Laban Shani Na Mungga -Hkristan teng yang gaw akyu hpyi ten hta Karai Kasang hpe chyeju dum shakawn chye ra ai( Pranwan Ladaw (28), C, 2022 )

Pranwan Ladaw (28), C, 2022

Hkristan teng yang gaw akyu hpyi ten hta Karai Kasang hpe chyeju dum shakawn chye ra ai

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (28) ngu na laban rai nga ai.

Nawku Hpung kata na nawku daw jau lamang ni hta shawng lawm ai hta myit sharawng myit rawt, myit lawm ai lam nga, n nga ai hpe masam maram yu nna shi a makam masham masa hpe chye lu na ga ai.

Hpa majaw nawku jawng lung ai, nawku daw jau a ta, ngu san yan mahtai gaw amyu myu htai na ma ai. (1) Nawku Hpung tara nga ai majaw, (2) ra ai hte ra ahkyak, ra kadawn ai lam ni Karai Kasang kaw sa hpyi ai, (3) myit ru myit tsang myit hkrit ai lam ni nga ai majaw Karai Kasang a shalan shabran ya ai hpe sa hkam la ai, (4) mahkawn hkawn lu ai majaw, manang ni hte hkrum lu ai majaw sa ai.

Mahtai gaw langai hte langai a bung ai lam nga ai zawn shai hkat ai lam ni mung nga na nhten.

Hkristu hpe kam sham ai majaw, anhte hpe mara dat hkyam sa ya ai majaw, sumsing mungdan de woi ningshawng ya nga ai majaw Karai Kasang hpe shakawn kungdawn ga ai rai nga ai.

Karai Kasang, mai kaja lam madun ya nga ai majaw sa ai rai ga ai. Missa Hkungga nawng jau ai hta Yesu Madu nga nga ai. Missa Hkungga gaw hkungga nawng jau ai wa hpe chyeju dum ai, shi a daw jau ai hpe sa hkam ai rai nga ai.

Nawku daw jau lamang hta Karai Kasang kaw na, anhte ra sharawng ai hpe hpyi shawn la ai hta grau nna galaw ra ai gaw shi hpe shakawn kungdawn na lam rai nga ai.

Dai majaw, prat shagu na “Missa Hkungga” gaw “Karai Kasang hpe chyeju dum shakawn kungdawn ai” rai nga ai hpe teng sha chye na da ra ga ai.

Nawku hpung anhte hpe sharin shaga ai gaw, “Hkristan ni gaw langai hpra raitim, wuhpung wuhpawng hte raitim, chyeju dum shakawn chye ai Hkristan prat hta kung hpan galu kaba, ngang gring nga na lam rai nga ai.

Naman A Lam

Ndai laban na la lu ai chyum daw langai gaw Naman shamai shatsai hkrum ai lam rai nga ai. Ratim, mabyin yawng hpe gaw n hti saga ai. Dai majaw ndai laban lapran kaw bai hti sumru na matu n-gun jaw mayu nngai.

Labau kadun

Yesu n du sa shi ai, BC 850 daram hta Israel mungdan gaw (Hkawhkam Solomon gaw de da ai mungdan hpe garan mat ai mungdan lahkawng hta na langai) makam masham lam hta matsan mayan rai ma ai. Law malawng gaw hpara sumla ni hpe naw ma ai. Dai hpara sumla ni shanhte hpe makawp maga akyu jaw ai ngu hkam la shut ma ai.

Karai Kasang gaw, mau hpa hpung dagu madun lu ai atsam jaw let Myihtoi Eliah hpe shanhte hpang de shangun dat ai.

Prat shagu hta, shi hpe Yuda ni a wenyi kawa ngu hkam la ma ai. (Yesu Madu a prat hta mung kam sham ai ni gaw shi hpe wenyi kawa hku mung hkap la lai wa ma ai.)

Mau hpa kumla ni hpe madun ai Eliah a hkinghtawng hpe Elisha bai hkam la ai rai nga ai. Elisha gaw Naman hpe shamai ya ai Myihtoi rai nga ai.

Share ninghkrin hpyendu Naman gaw Yuda myusha n re ai; dingdung Isreal mungdan maga, Damasaku mare kaba na Aram hkawhkam a hpyen luksuk hpe up ai du rai nga ai.

Shi gaw manggang ana kumla madun ai shanhpyi ana hkam sha wa ai. Manggang ana kap jang hpyenla ni hpe up ai hpyendu aya jashum kau na teng sha rai nga ai.

Israela ni hpe shang gasat ai shaloi Suri masha ni, rim woi wa ai mahkawn kasha gaw Naman a madu jan a shangun mayam ma tai wa ai. Dai mahkawn ma gaw Myihtoi Elisha a lam Naman a madu jan hpe tsun dan nna, shi hpe sa hkrum na matu hpaji jaw ai.

Kade nna shi yang, Naman nga ai mungdan hte Myihtoi Elisha nga ai mungdan lahkawng lapran majan byin da lai wa ai rai nga ai. Raitim, mahkawn mayam ma tsun dan ai ten gaw, simsa nga sai rai nga ai.

Naman gaw shi a hkawhkam wa kaw ahkang hpyi la nna, Israel hkawhkam wa hpang de kumhpa law law gun sa let Myihtoi Elisha kaw shaman hkam la na matu rawt sa wa ai. Samari hkawhkam wang hta aten kadun hkring sa la nna, Myihtoi Elisha hpe hkan tam ai.

Myihtoi Elisha gaw shi nta kaw na pyi n pru ai sha shangun ma hpe dat dat nna Naman hpe, Yadan hka lawng hta sanit (7) lang hka shang na matu matsun dat ai. (Gawng ba rai dum ai majaw dai zawn galaw ai gaw n rai nga ai; Naman gaw shi a akyu matu Karai kasang hpe grau kam hpa wa hkra yaw shada nna galaw lai wa ai rai nga ai.)

Naman gaw shi a sari makawp ai hku nna Myihtoi Elisha matsun ai hpe n galaw kam ai. Shangun ma hpe sa tsun shangun ai gaw shi hpe n hkungga ai, roi ai ngu hkam la nna pawt sindawng myit hte tinang a mungdan de bai wa na daw dan ai.

Raitim, shi a shangun ma ni hpaji jaw shadum jahprang ya ai majaw Elisha matsun ai hte maren Yawdan hka hta shi hkum hpe sanit lang tup shang tsing dat ai rai nna tsep kawp shamai shatsai wa ai.Shi a shan mung ma kaji a hkum zawn ting ting hkang hkang rai hkam kaja wa ai (4Hk.Hk 5:14).

Naman mung Myihtoi Elisha hpang de lau gat sa nna, chyeju dum let gun sa ai kumhpa ni jaw wu ai. Elisha gaw hpa kumhpa hpe mung n hkap la ai. Mungkan sut gan hpe myit n marin, myit n lawm ai Myihtoi hpe mu nna Naman mung ningmu ningnan hpaw let shi hpe, grau ahtang kaba, hkungga wu ai. Israel myusha ni a Yaweh Karai gaw mungkan ntsa nga ai shinggyim myusha ni yawng a Karai Kasang rai nga ai, ngu hkam la kam sham let hpara sumla ni hpe naw ai lam hpe kau da na myit daw dan lai wa ai.

Shi a myit daw dan ai lam hpe sakse shatai ai na matu, Israel mung ga na ga shi a buga Damasaku mare de la wa na ahkang, Myihtoi Elisha kaw hpyi nem wu ai.

(Dai teng, shanhte hkam la ai lam langai gaw, shanhte nawku ai Karai Kasang gaw shanhte nga ai lamu ga jarit hta hkan na atsam nga ai, hpung dagu nga ai; Karai Kasang gaw dai lamu ga jarit du hkra nga ai ngu hkam la ai rai nga ai. Dai Karai Kasang hpe lamu ga jarit lai ai kaga buga ginra ni hta nawku ai rai yang, dai shara hta up hkang taw ai Karai Kasang hpe dingbai dingna jaw, n hkungga ai tai nna dingnye lu wa chye ai; dai zawn galaw ai wa kaw hkra machyi chye ai, ti ai hkrum na ngu hkam la lai wa ma ai.)

(Israel mungga na ga la wa nna tinang a nta wang hta gat da ai lachyum gaw, dai shani kaw nna shi hte shi a nta masha ni gaw Israel myusha ni hpe matut manoi pawng nga sai lam, dai ga gat da ai a marang e dai shara hta Yaweh Karai Kasang a makaw maga ai hpe hkam la lu na ahkaw ahkang nga ai lam re ngu hkam la ma ai.)

Naman gaw Yaweh Karai Ksang hte Myihtoi hpe sanseng myit hte chyeju dum ai a majaw bai hkam ja wa ai. Grau nna gaw, manu daw dan n lu ai makam masham hpe lu la ai, Karai Kasang hpe sadi dung let ap nawng daw jau sa wa lu na matu myit daw dan lu ai.

Myihtoi a ga madat ai a marang e shi a ana ahkya mai tsai mat nna, Yaweh Karai Kasang hpe kam sham ai a marang e shi a mara ni shatsai kau ya hkrum ai.

Myihtoi Elisha a shangun ma Gehazi gaw nangmak law hpa myit a majaw Naman hkam sha lai wa ai manggang ana hpe hkam sha mat ai.

Shi a sara Myihtoi Elisha gaw Naman jaw ai kumhpa yawng n rai tim, nkau chyan sha gaw hkap la mai ai hpe n hkap la ai majaw lagu lagyim, masu nna Naman kaw na gumhpaw ni hpe hkap la da ai. Nta bai du wa ai shaloi Ra marin, lawhpa myit kaba wa ai. Dai majaw Naman hkrum sha lai wa ai ana zingli shi hta bai byin mat ai.

Tara maigan masha Naman gaw, madu jan a shangun ma tsun dan ai hpe, shawng daw hta myit nau n bang da ai raitim, Myihtoi Elisha kaw du hkra sa ai. Shi kaw du ai shaloi mung, shangun ma hte sha hkrum lu nna, matsun dat ai lam mung laklai lam n re ai majaw myit hta nau n bang ai.

Rai ti mung, hpang jahtum shagrit shanem ai hte hkan galaw ai majaw ana ahkya kaw na mai tsai lu ai, Teng man Yaweh Karai Kasang hpe hkam sham lu ai, ga sadi dung let ap nawng daw jau lu ai.

Elisha a hpung dagu lamik kumla ni hpe shani shagu mu lu nga tim nangmak lawhpa myit rawng wa ai shangun ma Gehazi gaw hkum hkrang lam hta mung, wenyi lam hta mung hkra machyi mat wa ai.

Yesu Shaman Ya Ai Manggang Kap Masha Marai Shi (10) a lam

Shanhte gaw manggang kap ana lu ai ni rai ma ai. Dai ten na manggang kap ai ni gaw matsan mayan rai ma ai. Shanhte hpe kun dinghku masha ni kaw nna pyi jahka da ma ai. Htat la ai nam maling ni de gawk shapraw kau hkrum ma ai rai nna, aten na wa ai. Si na n htoi hpe sha la na nga ra ma ai. 

“Manggang kap ai wa gaw je ai hpun palawng ni hpe bu hpun nna kara hpyan kau nhtawm shi a myi man lawu daw magap da let, n san n seng ai, n san n seng ai, ngu nna jahtau na rai wu ai. Shi hta ana kap nga dingsa n san n seng nga ai rai nna dai shinggan kaga masha ni hte tsan ai shara hta nga nga na rai wu ai” (Jaw Jau 13:45-46).

Yuda hte Samari masha ni kaga aten ni hta rau n nga ai, myit n hkrum ma ai. Raitim, ndai manggang kap ai ni hte seng nna tara jahkrat ai hta gaw myit hkrum ma ai.

Manggang kap ai ni gaw Madu Yesu hpe mu ai shaloi, tara nga ai hte “n san n seng ai” ngu n jahtau ai sha, “Madu e, anhte hpe matsan dum la e law” ngu hpyi jahtau ma ai (Lk 17:13).

Madu Yesu hkum nan kasa ni hpe shagun dat ai shaloi maanggang kap ai ni hpe shamai shatsai ya mu, ngu hkang da ai (Mt 10:8).

Shanhte a langai sha re ai myit mada shara gaw Yesu Madu rai nga ai hpe chye hkam sha ma ai rai na re.

“Nanhte wa nna hkingjawng ni hpe wa madu mu” ngu Madu Yesu shanhte hpe matsun dat ai (Lk 17:14).

Elisha gaw Naman hpe yawdan hka hta shi a hkum hpe sanit lang sa tsing na matu matsun ai hpe shanhte dum nna Madu Yesu hpe hpyi shawn ma ai rai na ma ai.

Kaja wa nga yang, Nang n shamai ya jang, hkingjawng ni hpe anhte gara hku wa madun na law, ngu bai htan mai nga ai.

Raitim, Yesu Madu matsun ai hpe n ningdang ai sha, hkingjawng ni kaw sa wa nga mayang mai tsai mat ai hpe dum chye wa ma ai.

“Shanhte lam e wa nga yang pyi san pra mat ma ai. Shanhte hta na marai langai mi gaw, tinang hkum san pra mat sai hpe mu chye jang, bai nhtang wa nna, nsen kaba hte Karai Kasang hpe shagrau sha-a wu ai. Yesu a lagaw nhpang e dingnyawm dagup let, shi a chyeju hpe shakawn ya wu ai. Dai wa gaw Samari masha rai nga ai,” (Lk 17:14-16).

Yesu Madu gaw, shanhte ni shi kaw hpyi shawn ma ai hpe mu na ai shaloi grai nan sharawng awng lai wa ai. Raitim, marai jahku, shi kaw bai n du sa wa ma ai majaw myit n pyaw na gaw teng sha rai na re.

Samari masha zawn shanhte shi kaw bai htang sa wa na Yesu myit mada lai wa ai. Chyeju dum hkam la mayu nna ngu na hta, Madu a tsaw ra matsan dum lama ai magam shanhte hta hkum tsup wa na matu rai nga ai.

Shamai shatsai ya ai gaw shawng na lahkam sha naw rai nga ai. Ahkyak ai gaw shanhte ni Madu hta kam sham nna sadi dung wa na lam rai nga ai.

Yesu Madu gaw bai htang wa ai wa hpe, “Rawt hkawm wa nu, na a kam sham ai gaw nang hpe kaja shangun nit dai, ngu nna tsun dat ai” (Lk 17:19).

Shi a shamai shatsai ya ai hpe shagrin ya ai hte hkye hkrang la lam hta du nga sai hpe chye shangun ai rai nga ai.

Yesu Madu hpe kam hpa ai majaw manggang ana kaw na shamai shatsai ya hkrum ai. Karai Kasang hpe chyeju dum chye ai majaw mara hta na shalawt ya ai, kashin jasan jaseng kau ya nna Shi hta kam sham ai lam hpe jaw bang ya ai.

Yesu Madu gaw, dai ngam ai marai jahku hpe mung, shi kaw bai n sa ai majaw, shi a shamai shatsai ya ai lam hpe bai n dawm la kau ya ai. Shanhte gaw hkingjawng ni kaw sa madun dan nna, shagrin madi shadaw ya ai sakse laika hpe la nna tinang a mare de bai wa na ma ai. Shanhte chyeju n dum chye ai majaw gade ram nan hkrat sum mat ai hpe dum chye na n rai ma ai.

Madu Yesu kaw bai htang wa ai wa gaw, Naman zawn sha, Yuda masha n re ai Samari masha re ai majaw Karai Kasang hte tsang gang lai wa na re.  Raitim, hpang jahtum hta, shagrit shanem ai hte chyeju dum chye ai a majaw Karai Kasang hte grau nihtep wa lu ai.

Karai Kasang hpe chyeju dum chye ai gaw Hkristan sak prat hta kunghpan wa shangun ai

Hkam la lu ai arung arai a matu Karai Kasang hpe chyeju dum chye ra ai.

(naw ka ra ai)

Wenyi hte seng ai lam ni a matu Karai Kasang hpe chyeju dum chye ra ai.

(kaw Ka ra ai)

Agung alau lam ni hte matsan jam jau, nni nkri lam ni a matu Karai Kasang hpe chyeju dum chye ra ai.

(naw ka ra ai)

Akyu hpyi saga

Wa Karai Kasang e, hkam la lu sut rai ni a matu, wenyi lam hte seng ai lam ni a matu hte nni nkri lam ni yawng a matu Nang Madu hpe chyeju dum ga ai. Sadi dung let nang Madu hta kam hpa kam sham nga lu ai chyeju atsam jaw ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw Pranwan Ladaw hta (28) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) – 4Hk.Hk 5:14-17

Chyum Mungga Daw (2) – 2Tim 2:8-13

Kabu Gara Shiga – Lk 17:11-19

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.