Laban Shani Na Mungga -Du Sa Ladaw Labn (3), AShaning ( Myihtoi Yeremiah Myihtoi Ga Dik Wa Ai Lam)

Du Sa Ladaw (3), A

Myihtoi Yeremiah Myihtoi Ga Dik Wa Ai Lam

 Hkristu hta tsaw ra ai nu wa hpu nau ni e, ndai laban gaw Du Sa Ladaw hta (3) ngu na laban rai nga ai.

Myihtoi Isaiah ndau shana ai laklai ai kabu pyaw lam

Palestine mungdan hte lamu ga jarit matut ai mungdan ni gaw lamu ga ginra langai hte langai grai nan shai hkat ai ginra ni rai ma ai. Nkau ginra ni hta gaw zaibru pa ni hkrai rai nna, ju hpun sha tu ai. Nkau ginra ni hta gaw daini na prat du hkra grai tsawm htap ai ginra ni rai nga ai. Myihtoi Isaiah a prat hta grau pyi tsawm htap na shadu ai.

“Camel bum hte Sharon pa layang” ni hta gaw namsi namsaw hpun ni hta apu asi ni pu si tsawm la ai ginra ni nga ai rai nga ai. Nam maling kaba ai bum shingyan ni mung nga ai shara rai nga ai.

Dai majaw Solomon A Mahkawn hta ramma langai mi shi tsaw ra dik ai wa hpe “Sharon ginra hkan tu ai hka law pan” hte shingdaw da ai (Solomon mahkawn 2:1).

Lamu ga gaw kabu pyaw lam hpe n hkam sha lu ai. Raitim, Myihtoi Isaiah gaw dai kabu pyaw lam hkam la na matu saw shaga lai wa ai. Hpa majaw nga yang, zaibru jang hte re ai katsi katsang shara rai taw nga tim, apu asi pu si ai namsi nampan hpun ni hte hpring rai tsawm htap la nga ai.

Myihtoi Isaiah ndau ai Laklai kabu pyaw ngawn ai lam masum nga ai. (1) Israel myusha ni tara maigan mungdan de mayam prat hkru rim woi la hkrum ai hpang kade nna yang madu mungdan de bai du wa lu ai laklai kabu pyaw lam lu la ma ai. (2) Gaw ningja ni, myi kyaw, na lahpang ai ni, ma-a ai ni, machyi ai ni, manggang kap ai ni, shamai shatsai hkrum na nhtoi du wa sana rai nga ai. (3) Nni nkri lam hte yawn hkyen ai lam ni yawng gaw gade nna yang hkoi mat sana rai nga ai.

Maigan mungdan de mayam yam hkawm ai prat kaw na madu mungdan de bai wa ai lam

Yerusalem mung hten run mat, Israel myusha ni mung tara maigan mungdan de mayam hku rim la, yam sha hkrum mat ai prat kaw nna madu mungdan de bai htang wa lu ai. Tara maigan mungdan hta shaning na na mayam hku nga lai wa ai Israel myusha ni madu buga de bai htang wa lu ai ten hta gaw, dum nta, sun wang ni galang bai gaw gap la lu ma ai hte Karai Kasang hpe shakawn kungdawn mahkawn ni hte kabu gara let mahkawn shakawn lu ai. Shanhte a masin salum hta sung la ai kabu pyaw lam byin nga ai.

“Shanhte gaw kabu gara ai hte Yerusalem de du wa na mara ai, mahkawn mangoi ai hte kabu gara jahtau na mara ai. Shanhte gaw htani htana kabu gara na mara ai” (Is 35:10a).

Raitim, Myihtoi Isaiah tsun ai tara maigan ni a mayam prat kaw na madu buga de bai htang wa lu ai kabu pyaw lam gaw hpring tup hkum tsup kabu pyaw lam n re ai hpe mu lu ga ai.

“Yawn hkyen ai hte sharung shayawt ai lam ni hprawng mat na mara ai” (Is 35:10b).

Madu mungdan de bai htang wa ai Israel myusha ni a kabu pyaw lam gaw, yak hkak jam jau ni hte ana ahkra zingli ni a majaw, gade nna yang hkoi mat wa ai. Labau hte maren, madu mungdan de du ai hpang gade nna yang myit htum myit kaji lai wa ma ai lam mu lu ga ai.

Myihtoi Isaiah a myihtoi ga lahkawng lang ngu na dik wa ai lam

Myihtoi Isaiah ndau ai teng man kabu pyaw lam gaw ya she mu lu na ga ai.

“Karai Kasang hkum nan du sa nna nang hpe hkye mawai la na ra ai” (Is 35:4). Yesu Madu du sa na lam rai nga ai.

Yesu Madu hkum hkrang hte seng ai ana ni hpe shamai ya ai lam ni

Myi kyaw ai ni hpe myi shamu ya ai lam (Mt 9:27-31; Yh 9:1-41)

Na lahpang ai ni hpe na na shangun ai lam hte ma-a ai ni hpe n-gup hpaw ga shaga lu shangun ai lam (Mk 7:31-37)

Lagaw lata si ai wa hpe bai rawt hkawm lu shangun ai lam (Mt 9:1-8; Kasa 3:1-10)

“Masha wunawng wuwa kaba shi kaw du sa ma ai hte, lagaw hten ai, myi kyaw ai, hkum hkrang hten ai ni, n chye shaga ai hte ana amyu myu kap ai machyi masha kaga law law hpe shanhte lahku sa ma ai rai nna Yesu a lagaw nhpang e shayu tawn da ma ai. Yesu mung shanhte hpe shamai shatsai ya mu ai” (Mt 15:30).

Yesu Madu mungkan hta naw nga ten, hkum hkrang hte seng ai ana ahkya ni hpe shamai shatsai ya ai gaw, wenyi hte seng ai ana ni hpe shamai shatsai ya ai kumla hkrang ni sha rai nga ai.

Prat shagu na shinggyim masha ni hpe matut manoi shamai shatsai ya nga ai. Anhte hkum nan mung wenyi hte seng ai ana ahkya ni hpe shamai shatsai hkrum ai sakse ni nga ga ai n rai ni?

Myihtoi Isaiah a myihtoi ga dik wa ai rai nna, anhte langai hpra hta mung dik wa ai rai nga ai.

Rai ti mung, anhte a kabu pyaw lam kaba tim, n hkum tsup shi ai hpe hkam sha na ga ai.

Anhte gaw hkum hkrang, wenyi lam hte seng ai ana zingli hkam sha nga ai ni rai ga ai. Anhte a prat hta matsan mayan rai yak hkak jam jau lam ni, yawn madai lam ni kaw nna atsai awai lawt lu ai ngu gaw n nga shi ga ai.

Myihtoi Isaiah ndau ai kabu pyaw lam hte seng ai myihtoi ga hpring tup hkra gaw n hpring tsup shi ai.

Anhte a kasi kamang Kashin Kamu jaw ai San Yawhan Baptista

Yawhan Baptista gaw Hkrist hpe ga sadi dung ai let ndau shana nna, shawa masha ni, Yesu Madu kashin kamun hkam la nga ninglen kaw Kawa Karai Kasang a nsen hpe madat nga ai hpe, kabu gara let mu lu ma ai.

"Ndai wa gaw ngai sharawng awng nga ai, ngai tsaw ra ai Kasha rai nga li ai" (Mt 3:17).

Yawhan gaw, shi a lit magam ngut kre jang simsa ai hte si wa lu na. Karai Kasang a ntsa sadi dung ai kumhpa hpe myit mada ala nga na sha rai sai ngu hkam la na ma ai. Raitimung, dai zawn n byin wa ai. Herod hkawhkam gaw Yawhan hpe hkyuk htawng jahkrat ai. Dai ten na hkyuk htawng gaw grai shawng ai rai nna, hkrit hpa kaba ai shara rai nga ai.

Dai hta grau ai masa lam hkrum na mung naw nga ai. Yawhan gaw hkyuk htawng hta shingtai hkam sha ai, nni nkri hkam sha ai lam ni a majaw myit um-ang hpa nga ai. Yesu Madu hkaw tsun ai, "kaja ai asi n si ai hpun nga manga hpe kahtam daw kau nna wan kaw bang kau nat kau ra ai" ngu ai gaw hpa rai n dik wa ai sha jahkring da ai kun? Anhte sumru nna myit n dik ai lam ni byin na nhten.

Mam nsen hpe gaw galoi n si ai wan hta nat kau na ra ai, (Mt 3:10,12) ngu ai gaw Herod hkawhkam hte shi a salum sala ni a matu n rai kun. Hpa majaw shanhte hpe mara n jaw ai kun? Hpa rai n jeyang ai kun? Anhte sumru hkrup na ga ai.

Yawhan a myit hta mung, Yesu ngu ai wa gaw Messaiah Madu gaw rai kun? Ngai nni nkri hkam ai lam ni gaw kaman sha rai mat sai kun?, ngu myit yang myit hkrup na nhten.

"Yawhan gaw shi a sape lahkawng hpe shangun dat nna, Nang gaw dai du sa na ra ai wa rai nga nni?, shing n rai, kaga langai ngai hpe anhte naw myit mada lu na rai nga a ni?, ngu nna shi hpe san dat wu ai" (Mt 11:2-3).

"Yesu htan let shanhte hpe tsun dat mu ai gaw, Na mana, mu mamu hte maren wa nna Yawhan hpe tsun dan mu: Myit kyaw ai ni myi mu lu ma ai, lagaw hten ai ni hkwm sa lu ma ai, manggang kap ai ni san pra wa lu ma ai, na lahpang ai ni na lu ma ai, si mat ai ni sharawt la ai hkrum ma ai, matsan mayan ni a matu kabu gara shiga hkaw dan nga ai. Ngai hta myit kadaw ai lam n mu ai wa kadai mung, a lu nga ai, ngu mu ai" (Mt 11:4-6).

Yesu Madu a mahtai gaw, Yawhan hte shinggyim masha ni myit mada lai wa ai lam gaw Shi hta dik wa sai lam rai nga ai.

Yawhan gaw ndai mahtai hpe na lu ai hte hkyuk htawng kaw nni nkri hkam ra ai rai tim, shi a masin salum hta simsa kabu pyaw lam hte hpring rai nga ai.

Anhte mung Yawhan zawn rai nga ra ga ai. Hkristan ningnan tai wa ai ten kabu pyaw lai wa ai hpe myit sum shai na ma ai. Dai kabu pyaw lam gaw galoi mung mat mat na n rai, ngu hkam la lai wa na ga ai.

Raitimung, agung alau ni, machyi makaw hkrum jam jau hkrum ten ni hte zingri zingrat hkrum nni nkri lam ni hkrum katut chye ga ai. Grau sawng ai gaw, tinang a gawng kya ai a majaw mara hta bai lup wa chye ga ai. Dai shaloi, n tsen n hten, myit um-ang ai lam ni byin pru wa chye ga ai.

Manghkang gaw, agung alau hkrum ai shaloi akyu hpyi na malap ai, Karai Kasang hpe shana na malap ai rai nga ai. Dai hku n malap ai rai yang gaw, simsa lam hte kabu pyaw lam hpe bai lu la na teng sha rai nga ai.

Yak hkak jam jau lam ni gaw hkoi mat mat na n rai nga ai. Nni nkri lam ni hpe mung matut manoi hkam sha ra na rai nga ai.

Raitimung, Hkristu Madu anhte hpe jaw ya na simsa lam hte kabu pyaw lam gaw dai yak hkak jam jau hte nni nkri lam ni hkam sha ai lapran kaw nna hkam la lu na rai ga ai.

Myihtoi Isaiah a myihtoi ga hpang jahtum dik wa ai lam

Myihtoi Isaiah a myihtoi ga gaw tsang hte tsang rai nna hkum tsup wa ai, dik wa ai rai nga ai. Anhte si wa ai shaloi, kashin kamun jaw ai Yawhan zawn nni nkri lam ni hkrum katut ai raitim, sadi dung ai hte sak hkrung ai rai yang, hkum tsup ai prat hpe lu la na ga ai.

"Shi gaw shanhte a myi hta na myi prwi pru mapru yawng katsut kau ya na ra ai: htawm hpang de si hkrung si htan ngu ai n nga lu na sai; sharung shayawt, hkrap ngu hkrap ngoi ai hte machyi makaw, hki si ba si ai mung n nga lu na sai" (Shingran 21:4).

Yi sun hkauna galaw sha ai wa gaw shi a lamu ga kaw na hpu ging ai nsi naisi ni shapraw ya na ra ai hpe ala nga ai zawn, Madu bai du sa wa na hpe, myit galu hkam sharang ai hte ala nga ra ga ai (Yaku 5:7-8).

Akyu hpyi saga

Wa Karai Kasang e, Myihtoi Yeremiah a myihtoi ga Madu Yesu hta hkum tsup, hpring tup dik wa sai hpe kam sham let Messiah Madu Yesu Hkristu hpe kabu myit hte myit galu kaba hkam sharang let ala dingda nga lu ai chyeju jaw ya rit. Anhte a Madu Hkristu a marang e sha hpyi nem nga ga ai. Amen.

Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban gaw Du Sa Ladaw hta (3) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) Is 3:1-6,10

Chyum Mungga Daw (2) Rom 5:7-10

Kabu Gara Shiga Mt 11:2-11

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.

 

Add new comment

8 + 7 =