Laban Shani Na Mungga -Du Sa Ladaw (2), A, 2022 Messiah a mauhpa atsam ni

 Hkristu hta tsaw ra ai nu wa hpu nau ni e, ndai laban gaw Du Sa Ladaw hta (2) ngu na laban rai nga ai.

Myihtoi Isaiah hpe “du sa na Madu a lam tau tsun shana ya ai Myihtoi” ngu mung shaga shamying ma ai.

Anhte myit mada ala nga ai hkyela Madu gaw ganing re ai masha rai kun? Dai masha hpe hkap la lu na matu, anhte gara hku hkyen lajang da ra na kun? Hkristu a hkye hkrang la ai hkrum lu na matu anhte ni gara hku sak hkrung nga ra na kun? Ndai laban na chyum laika ni hpe sumru ru ga!

Anhte a matu Messiah hpe shangun dat ai a marang e, Karai Kasang gaw Shi a hpung dagu hpe madun dan ai

Jese gaw David a kawa rai nga ai (Ruhta 4:22, 1Hk.Hk Labau 16:1). Chyum laika hta “Jese a aru arat, David a aru arat” ngu ai ga si hpe chyahkring hkring jai lang lai wa ai hpe mu lu ga ai. Israel myusha ni ngu tsun mayu ai ga si ni rai nga ai.

Myihtoi Isaiah sak naw hkrung nga ten, Israel myu ni a masa gaw myit n pyaw hpa rai nga ai. Solomon hkawhkam si wa ai hpang, shi a mungdan gaw lahkawng brang rai mat ai. Israel myusha ni nga ai dingdung mungdan gaw jahten kau hkrum na masa hta rai nga ai. Dai hte maren sha, hpang shaning gade n na yang, Yuda ni nga ai mungdan mung jahten kau hkrum ma ai.

Dingdung mungdan na Israel ni mayam hku rim woi la hkrum ai hpang gaw mungdan shara shagu de bra mat wa ma ai. Tinang mungdan kaw ngam nga ai ni law malawng gaw sak kung dinggai dingla ni hkrai rai ma ai.

Shaning na ai hpang, mayam yam hkawm mat ra ai ni, tinang a mungdan de bai wa na ahkang lu ai ten, kaga wuhpung mung bai jat wa ai. Law malawng gaw bai n wa ma ai. Bai wa ai ni gaw matsan ai ni rai ma ai.

Myihtoi Isaiah gaw, dai zawn rai myit n pyaw hpa masa hta rai nga ai Israel myusha ni hpe, kahtam daw kau hkrum nna ngam taw ai hpun pawt hte shing daw da ai.

Kahtam daw da ai hpun pawt kaw na prut pru wa ai makru ni hpe dusat ni bai sha kau nna mung, hkun hkraw nna mung, bai kung kaba wa na yak ai lam, Myihtoi Isaiah chye na da ai.

Lai wa sai aten hta, hpun kaba tai lai wa ai Israel myusha ni, ya chyawm gaw hpundu kaw nna pru pru wa ai Israel masha kachyi sha ngam taw sai.

Makru gaw, ntsa lam mu mada ai hta, n-gun n rawng ai zawn raitim, jahten kau n lu ai hpun kaba bai tai wa lu ai.

Israel myusha ni hta na bai rawt wa ai makru gaw Jese a myu lakung hta na rai nga ai. Dai wa gaw, shinggyim masha ni hpe hkye hkrang la na matu du sa ai Messiah hkum nan rai nga ai.

Messiah gaw Karai Kasang a Wenyi hte hpring ai wa rai nga ai

“Messiah” hte seng nna, Myihtoi Isaiah gaw “Karai Kasang a Wenyi” ngu tsun da ai (Is 11:2). Lachyum hpe sumru yu ga!

Karai Kasang a Wenyi gaw hpung dagu rawng ai daru magam ahkaw ahkang hte hpring ai. “Karai Kasang a Wenyi gaw hka hpung ni a ntsa e shamu hkawm nga ai,” (Np.Nhp 1:2). Chyum laika hte maren, dai ten gaw hka sha naw nga ai. Dai hpang she Karai Kasang gaw n htoi hpe hpang ai rai nga ai. Ngut jang, Jan, shata, shagan ni hpe hpan ai. Dai hpang hpun kawa, dusat dumyen ni hpe hpan ai. Hpang jahtum gaw Karai Kasang a wenyi hte bung ai shinggyim masha hpe hpan ai.

Ndai lam ni yawng gaw Karai Kasang a Wenyi a marang e, galaw ya ai lam ni hkrai rai nga ai. Karai Kasang a Wenyi hta n mai byin ai ngu hpa n nga ai. Karai Kasang gaw mahkra dang chye ai wa rai nga ai.

Karai Kasang a Wenyi gaw yawng mayawng hpe mauhpa hpung dagu hte hting hkang da ai lam Shakawn Kungdawn 104 hta hti lu ga ai. “Nang myi man kayin mat wa ai shaloi, dai ni hkrit nga ma ai; dai ni a nsoi nsa ni hpe, nang dawm la kau ya ai shaloi, shanhte si wa nna, shanhte pru wa ai ga npu kaw nna dai ga npu de bai nhtang mat wa ma ai. Rai ti mung, nang shanhte hpe nsoi nsa gawut bang dat ai hte shanhte hpe hpan da nga ndai; shing rai, nang gaw mungkan ga hpe asak ningnan jaw ya nga ndai,” (Shk.Kd 104:29-30).

Karai Kasang a wenyi masha langai a ntsa yu hkrat wa ai rai yang, dai wa gaw mauhpa hpung dagu hte hpring wa ai lam Chyum Laika hta tsun da nga ai.

Karai Kasang a wenyi hpe hkam la ai hpang, Abraham gaw ru jung ai makam masham hpe hkam la lu ai, Mawshe gaw share ninghkring ningbaw langai tai wa ai, David gaw share atsam marai kaba wa ai, Eliah gaw mau hpa hpung dagu langai hpang langai madun lu ai.

Karai Kasang a hpung dagu hpe hpa lam hte mung, gara hku mung, kadai mung hkum pat shingdang lu na n rai.

Karai Kasang lata la ai ni hkum nan pyi, shanhte kaw na Karai Kasang a Wenyi dawm la kau ya ai rai yang, shanhte a prat jasum kau ra na ra ai. Shawlu hkawhkam a prat hpe maram yu yang dan dawng nga ai.

“Dai Madu a wenyi Shawlu kaw na pru mat wa sai rai nna, dai Madu dat dat ai n hkru ai wenyi mahtang shi hpe sharu shatsang nna zingri nga ai” (1Samuela 16: 14).

Karai Kasang a wenyi Messiah ntsa yu hkrat wa ai shaloi, ndai chyeju ni hte hpring wa ai rai nga ai.

Dai Madu a wenyi gaw shi hpe hpaji byeng-ya, chye chyang ai nyan hte kung kyang ai hpaji jaw ya na ra ai (Is 11:2). Sumru nna galaw lu ai atsam, Karai Kasang hpe hkrit hkungga ai myit masin ni hte hpring wa ai.

Karai Kasang myit sharawng awng ai hpe hkan galaw shatup lu na matu atsam marai nga ra ai. Aten shagu hkan shatup lu hkra ngang kang ai myit daw dan ai lam mung nga ra ai.

“Ngai hpe shangun dat ai wa a myit ra ai hku hkan galaw na hte shi ap ya da ai magam bungli ngut kre hkra galaw na lam gaw nye a sha hpa rai nga li ai,” (Yh 11:2).

Karai Kasang hpe hkrit hkungga ai lam gaw Messiah a matu asak hkrung na lam rai nga ai.

Nsa sa na hte malu masha hkam la ai gaw masha langai a sak hkrung lu na matu n galaw n mai rai nga ai. Messiah a matu mung Yaweh Karai Kasang a sharawng awng ai hpe galaw nan hkan galaw shatup ra ai rai nga ai.

Karai Kasang hpe hkrit hkungga ai ngu ai ga yan a lachyum hpe atsawm chye na da ra ga ai. Ndai ga yan gaw “hkrit myit rawng ai” ngu ai hpe tsun mayu ai n rai nga ai.

Kasha Karai Kasang gaw Kawa Karai Kasang a n tsa tawn da ai tsawra myit hpe madun dan ai ga yan rai nga ai. Kasha gaw kawa hpe tsaw ra ai tsawra myit hte shingdaw myit la mai ga ai.

Messiah Madu gaw mungkan ntsa nga manga masha yawng hta laklai dik htum ai wa rai nga ai.

Messiah gaw simsa lam gun sa ya na ra ai

Myithtoi Isaiah gaw shinggyim masha ni myit mada nga ai “Simsa Lam” hpe Messiah gun sa ya na ra ai lam tau nau tsun shana da ai. Prat hte prat simsa ai ngu hkam la ai ladaw ni nga lai wa tim, hpring tsup, hkum tsup ai simsa lam gaw n lu ma ai.

Dai hpring tsup ai simsa lam hpe Messiah Madu du sa ai shaloi gun sa ya ai rai nga ai.

“Nam maling ni hta nga ai zai ai dusat ni hte mare nta wang ni hta rem da ai ni ai dusat ni gaw rau nga na mara ai lam ga shadawn hte Myihtoi Isaiah myihtoi htoi da ai (Is 11:5-8).

Ma ni gaw dai dusat ni hte rau ginsup pyaw nga na mara ai, ngu mung tsun da ai. Ma ni a shimlam a matu tsang shara n nga ra sai. Ma ni mung simsa ai hte kabu pyaw lu ai lachyum gaw grai nan simsa sai kumla rai nga ai.

Simsa lam ngu ai shaloi, (1) shinggyim masha hte Karai Kasang a lapran byin wa na simsa lam, (2) shinggyim masha shada lapran byin wa na simsa lam hte (3) shinggyim masha hte mungkan hta nga manga (mungkan shingra) ni a lapran simsa lam ni hpe tsun ai.

“Panglai ni gaw hka hte hpring nga ai zawn dai Madu a machye machyang hpaji gaw mungkan ting hta pri rai na ra ai,” (Is 11:9).

Sumsing mungdan hta Karai Kasang nga nga ai hte maren, shinggyim masha ni chye ma ai shaloi, simsa lam gaw hpring tsup dik ai simsa lam rai nga na gaw teng sha rai nga ai.

Hkyela Madu Messiah hpe hkam la hkap la lu na matu, anhte gaw Karai Kasang a wenyi hpe madu da ra ai

“Sumsing mundan du magang ra ai majaw, nanhte a shut hpyit mara ni kaw na myit malai lu mu,” ngu San Yawhan Baptista shadum sadi jaw saw shaga da nga ai (Mt 3:2).

Chyahkyawn prat kaw na sagu prat de galai shai wa na matu saw shaga ai rai nga ai. Mara hta lup nga dingsa gaw anhte ni chyahkyawn ni zawn tai nga ga ai ngu tsun mayu ai rai nga ai. Chyahkyawn gaw dusat ni hta na n hkru dik ai dusat rai nga ai.

Yuda ningbaw salang ni law malang a masin salum gaw gung (labu, tuk) hte hpring nga ma ai. Masha ni hpe tuk shang shangun ai (gun nsa shang shangun ai) ni rai ma ai. San Yawhan Baptista gaw shanhte hpe “tuk rawng ai lapu” ni ngu shaga ai rai nga ai.

Yuda masha ni hpe mung, akyu n rawng ai mam nsen hte yi hku zawn re ai prat kaw nna akyu rawng ai mam nsi tai wa na matu saw shaga da ai rai nga ai. Apu asi pu si wa na matu saw shaga ai rai nga ai.

Dai masa hta n rai jang, Messiah Madu du sa ai lam gaw shanhte a matu lachyum n nga rai mat na ra ai. Wan hkru mat mat na matan da hkrum ai ni tai mat na ra ai.

Shinggyim masha ni a masin salum hta galai shai na atsam marai nga ai. Chyahkawn prat kaw nna sagu prat de mung, yi hku kaw nna mam nsi tai wa na mung, galai shai lu ai hpung dagu atsam gaw Karai Kasang hta nga ai.

Karai Kasang a wenyi hta dai zawn galai shai lam byin wa shangun lu ai hpung dagu nga ai. Du sa na ra ai Messaiah Madu Langai chyu sha Karai Kasang a wenyi anhte a masin salum kata hta ru bang ya na daru magam ahkang aya jaw hkrum ai wa rai nga ai.

San Pawlu gaw shi a sawlu mying hte re ai prat hta, Hkristan ni hpe jahten ai chyahkyawn langai zawn rai nga ai. Shi galai shai wa ai shaloi mung, Hkristan tai nga sai ni shi hpe n hkap la ma ai. Shi Yerusalem de du sa wa nna sape ni hte rau rai nga lu hkra shakut tim, sape ni hta na sape langai hku shi hpe n hkap la ma ai (Kasa 9:26).

Hkristan nawku hpung hpe maram yu ga. Anhte gaw n bung pre ai myusha baw sang ni rai ga ai. Langai hte langai hpaji lam hta, lu su nga mai ai lam hta, bai kaga lam amyu myu ni hta n bung hkat ga ai.

Sawng dik ai gaw, masha langai hte langai shada n ju n dawng ai, dingbai dingna jaw ai lam ni rai nga ai. Daini anhte ni gaw sagu hpung zawn, mam nsi zawn, hpu nau myit majing hte rau nga pra ra ai. Karai Kasang a wenyi gaw anhte hta shamu shamawt taw nga ai.

Teng man galai shai, tsawm htap wa na matu chyam dinglik ai lam

Teng man galai shai lam gaw hpa rai ta? San Pawlu Roma hpung masha ni hpang de shagun dat ai laika hta tsun da ai gaw jaw ang ai hku sang lang da ai.

“Nanhte nga manga hte gaw Hkristu Yeu a kasi ningli hpe hkan nna nanhte shada da myit mang langai sha rai nga lu u ga, hkam sharang ai atsam hte myit shatsam ya ai lam jaw ya nga ai Karai Kasang gaw nanhte hpe woi awn nga u ga law. Shing rai yang she, nanhte yawng rau sha nsen langai sha hte anhte a Madu Yesu Hkristu a Kawa Karai Kasang a hpung shingkang hpe shakawn kungdawn lu na myit dai” (Rom 15:5-6).

Du na Hkristmas ladaw gaw anhte ni a hkyehkrang la lam gaw teng man kabu pyaw lam jaw ya na law htam ai ladaw rai nga ai.

Myithtoi Isaiah gaw, “Yese a aru arat langai mi paw pru na ra ai, maigan amyu ni hpe up na matu Karai Kasang gaw shi hpe paw pru shangun na rai nna, Maigan amyu ni dai wa hta myit mada kam hpa nga na mara ai, nga ai (Rom 15:12; Is 11:10).

Akyu hpyi saga

Wa Karai Kasang e, Messiah Madu gun sa ya ai teng man simsa lam hpe kabu gara hkap hkam la lu nna hpu nau ni hpe karan kachyan lu na chyeju jaw ya rit. Anhte a Madu Hkristu a marang e, hpyi nem nga ga ai. Amen.

Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban du sa ladaw hta (2) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) Is 11:1-10

Chyum Mungga Daw (2) Rom 15:4-9

Kabu Gara Shiga Mt 3:1-12

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.