Laban Mungga - Pranwan Ladaw 13,C,2022

Pranwan Ladaw (13), C, 2022

Hkristan ni yawng gaw Karai mungdan chyambra wa na lit nga ai

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (13) ngu na laban rai nga ai.

Chyum Laika sang lang daw

Anhte a buga ginra ni hta nawku hpung kata hparan ra ai mayak manghkang ni law law nga chye ga ai. Hkristan ni a matu gaw Nawku Hpung hpe gaw de bau sin makawp maga na hte Hkristu hpe garai n hkap la shi ai ni hpe shi hpang de du hkra woi sa ai sagu rem kaja ni tai hkra hkyen lajang da nna tatut galaw sa wa na gaw ra ahkyak nga ai.

Ndai laban na chyum daw ni gaw anhte hpe sumru da ra ai lam ni hpe jaw da nga ai.

Myihtoi Eliah a hkinghtawng hpe dagraw la na matu   hpe shaga la ai lam

Tinang hpe sat na yaw nga ai hkawhkam num Jezabel a lata kaw nna hprawng lawt wa ai hpang Myihtoi Eliah gaw wenyi a shadut lam woi ai hte Karai Kasang Mawshe hpe “Tara Kanu Lam Shi” jaw lai wa ai Horas/ Sainal bum de matut rawt sa wa ai.

Dai shara kaw na lungpu kata hta Karai Kasang gaw Myihtoi Eliah hpe lak lai n-gun ban ya nna Israel mungdan hta hpara sumla naw ai lam hpe matut ninghkap gasat shangun ai. Madu Karai gaw shi hpe lit magam ap jaw ai hta Elisha ngu shaga shamying ai wa shi a hkinghtawng hpe hkap la na matu arawng aya jaw shangun ai lit mung lawm nga ai.

Elisha gaw shangun mayam ni hte dam pa la ai lamu ga sun wang ni madu ai wa mai byin ai. Myihtoi Eliah gaw Karai matsun ai hte maren shi a hkinghtawng dagraw na wa hpe tam ai shaloi, kasha shi langai (11) hte rau dumsu kap mi hte na htai taw ai Elisha hpe mu hkrum ai.

Myihtoi Eliah gaw Elisha hpe mu hkrum ai shaloi ga hkaw mi mung n shaga ai sha, Elisha a lahpa ntsa kaw shi a hkinghtawng kumla rai nga ai lawng kaba hpe mara ya nna pru mat wa ai.

Moi shawng na masha ni gaw shanhte a lawng kaba gaw tinang hkum a adaw achyan re ngu hkam la lai wa ma ai. Dai lawng kaba hpe kaga masha langai a lahpa ntsa mara ya ai gaw mara ya ai wa a hkinghtawng arawng aya dai wa hpe ap jaw ai lachyum rai nga ai.

Elisha mung kalang lata nan nahtai hpe rap tawn kau da nna Eliah a hpang hkan gat nang let kanu kawa ni hpe shawng wa hkungga jaw shakram da ngu jang shi hpang hkan nang na matu hpyi shawn ai. Eliah mung Elisha a hpyi shawn ai ga hpe na jang  “Mai sa nhtang wa su; Ngai nang hpe hkum da na we ai n rai,” ngu bai htan ai (3Hk.Hk 19:20).

Elisha gaw shi madu ai sut gan yawng tawn kau da nna Myihtoi Eliah a hpang hkan nang ai. Madu da sut gan ni hte masan sa taw sai kan bau magam bungli ni hpe kau da let Myihtoi Eliah a hpang hkang sape tai wa ai.

Hkristu a hpang hkan ai ni gaw Hkristu hkum nan a wenyi hte sak hkrung ra ai

San Mahte, San Marku hte San Luka ka ai hta Yesu Madu a prat hta byin ai mabyin lahkawng hpe sumru yu ga. (1) San Petru gaw Yesu Madu hpe Messaiah hkyela Madu re ngu yin la ai lam hte (2) bun ntsa kaw Yesu Madu ahpaw nsam galai ai lam rai nga ai.

Ndai mabyin lahkawng hte Kabu Gara Shiga hpe daw lahkawng garan da ai. (1) langai ngu na daw hta gaw Yesu Madu Karai Kasang a ja mungdan lam mare ni hta ndau ai lam, (2) lahkawng ngu na hta gaw kasa ni hpe masum lang tup tau nau tsun dan lai wa sai Shi a nni nkri lam ni hte si hkam ai a marang e sumsing mungdan gaw de da na lam rai nga ai.

“Ya Yesu hpe lamu de shalun la na nhtoi du wa magang yang, Yerusalem mare de sa wa na matu myit daw dan da wu ai,” (Lk 9:51).

Yesu Madu hte kasa ni hkrunglam langai hta rai nga ai Samari mare hta malu masha hte shanu shingbyi na lam hte seng nna ninghkap ai hkrum lai wa ma ai.

Dai ten Yuda myusha ni hte Samari myusha ni a lapran hta shada n dawng ma ai, shing n rai, n hkap la ma ai.

Mabyin gaw dai ten a shawng shaning (500) daram aten na Yuda ni maiban mungdan de mayam yam hkawm ra ai kaw na bai htang wa ai shaloi Yerusalem mare kata Nawku Htingnu hpe bai gaw gap ai hta Samari myusha ni hpe shang lawm garum na ahkang n jaw ai majaw rai nga ai.

Samari myusha ni gaw shanhte a mare kaba hte ni ai Geriphin bum ntsa hta nawku dawjau na matu shanhte a Nawku Htingnu hpe gaw gap lai wa ma ai.

Dai ten kaw nna hpang nna Galillee ginra na Yuda ni gaw shanhte a ahkyak dik poi ni hta nawku daw jau na matu Yerusalem de sa du ai shaloi ni dik htum rai nga ai Samari ginra hpe lai ga sa ra ai. Shaloi shanhte hkum shanhte makawp maga na n-gun atsam n nga ai rai yang mayak manghkang byin mai ai rai nga ai.

Dai masa re ai majaw ndai laban na Kabu Gara Shiga na mabyin hta samaritan mare masha ni gaw Yesu hte kasa ni hpe shana malu masha hte manam shara n jaw ai rai nga ai.

Petru hte kasa ni gaw dai mare hpe wan shaga jeyang na matu Yesu hpe hpyi shawn ma ai. Lai wa sai shaning 850 daram aten hta Myihtoi Eliah a wan nat hkungga hte tara maigan hkawhkam Arhab a hkingjawng ni hpe jeyang ai hpe bai myit dum shangun nga ai, (4Hk.Hk 1:9-16).

“Nye a mungga na la nhtawm dai hpe n hkan nang ai wa kadai hpe mung, ngai jeyang na n rai; hpa majaw nga yang, mungkan ga hpe jeyang na mtu ngai du sa nngai n rai, dai hpe hkye la na matu she sa nngai,” (Yh 12:47).

Shi a magam hta shang lawm mayu ai marai masum hpe Yesu Madu mahtai masum jaw ai lam

San Yaku a kabu gara shiga hta Madu Yesu gaw shi a hpang hkan nna Karai Kasang a ja mungdan hpe gaw gap ai hta garum mayu ai masha marai masum hpe san htai masum galaw ai hpe mu lu ga ai.

“Yesu gaw, chyahkyawn ni nhkun lu ma ai, ntsa malen pyen ai u ni mung, utsip ni lu ma ai; rai ti mung, dai Masha Kasha chyawm gaw, baw tawn na shara pyi n lu nga ai,” ngu nna shi shawng na wa hpe tsun ai (Lk 9:58).

Tsun mayu ai gaw, Shi a hpang hkan mayu yang majoi nga n mai ai; grai n hkring n sa shakut ja ra ai. Mungkan sutgan ni hpe madung n mai da ai; dai hpe shamyat shanat nga n mai ai. Shi a hpang hkan ai ni gaw mungkan sutgan hpe mung madu lu na n re, ngu ai rai nga ai.

“Yesu Madu gaw, Masha jasi ni gaw tinang a jasi ni hpe makoi mu ga, nang gaw Karai Kasang a Mungdan lam sa hkaw dan su,” ngu nna lahkawng ngu na wa hpe tsun ai (Lk 9:60).

Chyeju nga, lit nga ai hte maren si mat ai tinang nta masha ni hpe makoi mayam na hpe Yusu ninghkap ai gaw n rai na re. Bai masha langai gaw shi a kawa asak htum mat ai ten shi hte rau nga ang yang she nga ang na re.

Dai lahkawng ngu na masha hpyi shawn ai lachyum gaw, Madu a hpang hkan mayu ai; rai ti mung, kawa si ai ten du hkra naw la ya rit, dai hpang gaw hkan na, ngu ai lachyum rai nga ai.

Yesu Madu bai htang ai ga a lachyum gaw, Karai Kasang a ja mungdan de shang ai hta lakyin taw ai, hpang hkrat taw ai, rai yang dingbai dingna nga ai. Shinggyim masha ni ntsa lam asak hkrung nga let hkum hkrang hkam ja nga ai raitim, wenyi lam hta si chye nga ma ai.

Ngai hta hkum tsup wa na ahkyak dik ai lit magam langai nga ai. Shinggyim masha yawng hpe asak ningnan de wenyi nnan hte galai shang shangun na. Ngai hpe garum na matu shaga la hkrum ai ni gaw htingnut mat ai lam n nga ai sha, kalang lata shakut hkan nang ra ai.

Si mat sai ni hpe lup makoi mayam ai gaw shinggyim nau na myit hte mai kaja ai magam lit rai nga ai. Rai ti mung, shinggyim masha ni hpe sumsing mungdan de woi shang nna htani htana asak hte sak hkrung na gaw hkyak hkyak ra ahkyak nga ai, hpe tsun ai rai nga ai.

“Yesu gaw, na htai jum nna hpang de kayin yu ai wa kadai mung, Karai Kasang a Mungdan hte n ging dan nga ai, ngu nna masum ngu na wa hpe tsun ai (Lk 9:62).

Ndai ga shadawn hte sharin shaga ai hpe hkauna galaw yu ai ni gaw asan sha chye na na ma ai. Karai Kasang a mungdan gaw gap ai hta Yesu a hpang hkan ai ni ndai mungkan ga hte seng ai kaga bungli ni hta myit bra hkawm nga ai rai yang gaw Karai Kasang shanhte hpe ap jaw da ai lit magam ni hpe hprai na rai nga ai.

Ndai laban na anhte hkam la na ahkyak ai sharin shga ai lam ni

Yaweh Karai Kasang gaw Myihtoi Eliah si mat jang shi a hkinghtawng hte lit magam hpe dagraw na wa langai hpe lata na matu shi hpe matsun let lam madun ya ai.

Nawku hpung labau hta shawng na Hkristan ni kaw nna ya du hkra nawku hpung a lit magam hpe lahpa galai gun hpai na ni hpe prat hte prat rai nna saw shaga shapan shalat, lata san lai wa ai.

Wenyi shadum jahprang ya ai a marang e, lata la hkrum ai Myihtoi Elisha gaw lai sai ten na kun dinghku nta masha ni hte madu da sutgan ni yawng hpe kau da let shaga la hkrum ai lam hta Karai Kasang a mungdan chyam bra wa hkra htuk manu ai hte tsawm htap ai mahkrum lam hta hkawm sa ai.

Nawku Hpung kata shaga la hkrum ai ni mung Karai Kasng a mungdan chyam bra wa na matu Madu Yesu a hpang htep lahti hkan nang ra ai.

Yesu Madu gaw mungkan ja sutgan madu ai lam hpe kachyi mi pyi myit n dun ai. Shi hta madu ai lam mung lamu ga lahkam mi pyi n nga ai. Baw jahkrat na shara pyi n lu ai, ngu shi hkum nan tsun da ai.

Hpung a ningbaw ningla tai mayu ai ni hte shingdep shingtau tai ai ni hta nga ra ai myit masa hte kyang lailen sat lawat ni a lam 1Tim 3:1-13 hta San Pawlu shadum da ai.

Kabu Gara Shiga gat hkai ai ni a ahkyak madung hte yawng a shawng kaw tawn nna galaw ra ai lit magam gaw Kabu Gara Shiga hpe shachyam shabra na lam rai nga ai. Tinang hkum nan dai Kabu Gara Shiga hte maren sak hkrung, hkaw tsun nna shachyam shabra ra ai.

Karai mungga gun ai ni gaw, galoi mung, shawng lawt ai ni rai ra ai

Chyum daw lahkawng gaw san Pawlu Galati hpung masha ni hpang de shagun dat ai laka hta na rai nga ai.

Kabu Gara Shiga hkaw tsun ai gaw tinang hkum nan a matu shakut ai nna akyu hkam la ai lam rai nga ai.

“Hkristu gaw anhte hpe mayam kaw nna shalawt dat mi ai rai nna, anhte mayam n rai saga ai. Dai re majaw shanglawt masha ni re ai hku nna tsap nga ga ai. Mayam a kandang npu e bai hkum ahkang nga masa,” (Gal 5:1).

“Anhte Wenyi hta asak hkrung nga ga yang gaw, dai Wenyi e woi awn lam matsun madun ai hte maren hkawm sa nga ga,” (Gal 5:25).

Akyu hpyi saga

Wa Karai Kasang e, Kabu Gara Shiga gat hkai shachyam shabra ai hta dingbai dingna jaw pat shingdang ya ai gawng ba rai dum ai myit ni hte kaga n hkru n kaja ai lailen ni hpe koi gam kau lu na hte, mungkan ja sutgan ni hpe myit maju n jung u ga; Wenyi a lam woi ai hta sha myit jung ai hte sharawng awng ai myit masa anhte hta jaw bang ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw Pranwan Ladaw hta (13) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) – 3Hk.Hk 19:16, 19-21

Chyum Mungga Daw (2) – Gal 5:1, 13-18

Kabu Gara Shiga – Lk 9:51-62

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.