Laban Mungga - Paska Poi Laban, C, 2022

Paska Poi Laban, C, 2022

          Hkristu hta tsaw ra ai nu wa hpu nau ni e, ndai laban gaw Madu Yesu bai hkrung rawt ai Paska poi laban rai nga ai.

Hkrung rawt sai Madu Yesu a Poi gaw, anhte ni kahtap kahtap nna tsun nga ga ai, nawku daw jau shaning a ahkyak dik kri madung langai rai nga ai.

Yesu Madu a Awng Padang rai nga ai “bai hkrung rawt ai lam” gaw mungsung ga sung langai rai nna, shadawn n dang kabu pyaw na matu anhte hpe saw shaga nga ai.

“Daini na nhtoi gaw dai Madu a awng padang lu ai shani rai nga ai, anhte kabu gara nga let, masat poi galaw nga ga ai,” (Sh.K.Kd 118:24).

Yesu Madu a bai hkrung rawt ai lam gaw htam lahkawng kahtap awng dang ai lam rai nga ai. (1) Si ai kaw nna bai hkrawng rawt ai gaw shi hkum nan a matu awng dang ai lam rai nga ai. (2) Anhte marai hkum shagu a matu mung awng dang ai lam rai nga ai.

Shawng ningnan, anhte hpe mara a marang e si hkrung si htan kaw nna wenyi ningnan de galai shang wa shangun ai. Dai hpang, Kawa Karai Kasang a lata hta si wa ai shaloi, anhte hpe htani htana asak hte jahkrung sharawt ya ai.

“Madu a tsaw ra myit gaw anhte a matu kaba nga ai, shi a sadi sahka gaw htani htana prat dingsa agrin nga ai,” (Sh.K.Kd 117:2).

Kawa Karai Kasang gaw Kasha Yesu bai hkrung rawt ai a marang e, Shi a htani htana wenyi asak hpe jaw bang ya ai hta grau htoi tu ai nhtoi shingkang n nga sai.

Bai hkrung rawt ai Hkristu gaw anhte prat a matu nhtoi rai nga ai

Paska wan shadaw kaba hpe masum lang tup, “Hkristu a nhtoi shingkang anhte hta htoi tu wa sai,” ngu woi awn ai jau mahkawn hte ndau ya ai shaloi, “Karai Kasang hpe chyeju dum nga ga ai,” ngu hpung shawa masha ni, kabu gara let bai htan ai.

Dai hapng tara tau ni gaw hpung masha ni hpang wan shatu ya ai. Nawku htingnu kata laklai nhtoi shingkang htoi tu nga ai. Ndai gaw Hkristan ni bai hkrung rawt sai Hkristu a nhtoi hte anhte a prat hta nhtoi tu nga ra ai hpe chye na lu ga ai.

San Yawhan a Kabu Gara Shiga Laika hta, nhtoi hte nsin a shai hkat ai lam hpe hkring hkring tsun dan da ai. San Yawhan a matu nhtoi gaw kaja ai lam hte seng ai rai nna, “asak” ngu ai gaw galoi mung kaja ai, masha shagu a matu shadawn n ma nga nga ai asak Madu npawt ninghpang Karai kasang hpe tsun ai rai nga ai.

Nsin chyawm gaw n kaja ai, si hkrung si htan lam, grau nna, n kaja ai lam yawng a npawt madu rai nga ai satan hpe tsun ai rai nga ai.

San Yawhan tsun ai nhtoi hte nsin gaw anhte a myi hte mu mada hkam sha lu ai nhtoi hte nsin hta grau ai hpe tsun ai rai nga ai.

Ga sadi run ai Yuda Iscariot gaw Yesu Madu hpe dut sha na matu maw mawn nga ai. Dai aten gaw shana aten rai nga ai, ngu Yawhan ka da nga ai (Yh 13:30). Satan gaw Yuda Iscariot hpe gunglau kau sai rai nga ai.

Laban Nhtoi

“Laban jahtawt nhtoi garai nhtoi lu yang, Magdalena Maria gaw jau jau e lup de sa wa ai rai nna, lup chyinghka pat da ai nlung sit mat nga ai hpe mu wu ai,” (Yh 20:1).

Yesu Madu gaw laban shani bai hkrung rawt ai rai nna, shi a sape ni hpe mung dai shani dan dan ai rai nga ai.

“Shaloi Karai Kasang gaw, nhtoi tai u ga, ngu yang, nhtoi pru wa nga ai. Karai Kasang mung dai hpe shi mu nna awng sharwng nga ai. Dai hpang shi gaw nhtoi hpe nsin kaw nna ginhka karan kau wu ai. Shi gaw nhtoi hpe, shani, nsin hpe shana, ngu nna shamying wu ai. Shana gaw lai wa nna jahpawt du nga sai, dai gaw langai ya nhtoi rai nga sai,” (Np.Nhp 1:3-5).

Yuda masha ni a matu, Yesu Madu hkrung rawt ai nhtoi gaw shawng shani rai nga ai laban nhtoi hta nan rai nga ai. Anhte Hkristan ni gaw ndai nhtoi hpe “Laban nhtoi, Karai Kasang a nhtoi” ngu shamying ga ai hte bat mi na nhtoi ni hta ahkyak dik nhtoi rai nga ai.

Hkristu si hkam nna bai hkrung rawt ai lam hte anhte a kashin kamun hkam ai shaloi mara hta na shalawt ya let htani htana asak ningnan hte sak hkrung lu saga ai gaw Paska poi hta shang lawm lu ai hpan da lam ningnan rai nga ai.

Hpan da lam ngut ai shaloi, n-gawn tawa ting hta kaja ai lam yawng gaw nhtoi kaw nna sa wa ai rai nna, wenyi asak hte dai kaw nna pru wa ai mara dat hkyamsa lam, ngwi pyaw simsa lam ni gaw Yesu Madu a bai hkrung rawt ai chyeju hka shi kaw nna lwi hkrat wa ai. Bai hkrung rawt ai lam n nga ai rai yang shawg de tsun dan mat sai chyeju lam ni pru wa na n rai nga ai.

Nhtoi a marang e, anhte ni arung arai ni hpe asan sha mu lu ga ai zawn, Yesu Madu a bai hkrung rawt ai gaw Madu asak hte si hkam ai lam, hkaw matsun sharin shaga ai lam yawng, mungkan ntsa naw nga ten galaw lai wa sai lam ni yawng, grau nna, nni nkri hte si hkam ai lam hpe chye na shangun ai kri madung zaw rai nga ai.

Yesu Madu a bai hkrung rawt ai a marang e anhte hkum nan sak prat lachyum hpe chye na lu ai. Karai Kasang gaw anhte hpe shi a kasha ni shatai la ai a marang e, Shi a matsan dum lama ai hpe prat tup hta myit lawm shangun ai.

Shinggyim masha ni koi yen taw ai nni nkri lam hte si hkam ai lam zawn re ai ap nawng daw jau magam ni hta kabu gara myit dik myit pyaw sadi dung let hkap la na matu karum ya ai. “Daini na nhtoi gaw anhte kabu gara let masat poi galaw nga ga ai,” (Shk.kd 118:24).

Bai hkrung rawt ai Hkristu hta kam sham ai lam gaw anhte a shani shagu prat hpe grau ai nhtoi hte jahtoi ya ai

Hkrung rawt sai Hkristu hta kam sham ai gaw kalang marang sha lu la ai raitim, dai lu la ai hpe galoi n shamat kau na matu mahkawng da ai gumhpraw, ta lachyawp, kachyi zawn re ai sut gan n re ai. Bai hkrung rawt ai Hkristu hta kam sham ai gaw sak rawng ai rai nna, teng man asak rai nga ai majaw galoi mung n si ai sha lani hte lani grau rawt jat wa lu ai.

Nhtoi hte shadawn nna tsun ga nga yang, anhte a bai hkrung rawt ai Hkristu hta kam sham ai gaw jahpawt nhtoi htoi hpang ai kaw nna shana nsin sin hpang ten du hkra htoi ai nhtoi rai nga ai.

Rai ti mung, Jan a nhtoi hta grau ai rai nga ai. Jan a nhtoi hte sha hkrak shingdaw yang gaw Karai Kasang a nhtoi a lachyum yawm mat na rai nga ai. Karai Kasang a nhtoi gaw jan shang ai ngu n nga ai.

Hkristu hta kam sham ai nhtoi gaw masha hkum shagu kaw laklai laksan hku, lam amyu myu hte du shang wa ai.

Maria Madelena, Yesu a lup hkuwat hpe pat da ai nlung hpaw malang nga ai hpe mu ai majaw Petru hte Yawhan, kasa ni hpang de gat wa nna, Madu a hkum tsawp hpe lagu masam ai ngu tsun dan ai. Shi gaw n lu lu hkra sagawn nna mabyin masa hpe hkrak chye la lu ai. Shi a myit masin salum hta nhtoi hte myit pyaw ai lam hpring rai nna, Shi hpe Yesu “Maria” ngu shaga ai shaloi, Madu re ai hpe mu chye wa ai.

Yesu a lup kaw Yesu Madu a hkum tsawp hpe hkayawp da ai sumpan shara mi kaw atsawm sha katsu taw ai hpe mu ai Yawhan a myit masin salum hta nhtoi hte hpring rai wa ai. Shi hkum nan anhte hpe tsun ai gaw, “Dai hpang mi lup de shawng du taw nga ai dai kaga sape mung hkan shang wa nna, mu lu ai hte kam sham wu ai,” (Yh 20:8).

San Petru a masin salum nsin kaw nna nhtoi de bai du lu na matu kaga ni hta loi grau na ai hpe mu lu ai. Kalang marang, Yesu Madu gaw shi hpang de, shani aten sa du dam ai. Yesu Madu nni nkri garai n hkam shi yang shana aten masum lang tup shi hpe nyet kau ai Petru hpe si mani ai hku tsun shaga sharin shaga ya ai gaw Petru a matu chyeju kaba la nga ai.

Yesu Madu gaw, mungkan masha yawng hpe matut manoi rai, shi hta kam sham wa na nhtoi jaw ya nga ai. Anhte langai hpra hpe saw shaga nga ai. Bai hkrung rawt ai Madu Yesu hpe kam sham ai lam gaw masha shagu lu la na n rai nga ai; dai gaw “Madu hkum nan a laklai kumhpa rai nga ai. Dai kumhpa hpe manu shadan shatsaw ai gaw anhte loi loi hte hkap la lu hkra Yesu Madu gaw anhte marai hkum shagu a matu shi a shi masan sa loi dik ai lam Yesu lajang da ai rai nga ai.

Tsaw ra ai lam gaw Yesu Madu hta kam sham ai lam de woi sa ai. Maria Madelana gaw Yesu Madu a hkum tsawp hpe sari nga ai hku makoi mayang lu na, n lu na, myit tsang lai wa ai. Yesu Madu shi a mying hpe shaga ai shaloi dai lam ni hpe mung dum shai wa lu ai.

Yawhan gaw Yesu Madu hpe grai tsaw ra ai majaw lup kata de shang ai shaloi, teng sha bai hkrung rawt ai mabyin re ai hpe chye wa ai (Yh 20:8). Hka nawng kaw na mabyin hta mung matsing wa ai, dum chye wa ai (Yh 21:7).

Tsun mayu ai gaw, bai hkrung rawt sai Hkristu hta kam sham ai chyeju, kadai hta mung n gingdan ga ai raitim, tinang hkum nan a matu mung, ni htep ai ni a matu mung Yesu Madu gaw shi Madu hte hkye la Madu hku hkap la lu na matu anhte hpe nhtoi jahtoi ya ai.

Chyum daw langai hta na Cornelius (koneli) a lam gaw anhte tsun ai lam yawng a sakse rai nga ai. Cornelius gaw hpyen du rai nna, tara maigan masha mung rai nga ai. Raitim, myit sharawng shara rai nna, tsaw ra matsan dum lama myit kaba ai wa mung rai nga ai. Petru gaw shi hpe sharin shaga nna nhtoi jaw ya ai. Dai nhtoi gaw, wenyi yu hkrat wa ai shaloi, nhtoi htoi tu ai wan shinglet zawn rai nna, kashin kamun n hkam la shi ai shaloi, shi hte shi a nta masha ni a ntsa yu hkrat wa ai.

Bai hkrung rawt ai Hkristu hta kam sham ai gaw shani shagu Madu hte hkrum lu na matu n-gun hte ahkaw ahkang rai nga ai.

“Messaiah gaw shi a hpung shingkang hta garai n shang ningngai yang, shing re ai nni nkri hpe hkam ra ai n rai ni, ngu nna Madu tsun ai,” (Lk 24:26). Anhte gaw hpang jahtum nhtoi hta si mat wa ai shaloi, Yesu Madu hkum nan hpe htoi kabrin ai hku mu lu na rai nga ai lam 1Yh 3:2 hta, “Tsaw ra ai ni e, anhte ya e Karai Kasang a kashu kasha ni rai nga ga ai, raitim, hpang de anhte hpa mi tai na danleng hkra garai n chye lu ga ai: rai ti mung, Hkristu dan pru ai shaloi anhte shi hte bung na ga ai, hpa majaw nga yang shi nan teng teng rai nga ai hpe dai myit mada shara lu ai masha shagu gaw, Hkristu nan chyoi pra nga ai hte maren tinang hkum hpe mung shachyoi shapra da nga ai,” ngu San Yawhan sakse hkam sharin shaga da ai.

Dai shani gaw galoi mung nga nga na ra ai laban nhtoi rai nga ai. Dai nhtoi hta hpang ai bai hkrung rawt ai Hkristu gaw anhte a nhtoi, anhte a kabu pyaw lam, anhte a htani htana asak rai nga ai.

Akyu hpyi saga

Wa Karai Kasang e, Ndai Paska ladaw hta Nang Madu a bai hkrung rawt ai mungsung lam ni hpe myit sumru chyeju hkam la let hpu nau ni hpe mung garan gachyan sa wa lu na chyeju jaw ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban gaw Paska ladaw hta (1) ngu na Paska poi laban rai nga ai.

Hti ang ai Ja Chyum Mungga ni gaw

Chyum Mungga Daw (1) Kasa 10:34, 37-43

Chyum Mungga Daw (2) Kol 3:1-4

Kabu Gara Shiga Yh 20:1-9

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.