Laban Mungga -Paska Ladaw (5), C, 2022 ( Hkristu Ra Sharawng Ai Hkristan Wuhpung Ni)

Paska Ladaw (5), C, 2022

Hkristu Ra Sharawng Ai Hkristan Wuhpung Ni

          Hkristu hta tsaw ra ai nu wa hpu nau ni e, ndai laban gaw (5) ngu na Paska ladaw laban rai nga ai.

Chyum Laika Sang lang daw

Lai wa sai laban hta madung sumru ai lam lahkawng gaw (1) Yesu Madu gaw Nawku Hpung ting hta dam lada ai hku, kasang karang/kawang rai nga nga ai, (2) Madu gaw Hkristan wuhpung hta kasang kabrang rai myit tsang lawm ya nga ai, ngu ai lam rai nga ai.

San Pawlu hte Barnerba yan a shawng lang na sasana hkrunlam hta kabu pyaw ai lam hte jam jau ai lam ni

Chyum daw langai gaw San Pawlu a shawng lang na sasana hkrunlam hte shangut da ai. Kasa 13-14 gaw sasana hkrun lam hta byin lai wa ai mabyin, Antioch kaw nna hpang nna Antioch de bai htang wa ai ten du hkra tara mungga hkaw tsun na matu shangun dat hkrum ai lam rai nga ai.

Sasana hkrunlam gaw mali ning daram na lai wa ai. Shan gaw shawng e Seluki, dai hpang Kupru zinglawng, dai hpang Salami mare ni hta du hkawm let tara hkaw ngut ai hpang du hkawm ai mare shagu ni hta Hkristan wuhpung ni hpe gaw de lai wa ma ai.

Shanhte hpang jahtum du ai Lustra mare hta San Pawlu, shi a prat hta n hkrum lai wa yu ai lam n mai hkawm lagaw lata si ai wa hte hkrum ai shaloi Ai jan rai rawt tsap u, nga nna tsun let shamai ya ai (Kasa 14:8-10).

Ndai lamik kumla hpe mu ai, tara lam n nga ai ni gaw San Pawlu hte Barnarba hpe sumsing lamu na du sa ai Karai Kasang ngu shadu nna shan hpe laklai hkikhkam ai nhtoi hta dusat hte wan nat hkungga nawng jau na matu lajang wa ma ai. Dai hpe yak yak hkak hkak rai nna jahkring da lai wa ra ma ai.

Hpang daw hta mung, shan a hpang kaw hkan let jahtep tam ai Yuda salang ni a woi maw ai hta kadawng bang ai shawa masha ni San Pawlu hpe mare shinggan de gang garawt shaprawt nna nlung hte kabai sat ma ai. Nlung kachyi kajaw hte sha n re ai; law law hte lang hte lang rai nna si sai ngu shadu ai ten du hkra kabai nna hpang de byin wa na mang hkang hpe hkrit ma ai majaw pru mat ma ai.

San Pawlu si sai ngu htang da ai shawa masha ni, shi hpe bai mu ai shaloi mau ma ai. Ana dam law law hte rai tim, ngang kang ai myit daw dan lam hte Derbe mare de matut sa nna kaga Hkristan wuhpung ningnan hpe bai gaw de da ya ai. San Pawlu hte San Barnarba gaw dai Derbe mare kaw nna Antioch mare de bai htang wa ma ai rai nga ai.

San Pawlu, shi gaw de da ya ai Hkristan wuhpung ni hpe ndai sharin shaga lam ni hte sharin shaga da ai. (1) Makam masham hta matut manoi shangang shakang rawt jat wa na matu hte Karai Kasang gaw shanhte hpe Hkristu a hpang hkan na matu shaga la hkrum ai hpe myit sumru chyeju dum na matu, (2) San Pawlu n nga ang ai shaloi raitim, kaga Hkristan masha ni hpe woi na hpa-awn ni hpe lata san da na matu, (3) Hkristan ningnan tai wa ai ni gaw matsan jam jau yak hkak lam ni hte zingri zingrat hkrum ai gaw Hkristan prat hta hkrum ang ai lam ni rai nna, Hkristu hkum nan ndai mungkan hta hkrum lai wa ai teng man jaw ang ai lam masat rai wa ai hpe myit dum na matu ni rai nga ai.

“Anhte gaw Karai Kasang a mungdan hta shang na matu ru yak jam jau law law hpe hkrum hkra lai di kau ra ga ai,” (Kasa 14:22) ngu tsun let dai makam masham hta ngang kang grin nga na matu San Pawlu hte Barnaba yan n-gun jaw shadum jahprang ma ai.

Antioch kaw nna mali ning sasana hkrunlam hta (1) awng dang ai lam ni yawng gaw shan a ngu na hta Karai Kasang a lam woi garum ya ai a majaw re ai lam, (2) Karai Kasang gaw Yuda myusha ni hte rau shinggyim masha yawng hpe hkye hkrang la lam de saw shaga nga ai lam hkaw tsun ma ai. Karai Kasang gaw shara shagu na masha ni hta na shinggyim num sha, la sha yawng hpe maren mara tsaw ra wu ai majaw rai nga ai.

Mara hta na lawt lu ai majaw myit tsang lam n nga ai Nawku Hpung

Chyum mungga daw lahkawng gaw ndai lam hte seng nna tsun da nga ai. Sumsing mungdan du magang ra ai Nawku Hpung hpe tsun ai rai nga ai. Shinggyim masha langai a matu sumsing mungdan lam sumru na gaw yak na teng ai. Chyum daw lahkawng hta San Yawhan a shingran laika hta sumsing mungdan na Hkristan langai, shing n rai, Nawku Hpung ting a lam hpe sang lang da ai.

Mungkan lamu ga hte pang lai mat mat na lam hte tsun hpang ai (Shingran 21:1). Sumsing mungdan hta gaw mara, shing n rai, n kaja ai lam hpa n nga ai hpe tsun ai rai nga ai. Shingran Laika hta na mungkan lamu ga gaw mara hte seng ai rai nna, panglai gaw Satan hte seng ai hpe tsun ai rai nga ai.

Moi shawng na jiwoi jiwa ni gaw Satan hpe panglai kata hta nga ai hkrit hpa kaba dik dusat langai ngai zawn re ai ngu hkam la ma ai (Yoba 7:12; shingran 13:1).

Mara ngu ai mat mat jang gaw mara a majaw byin wa chye ai machyi makawp ai, yawn hkyen ai, grau nna gaw, si hkrung si htan lam mat mat sana rai nga ai. Myihtoi Isaiah 8:8 hpe lakap nna Yawhan gaw, Karai Kasang shi a nta de bai wa ai kashu kasha ni a myipri hpe katsut kau ya ai zawn sumsing mungdan de du ai ni a myipri hpe mung katsut kau ya na ra ai, ngu tsun da ai.

Dinghta ga hta gaw mara hta na kadai mung n lawt ai. Raitim, sumsing mundan du ai shaloi, shinggyim masha ni yawng a masin salum ni gaw mara kaji kajaw kaw na hkawt kashin kau ya hkrum sana. Kashu kasha yawng gaw jasan jaseng ai hkrum sai rai nna, Hkristan langai hpra gaw htoi tu ai nhprang sut rai zawn, Nawku Hpung gaw hkungran matut maw ai num ningnan zawn mawn sumli da na ra ai. Shaloi Hkristu gaw nawku hpung hpe, la ningnan gaw num ningnan hpe tsaw ra ai hta grau ai, tsaw ra myit hte tsaw ra na ra ai.

Israel myusha ni hte Karai Kasang tawn da ai myit hkrum ga shaka zawn (Pru Mat Wa Ai 24) Hkistu Madu gaw Karai Kasang hte shinggyim masha ni lapran dai ga shaka hpe shagrin da na ra ai. Dai kumla mung rai nga ai. Wudang ntsa shi a sai hte myit hkrum ga shaka lakmat htu da ai rai nga ai. Masha hkum shagu hpe gaw Madu hta kam sham ai makam hte shagrin da ya ai. Shingrai, anhte gaw “Karai Kasang a myusha ni” tai wa ga ai (Jaw Jau 26:12).

Myihtoi Isaiah hkaw da ai “Emanuel” ngu ai Karai Kasang anhte hte rau nga nga ai (Yk 7:14). Ndai makam mung hkum tsup wa ai.  Shaloi Karai Kasang hpe n jasum sana ga ai. Karai a nta rai nga ai sumsing mungdan gaw anhte a htani htana dum nta tai wa ai (Shingran 21:3).

Tsaw ra myit langai chyu sha anhte hpe sumsing mungdan hte grin dan shangun ai

Kabu Gara Shiga hta, Yesu Madu gaw anhte hpe mau hpa galai shai lam tsun dan da ai. Shada tsaw ra ai a marang e mau hpa galai shai lam hpe mu tam la na, ngu ai rai nga ai. Kaga lam n nga sai.

Hpang jahtum daw sha poi hta, Yesu Madu gaw kasa ni hte ni ni htep htep hku hku hkau hkau tsun shaga na matu Yuda Isacarot pru mat ai aten du hkra hkam sharang let ala lai wa ai. Dun nta hta ahkyak ai ga tsun na rai yang tsasam masha pru mat ai hpang she aten la nna tsun chye ra ga ai.

Yesu Madu asak ap nawng kau na aten du sai hpe chye da wu ai. Shi a kasa ni hpe hpang jahtum du hkra tsaw ra wu ai ngu San Yawhan ka da ai (Yh 13:1). Lachyum gaw Madu gaw shanhte hpe dai hta grau ai tsaw ra na lam kaga n nga sai hpe tsun ai rai nga ai.

Yesu Madu gaw kasa ni hpe, “Ngai sha ni e,” (Yh 13:33) ngu shaga ai gaw kaga Kabu Gara Shiga chyum laika hta n na yu ai kasa ni hpe shaga ai ga rai nga ai.

“Shada da tsaw ra nga mu, ngu nna tara ningnan ngai nanhte hpe jaw made ai. Ngai nanhte hpe tsaw ra made ai zawn, nanhte mung shada da tsaw ra nga lu na rai myit dai,” (Yh 13:34).

Ndai gaw Yesu Madu a ahkyak dik tara rai nga ai. Tara ningnan, shing n rai, shingjawng hpa n nga ai hkan shatup ra ai lam rai nga ai.

“Ni htep ai ni hpe tinang hkum hte maren tsaw ra u,” (Jaw Jau 19:18). “Myihtoi ni a sharin shaga ai lam ni a npawt madung rai nga ai,” (Mt 22:40).

Karai Kasng tsaw ra ai zawn tsaw ra chye ra ai. Hkum hkrang myit marai atsam nga manga hte tsaw ra ai lam rai nga ai. Kadai hpe rai tim tsaw ra ai lam rai nga ai. Tsaw ra na gaw Karai Kasang a bungli rai nga ai. Anhte mung dai hte maren tsaw ra nga ga ai kun?

Karai Kasang sharawng awng ai Hkristan Nawku Hpung

1. Kashin kamun hkam la ai shaloi, Kabu Gara Shiga hte maren sak hkrung na matu Hkristu Madu jaw da ai ga sadi hte gaw de da ai kam sham ai ni rai ra ai.
2. Antioch mare na nawku hpung zawn sasana galaw ai nawku hpung rai ra ai. Kabu gara lam jaw ai shiga hpe shachyam shabra na myit masin rawng ra ai. Hkristu hta kam sham ai ngu ai manu daw dan n lu ai sut rai hpe zawn kaga masha ni hpe garan jaw na ahkaw ahkang hpe n mai tat shamat kau ai. Lani hte lani, anhte gaw kaga buga ni de sasana galaw ai sasana magam gun ni hpe grau grau shangun dat lu na myit mada ra ai.
3. Ginlum kahkyin gumdin ai Nawku Hpung; Hkristu gaw langai hte langai n ru n ra byin nga ai shara kaw pyaw pyaw rai nga lu n n rai. Myit hkrum ginlum kahkyin gumding ai gaw kaba dik sut gan rai nna, shada da tsaw ra let kaga masha ni hpe mung makam masham hta woi la ra ai; sak jaw ap nawng ra ai.
4. Buga madang hta nga ai Nawku Hpung mung ginlum kahkyin gumdin ai Nawku Hpung rai ra ai. Kabu Gara Shiga shachyam shabra ai hta myit hkrum mang rum atsam dat rau sha shang lawm ra ai. Myit kraw kata kaw nna nan ginlum kahkyin gumdin ra ai. Kabu pyaw ten hta rai tim, matsan mayan rai yak hkak jam jau ten hta rai tim shada garum shingtau hkat ra ai.
5. Atsam marai rawng nna kabu pyaw ai Nawku Hpung rai nga ra ai. Myit rawt let asharawng ashara rai, galoi mung asum n jaw ai, nawku hpung tai nga ra ai. Hkristu Madu a dum nta, Karai Kasang a dum nta, sumsing mungdan de rau hkawm sa ai Nawku Hpung tai nga ra ai.

Akyu hpyi saga

Wa Karai Kasang e, Catholic ngu ai University Church, n-gawn tawa hte seng ai Nawku Hpung hta ginlum kahkyin gumdin let sasana magam gun sumsing sut gan hkam la lu na chyeju atsam jaw ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra ai hkung ga ai kanu kawa Tarahkaw sara/num ni hte nu wa hpu nau ni e, ndai laban gaw Paska Ladaw hta (5) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) Kasa 14:21-27

Chyum Mungga Daw (2) Shingran 21:1-5

Kabu Gara Shiga Yh 13:31-35

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.