a hkye hkrang la magam hpe hpang wa ai rai nga ai.

Yesu Madu sagu rem ai ni a matu hpa ni jaw lai wa ai rai?

Nhtoi jaw ya ai. "shaloi dai Madu a lamu kasa langai mi shanhte a man e dan pru nna, dai Madu a hpung shingkang shanhte a grupyin htoi kabrim wa ai," (Lk 2:9).

Kabu pyaw lam hpe jaw ya ai. "Hkum hkrit myit! Masha nlang a matu nachying kabu gara mai ai shiga ngai nanhte kaw gun sa ring ngai" (Lk 2:10).

Simsa lam hpe jaw ya ai. "Ga ntsa e mung, shi sharawng awng ai masha ni hta, ngwi pyaw simsa ai gaw anga nga nu ga law" (Lk 2:14).

Yesu Madu sagu rem ni kaw na hpa hpyi ai rai?

Kamsham myit hpe hpyi ai. "Ma chyangai langai mi nbat hte kayawp nna ushat wakang hta kalent taw nga ai hpe nanhte mu na marin dai; dai gaw shangai wa sai ma teng teng rai nga ai lam nanhte chye lu na matu kumla rai na ra ai" (Lk 2:12).

Sagu rem ni mung lamu kasa tsun ai hpe kam sham ma ai. "Shingrai shanhte tin tin sa nna, Maria yan Yawsep hpe mung, ushat wakang hta kaleng taw nga ai ma hpe mung mu ma ai" (Lk 2:16).

Shanhte kam sham ma ai majaw Yesu Madu shanhte hpe hkye la na matu hkye hkrang la magam hpe matut gun hpai lai wa ai.

Sagu rem ni gaw shanhte a sagu hpung nga ai shara de bai htang wa ma ai. Yak hkak jam jau ai prat de bai du wa ma ai raitim, shanhte a sak prat gaw shawng de na hte n bung ai sak prat ningnan hpe lu la ma ai.

Hkristmas ladaw hta "Hkristu" gaw anhte a matu laklai kumhpa rai nga ai

Sagu rem ni hpe zawn, daini na prat hta, Yesu Madu, anhte hpe mung shi a hkum hpe kumhpa hku nna jaw ya nga ai.

"Karai Kasang gaw masha amyu yawng hpe shi a hkye hkrang la ai chyeju shapraw shadan dan nu ai," (Titu 2:11).

Yesu Madu gaw Karai Kasang a n gaw n wai ai tsaw ra myit hte mai kaja lam jaw ai wa rai nga ai (Titu 3:4).

Yesu Madu gaw, shinggyim masha ni a matu Karai Kasang jaw ya ai kumhpa rai nna, Yesu Madu hta nan dai kumhpa ngu ai chyeju yawng rawng nga ai.

Karai Kasang gaw ndai laklai kumhpa a matu anhte kaw na hpa hpyi ai rai?

"Kaja reng ai magam bungli galaw na hta lai nna kaga hpa mung n mai galaw ai" (Titu 2:14).

Hkristmas gaw kabu pyaw ai Hkristmas rai na, n rai na gaw Yesu Madu hpyi shawn ai hpe anhte jaw ai, n jaw ai ngu ai hta hkan na rai nga ai.

Hkristmas ladaw hta Maria hte Yawsep yan gaw anhte kasi la ra ai yan rai nga ai

Ndai laban na Kabu Gara Shiga hta San Luka gaw Roma Asuya hta ai yuptung jahpan a lam shalawm da ai. Maria hte Yawsep gaw grai tsan ai Nazareth mare kaw na Bethelehem de nhtoi galu hkrun lam hkawm sa ra ma ai rai nna pu ba jam jau ma ai. Nhtoi gu wa sai ma hkum hte re ai Maria a matu grau yak grau jam jau na gaw teng sha rai nga ai. Manam shara n lu ai majaw shangai la lu sai ma chyangai hpe ushat wakang hta tawn da ra ai.

Shan a makam hpe chyam dinglik ai hta n kam mat na daram sawng ai chyam dinglik ai lam rai nga ai.

Ndai ma chyangai hte seng nna, lamu kasa, Maria hpe ga sa shana ai shaloi, hkikhkam ai hku tsun shapraw da ai rai nga ai. Ya ya wa gaw shawng dik ai hku matsan mayan rai shangai la ra ma ai gaw hpa majaw rai kun? Karai Kasang, hpa majaw ndai hku di ai kun?

Sagu rem ai ni a matu lamu de na nhtoi shingkang madun dan nna, shan yan hpe gaw ma shangai la na nhtoi pyi n jaw ai; kadai lamu kasa mung shan a myi hte mu mada ai hta n nga ma ai.

Rai ti mung, Maria yan Yawsep gaw Karai Kasang a myit ra sharawng ai hpe shagrit shanem let san seng ai makam hte hkam la ma ai.

Shan hte shinggyim masha yawng a hkye la Madu Yesu hpe shangai chyinghkai ya ma ai. Dai ten, shan a kamsham ai a chyeju hpe hkam sha lu ma ai.

Kadai hpe mung, galoi mung n jaw yu shi ai kabu pyaw lam shan hpe Yesu Madu jaw ya ai. Ndai gaw shan a matu Yesu Madu jaw ya ai langai lang ngu na Hkristmas kumhpa kaba rai nga ai.

"Daini na nhtoi hta Hkristu Madu ngu ai hkye la Madu gaw David a mare hta nanhte a matu shangai wa sai" (Lk 2:11).

BC 700 daram aten hta Myihtoi Isaiah ka lai wa ai ga hpe bai ndau ai nsen rai nga ai.

"Anhte a matu kasha langai shangai sai! Anhte hpe shadang sha jaw mi ai!" (Lk 9:6).

Anhte a matu Hkristmas gaw, mayam prat kaw na lawt lu ai, majan prat kaw na lawt lu nna simsa lam lu la ai, nsin chyip re ai kaw nhtoi shingkang du shang wa ai, myit htum myit ru ai kaw na lawt lu nna kabu pyaw lam hpe lu la ai poi rai nga ai.

Akyu hpyi saga

Wa Karai Kasang e, kabu pyaw ngawn dik ai Hkristmas chyeju hkam la lu shangun ya rit. Anhte a Madu Hkristu a marang e hpyi nem nga ga ai.  Amen.

Hti ang ai Ja Chyum Mungga ni gaw

Chyum Mungga Daw (1) Is 9:1-7

Chyum Mungga Daw (2) Titus 2:11-14

Kabu Gara Shiga  Lk 2:1-14

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.