Laban Shani Na Mungga -Du Sa Ladu (1), A, 2022

Du Sa Ladaw (1), A, 2022

 Karai Kasang gaw ngai hpe hkye la na matu aten shagu shakut nga ai

Hkristu hta tsaw ra ai nu wa hpu nau ni e, ndai laban gaw (A) shaning, Du Sa Ladaw hta langai (1) ngu na laban rai nga ai.Shinggyim myu baw sang shagu hta jiwoi jiwa ni kaw na yu hkrat wa ai shaning ningnan ngu ai nga ma ai.Yawng hte seng ai shaning ningnan hpe mung, dai ni, anhte hta nga ga ai. January langai ya shani rai nga ai.Nawku hpung hta mung makam hte seng ai nawku daw jau shaning ngu ai nga ai. Ndai Du Sa Ladaw hpang ai shani gaw Kahtawlik Nawku Hpung a nawku daw jau shaning ningnan rai nga ai.

 

Hkristmas n du shi yang hpa rai masat da ai rai? Nawku hpung hta nawku daw jau shaning gaw hpa lachyum rai kun?Nawku daw jau shaning a lachyum hpe, kaja htuk jaw ang ai hku chye na lu na lam gaw ji woi ji wa ni jai lang wa ai shata hti lai ladat hpe hka ja ai lam rai nga ai.Ji wa ni a prat hta ahkying masat ai (nari) n nga shi ai. Jan gaw aten masat ai (nari) rai nga ai. Shani shagu na bungli magam hpe, jan hpe yu nna masat galaw ma ai.Jahpawt daw jan nnan pru ai ten yi sun hkauhting hkauna de sa ma ai. Shani ka-ang aten yi wa, hkauna yi wa hta shat sha la, hkring sa la ma ai. Jan shang nsin garai nsin shi yang mare nta de bai wa ma ai. Shani shagu na bungli magam aten hpe ndai hku masat ma ai.

 

Ji wa ni gaw nhtoi gade ya ngu ai hpe n hti ai sha, shata hpe yu nna masat matsing da ma ai. “Shata” kaji kaw nna “shata rum ten du hkra hpe shata mi ngu shaga shamying ma ai.Laning mi tup hta ahkyak ai aten ladaw ni hkan nna yi sun hkauna sun wang hta hkai nmai hkai sha ma ai.Yi hkyen, yi sawm, yi nat ten, mam hkai ten, tsing magang ten, mam dan ten, nga nna masat galaw lai wa ma ai. Shu la dan la lu ai hpe gaw mare de la wa nna tinang a nta na mam dum ni hta shim ai hku mahkawng da ma ai.Dai majaw anhte a ji woi ji wa ni a prat hta shaning hpe yi hkyen ta hta hpang nna shaning htum ten gaw nsi nai mam ni hpe shim lum ai hku zin mazawng/mahkawng da ngut ai ten rai nga ai.

Byin dik htum yi sun hkauna galaw ai wa: Karai Kasang

Nawku Hpung a nawku daw jau shaning hpe mung dai hte maren shaning ladaw hpe yu nna masat da ai.Karai Kasang gaw yi sun hkauna kaw na n si nai mam ni hpe zing mahkawng la na gaw n raitim, wenyi ni hpe shu la dan la na hte prat shagu na shinggyim masha ni hpe prat hte prat hkye hkrang la na matu aten ladaw amyu myu hpe lata masat da lai wa ai, ngu sumru la hkam la mai ga ai.Karai Kasang hpe yi sun hkauna galaw ai wa langai hte shingdaw nna sumru la mung mai nga ai. Karai Kasang, Yi sun hkauna galaw ai wa, a matu hkai sha shara dam pa ni gaw shinggyim masha ni a masin salum ni rai nga ai. Karai Kasang gaw shinggyim masha ni hpe hkye hkrang la na matu sharawng awng ai yi sun hkauna galaw sha ai wa nan rai nna, hkringsa aten ngu n nga lu ai.

 

Karai Kasang shinggyim masha ni hpe hkye hkrang la na lam gaw shinggyim masha ni mara hta hkrat sum mat wa ai ten kaw nna hpang wa ai. Shinggyim masha ni a salum hta sumsing nli tum hpe hkap la lu mu ga matu Karai Kasang gaw shaning law law myit galu kaba hkam sharang let hkyen lajang lai wa ai.Shinggyim masha hpe hpan ai ten kaw na hpang nna, Hkristu Madu mungkan ga de du sa ai aten laman hpe, Nawku Hpung gaw, nawku daw jau shaning a shaning ningnan ladaw ngu nna hkam la ga ai. Hkristmas ladaw a shawng na laban mali tup hpe “myit mada ala nga ai ladaw” ngu lachyum nga ai “Du Sa Ladaw” (Adventu) nga nna shamying ga ai.

Dai hpang gaw Karai Kasang shinggyim masha ni hpe hkye la na matu lahkawng ngu na ladaw de du shang wa ai.Karai Kasang gaw shinggyim masha ni a masin salum hta hkai shaprut ya na matu manu dan, awng ai nli tum hte rau, (bungli shakut shaja ai yi sun hkauna galaw ai wa langai hku hku nna) Shi a kasha shingtai Yesu hpe mungkan ga de shangun dat ai.Ndai ladaw gaw Yesu Madu Mungkan ga de du sa ai ladaw rai nga ai.Dai hpang Madu Yesu Yawhan Baptista a lata hta kashin kamun hkam la nna mali shi ya mali shi na tup lusha gam akyu hpyi ai lam hte, nni nkri hkam si hkam ai lam hpe myit dum ai “Lusha Gam Ladaw” rai nga ai.

 

Ngut jang, Madu Yesu bai hkrung rawt ai ten kaw nna Chyoi Pra ai Wenyi yu hkrat wa ai Pentecost aten du hkra laman gaw “Paska Ladaw” rai nga ai.Pentecost shani kaw nna hpang nna gaw mungkan htum ai shani du hkra hpe Madu Yesu a hkye hkrang la magam galaw ai aten ladaw ngu tsun mai ga ai. Dai ladaw hta gaw shinggyim masha ni a masin salum ni hta, gat hkai da ai Karai Kasang a sak hkrung mungga ngu ai nli tum prut pru kung kaba wa nna apu asi pu si wa ai.

“Pranwan Ladaw” ngu shamying ai rai nga ai. Ndai ladaw hta gaw Madu Yesu a sak hkrung mungga ni, galaw lai wa ai mai kaja ai magam lam ni hpe hti sumru ga ai.

Shinggyim masha langai hpra hta, Karai Kasang gaw, hkye hkrang la magam hpe bai galaw nga ai

Karai Kasang a lam anhte garai n chye shi a aten, shaning law law jau ai aten kaw nna nan, anhte a masin salum kata hta Karai Kasang a sak hkrung mungga nli tum hte Wenyi hpe hkap la lu na matu myit galu kaba ai hte tau nau lajang da lai wa sai rai nga ai.

Anhte ni Hkristu Madu hpe hkap la kam sham nna Hkristan ni tai wa hkra, lam matsun madun da lai wa sai rai nga ai.

Kashin Kamun chyeju kumla ngu ai gaw, anhte mara ngu ai bum maling/sharaw hpe wan nat, sawm kau nna, wenyi nli tum gat hkai da ya ai ngu ai ga shadawn hte lachyum htai la mai nga ai.

 

Wenyi nli tum gaw anhte a masin salum hta prut pru kung kaba wa nga ai. Nli tum n hten mat u ga, kung kaba wa nna apu asi pu si shangun mayu ga ai rai yang, Karai Kasang a yaw sin magam hte anhte a atsam dat, n-gun dat shakut ai lam hpe ya jang pawng kayau nna ru bang da ra ga ai. Karai Kasang hte matut mahkai rau galaw gun hpai ra ai hpe tsun ai rai nga ai.

Karai Kasang gaw marang jahtu, jan shamai ya nna, nli tum gaw anhte a masin salum kata hta kung kaba wa na matu rai nga ai.

Anhte a bungli gaw, hkauna pa hta tsin magang, ga sau kaja bang, nam hkyen shatsawm na rai nga ai. Kashin Kamun hkam la ngut sai raitim, anhte a myit kata hta prut pru wa chye ai mara ni hpe shamyit shamat kau na matu, shaw la kau na matu rai nga ai.

 

Karai Kasang a yaw sin ai magam gaw shut shai ai lam n nga, n awng dang ai ngu galoi n nga ai. Anhte mung tinang a lit magam hpe htep lahti galaw shatup ra ga ai. Dai n rai yang, anhte shu la dan la na shani hta hkrat sum mat na rai ga ai.

Nawku daw jau shaning laman hta, shinggyim masha ni hpe hkye hkrang la ai Karai Kasang gaw, anhte marai hkum shagu a masin salum kata hta matut matut nna nga nga ai.

Du Sa Ladaw: myit mada ala dingda nga ai ladaw

Du sa wa na ra ai wa gaw Hkristu hkum nan rai nga ai hpe anhte chye da chyalu rai ga ai. Nawku Hpung gaw, grau nna Hkristmas Ladaw hta Hkristu hpe hkap hkalum la lu na matu jin jing rai nga shangun mayu ai.

Ndai Ladaw hpe “Hkristu shawng na lang du sa ai lam” ngu shaga shamying ai. Mungkan htum ai shani, Madu du sa wa ai shaloi mung, shi hpe hkap tau la na jin jing rai nga ra ga ai. Ndai lang na du sa wa na hpe, lahkawng lang ngu na du sa ai, shing n rai, hpang jahtum du sa ai lam ngu shaga shamying ga ai.

 

Hkristu shawng na lang du sa ai hte, hpang jahtum du sa na gaw, kalang sha byin na n rai nga ai. Hkauna galaw ai wa shi a hkauna pa hta hkai hpang ai ten hte shu la dan la ai ten, aten lahkawng hpe sha masat da ai n rai nga ai. Shani shagu hkauna de sa ra ai. Shi a matu hkauna pa gaw manu dan ai; kaja dik shu la dan la lu na matu atsam marai dat shakut na gaw ten sha rai nga ai.

 

Hkristu Madu gaw anhte hpang de aten man man du sa ai. Anhte akyu hpyi ai shaloi, mungga hti, madat, sumru ai shaloi, sakramentu chyeju kumla daw jau lamang galaw ai shaloi, anhte a shani shagu na prat hta byin nga ai yawn hpa lam hkrum ai shaloi, kabu pyaw ai shaloi, Hkristu anhte kaw du sa ai.

Dai majaw Hkristan langai a sak prat gaw, Du Sa Ladaw, anhte hpang de du sa ai Hkristu Madu hpe hkap hkalum la ai ladaw re ngu tsun lu ga ai.

Ndai laban na lu ai chyum laika na kabu gara shiga

Karai Kasang gaw, kaja wa sha shinggyim masha yawng hkye hkrang la hkrum na hpe ra sharawng ai.

Chyum daw langai hta na lu ai hte maren, Karai Kasang gaw Israel myusha ni hpe mau hpa lam law law madun lai wa ai. Dai zawn madun lai wa tim, Yuda ni gaw hkye hkrang la hkrum nna ngam ai masha ni yawng gaw lani mi na nhtoi hta hten run mat na ra ai, ngu shut shai ai hku hkam la lai wa ma ai.

Yaweh Karai gaw, Myihtoi Isaiah hpe, shingran langai jaw ai. Karai Kasang gaw shinggyim myusha yawng hpe tsaw ra ai lam, Yuda ni sha n rai, shinggyim masha yawng a matu hkye hkrang la lam hpaw da ya sai lam rai nga ai.

Palestine hte makau grupyin hta nga pra ai shawng na masha ni gaw, nawku daw jau shara hpe bum ntsa ni hta lata akyu jashawn lai wa ma ai. Sumsing lamu hta nga ai Karai Kasang hte grau ni ai shara kaw nawku ai, ngu hkam la ma ai rai nga ai.

Myihtoi Isaiah mu ai shingran hta na Yerusalem gaw grai tsaw ai bum nta kaw nga ai rai nga ai. Mungkan jut shara shagu na pyi mu mada lu ai shara hta nga ai hpe Yaweh Karai madun dan ai, ngu ai rai nga ai.

 

Mungdan shagu na masha ni gaw Yaweh Karai a masing, shinggyim masha ni hpe hkye hkrang la na masing hpe chye na hkap la na mara ai, ngu ai lachyum rai nga ai.

Mungdan shagu na shinggyim masha nlang hte gaw Yaweh Karai matsun madun dan ai lam hta hkawm sa na matu, shi a myit ra ai hpe hkan shatup na matu teng man jaw ang ai magam bungli ni hpe madun dan na ra ai. Hpang jahtum gaw, mungdan shagu na shinggyim myusha ni hpe hpunau nauna majing shatai ya nna, majan kaw nna shalawt ya let, mungkan ting simsa lam hte hpring nga na ra ai, ngu ai rai nga ai.

“” (1Tim 2:4).

Karai Kasang gaw lakyin nga ai lam n nga ai sha, anhte hpe hkye hkrang la na sharawng awng ai.

Chyum mungga daw lahkawng gaw San Pawlu Roma na, kalang pyi n mu ga shi ai Hkristan ni hpang de shagun dat ai sharin shaga mungga rai nga ai. Hpa lam ni sharin shaga lai wa ai kun?

Aten du sai, ngu San Pawlu tsun ai gaw kaning re ai aten hpe tsun ai kun? Du sa wa na ra ai Hkristu hpe hkap tau la na aten, hkye hkrang la na aten du sai hpe tsun ai rai nga ai.

Hkristan langai a sak prat gaw, aten shagu, shani/nhtoi rai nga ra ai.

Anhte hpe hkye hkrang la na matu magam bungli shagu, Hkristu hpe chyu n mai ap tawn da ai. Anhte a magam bungli shatai la ra ai. San Pawlu gaw shani hte shana aten, shai hkat ai lam, hti htang re ai lam hpe madun shingdaw shang lang da ai.

Shana aten gaw, shinggyim masha ni shut hpyit mara galaw ai aten kumla rai nga ai. Shani aten gaw, shinggyim masha ni mai kaja ai magam galaw ai aten rai nga ai.

Kashin kamun chyeju kumla hkam la ai shaloi, anhte a matu jahpawt manap nhtoi htoi wa ai aten zawn rai nga ai. Dai ten kaw na hpang let Hkristan langai a sak prat tup gaw shani aten sha rai nga ra ai. Shana aten de bai n mai du shangun ai. Mai kaja ai lam hpe sharawng awng ai hte dai mai kaja ai magam bungli galaw ai aten sha rai nga ra ai. N kaja ai myit jasat n mai tawn ai, n kaja ai lam n mai galaw sai rai nga ai.

 

Kashin kamun hkam la ai hpang raitim, anhte a sak prat hta nhtoi, nsin kayau taw nga chye ai hpe, San Pawlu dum chye ya ai. Kashin kamun hkam la ai hpang hta mung, anhte gaw agung alau hkrum nna shut hpyit mara galaw chye ga ai rai nga ai.

Dai majaw anhte gaw kaja ai hpe sha matut manoi galaw shakut nga ra ai. Gade nna yang anhte a prat hta shani ka-ang aten du na ra ai hpe myit hprang let sadi maja nga na matu San Pawlu shadum da ai rai nga ai.

 

Anhte mungkan prat htum ten, htani htana asak hpang ten hta, anhte a matu hkye hkrang la magam hpe Hkristu Madu du sa let ginchyum dat shangunt ya na ra ai.

Dai hpang gaw nhtoi htoi ai aten rai na ra ai. Hkristu gaw anhte a matu nhtoi rai nga ai. Htoi tu ai dai nhtoi shingkang hta anhte a prat gaw kabu pyaw lam hte hpring ai aten rai nga na ra ai.

Hkristu gaw Hkristan langai dagraw la ai bu hpun rai nga ra ai; shi a laknak rai nga ra ai. Jahpawt jau jau anhte gaw, bu hpun n lawm ai, shinggu krin rai nna, nta shinggan de le gwi na n rai ga ai. Yi ngam magam galaw na matu hkauna pa de rawt sa yang nam hkyen na, shing n rai, makawp maga na nhtu hte kaga ra ai arai lang sa na malap na n rai nga ai.

 

Anhte tinang sak prat a shani aten ni hta Hkristu hpe gun lang ra ai, dagraw la ra ai. Hkristu zawn sak hkrung nga pra ra ai, shi a sharin shaga ai mungga ni hpe hkam la hkawm sa ra ai.

Anhte hkye hkrang la hkrum lu na magam a matu matut manoi shakut nga ten hta sadi shahkra rai nga ra ai.

Ndai laban na Kabu Gara Shiga gaw, Noah prat na masha ni a masa lam hpe bai myit dum sumru na matu Hkristu tsun dan ai hpe na lu ga ai.

Shinggyim masha ni gaw tara n lang ai sha lu lai sha lai ai, la shada, num shada rau nga ai lam ni, manam ni hpe roi rip ai lam ni a majaw Karai Kasang gaw hka rawt kaba shangun nna je yang ai.

Anhte gaw shanhte hta grau ai hku sadi shahka let nga pra ra ai lam Madu tsun ai rai nga ai. Hpa majaw nga yang, gade n na yang, mungkan htum wa sana rai nga ai.

Yesu Madu gaw anhte hpe lu sha na hte dinghku de na lam kaw nna pat shing dang da ai gaw n rai nga ai.

 

Prat hta ahkyak dik ai hkye hkrang la lam hpe malap da nna, shinggyim lailen hta htenrun lup si mat shangun n mai ga ai.

Hkristu gaw, anhte a prat hta hpang jahtum shi bai du sa na lam hte seng nna myit ru nga na, shing n rai, hkrit tsang nga na hpe tsun ai n rai nga ai.

Anhte a prat hta hkye hkrang la ai apu asi hpe myit mada let sadi sahka myit rai nna sharawng awng ai kabu myit hte sak hkrung nga na gaw ahkyak ai. Apu asi gaw Madu hte anhte a matu rai nga ai. Dai apu asi ni a majaw, yawng kabu pyaw lu na rai nga ai.

 

Akyu hpyi saga

Wa Karai Kasang e, shani shagu mai kaja ai apu asi pu si shangun ya rit. Anhte a Madu Hkristu a marang e, hpyi nem nga ga ai. Amen.

Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban gaw (A) shaning na du sa ladaw(1) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) Is 2:1-5

Chyum Mungga Daw (2) Rom 13:11-14

Kabu Gara Shiga  Mt 24:37-44

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.