Laban Mungga -Myit Malai Ai Lam ( Lusha Gam Ladaw ( III ) ),C, 2022

Lusha Gam Ladaw (3), C, 2022

Pru Mat Wa Ai 3:1-8, 13-15   1Kor 1: 1-6, 10-12        Lk 13:1-9

Myit Malai Ai Lam

  Hkristu hta tsaw ra ai nu wa hpu nau ni e, ndai laban gaw Lusha Gam Ladaw hta (3) ngu na laban rai nga ai.

Karai Kasang gaw anhte hpe lit magam langai ngai hte rau saw shaga ai. Anhte a hkye la hkrum na lam, shing n rai, hten run mat na lam gaw Karai Kasang jaw ai lit magam hpe gara hku gun hpai ai ngu ai hta madung hkan wa na rai nga ai.

Karai Kasang gaw Shi a myusha ni hpe mayam prat kaw nna shalawt ya na matu Mawshe hpe saga la ai

Mawshe ma chyangai naw rai yang, Hparol hkawhkam a kasha e hka hkinggau kaw na sai la nna bau kaba da hkrum ai majaw hkawhkam wang kata hta sak kung kaba wa lu ai wa tai wa ai.

Asak kung gawng shingyan kaba wa nna arawng aya kaba hpe hkam la lu ai raitim, shi mung mayam myusha langai rai nga ai hpe sai kaw nna nan dum chye nga ai majaw shi a myusha ni mayam tai yam sha hkrum nga ai hpe galoi n malap ai.

Egutu hpyen la langai mi Yuda masha langai hpe zingri zingrat nga ai hpe mu ai shaloi, dai Egutu masha hpe sat kau mu ai. Ndai shiga masha law law chye mat ai majaw Mawshe shi a asak hpe hkye la na matu Midian mung ga de hprawng mat ra ai (Pru Mat Wa Ai 2:11-15).

Midian mungdan kaw sagu rem let dai mungdan na hkingjawng agyi Yehtru a shayi sha zihpura hte dinghku de nna nga ai (Pru Mat Wa Ai 2:16-22).

Ndai laban na chyum daw langai hta na mabyin gaw Mawshe, shi a katsa a sagu ni hpe rem nga yang Karai Kasang hte hkrum ai lam rai nga ai.

Karai Kasang wan chyi nga tim nhkru ai sumwum kaw na Mawshe hpe shaga ai (Pru Mat Wa Ai 3:2).

Ga shaka dingsa prat hta Karai Kasang gaw shinggyim masha ni hpe lam amyu myu hku, ladat amyu myu hte shadan dan let hkrum shaga ai hpe mu lu ai. Wan, nhtoi, lamu na summwi, nbung laru ni hte kaga lam ni hta dan dan chye ai.

Mawshe hpe nnan shadan dan ai gaw wan chyi tim n hkru mat ai sumwum kaw dan dan ai rai nga ai. De a lachyum gaw Karai Kasang a hpung dagu gaw galoi mung n yawm mat ai, ja nga ai raitim htum mat ngu n nga ai; Karai Kasang gaw htani htana Karai Kasang rai nga ai hpe madun ai rai nga ai.

Karai Kasang Mawshe hpe kyepdin raw shangun ai; makau de mung hkum sit sa na matu hkum pat da ai.

Ga shaka dingsat prat hta na masha ni gaw karai Kasang hpe n dum shami, n myit mada ai ten hkrum katut yang kalang lata si chye ai ngu hkam la lai wa ma ai. Karai Kasang gaw shi a hpung dagu hpe madun dan let shinggyim masha ni shi hpe hkrit hkungga lam hkam sha shangun ai gaw mungkan sumla hpara hpe nawku ai lam n galaw shangun mayu ai majaw rai nga ai.

Karai Kasang gaw Egutu mung hta mayam yam hkrum nga ai Shi a myusha ni hpe shalawt ya na matu Mawshe hpe shangun dat ai.

Ndai zawn shangun dat hkrum ai shaloi hkrit tsang ai majaw Mawshe lawt lam lahkawng hte bai htang ai. (1) Egutu masha langai hpe sat kau sai majaw shanhte ni shi hpe tam nga ai. (2) Grau nna gaw Karai Kasang jaw ai lit magam gaw shi hte gara hku mung n htuk ai lam rai nga ai. Karai Kasang hpe hkrit ai majaw mung, ap jaw ai lit magam hte seng nna n kung kyang ai majaw mung lawt ga tsun ai rai nga ai. Karai Kasang ra sharawng ai lit magam hpe gun hpai na atsam shi hta n nga ai majaw rai nga ai.

Karai Kasang gaw Mawshe hpe n-gun jaw ga tsun ai.

Karai Kasang gaw Mawshe hpe sat na matu hkan tam ai ni Egutu mung hta n nga sai lam tsun dan ai. Egutu hta mayam yam hkrum nga ai Israel myusha ni hpe hkye la ai hta ra wa yang jai lang na matu hpung dagu hpe jaw da ai. Ga shadawn-sumdoi hpe lapu shatai lu ai zawn dai lapu hpe sumdoi bai shatai lu ai. Ga tsun shaga ai hta atsam n nga ai, n chye shaga ai raitim,garum ya na matu kahpu Aaron hpe shingdep shingtau shatai ya ai.

Mawshe gaw Karai Kasang a amying shingteng a lachyum hpe san sagawn la ai.

Shi hpe shangun dat ai wa kadai re ai hpe atsawm sha tsun dan lu na matu san ai rai nga ai. “Ngai gaw ngai rai nga nngai” ngu Karai Kasang shi a mying hpe dai hku tsun dan matu Mawshe hpe hkang dat ai. Chye na yak ai mungsung rai nga ai. Hpa rai Karai Kasang na mying hpe chye mayu ai rai, ngai hpe masha ni myit da htang da ai zawn jum tep da lu na shadu ai i, ngai gaw htani htana sak hkrung ai Karai Kasang majing nan rai nngai, ngu ai lachyum rai nga ai.

Karai Kasang gaw Mawshe hpe shaga la ai zawn anhte marai hkum shagu hpe mung laksan shaga nga ai

Karai Kasang gaw anhte ni hpe kanu a hkritung kaw ma hkum tai wa ai aten kaw nna nan Shi a asak hte matut ya ai.

“Ngai hpe shangun dat ai nye Wa e shi hpe ngai hpang de lau la ai wa sha n rai yang gaw, kadai mung ngai hpang de sa lu na n rai, du sa ai wa hpe mung, hpang jahtum na nhtoi hta ngai sharawt la na we ai” (Yh 6:44).

Masha lahkawng hkrak bung ai langai sha re ai bungli lit magam hpe hkrak tup bung pre ai hku n galaw shatup lu ai. Karai Kasang gaw langai hpra a prat hta laksan re ai lit magam hpe masat nna jaw da ai. Gara mabyin lam raitim, ang katut bying wa ai n re ai; Karai Kasang gaw yawng hpe kata lam azing ayang lajang shachyip da ai.

Karai Kasang gaw anhte hpe matsan dum ai hte Hkristu hta kam sham shangun ai.

“Nye a amyu masha ni Egutu mung hta kade daram mazut ai hku sharu shatsang hkrum nga ma ai hpe ngai mu ni ai; shanhte a mayam hpareng ai a lata kaw na hkye la hkrum na matu hkrap sharung ai nsen ni hpe mung ngai na ni ai. Shanhte hkrum sha ai nni nki yawng a lam hpe ngai chye nngai; shanhte hpe Egutu masha ni a lata kaw na hkye hkrang la na hte Egutu mung kaw nna shanhte hpe woi shapraw wa nhtawm ya aten, Hkanan, Heti, Amori, Hperizi, Hiwi hte Yebusi masha ni nga ai dai dam lada rai nna sut su ngamu ngamai ai, ga sau kaja ni hte hpring ai mung de woi la na ngai du sa ring ngai,” (Pru Mat Wa Ai 3:7-8). Ndai gaw sumsing mungdan anhte kaw du shangun na lam rai nga ai.

Karai Kasang gaw anhte hkum nan a matu hte hpu nau ni a matu anhte marai hkum shagu hpe shaga ai.

Mawshe gaw masat sat ai hpang hprawng lawt sai ngu shi hkum a matu lawt lu sai ngu hkam sha lai wa ai. Raitim, masha ni hpe jam jau jaw ai gawng ba rai dum ai kaw nna lawt lu na gaw grau nna ahkyak nga ai. Shi a lawt lu ai lam gaw Egutu mung hta na hpunau ni a lawt lu na lam hte matut manoi nga ai.

Anhte a hkye hkrang la hkrum lam mung dai hte maren sha rai nga ai. Anhte hte rau nga rau pra ai ni a hkye hkrang la hkrum na matu ap nawng shakut ra ai.

Karai Kasang chyu sha anhte a ntsa ap jaw da ai lit magam hpe gun hpai lu na matu karum ya ai.

Anhte gaw tinang hkum hpe mung, kaga masha ni hpe mung hkye la na n mai byin ai. Karai Kasang chyu sha shinggyim masha ni hpe hkye hkrang la lu ai. Sumsing mungdan hkrun lam gaw Karai Kasang n lawm yang kaman sha rai nga ai. Raitim Karai Kasang jaw da ai lit magam hpe mung anhte shakut gun hpai ai, rai yang she dai hkye hkrang la lam hpe hkam la lu na ga ai.

Karai kasang ap jaw da ai lit magam hprai ai gaw anhte a matu hkrit tsang hpa rai nga ai

Shawng na Hkristan ni gaw kashin kamun hpe, “panglai hkyen hpe rap di ai” hte shingdaw shaga shamying lai wa ma ai. Israel myusha ni panglai hkyen hpe lai di nna lawt lu wa ai zawn Hkristan ni gaw kashin kamun hkam la ai a marang e mara hta na lawt lu ai, mara hpe kashin shatsai kau ya ai. Bai n shut kataw na matu mung shakut ra ai.

Ga sadi tawn da ai lamu ga de hkawm sa ai hkrun lam hta Karai Kasang gaw Israel myusha ni hpe mau hpa lusha, mana muk hpe jaw sha ai. Hka hpang gara ai shaloi mung, Mawshe hpe lungrawk kaw sumdoi hte gayat shangun nna san seng dik hka hpe jaw lu ya ai. San Pawlu gaw Lungrawk hte Hkristu hpe ga shadawn hte shabung da ai (Rom 10:4).

Hkristan ni gaw kashin kamun a marang e Hkristu hte nihtep ai hku pawng hpawng wa ai. Israel myusha ni hte Mawshe mung dai zawn pawng hpawng lai wa ma ai. Dai majaw, San Pawlu gaw “Mawshe hta kashin kamun hkam la ai,” ngu mung tsun da ai.

Hkristan ni gaw Kashin kamun a marang e mara a mayam prat kaw nna lawt lu ai. Dai zawn sha, Israel myusha ni mung panglai hkyen hpe rap lai ai a marang e Pharol hkawhkam a mayam prat kaw na lawt lu ma ai. Lamu na jahkrat ya ai mana muk hte lungrawk kaw na hka hpe lu sha lu ma ai.

San Pawlu matut tsun ai hta, Israel myusha ni a matu hpung dagu law law hpe mu lu ma ai raitim, shanhte a mara a majaw Israel myusha prat bang langai na ni gaw Karai Kasang ga sadi tawn da ai lamu ga hpe n mu lu, n shang lu ma ai. Hkristan ni mung, San Pawlu sadi jaw ai gaw, teng man Hkristan prat hta sak hkrung ai lam n nga yang gaw dai zawn rai na ra ai.

Kadai raitim, tinang hkum hpe chyu sha n mai kam hpa ai. Karai Kasang jaw da ai lit magam hpe gun hpai lu na matu gaw Shi jaw ya na n-gun atsam marai hpe ra kadawn ga ai. Shi hta kam sham let teng man shagrit shanem ai hte atsam dat ga ai rai yang Karai Kasang a karum shingtau ai hpe hkam la lu na ga ai.

Ndai lusha gam ladaw hta myit malai nna apu asi pu si na matu Karai Kasang anhte hpe shaga nga ai

Hkristu gaw anhte ni myit malai na matu saw shaga nga ai. Pilattu gaw grai n hkru ai wa rai nga ai. Masha nkau ni gaw nawku htingnu hta nawku daw jau lu na matu Galilee gingwang kaw nna Yerusalem de sa du ma ai. Pilattu gaw shi a hpyen ma ni hpe shangun dat nna dai nawku htingnu ni hta nawku daw jau ai ni hpe sat shangun lai wa ai.

Yesu Madu gaw anhte a prat hta apu asi pu si nga shangun mayu ai.

Anhte hkye hkrang la hkrum lu na matu n hkru n kaja ai lam hpe koi gam ai hte n ngut shi ai. Karai Kasang a man e, masha a man e, kaja ai apu asi pu si na naw ra ai.

Israel myusha ni hpe hpun hte shingdaw da ai. Karai Kasang gaw shanhte hpe lata la nna tsaw ra myit kaba hte lakawn lamawn makawp maga yu bau sin ya ai. Israel myusha ni hta na apu asi htam lahkawng hpe myit mada lai wa ai. Karai kasang a mai kaja ai tsaw ra ai kumla tai na matu hte aten ladaw gu jang Messaiah hpe hkap la nna kaga myusha ni hpe tsun dan sakse hkam na matu myit mada ai rai nga ai.

Israel myusha ni gaw Karai Kasang hpe lang hte lang myit htum shangun lai wa ma ai. Shanhte pu si gaw mara mahtang she rai ma ai. Karai Kasang gaw shanhte a matu shi a hpun hpe gawn lajang na shangun dat ai. Masum ning laman sasana galaw mungga hkaw matsun nna Messaiah madu hpe kam sham wa shangun nna apu asi law law pu si shangun ai.

Anhte hpe hkye hkrang la na matu Karai Kasang yaw sin da ai, hkang da ai hpe kabu gara let gun hpai nna Karai kasang a apu asi pu si nga ga. Nihtep ai ni a hkye hkrang la hkrum na hpe mung myit lawm hkum lawm ai hte tsaw ra apu asi pu si shangun ga.

Akyu hpyi saga

Wa Karai Kasang e, shut hpyi ai wa ngai hpe matsan dum la mi, ngai myit malai lu ni ai, ya kaw nna shut hpyi mara hpe koi yan kau lu na chyeju jaw ya rit.  Amen.

Hkristu hta tsaw ra ai hkung ga ai kanu kawa, Tara hkaw sara/num ni hte nu wa hpu nau ni e, ndai laban gaw Lusha Gam Ladaw hta (3) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) Pru Mat Wa Ai 3:1-8, 13-15/ Josiah 5:9A, 10-12

Chyum Mungga Daw (2) 1Kor 1: 1-6, 10-12 / 2Kor 5:17-21

Kabu Gara Shiga Lk 13:1-9 / Lk 15:1-3,11-32

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.